ਬਿਓਰੋ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ 5 ਮਹੀਨਿਆਂ ਦਾ ਸਮਾਂ ਬਚਿਆ ਹੈ, ਪਰ ਪੰਜਾਬ ਕਾਂਗਰਸ ਵਿੱਚ ਛਿੜਿਆ ਘਮਸਾਣ ਥੰਮਦਾ ਨਜ਼ਰ ਨਹੀਂ ਆ ਰਿਹਾ। ਚੰਡੀਗੜ੍ਹ ਪਹੁੰਚੇ ਪਾਰਟੀ ਇੰਚਾਰਜ ਹਰੀਸ਼ ਰਾਵਤ ਨੇ ਆਗੂਆਂ ਦੇ ਨਾਲ ਤਿੰਨ ਦਿਨਾਂ ਤੱਕ ਮੈਰਾਥਨ ਮੰਥਨ ਕੀਤਾ। ਇਸ ਦੌਰਾਨ ਉਹਨਾਂ ਨੇ ਕੈਪਟਨ, ਸਿੱਧੂ ਸਣੇ ਕਈ ਆਗੂਆਂ ਨਾਲ ਮੁਲਾਕਾਤ ਕੀਤੀ, ਪਰ ਕੋਈ ਨਤੀਜਾ ਨਹੀਂ ਨਿਕਲਿਆ। ਇਥੋਂ ਤੱਕ ਕਿ ਰਾਵਤ, ਕੈਪਟਨ-ਸਿੱਧੂ ਦੀ ਮੁਲਾਕਾਤ ਕਰਵਾਉਣ ਵਿੱਚ ਵੀ ਕਾਮਯਾਬ ਨਹੀਂ ਹੋਏ।
ਰਾਵਤ ਨੇ ਖੁਦ ਮੰਨਿਆ, ‘ਸਭ ਠੀਕ ਨਹੀਂ’
ਚੰਡੀਗੜ੍ਹ ਤੋਂ ਦੇਹਰਾਦੂਨ ਰਵਾਨਾ ਹੋਣ ਤੋਂ ਪਹਿਲਾਂ ਮੀਡੀਆ ਨਾਲ ਗੱਲ ਕਰਦੇ ਹੋਏ ਹਰੀਸ਼ ਰਾਵਤ ਨੇ ਖੁਦ ਮੰਨਿਆ ਕਿ ਪਾਰਟੀ ਵਿੱਚ ਸਭ ਕੁਝ ਠੀਕ ਨਹੀਂ ਹੈ। ਉਹਨਾਂ ਨੇ ਕਿਹਾ ਕਿ ਉਹ ਨਹੀਂ ਕਹਿ ਸਕਦੇ ਕਿ ਪੰਜਾਬ ਕਾਂਗਰਸ ਵਿੱਚ ਸਭ ‘ਆਲ ਇਜ਼ ਵੈੱਲ’ ਹੈ। ਹਾਲਾਂਕਿ ਉਹਨਾਂ ਕਿਹਾ ਕਿ ਮਤਭੇਦ ਦੂਰ ਕਰਨ ਦੀਆਂ ਕੋਸ਼ਿਸ਼ਾਂ ਜਾਰੀ ਹਨ, ਜਿਸਦਾ ਜਲਦ ਅਸਰ ਵੀ ਵਿਖੇਗਾ।
ਬਾਗੀ ਮੰਤਰੀਆਂ ਦੀ ਛੁੱਟੀ ਦੀ ਖ਼ਬਰ ਵੀ ਉੱਡੀ
ਹਰੀਸ਼ ਰਾਵਤ ਨੇ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਨਾਲ ਮੁਲਾਕਾਤ ਕੀਤੀ, ਤਾਂ ਮੀਡੀਆ ਵਿੱਚ ਚਰਚਾ ਸ਼ੁਰੂ ਹੋ ਗਈ ਕਿ ਦੋਵਾਂ ਵਿਚਾਲੇ ਕੈਬਨਿਟ ਫੇਰਬਦਲ ਨੂੰ ਲੈ ਕੇ ਵੀ ਚਰਚਾ ਹੋਈ ਹੈ। ਖ਼ਬਰਾਂ ਇਥੋਂ ਤੱਕ ਆਈਆਂ ਕਿ ਕੈਪਟਨ ਨੇ 4 ਵਿੱਚੋਂ 2 ਬਾਗੀ ਮੰਤਰੀਆਂ ਦੀ ਕੈਬਨਿਟ ‘ਚੋਂ ਛੁੱਟੀ ਦੀ ਗੱਲ ਹਰੀਸ਼ ਰਾਵਤ ਦੇ ਸਾਹਮਣੇ ਰੱਖੀ ਹੈ, ਜਿਸ ਨੂੰ ਰਾਵਤ ਨੇ ਇਹ ਕਹਿੰਦੇ ਹੋਏ ਠੁਕਰਾ ਦਿੱਤਾ ਕਿ ਇਸ ਨਾਲ ਪਾਰਟੀ ਵਿੱਚ ਠੀਕ ਸੰਦੇਸ਼ ਨਹੀਂ ਜਾਵੇਗਾ। ਹਾਲਾਂਕਿ ਬਾਅਦ ਵਿੱਚ ਕੈਪਟਨ ਅਤੇ ਰਾਵਤ ਦੋਵਾਂ ਨੇ ਅਜਿਹੀ ਕਿਸੇ ਚਰਚਾ ਤੋਂ ਇਨਕਾਰ ਕਰਦੇ ਹੋਏ ਫੇਰਬਦਲ ਦੀਆਂ ਖ਼ਬਰਾਂ ਦਾ ਸਿਰੇ ਤੋਂ ਖੰਡਨ ਕੀਤਾ।
Incorrect story. Issue of cabinet reshuffle was neither raised nor discussed at the meeting between @capt_amarinder & @harishrawatcmuk. So where’s the question of dropping or retaining any ministers? Any cabinet changes will happen at appropriate time after due consultation. 1/2 pic.twitter.com/NWzZoaM6pL
— Raveen Thukral (@RT_MediaAdvPBCM) September 2, 2021
ਹਰੀਸ਼ ਰਾਵਤ ਨੂੰ ਨਹੀਂ ਮਿਲੇ ਬਾਗੀ ਮੰਤਰੀ
ਹਰੀਸ਼ ਰਾਵਤ ਤਿੰਨ ਦਿਨਾਂ ਤੱਕ ਚੰਡੀਗੜ੍ਹ ਵਿੱਚ ਰਹੇ, ਪਰ ਇਸ ਦੌਰਾਨ ਉਹਨਾਂ ਨੇ ਕੈਪਟਨ ਖਿਲਾਫ਼ ਬਗਾਵਤ ਦਾ ਬਿਗੁਲ ਵਜਾਉਣ ਵਾਲੇ 4 ਮੰਤਰੀਆਂ ਨੇ ਉਹਨਾਂ ਨਾਲ ਮੁਲਾਕਾਤ ਨਹੀਂ ਕੀਤੀ। ਨਾ ਤਾਂ ਮੰਤਰੀਆਂ ਨੇ ਰਾਵਤ ਨੂੰ ਮਿਲਣ ਵਿੱਚ ਦਿਲਚਸਪੀ ਵਿਖਾਈ ਤੇ ਨਾ ਹੀ ਰਾਵਤ ਵੱਲੋਂ ਉਹਨਾਂ ਨੂੰ ਸੱਦਿਆ ਗਿਆ। ਜਦੋਂ ਰਾਵਤ ਤੋਂ ਇਸ ਬਾਰੇ ਸਵਾਲ ਕੀਤਾ ਗਿਆ, ਤਾਂ ਉਹਨਾਂ ਨੇ ਇੰਨਾ ਜ਼ਰੂਰ ਕਿਹਾ ਕਿ ਚੰਗਾ ਹੋਇਆ ਉਹ ਨਹੀਂ ਆਏ, ਕਿਉਂਕਿ ਜੇਕਰ ਉਹ ਆਉਂਦੇ ਤਾਂ ਸ਼ਾਇਦ ਮੀਡੀਆ ਉਹਨਾਂ ਦੇ ਦੌਰੇ ਨੂੰ ਸਿਰਫ਼ ਨਰਾਜ਼ ਮੰਤਰੀਆਂ ਤੱਕ ਹੀ ਸੀਮਤ ਕਰ ਦਿੰਦਾ।
ਹੁਣ ਹਾਈਕਮਾਂਡ ਨੂੰ ਰਿਪੋਰਟ ਸੌਂਪਣਗੇ ਰਾਵਤ
ਲੰਮੇਂ ਮੰਥਨ ਤੋਂ ਬਾਅਦ ਹੁਣ ਹਰੀਸ਼ ਰਾਵਤ ਜਲਦ ਹੀ ਕਾਂਗਰਸ ਹਾਈਕਮਾਂਡ ਨੂੰ ਆਪਣੀ ਰਿਪੋਰਟ ਸੌਂਪਣਗੇ। ਮੰਨਿਆ ਜਾ ਰਿਹਾ ਹੈ ਕਿ ਅਗਲੇ 2-3 ਦਿਨਾਂ ਵਿੱਚ ਉਹ ਦਿੱਲੀ ਜਾ ਕੇ ਸੋਨੀਆ ਗਾਂਧੀ ਨਾਲ ਮੁਲਾਕਾਤ ਕਰ ਸਕਦੇ ਹਨ।
ਸਿੱਧੂ ਨੂੰ ਨਹੀਂ ਮਿਲਿਆ ਹਾਈਕਮਾਂਡ ਤੋਂ ਵਕਤ
ਜਿਸ ਵੇਲੇ ਰਾਵਤ ਚੰਡੀਗੜ੍ਹ ਵਿੱਚ ਕਾਂਗਰਸ ਦਾ ਕਲੇਸ਼ ਸੁਲਝਾਉਣ ਦੀ ਕਵਾਇਦ ਵਿੱਚ ਲੱਗੇ ਸਨ, ਉਸੇ ਦੌਰਾਨ ਨਵਜੋਤ ਸਿੱਧੂ ਦਿੱਲੀ ਪਹੁੰਚ ਗਏ ਸਨ। ਦਰਅਸਲ, ਰਾਵਤ ਦੇ ਦੌਰੇ ਦੇ ਦੂਜੇ ਦਿਨ ਸਿੱਧੂ ਅਚਾਨਕ ਦਿੱਲੀ ਚਲੇ ਗਏ। ਪਹਿਲਾਂ ਖ਼ਬਰ ਆਈ ਕਿ ਉਹ ਪ੍ਰਿਅੰਕਾ ਗਾਂਧੀ ਨਾਲ ਮੁਲਾਕਾਤ ਕਰਨਗੇ, ਪਰ ਬਾਅਦ ਵਿੱਚ ਪਤਾ ਲੱਗਿਆ ਕਿ ਉਹਨਾਂ ਨੂੰ ਹਾਈਕਮਾਂਡ ਨਾਲ ਮੁਲਾਕਾਤ ਲਈ ਸਮਾਂ ਹੀ ਨਹੀਂ ਦਿੱਤਾ ਗਿਆ ਅਤੇ ਸਿੱਧੂ ਉਲਟੇ ਪੈਰ ਪੰਜਾਬ ਪਰਤ ਆਏ।
