ਜਲੰਧਰ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਆਮ ਆਦਮੀ ਪਾਰਟੀ ਤੋਂ ਬਾਅਦ ਹੁਣ ਕਾਂਗਰਸ ਦੀ ਬਰਾਤ ਨੂੰ ਵੀ ਉਸਦਾ ਲਾੜਾ ਮਿਲਣ ਜਾ ਰਿਹਾ ਹੈ। ਜਲੰਧਰ ਪਹੁੰਚੇ ਕਾਂਗਰਸ ਦੇ ਸੀਨੀਅਰ ਆਗੂ ਰਾਹੁਲ ਗਾਂਧੀ ਨੇ ਐਲਾਨ ਕੀਤਾ ਕਿ ਜਲਦ ਪੰਜਾਬ ਦੀ ਜਨਤਾ ਨੂੰ ਦੱਸਿਆ ਜਾਵੇਗਾ ਕਿ ਉਹਨਾਂ ਦੀ ਪਾਰਟੀ ਕਿਸਦੇ ਚਿਹਰੇ ‘ਤੇ ਚੋਣ ਮੈਦਾਨ ਵਿਚ ਉਤਰੇਗੀ। ਹਾਲਾਂਕਿ ਉਹਨਾਂ ਦੇ ਭਾਸ਼ਣ ਵਿੱਚ ਇਹ ਵੀ ਸਾਫ਼ ਹੋ ਗਿਆ ਕਿ ਫੈਸਲਾ ਨਵਜੋਤ ਸਿੱਧੂ ਅਤੇ ਚਰਨਜੀਤ ਸਿੰਘ ਚੰਨੀ ਵਿਚਕਾਰ ਹੋਣਾ ਹੈ। ਤੀਜਾ ਕੋਈ ਦਾਅਵੇਦਾਰ ਇਸ ਰੇਸ ਵਿੱਚ ਨਹੀਂ ਹੈ।
LIVE: Shri @RahulGandhi addresses the #NaviSochNavaPunjab Virtual Rally, in Jalandhar, Punjab.
https://t.co/KbQptaOx1K— Congress (@INCIndia) January 27, 2022
ਰਾਹੁਲ ਗਾਂਧੀ ਨੇ ਕਿਹਾ, “ਜੇਕਰ ਪੰਜਾਬ ਜਾਣਨਾ ਚਾਹੁੰਦਾ ਹੈ, ਤਾਂ ਕਾਂਗਰਸ ਪੰਜਾਬ ਵਿੱਚ CM ਚਿਹਰੇ ਦਾ ਐਲਾਨ ਜ਼ਰੂਰ ਕਰੇਗੀ। ਇਸ ਬਾਰੇ ਪਾਰਟੀ ਵਰਕਰਾਂ ਅਤੇ ਲੀਡਰਾਂ ਨਾਲ ਗੱਲ ਕੀਤੀ ਜਾਵੇਗੀ।” ਉਹਨਾਂ ਕਿਹਾ, “ਜਦੋਂ ਮੈਂ ਅੰਮ੍ਰਿਤਸਰ ਤੋਂ ਜਲੰਧਰ ਆ ਰਿਹਾ ਸੀ, ਤਾਂ ਰਸਤੇ ਵਿੱਚ ਕਾਰ ‘ਚ ਸਿੱਧੂ ਅਤੇ ਚੰਨੀ ਦੋਵਾਂ ਨੇ ਮੈਨੂੰ ਕਿਹਾ ਕਿ ਪੰਜਾਬ ਵਿੱਚ ਸੀਐੱਮ ਚਿਹਰੇ ਦਾ ਐਲਾਨ ਕਰ ਦੇਣਾ ਚਾਹੀਦਾ ਹੈ। ਦੋਵਾਂ ਨੇ ਕਿਹਾ ਕਿ ਸੀਐੱਮ ਫੇਸ ਕੋਈ ਵੀ ਹੋਵੇ, ਦੂਜਾ ਉਸਦੀ ਪੂਰੀ ਮਦਦ ਕਰੇਗਾ। ਇਸ ਨਾਲ ਮੈਨੂੰ ਬੇਹੱਦ ਖੁਸ਼ੀ ਹੋਈ।”
ਦਰਅਸਲ, ਰਾਹੁਲ ਗਾਂਧੀ ਵੀਰਵਾਰ ਨੂੰ ਪੰਜਾਬ ਦੌਰੇ ‘ਤੇ ਸਨ। ਗੁਰੂ ਨਗਰੀ ਅੰਮ੍ਰਿਤਸਰ ਵਿੱਚ ਧਾਰਮਿਕ ਅਸਥਾਨਾਂ ਦੇ ਦਰਸ਼ਨ ਕਰਨ ਤੋਂ ਬਾਅਦ ਰਾਹੁਲ ਸ਼ਾਮ ਨੂੰ ਜਲੰਧਰ ਦੇ ਮਿੱਠਾਪੁਰ ਵਿੱਚ ਵਰਚੁਅਲ ਰੈਲੀ ਨੂੰ ਸੰਬੋਧਿਤ ਕਰਨ ਪਹੁੰਚੇ। ਚੋਣ ਰੈਲੀ ਦੇ ਮੰਚ ਤੋਂ ਪਹਿਲਾਂ ਨਵਜੋਤ ਸਿੱਧੂ ਅਤੇ ਫੇਰ ਚਰਨਜੀਤ ਚੰਨੀ ਨੇ ਰਾਹੁਲ ਦੇ ਸਾਹਮਣੇ ਪੰਜਾਬ ‘ਚ ਸੀਐੱਮ ਕੈਂਡੀਡੇਟ ਐਲਾਨੇ ਜਾਣ ਦੀ ਮੰਗ ਕੀਤੀ, ਜਿਸ ਤੇ ਰਾਹੁਲ ਗਾਂਧੀ ਨੇ ਹਾਮੀ ਭਰ ਦਿੱਤੀ।
ਮੈਨੂੰ ਦਰਸ਼ਨੀ ਘੋੜਾ ਨਾ ਬਣਾ ਦਿਓ- ਸਿੱਧੂ
ਮੰਚ ਤੋਂ ਆਪਣੇ ਸੰਬੋਧਨ ਵਿੱਚ ਨਵਜੋਤ ਸਿੱਧੂ ਨੇ ਕਿਹਾ, “ਪੰਜਾਬ ਦੇ ਲੋਕ ਜਾਣਨਾ ਚਾਹੁੰਦੇ ਹਨ ਕਿ ਉਹਨਾਂ ਨੂੰ ਚਿੱਕੜ ਚੋਂ ਕੌਣ ਬਾਹਰ ਕੱਢੇਗਾ।” ਇਸਦੇ ਨਾਲ ਹੀ ਉਹਨਾਂ ਨੇ ਖੁਦ ਨੂੰ ਹੀ ਸੀਐੱਮ ਫੇਸ ਐਲਾਨੇ ਜਾਣ ਦੀ ਵਕਾਲਤ ਵੀ ਕਰ ਦਿੱਤੀ। ਸਿੱਧੂ ਨੇ ਕਿਹਾ, “ਮੈਨੂੰ ਦਰਸ਼ਨੀ ਘੋੜਾ ਨਾ ਬਣਾ ਦਿਓ। ਮੈਨੂੰ ਫੈਸਲੇ ਲੈਣ ਦੀ ਤਾਕਤ ਦਿਓ।” ਮਤਲਬ ਸਾਫ਼ ਹੈ ਕਿ ਸਿੱਧੂ ਖੁਦ ਲਈ ਮੁੱਖ ਮੰਤਰੀ ਦਾ ਅਹੁਦਾ ਮੰਗ ਰਹੇ ਹਨ, ਕਿਉਂਕਿ ਵਾਰ ਵਾਰ ਸਿੱਧੂ ਇਹ ਕਹਿੰਦੇ ਰਹਿੰਦੇ ਹਨ ਕਿ ਪੰਜਾਬ ਲਈ ਜੋ ਉਹਨਾਂ ਦੀ ਨੀਤੀ ਹੈ, ਉਸ ਨੂੰ ਸੀ ਐੱਮ ਹੀ ਲਾਗੂ ਕਰ ਸਕਦਾ ਹੈ।
ਚੰਨੀ ਨੇ ਮੰਚ ‘ਤੇ ਵਿਖਾਈ ਇਕਜੁੱਟਤਾ
ਸਿੱਧੂ ਤੋਂ ਬਾਅਦ ਜਦੋਂ ਸੀਐੱਮ ਚਰਨਜੀਤ ਚੰਨੀ ਸੰਬੋਧਨ ਲਈ ਆਏ, ਤਾਂ ਉਹਨਾਂ ਨੇ ਵੀ ਰਾਹੁਲ ਗਾਂਧੀ ਦੇ ਸਾਮ੍ਹਣੇ ਸੀਐੱਮ ਕੈਂਡੀਡੇਟ ਐਲਾਨੇ ਜਾਣ ਦੀ ਮੰਗ ਕੀਤੀ। ਚੰਨੀ ਨੇ ਇਥੋਂ ਤੱਕ ਕਿਹਾ ਕਿ ਜੇਕਰ ਉਹ ਚਿਹਰਾ ਨਵਜੋਤ ਸਿੱਧੂ ਹਨ, ਤਾਂ ਵੀ ਉਹਨਾਂ ਨੂੰ ਕੋਈ ਇਤਰਾਜ਼ ਨਹੀਂ। ਉਹਨਾਂ ਨੇ ਸਟੇਜ ਤੇ ਸਿੱਧੂ ਨੂੰ ਆਪਣੇ ਕੋਲ ਬੁਲਾ ਕੇ ਉਹਨਾਂ ਨੂੰ ਆਪਣਾ ਭਰਾ ਦੱਸਿਆ ਅਤੇ ਕਿਹਾ ਕਿ ਕਾਂਗਰਸ ਦੀ ਪੂਰੀ ਲੀਡਰਸ਼ਿਪ ਇੱਕਜੁਟ ਹੋ ਕੇ ਇਹ ਚੋਣ ਲੜੇਗੀ।
ਹਾਲਾਂਕਿ ਇਸ ਦੌਰਾਨ ਚੰਨੀ ਨੇ ਖੁਦ ਲਈ ਵੀ 5 ਸਾਲ ਮੰਗ ਲਏ ਉਹਨਾਂ ਨੇ ਮਾਈਕ ਸੰਭਾਲਦੇ ਹੀ ਕਿਹਾ, “ਮੈਨੂੰ 111 ਦਿਨ ਮਿਲੇ, ਜਿਸ ਦੌਰਾਨ ਨਾ ਮੈਂ ਸੋਇਆ ਤੇ ਨਾ ਹੀ ਕਿਸੇ ਨੂੰ ਸੌਣ ਦਿੱਤਾ। ਜੇਕਰ ਪਾਰਟੀ ਨੂੰ ਮੇਰਾ ਕੰਮ ਪਸੰਦ ਆਇਆ, ਤਾਂ ਮੈਨੂੰ ਪੂਰੇ 5 ਸਾਲ ਵੀ ਦੇ ਦਿਓ।” ਨਾਲ ਹੀ ਚੰਨੀ ਨੇ ਇਹ ਵੀ ਦਾਅਵਾ ਕਰ ਦਿੱਤਾ ਕਿ ਉਹ ਕਿਸੇ ਅਹੁਦੇ ਦੇ ਮੁਹਤਾਜ ਨਹੀਂ।
