ਨਵੀਂ ਦਿੱਲੀ। ਅਕਾਲੀ ਦਲ ਅਤੇ ਬੀਜੇਪੀ ਦੇ ਰਾਹ ਵੱਖ ਹੋਣ ਤੋਂ ਬਾਅਦ ਅਕਾਲੀ ਦਲ ਬੇਸ਼ੱਕ BSP ਨਾਲ ਗਠਜੋੜ ਦੀਆਂ ਕੋਸ਼ਿਸ਼ਾਂ ‘ਚ ਲੱਗਿਆ ਹੈ, ਪਰ ਬੀਜੇਪੀ ਨੇ ਸੰਕੇਤ ਦੇ ਦਿੱਤੇ ਹਨ ਕਿ ਉਹ ਪੰਜਾਬ ‘ਚ ਕਿਸੇ ਵੀ ਦੂਜੀ ਪਾਰਟੀ ਦੇ ਸਾਥ ਤੋਂ ਬਿਨ੍ਹਾਂ ਹੀ ਚੋਣ ਮੈਦਾਨ ‘ਚ ਨਿਤਰੇਗੀ। ਪੰਜਾਬ ਬੀਜੇਪੀ ਇੰਚਾਰਜ ਦੁਸ਼ਯੰਤ ਗੌਤਮ ਨੇ ਕਿਹਾ ਕਿ ਬੀਜੇਪੀ ਪੰਜਾਬ ਦੀਆਂ ਸਾਰੀਆਂ 117 ਸੀਟਾਂ ‘ਤੇ ਚੋਣ ਲੜੇਗੀ ਅਤੇ ਜਿੱਤੇਗੀ ਵੀ।
ਦੁਸ਼ਯੰਤ ਗੌਤਮ ਨੇ ਕਿਹਾ, “ਬੀਜੇਪੀ ਹਮੇਸ਼ਾ ਚੋਣਾਂ ਲਈ ਤਿਆਰ ਰਹਿੰਦੀ ਹੈ। ਬੀਜੇਪੀ ਨੇਤਾਵਾਂ ਦੀ ਪੰਜਾਬ ਫੇਰੀ ਵੀ ਜਲਦੀ ਸ਼ੁਰੂ ਹੋਵੇਗੀ। ਮੈਂ ਪਿਛਲੇ ਹਫਤੇ ਵੀ ਦੌਰਾ ਕੀਤਾ ਹੈ ਅਤੇ ਆਉਣ ਵਾਲੇ ਦਿਨਾਂ ਵਿੱਚ ਪੂਰਾ ਰੋਡਮੈਪ ਤਿਆਰ ਹੋਣ ਤੋਂ ਬਾਅਦ ਸਾਰੇ ਆਗੂ ਪੰਜਾਬ ਦਾ ਦੌਰਾ ਕਰਨਗੇ।”
‘ਪਾਰਟੀ ਨਹੀਂ, ਪੰਜਾਬ ਨੂੰ ਬਚਾਉਣਾ ਵੱਡੀ ਚੁਣੌਤੀ’
ਪਾਰਟੀ ਚੁਣੌਤੀ ‘ਤੇ ਬੋਲਦਿਆਂ ਪੰਜਾਬ ਬੀਜੇਪੀ ਇੰਚਾਰਜ ਨੇ ਕਿਹਾ, “ਕੋਈ ਵੀ ਪਾਰਟੀ ਬੀਜੇਪੀ ਲਈ ਚੁਣੌਤੀ ਨਹੀਂ ਹੈ, ਸਾਰੀਆਂ ਪਾਰਟੀਆਂ ਨੇ ਪੰਜਾਬ ਦੇ ਲੋਕਾਂ ਨੂੰ ਟੋਏ ਵਿੱਚ ਪਾ ਦਿੱਤਾ ਹੈ।” ਉਹਨਾਂ ਕਿਹਾ ਕਿ ਲੋਕਾਂ ਨੂੰ ਆਪਣੇ ਘਰਾਂ ਵਿੱਚ ਖੁਸ਼ਹਾਲੀ ਅਤੇ ਸ਼ਾਂਤੀ ਮਿਲਣੀ ਚਾਹੀਦੀ ਹੈ, ਲੋਕਾਂ ਨੂੰ ਕਰੋਨਾ ਤੋਂ ਕਿਵੇਂ ਬਚਾਇਆ ਜਾਵੇ। ਪੰਜਾਬ ਦੀ ਧਾਰਮਿਕ ਪਹਿਚਾਣ ਨੂੰ ਕਿਵੇਂ ਬਚਾਇਆ ਜਾਵੇ, ਇਹ ਬੀਜੇਪੀ ਸਾਹਮਣੇ ਚੁਣੌਤੀ ਹੋਵੇਗੀ।
ਕਾਂਗਰਸ ‘ਤੇ ਚੋਣ ਵਾਅਦਿਆਂ ਦੇ ਬਹਾਨੇ ਹਮਲਾ
ਦੁਸ਼ਯੰਤ ਗੌਤਮ ਨੇ ਕਿਹਾ, “ਅਸੀਂ ਕਾਂਗਰਸ ਵਰਗੇ ਨਹੀਂ ਹਾਂ ਕਿ ਚੋਣਾਂ ਲਈ 6 ਮਹੀਨੇ ਬਾਕੀ ਹਨ ਅਤੇ ਹੁਣ ਇਸ ਨੇ ਸਮਾਜਿਕ ਕੰਮਾਂ ਦੀ ਤਿਆਰੀ ਸ਼ੁਰੂ ਕਰ ਦਿੱਤੀ ਹੈ। ਕਾਂਗਰਸ ਨੇ ਸੱਤਾ ਵਿਚ ਬਣੇ ਰਹਿ ਕੇ ਆਪਣੇ ਵਾਅਦੇ ਪੂਰੇ ਨਹੀਂ ਕੀਤੇ, ਨਸ਼ਾ ਛੁਡਾਉਣ ਦੀ ਗੱਲ ਕੀਤੀ ਪਰ ਨਸ਼ੇ ਕਾਰਨ 300 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ, ਕਾਂਗਰਸ ਸਰਕਾਰ ਪੰਜਾਬ ਦੇ ਲੋਕਾਂ ਨਾਲ ਖੇਡ ਰਹੀ ਹੈ, ਕੇਂਦਰ ਸਰਕਾਰ ਵੱਲੋਂ ਦਿੱਤੇ ਗਏ ਵੈਂਟੀਲੇਟਰ ਕੋਰੋਨਾ ਕਾਲ ਵਿੱਚ ਨਹੀਂ ਲਗਾਏ ਗਏ ਸਨ ਅਤੇ ਕੋਰੋਨਾ ਟੀਕਾ ਵੀ ਨਿੱਜੀ ਹਸਪਤਾਲਾਂ ਨੂੰ ਵੀ ਦਿੱਤਾ ਜਾ ਰਿਹਾ ਹੈ ਜੋ ਕਿ ਇੱਕ ਘੁਟਾਲਾ ਹੈ। ਇਸ ਲਈ ਪੰਜਾਬ ਦੇ ਲੋਕ ਨਿਰਾਸ਼ ਹੋ ਚੁੱਕੇ ਹਨ ਹਨ, ਪੰਜਾਬ ਦੇ ਲੋਕ ਵਿਕਾਸ ਚਾਹੁੰਦੇ ਹਨ।
ਅਸੀਂ ਕਿਸਾਨ ਹਿੱਤ ‘ਚ ਕਈ ਫ਼ੈਸਲੇ ਲਏ- ਦੁਸ਼ਯੰਤ
ਕਿਸਾਨ ਅੰਦੋਲਨ ਨੂੰ ਲੈ ਕੇ ਵੀ ਪੰਜਾਬ ਬੀਜੇਪੀ ਇੰਚਾਰਜ ਨੇ ਆਪਣੀ ਗੱਲ ਰੱਖੀ। ਉਹਨਾਂ ਕਿਹਾ ਕਿ ਸ਼੍ਰੋਮਣੀ ਅਕਾਲੀ ਦਲ, ਕਾਂਗਰਸ ਅਤੇ ਆਮ ਆਦਮੀ ਪਾਰਟੀ ਦੇ ਲੋਕ ਕਿਸਾਨ ਝੰਡਾ ਚੁੱਕਦੇ ਹਨ ਅਤੇ ਕਿਸਾਨ ਬਣਦੇ ਹਨ, ਪੰਜਾਬ ਦੇ ਲੋਕਾਂ ਨੇ ਉਨ੍ਹਾਂ ਨੂੰ ਠੁਕਰਾ ਦਿੱਤਾ ਹੈ। ਬੀਜੇਪੀ ਨੇ ਕਿਸਾਨਾਂ ਲਈ ਬਹੁਤ ਕੁਝ ਕੀਤਾ ਹੈ ਭਾਵੇਂ ਇਹ ਪੈਸਾ ਸਿੱਧਾ ਖਾਤਿਆਂ ਪਾਉਣਾ ਹੋਵੇ ਜਾਂ ਫਸਲਾਂ ਦੇ MSP ਵਧਾਉਣ ਦਾ, ਇਕ ਨਹੀਂ ਬਲਕਿ ਬਹੁਤ ਸਾਰੀਆਂ ਯੋਜਨਾਵਾਂ ਕਿਸਾਨਾਂ ਲਈ ਲਾਗੂ ਕੀਤੀਆਂ ਗਈਆਂ ਹਨ। ਉਹਨਾਂ ਇਲਜ਼ਾਮ ਲਾਇਆ ਕਿ ਕੁਝ ਲੋਕ ਕਿਸਾਨਾਂ ਦੇ ਨਾਮ ‘ਤੇ ਰਾਜਨੀਤੀ ਕਰ ਰਹੇ ਹਨ।
