ਅੰਮ੍ਰਿਤਸਰ, September 4, 2022
ਅੰਮ੍ਰਿਤਸਰ ‘ਚ ਐਤਵਾਰ ਸ਼ਾਮ ਨੂੰ ਡੇਰਾ ਬਿਆਸ ਦੀ ਸੰਗਤ ਅਤੇ ਨਿਹੰਗ ਸਿੱਖਾੰ ਵਿਚਕਾਰ ਝੜਪ ਹੋ ਗਈ। ਦੱਸਿਆ ਜਾ ਰਿਹਾ ਹੈ ਕਿ ਡੇਰੇ ਦੇ ਕਬਜ਼ੇ ਵਾਲੀ ਜ਼ਮੀਨ ‘ਤੇ ਪਸ਼ੂਆੰ ਨੂੰ ਲਿਆਉਣ ਦੇ ਚਲਦੇ ਤਰਨਾ ਦਲ ਬਾਬਾ ਬਕਾਲਾ(ਬਾਬਾ ਪਾਲਾ ਸਿੰਘ) ਅਤੇ ਡੇਰੇ ਦੀ ਸੰਗਤ ਵਿਚਕਾਰ ਇਹ ਝੜਪ ਹੋਈ।
ਜਾਣਕਾਰੀ ਮੁਤਾਬਕ, ਤਰਨਾ ਦਲ ਦੇ ਨਿਹੰਗ ਆਪਣੇ ਪਸ਼ੂਆੰ ਨੂੰ ਡੇਰੇ ਦੀ ਜ਼ਮੀਨ ਤੋੰ ਲਿਜਾ ਰਹੇ ਸਨ। ਇਸੇ ਦੌਰਾਨ ਸੰਗਤ ਨੇ ਉਹਨਾੰ ਨੂੰ ਅਜਿਹਾ ਕਰਨ ਤੋੰ ਰੋਕਿਆ ਅਤੇ ਕਹਾਸੁਣੀ ਸ਼ੁਰੂ ਹੋ ਗਈ। ਬਿਆਸ ਪੁੱਲ ਦੇ ਕੋਲ ਝਗੜਾ ਇਸ ਕਦਰ ਵੱਧ ਗਿਆ ਕਿ ਦੋਵਾਂ ਵਿਚਕਾਰ ਤਲਵਾਰਾੰ ਚੱਲ ਗਈਆੰ ਅਤੇ ਫਾਇਰਿੰਗ ਵੀ ਹੋਈ।
ਝਗੜੇ ਦੀ ਜਾਣਕਾਰੀ ਮਿਲਣ ਤੋੰ ਬਾਅਦ ਪੁਲਿਸ ਵੀ ਮੌਕੇ ‘ਤੇ ਪਹੁੰਚ ਗਈ, ਪਰ ਹਾਲਾਤ ਵਿਗੜਨ ਲੱਗੇ ਅਤੇ ਦੋਵੇੰ ਧਿਰਾੰ ਦੇ ਝਗੜੇ ਵਿਚਕਾਰ ਕੁਝ ਪੁਲਿਸ ਮੁਲਾਜ਼ਮ ਵੀ ਜ਼ਖਮੀ ਹੋ ਗਏ।
ਪਹਿਲਾੰ ਵੀ ਕਈ ਵਾਰ ਹੋ ਚੁੱਕੀ ਹੈ ਝੜਪ
ਤਰਨਾ ਦਲ ਵੱਲੋ ਕਈ ਵਾਰ ਪਸ਼ੂਆੰ ਨੂੰ ਚਰਾਉਣ ਲਈ ਬਿਆਸ ਤੋੰ ਲੰਘਾਇਆ ਜਾੰਦਾ ਹੈ। ਇਸ ਦੌਰਾਨ ਡੇਰੇ ਦੀ ਜ਼ਮੀਨ ‘ਤੇ ਪਸ਼ੂਆੰ ਦੇ ਆਉਣ ਕਾਰਨ ਕਈ ਵਾਰ ਪਹਿਲਾੰ ਵੀ ਦੋਵੇੰ ਧਿਰਾੰ ਵਿਚਕਾਰ ਝਗੜਾ ਹੋ ਚੁੱਕਿਆ ਹੈ, ਪਰ ਉਦੋੰ ਗੱਲਬਾਤ ਨਾਲ ਦੋਵੇੰ ਧਿਰਾੰ ਵਿਚਕਾਰ ਝਗੜਾ ਸ਼ਾੰਤ ਕਰਵਾ ਦਿੱਤਾ ਗਿਆ। ਹਾਲਾੰਕਿ ਐਤਵਾਰ ਨੂੰ ਦੋਵੇੰ ਧਿਰਾੰ ਮੁੜ ਭਿੜ ਗਈਆੰ।
ਹਾਲਾਤ ਹੁਣ ਕੰਟਰੋਲ ‘ਚ ਹਨ- SSP
SSP ਰੂਰਲ ਸਵੱਪਨ ਸ਼ਰਮਾ ਦੇ ਮੁਤਾਬਕ, ਝਗੜੇ ਦੌਰਾਨ ਕਈ ਨਿਹੰਗ ਜ਼ਖਮੀ ਹੋਏ ਹਨ, ਜਿਹਨਾੰ ਨੂੰ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ ਹੈ। SSP ਮੁਤਾਬਕ, ਝਗੜੇ ਤੋੰ ਬਾਅਦ ਹਾਲਾਤ ਤਣਾਅਪੂਰਣ ਹੋਏ ਸਨ, ਪਰ ਹੁਣ ਹਾਲਾਤ ਕੰਟਰੋਲ ਵਿੱਚ ਹਨ।
