ਦਿੱਲੀ। ਕਿਸਾਨ ਅੰਦੋਲਨ ਦੇ ਕੇਂਦਰ ਸਿੰਘੂ ਬਾਰਡਰ ‘ਤੇ ਵੀਰਵਾਰ ਰਾਤ ਇੱਕ ਸ਼ਖਸ ਦਾ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ ਗਿਆ। 35 ਸਾਲ ਦੇ ਲਖਬੀਰ ਸਿੰਘ ਦੇ ਪਹਿਲਾਂ ਹੱਥ-ਪੈਰ ਵੱਢੇ ਗਏ, ਤੇ ਫਿਰ ਉਸ ਨੂੰ ਰੱਸੀ ਨਾਲ ਬੰਨ੍ਹ ਕੇ 100 ਮੀਟਰ ਤੱਕ ਘਸੀਟਿਆ ਗਿਆ। ਬਾਅਦ ਵਿੱਚ ਉਸ ਨੂੰ ਕਿਸਾਨ ਅੰਦੋਲਨ ਦੇ ਮੰਚ ਦੇ ਸਾਹਮਣੇ ਬੈਰੀਕੇਡ ਨਾਲ ਲਟਕਾ ਦਿੱਤਾ ਗਿਆ। ਬੁਰੀ ਤਰ੍ਹਾਂ ਜ਼ਖਮੀ ਹੋਣ ਅਤੇ ਖੂਨ ਵਹਿਣ ਦੇ ਚਲਦੇ ਪੀੜਤ ਸ਼ਖਸ ਨੇ ਕੁਝ ਹੀ ਦੇਰ ਵਿੱਚ ਦਮ ਤੋੜ ਦਿੱਤਾ।
ਨਿਹੰਗ ਸਿੰਘਾਂ ਨੇ ਕਬੂਲੀ ਕਤਲ ਦੀ ਗੱਲ
ਕਤਲ ਦੀ ਜਿੰਮੇਵਾਰੀ ਨਿਹੰਗ ਸਿੰਘਾਂ ਨੇ ਲਈ ਹੈ। ਨਿਹੰਗਾਂ ਦੇ ਕਬੂਲਨਾਮੇ ਦੀ ਬਕਾਇਦਾ ਵੀਡੀਓ ਵੀ ਸਾਹਮਣੇ ਆ ਚੁੱਕੀ ਹੈ। ਮੁਲਜ਼ਮਾਂ ਮੁਤਾਬਕ, ਲਖਬੀਰ ਸਿੰਘ ਨੇ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੇਅਦਬੀ ਕੀਤੀ ਸੀ, ਜਿਸ ਕਾਰਨ ਉਸ ਨੂੰ ਜਾਨੋਂ ਮਾਰ ਦਿੱਤਾ ਗਿਆ। ਇਲਜਾਮ ਇਹ ਵੀ ਹੈ ਕਿ ਲਖਬੀਰ ਨੂੰ ਸਾਜਿਸ਼ ਦੇ ਤਹਿਤ ਗੁਰੂ ਸਾਹਿਬ ਦੀ ਬੇਅਦਬੀ ਲਈ ਭੇਜਿਆ ਗਿਆ ਸੀ, ਜਿਸ ਲਈ ਉਸਨੂੰ 30 ਹਜਾਰ ਰੁਪਏ ਵੀ ਦਿੱਤੇ ਗਏ। ਬੇਅਦਬੀ ਦੀ ਭਣਕ ਲੱਗਦੇ ਹੀ ਨਿਹੰਗਾਂ ਨੇ ਉਸ ਨੂੰ ਫੜ ਲਿਆ ਅਤੇ ਘਸੀਟਦੇ ਹੋਏ ਪੰਡਾਲ ਦੇ ਕੋਲ ਲੈ ਆਏ।
ਪੁਲਿਸ ਨੂੰ ਲਾਸ਼ ਤੱਕ ਉਤਾਰਨ ਨਹੀਂ ਦੇ ਰਹੇ ਸਨ ਨਿਹੰਗ
ਜਾਣਕਾਰੀ ਮੁਤਾਬਕ, ਘਟਨਾ ਤੜਕ ਸਵੇਰੇ ਕਰੀਬ ਸਾਢੇ 3 ਵਜੇ ਹੋਈ ਅਤੇ ਪੁਲਿਸ ਨੂੰ ਇਸਦੀ ਜਾਣਕਾਰੀ ਕਰੀਬ 5 ਵਜੇ ਮਿਲੀ। ਪੁਲਿਸ ਮੌਕੇ ‘ਤੇ ਪਹੁੰਚੀ, ਤਾਂ ਨਿਹੰਗਾਂ ਨੇ ਲਾਸ਼ ਉਤਾਰਨ ਤੋਂ ਰੋਕ ਦਿੱਤਾ। ਬਾਅਦ ਵਿੱਚ ਕੁਝ ਕਿਸਾਨ ਆਗੂ ਮੌੰਕੇ ‘ਤੇ ਪਹੁੰਚੇ, ਤਾਂ ਪੁਲਿਸ ਨੂੰ ਲਾਸ਼ ਉਤਾਰਨ ਦਿੱਤੀ ਗਈ। ਪੁਲਿਸ ਨੇ ਲਾਸ਼ ਨੂੰ ਕਬਜੇ ਵਿੱਚ ਲੈ ਕੇ ਪੋਸਟਮਾਰਟਮ ਲਈ ਭੇਜ ਦਿੱਤਾ। ਸ਼ੁਰੂਆਤੀ ਜਾਂਚ ਵਿੱਚ ਪੁਲਿਸ ਨੇ ਅਣਪਛਾਤੇ ਲੋਕਾਂ ਖਿਲਾਫ਼ ਕਤਲ ਦਾ ਕੇਸ ਦਰਜ ਕੀਤਾ ਹੈ।
ਮੌਤ ਤੋਂ ਪਹਿਲਾਂ ਦੀ ਵੀਡੀਓ ਵੀ ਆਈ ਸਾਹਮਣੇ
ਲਖਬੀਰ ਦੀ ਮੌਤ ਤੋਂ ਪਹਿਲਾਂ ਦੀ ਵੀਡੀਓ ਵੀ ਸਾਹਮਣੇ ਆਈ ਹੈ, ਜਿਸ ਵਿੱਚ ਉਹ ਖੂਨ ਨਾਲ ਲਥਪਥ ਤੜਪਦਾ ਹੋਇਆ ਨਜ਼ਰ ਆ ਰਿਹਾ ਹੈ। ਵੀਡੀਓ ਵਿੱਚ ਕੁਝ ਲੋਕ ਉਸ ਨੂੰ ਆਪਣੀ ਪਛਾਣ ਦੱਸਣ ਲਈ ਕਹਿ ਰਹੇ ਹਨ ਅਤੇ ਪੁੱਛ ਰਹੇ ਹਨ ਕਿ ਉਹ ਕਿਥੋਂ ਆਇਆ ਹੈ। ਜਵਾਬ ਵਿੱਚ ਲਖਬੀਰ ਕਹਿੰਦਾ ਹੈ ਕਿ ਸੱਚੇ ਪਾਤਸ਼ਾਹ ਗੁਰੂ ਤੇਗ ਬਹਾਦਰ ਜੀ ਨਿਹੰਗਾਂ ਨੂੰ ਮੇਰਾ ਵਧ ਕਰਨ ਦੀ ਆਗਿਆ ਬਖਸ਼ਣ ਅਤੇ ਮੈਨੂੰ ਆਪਣੇ ਚਰਨਾਂ ਵਿੱਚ ਨਿਵਾਸ ਦੇਣ। ਹਾਲਾਂਕਿ ਇਸੇ ਵੀਡੀਓ ਵਿੱਚ ਉਹ ਇਹ ਵੀ ਕਹਿੰਦਾ ਨਜ਼ਰ ਆ ਰਿਹਾ ਹੈ ਕਿ ਉਸਨੇ ਕੋਈ ਬੇਅਦਬੀ ਨਹੀਂ ਕੀਤੀ।
ਤਰਨਤਾਰਨ ਦਾ ਰਹਿਣ ਵਾਲਾ ਸੀ ਮ੍ਰਿਤਕ ਨੌਜਵਾਨ
ਮ੍ਰਿਤਕ ਲਖਬੀਰ ਸਿੰਘ ਦਲਿਤ ਭਾਈਚਾਰੇ ਨਾਲ ਸਬੰਧਤ ਸੀ ਅਤੇ ਤਰਨਤਾਰਨ ਦੇ ਚੀਮਾ ਖੁਰਦ ਪਿੰਡ ਦਾ ਰਹਿਣ ਵਾਲਾ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਲਖਬੀਰ ਸਿੰਘ ਨਸ਼ੇ ਦਾ ਆਦੀ ਸੀ, ਜਿਸਦੇ ਚਲਦੇ ਉਸਦੀ ਪਤਨੀ ਕਰੀਬ 5 ਸਾਲ ਪਹਿਲਾਂ ਆਪਣੀਆਂ 3 ਬੇਟੀਆਂ ਨੂੰ ਲੈ ਕੇ ਪੇਕੇ ਚਲੀ ਗਈ ਸੀ। ਉਦੋਂ ਤੋਂ ਹੀ ਲਖਬੀਰ ਆਪਣੀ ਭੁਆ ਕੋਲ ਰਹਿ ਰਿਹਾ ਸੀ।
