October 29, 2022
(Chandigarh)
ਪੰਜਾਬ ਦੇ ਕੈਬਨਿਟ ਮੰਤਰੀ ਫੌਜਾ ਸਿੰਘ ਸਰਾਰੀ ਹੁਣ ਇੱਕ ਨਵੇਂ ਵਿਵਾਦ ਵਿੱਚ ਘਿਰਦੇ ਨਜ਼ਰ ਆ ਰਹੇ ਹਨ। ਇਸ ਵਾਰ ਵਿਵਾਦ ਡੇਰਾ ਸੱਚਾ ਸੌਦਾ ਨਾਲ ਜੁੜਿਆ ਹੈ। ਦਰਅਸਲ, ਮੰਤਰੀ ਸਰਾਰੀ ਸ਼ੁੱਕਰਵਾਰ ਨੂੰ ਆਪਣੀ ਪਤਨੀ ਦੇ ਨਾਲ ਫਿਰੋਜ਼ਪੁਰ ਦੇ ਗੁਰੂ ਹਰਸਹਾਏ ਸਥਿਤ ਡੇਰੇ ਵਿਖੇ ਪਹੁੰਚੇ। ਇਸ ਦੌਰਾਨ ਡੇਰੇ ਵੱਲੋਂ ਉਹਨਾਂ ਨੂੰ ਸਨਮਾਨਿਤ ਵੀ ਕੀਤਾ ਗਿਆ।
ਕਾਂਗਰਸ ਨੇ ਚੁੱਕੇ ਸਰਕਾਰ ‘ਤੇ ਸਵਾਲ
ਮੰਤਰੀ ਦੀ ਡੇਰੇ ‘ਚ ਤਸਵੀਰਾਂ ਸਾਹਮਣੇ ਆਉਂਦੇ ਹੀ ਕਾਂਗਰਸ ਨੇ ਸਰਕਾਰ ਦੇ ਖਿਲਾਫ਼ ਮੋਰਚਾ ਖੋਲ੍ਹ ਦਿੱਤਾ। ਕਾਂਗਰਸੀ ਆਗੂ ਸੁਖਪਾਲ ਖਹਿਰਾ ਨੇ ਟਵੀਟ ਕਰਕੇ ਕਿਹਾ, “ਕੀ ਤੁਹਾਨੂੰ ਲੱਗਦਾ ਹੈ ਕਿ ਭਗਵੰਤ ਮਾਨ ਦੀ ਸਰਕਾਰ ਬੇਅਦਬੀ ਅਤੇ ਬਹਿਬਲ ਕਲਾਂ ਕਾਂਡ ਵਿੱਚ ਇਨਸਾਫ਼ ਯਕੀਨੀ ਬਣਾ ਸਕਦੀ ਹੈ, ਜਦੋਂ ਉਸ ਦੇ ਦਾਗੀ ਮੰਤਰੀ ਫੌਜਾ ਸਰਾਰੀ ਨੂੰ ਫਿਰੋਜ਼ਪੁਰ ਵਿੱਚ ਡੇਰਾ ਸਿਰਸਾ ਪ੍ਰੇਮੀਆਂ ਦੁਆਰਾ ਸਨਮਾਨਿਤ ਕੀਤਾ ਜਾ ਰਿਹਾ ਹੈ। ਉਹਨਾਂ ਦੇ ਇਨਸਾਫ਼ ਦੇ ਵਾਅਦੇ ਉਹਨਾਂ ਦੇ ਬਦਲਾਅ ਵਾਂਗ ਹੀ ਫਰਜ਼ੀ ਹਨ।”
Do you think @bhagwantmann govt can ensure justice in (Beadbi) sacrilege & Behbal killings when his tainted Minister Fauja Sarari is being honored by Dera Sirsa Premi’s in V. Saide Ke Mohan in Ferozepur.Their promises of justice are as bogus as their Badlav-Khaira pic.twitter.com/LbD1Dp28bB
— Sukhpal Singh Khaira (@SukhpalKhaira) October 29, 2022
ਪੈਰੋਲ ‘ਤੇ ਚੱਲ ਰਿਹਾ ਗੁਰਮੀਤ ਰਾਮ ਰਹੀਮ
ਬੇਅਦਬੀ ਮਾਮਲਿਆਂ ਵਿੱਚ ਮੁਲਜ਼ਮ ਰਾਮ ਰਹੀਮ ਫਿਲਹਾਲ ਕਤਲ ਅਤੇ ਬਲਾਤਕਾਰ ਦੇ ਮਾਮਲੇ ਵਿੱਚ ਸਜ਼ਾ ਕੱਟ ਰਿਹਾ ਹੈ। ਉਹ ਰੋਹਤਕ ਜੇਲ੍ਹ ਵਿੱਚ ਸਜ਼ਾਯਾਫਤਾ ਹੈ। ਪਿਛਲੇ ਦਿਨੀਂ ਉਹ 40 ਦਿਨਾ ਦੀ ਪੈਰੋਲ ‘ਤੇ ਜੇਲ੍ਹ ਤੋਂ ਬਾਹਰ ਆਇਆ ਹੈ। ਪੈਰੋਲ ‘ਤੇ ਆਉਣ ਦੇ ਬਾਅਦ ਤੋਂ ਹੀ ਰਾਮ ਰਹੀਮ ਪੂਰੀ ਤਰ੍ਹਾਂ ਸਰਗਰਮ ਹੈ। ਉਹ ਲਗਾਤਾਰ ਆਨਲਾਈਨ ਸਤਸੰਗ ਕਰ ਰਿਹਾ ਹੈ, ਜਿਸ ਵਿੱਚ ਬੀਜੇਪੀ ਦੇ ਕਈ ਲੀਡਰ ਪਹੁੰਚ ਰਹੇ ਹਨ। ਤੇ ਹੁਣ ‘ਆਪ’ ਲੀਡਰ ਤੇ ਪੰਜਾਬ ਦੇ ਕੈਬਨਿਟ ਮੰਤਰੀ ਨੇ ਡੇਰੇ ‘ਚ ਹਾਜ਼ਰੀ ਲਗਾ ਕੇ ਨਵਾਂ ਵਿਵਾਦ ਖੜ੍ਹਾ ਕਰ ਦਿੱਤਾ ਹੈ।
ਪਹਿਲਾਂ ਤੋਂ ਵਿਵਾਦ ਵਿੱਚ ਘਿਰੇ ਹਨ ਸਰਾਰੀ
ਦੱਸ ਦਈਏ ਕਿ ਫੌਜਾ ਸਿੰਘ ਸਰਾਰੀ ਪਹਿਲਾਂ ਤੋਂ ਕਰੱਪਸ਼ਨ ਕੇਸ ਵਿੱਚ ਘਿਰੇ ਹੋਏ ਹਨ। ਇੱਕ ਕਥਿਤ ਆਡੀਓ ਵਿੱਚ ਉਹ ਕਿਸੇ ਦੇ ਨਾਲ ਸੌਦੇਬਾਜ਼ੀ ਕਰਦੇ ਸੁਣਾਈ ਦੇ ਰਹੇ ਹਨ। ਇਸ ਮਾਮਲੇ ਵਿੱਚ ਵਿਰੋਧੀ ਧਿਰ ਸਰਾਰੀ ਦੇ ਅਸਤੀਫ਼ੇ ਦੀ ਮੰਗ ‘ਤੇ ਅੜਿਆ ਹੈ। ਪਾਰਟੀ ਨੇ ਵੀ ਸਰਾਰੀ ਨੂੰ ਨੋਟਿਸ ਜਾਰੀ ਕੀਤਾ ਸੀ, ਪਰ ਨਾ ਤਾਂ ਸਰਾਰੀ ਨੇ ਉਸ ਨੋਟਿਸ ਦਾ ਕੋਈ ਜਵਾਬ ਦਿੱਤਾ ਤੇ ਨਾ ਹੀ ਪਾਰਟੀ ਨੇ ਮੰਤਰੀ ‘ਤੇ ਕੋਈ ਕਾਰਵਾਈ ਕੀਤੀ।
