September 18, 2022
(Mohali)
ਮੋਹਾਲੀ ਦੀ ਚੰਡੀਗੜ੍ਹ ਯੂਨੀਵਰਸਿਟੀ ਵਿੱਚ ਬੀਤੀ ਦੇਰ ਰਾਤ ਕਰੀਬ ਢਾਈ ਵਜੇ ਅਚਾਨਕ ਹੰਗਾਮਾ ਸ਼ੁਰੂ ਹੋ ਗਿਆ। ਇਹ ਹੰਗਾਮਾ ਯੂਨੀਵਰਸਿਟੀ ਦੇ ਹੋਸਟਲ ‘ਚ ਰਹਿੰਦੀਆੰ ਸੈੰਕੜੇ ਕੁੜੀਆੰ ਨੇ ਕੀਤਾ, ਜਿਹਨਾੰ ਨੇ ਹੋਸਟਲ ਦੀ ਹੀ ਇੱਕ ਕੁੜੀ ‘ਤੇ ਇਲਜ਼ਾਮ ਲਾਇਆ ਕਿ ਉਸ ਵੱਲੋੰ 50-60 ਕੁੜੀਆੰ ਦੇ ਨਹਾਉੰਦਿਆੰ ਦੀ ਵੀਡੀਓ ਬਣਾ ਕੇ ਸ਼ਿਮਲਾ ਵਿੱਚ ਆਪਣੇ ਦੋਸਤ ਨੂੰ ਭੇਜੀ ਗਈ। ਇੰਨਾ ਹੀ ਨਹੀੰ, ਸ਼ਿਮਲਾ ਵਾਲੇ ਉਸਦੇ ਦੋਸਤ ਨੇ ਉਹ ਵੀਡੀਓਜ਼ ਵਾਇਰਲ ਵੀ ਕਰ ਦਿੱਤੀਆੰ।
ਇਥੋੰ ਤੱਕ ਕਿ ਮੁਲਜ਼ਮ ਵਿਦਿਆਰਥਣ ਵੀ ਇੱਕ ਵੀਡੀਓ ਵਿੱਚ ਇਹ ਕਬੂਲ ਕਰਦੀ ਨਜ਼ਰ ਆਈ ਕਿ ਉਸ ਵੱਲੋੰ ਕੁਝ ਵੀਡੀਓਜ਼ ਬਣਾ ਕੇ ਸ਼ਿਮਲਾ ‘ਚ ਇੱਕ ਮੁੰਡੇ ਨੂੰ ਭੇਜੀਆੰ ਗਈਆੰ ਹਨ। ਇੱਕ ਵੀਡੀਓ ਵਿੱਚ ਤਾੰ ਮੁਲਜ਼ਮ ਵਿਦਿਆਰਥਣ ਉਸ ਮੁੰਡੇ ਦੀ ਤਸਵੀਰ ਵੀ ਵਿਖਾ ਰਹੀ ਹੈ ਕਿ ਇਸਨੇ ਵੀਡੀਓਜ਼ ਬਣਾਉਣ ਲਈ ਦਬਾਅ ਪਾਇਆ।
ਦਾਅਵਾ ਇਹ ਵੀ ਕੀਤਾ ਗਿਆ ਕਿ ਵੀਡੀਓਜ਼ ਵਾਇਰਲ ਹੋਣ ਤੋੰ ਬਾਅਦ ਬਦਨਾਮੀ ਦੇ ਡਰ ਤੋੰ 8 ਵਿਦਿਆਰਥਣਾੰ ਨੇ ਖੁਦਕੁਸ਼ੀ ਦੀ ਕੋਸ਼ਿਸ਼ ਕੀਤੀ। ਇਸ ਸਬੰਧੀ ਕੁਝ ਵੀਡੀਓਜ਼ ਵੀ ਸਾਹਮਣੇ ਆਈਆੰ, ਜਿਹਨਾੰ ਵਿੱਚ ਕੁੜੀਆੰ ਨੂੰ ਬੇਹੋਸ਼ੀ ਦੀ ਹਾਲਤ ਵਿੱਚ ਐੰਬੂਲੈੰਸ ਵਿੱਚ ਲਿਜਾਇਆ ਜਾ ਰਿਹਾ ਸੀ।
ਇਸ ਪੂਰੇ ਮਾਮਲੇ ਨੂੰ ਲੈ ਕੇ ਯੂਨੀਵਰਸਿਟੀ ਦੀਆੰ ਵਿਦਿਆਰਥਣਾੰ ਰੋਸ ਪ੍ਰਦਰਸ਼ਨ ਕਰਨ ਲੱਗੀਆੰ ਅਤੇ We Want Justice ਦੇ ਨਾਅਰੇ ਲਗਾਉਣ ਲੱਗੀਆੰ। ਪਹਿਲਾੰ ਤਾੰ ਯੂਨੀਵਰਸਿਟੀ ਪ੍ਰਸ਼ਾਸਨ ਨੇ ਆਪਣੇ ਪੱਧਰ ‘ਤੇ ਮਾਮਲਾ ਸ਼ਾੰਤ ਕਰਵਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਹਾਲਾਤ ਵਿਗੜਦੇ ਵੇਖ ਕੈੰਪਸ ਵਿੱਚ ਪੁਲਿਸ ਬੁਲਾਈ ਗਈ। ਹਾਲਾੰਕਿ ਵਿਦਿਆਰਥਣਾੰ ਇਸ ਕਦਰ ਭੜਕੀਆੰ ਸਨ ਕਿ ਪੁਲਿਸ ਦੀ ਵੀ ਇੱਕ ਨਹੀੰ ਸੁਣੀ ਅਤੇ FIR ਹੋਣ ਤੋੰ ਬਾਅਦ ਹੀ ਮਾਹੌਲ ਕੁਝ ਸ਼ਾੰਤ ਹੋ ਸਕਿਆ।
ਵਾਇਰਲ ਵੀਡੀਓ ‘ਚ ਵਾਰਡਨ ਕਰ ਰਹੀ ਸਵਾਲ-ਜਵਾਬ
ਇਸ ਦੌਰਾਨ ਸੋਸ਼ਲ ਮੀਡੀਆ ‘ਤੇ ਇੱਕ ਵੀਡੀਓ ਵਾਇਰਲ ਹੋਈ, ਜਿਸ ਵਿੱਚ ਵਾਰਡਨ ਮੁਲਜ਼ਮ ਕੁੜੀ ਨੂੰ ਸਵਾਲ ਪੁੱਛ ਰਹੀ ਹੈ। ਵਾਰਡਨ ਮੁਲਜ਼ਮ ਕੁੜੀ ਤੋੰ ਪੁੱਛਗਿੱਛ ਕਰ ਰਹੀ ਹੈ, ਜਿਸ ਵਿੱਚ ਕੁੜੀ ਦੱਸਦੀ ਹੈ ਕਿ ਉਹ ਸ਼ਿਮਲਾ ਰਹਿੰਦੇ ਮੁੰਡੇ ਨੂੰ ਵੀਡੀਓਜ਼ ਭੇਜਦੀ ਹੈ। ਭਾਵੇਂ ਕਿ ਉਹ ਵਾਰਡਨ ਨੂੰ ਉਸ ਮੁੰਡੇ ਬਾਰੇ ਵੀਡੀਓ ਵਿੱਚ ਜ਼ਿਆਦਾ ਜਾਣਕਾਰੀ ਨਹੀਂ ਦਿੰਦੀ। ਵਾਰਡਨ ਜਦੋਂ ਕੁੜੀ ਨੂੰ ਪੁੱਛਦੀ ਹੈ ਕਿ ਤੇਰਾ ਉਸ ਮੁੰਡੇ ਨਾਲ ਕੀ ਰਿਸ਼ਤਾ ਹੈ, ਤਾਂ ਉਹ ਜਵਾਬ ਦਿੰਦੀ ਹੈ ਕੁਝ ਨਹੀਂ। ਪਰ ਕੁੜੀ ਇਹ ਕਬੂਲ ਕਰਦੀ ਹੈ ਕਿ ਉਸ ਨੇ ਅਸ਼ਲੀਲ ਵੀਡੀਓਜ਼ ਬਣਾਈਆਂ ਅਤੇ ਸ਼ਿਮਲਾ ‘ਚ ਮੁੰਡੇ ਨੂੰ ਭੇਜੀਆਂ ਹਨ।
ਵਾਰਡਨ ਵੀਡੀਓ ਵਿਚ ਇਹ ਪੁੱਛਦੀ ਦਿਖ ਰਹੀ ਹੈ ਕਿ ਤੈਨੂੰ ਉਸ ਮੁੰਡੇ ਦਾ ਕੀ ਡਰ ਹੈ ਕਿ ਤੂੰ ਬਾਕੀ ਕੁੜੀਆਂ ਦੀ ਇੱਜ਼ਤ ਉਛਾਲਣ ਲੱਗੀ ਹੋਈ ਹੈ। ਵਾਰਡਨ ਇਹ ਵੀ ਪੁੱਛ ਰਹੀ ਹੈ ਕਿ ਤੂੰ ਇਨ੍ਹਾਂ ਦੇ ਵੀਡੀਓ ਕਦੋਂ ਤੋਂ ਬਣਾ ਰਹੀ ਹੈ, ਉਹ ਮੁੰਡਾ ਕੌਣ ਹੈ ਅਤੇ ਤੇਰਾ ਕੀ ਲੱਗਦਾ ਹੈ। ਕੁੜੀ ਜਵਾਬ ਦਿੰਦੀ ਹੈ ਕੁਝ ਨਹੀਂ। ਵਾਰਡਨ ਕਹਿੰਦੀ ਹੈ ਕਿਇਸ ਜਾਂਚ ਹੋਵੇਗੀ ਅਤੇ ਮੁੰਡੇ ਦੀ ਡਿਟੇਲ ਦੇਣੀ ਪਵੇਗੀ। ਤੇਰੇ ਮਾਪਿਆਂ ਨੂੰ ਬੁਲਾਇਆ ਜਾਵੇਗਾ ਅਤੇ ਅੱਜ ਹੀ ਤੈਨੂੰ ਸਸਪੈਂਡ ਕੀਤਾ ਜਾਵੇਗਾ।
ਸਵੇਰ ਹੁੰਦੇ-ਹੁੰਦੇ ਖੁਦਕੁਸ਼ੀਆੰ ਦੀ ਖ਼ਬਰ ਨਿਕਲੀ ਅਫ਼ਵਾਹ
ਦੇਰ ਰਾਤ ਤੋੰ ਲੈ ਕੇ ਸਵੇਰ ਤੱਕ ਚੰਡੀਗੜ੍ਹ ਯੂਨੀਵਰਸਿਟੀ ਦੇ ਇਸ ਮਾਮਲੇ ਨੂੰ ਲੈ ਕੇ ਸੋਸ਼ਲ ਮੀਡੀਆ ‘ਤੇ ਵੀ ਕਈ ਤਰ੍ਹਾੰ ਦੀਆੰ ਖ਼ਬਰਾੰ ਸਾਹਮਣੇ ਆਈਆੰ, ਪਰ ਸਵੇਰ ਹੁੰਦੇ-ਹੁੰਦੇ ਵਿਦਿਆਰਥਣਾੰ ਵੱਲੋੰ ਖੁਦਕੁਸ਼ੀ ਦੀ ਖ਼ਬਰ ਨੂੰ ਅਫਵਾਹ ਦਸਦੇ ਹੋਏ ਇਹ ਦਾਅਵਾ ਕੀਤਾ ਗਿਆ ਕਿ ਕਿਸੇ ਵੀ ਵਿਦਿਆਰਥਣ ਵੱਲੋੰ ਖੁਦਕੁਸ਼ੀ ਦੀ ਕੋਸ਼ਿਸ਼ ਨਹੀੰ ਕੀਤਾ ਗਈ।
ਯੂਨੀਵਰਸਿਟੀ ਪਹੁੰਚੇ ਪੰਜਾਬ ਮਹਿਲਾ ਕਮਿਸ਼ਨ ਦੀ ਚੇਅਰਪਰਸਨ ਮਨੀਸ਼ਾ ਗੁਲਾਟੀ ਨੇ ਇਹ ਦਾਅਵਾ ਸਭ ਤੋੰ ਪਹਿਲਾੰ ਕੀਤਾ। ਉਹਨਾੰ ਕਿਹਾ ਕਿ ਪੁਲਿਸ ਦੇ ਆਲਾ ਅਧਿਕਾਰੀਆੰ ਨਾਲ ਗੱਲ ਕਰਨ ਤੋੰ ਬਾਅਦ ਹੀ ਉਹ ਅਜਿਹਾ ਬਿਆਨ ਦੇ ਰਹੇ ਹਨ। ਬਾਅਦ ਵਿੱਚ ਯੂਨੀਵਰਸਿਟੀ ਪ੍ਰਸ਼ਾਸਨ ਅਤੇ ਮੋਹਾਲੀ ਪੁਲਿਸ ਦੇ SSP ਨੇ ਵੀ ਸੁਸਾਈਡ ਅਟੈੰਪਟ ਦੀ ਖ਼ਬਰ ਨੂੰ ਗਲਤ ਠਹਿਰਾਇਆ। ਉਹਨਾੰ ਕਿਹਾ ਕਿ 3-4 ਕੁੜੀਆੰ ਪ੍ਰਦਰਸ਼ਨ ਦੌਰਾਨ ਬੇਹੋਸ਼ ਹੋਈਆੰ ਹਨ, ਪਰ ਕਿਸੇ ਨੇ ਖੁਦਕੁਸ਼ੀ ਦੀ ਕੋਸ਼ਿਸ਼ ਨਹੀੰ ਕੀਤੀ। ਉਹਨਾੰ ਦਾਅਵਾ ਕੀਤਾ ਕਿ ਜਿਹੜੀਆੰ ਵੀਡੀਓਜ਼ ਵਾਇਰਲ ਹੋ ਰਹੀਆੰ ਹਨ, ਉਹ ਉਹਨਾੰ ਕੁੜੀਆੰ ਦੀਆੰ ਹੀ ਹਨ, ਜੋ ਬੇਹੋਸ਼ ਹੋਈਆੰ ਸਨ।
ਪੁਲਿਸ ਦੀ ਜਾੰਚ ‘ਚ ਮਾਮਲਾ ਕੁਝ ਹੋਰ ਹੀ ਨਿਕਲਿਆ
ਓਧਰ ਇਸ ਪੂਰੇ ਮਾਮਲੇ ਦੀ ਸ਼ੁਰੂਆਤੀ ਜਾੰਚ ਤੋੰ ਬਾਅਦ ਮੋਹਾਲੀ ਪੁਲਿਸ ਦੇ SSP ਵਿਵੇਕਸ਼ੀਲ ਸੋਨੀ ਨੇ ਦਾਅਵਾ ਕੀਤਾ ਕਿ ਮੁਲਜ਼ਮ ਕੁੜੀ ਵੱਲੋੰ ਕਿਸੇ ਵੀ ਦੂਜੀ ਕੁੜੀ ਦੀ ਵੀਡੀਓ ਨਹੀੰ ਬਣਾਈ ਗਈ। ਉਹਨਾੰ ਦਾਅਵਾ ਕੀਤਾ ਕਿ ਕਥਿਤ ਮੁਲਜ਼ਮ ਕੁੜੀ ਨੇ ਜੋ ਵੀਡੀਓ ਬਣਾਈ ਹੈ, ਉਹ ਉਸੇ ਕੁੜੀ ਦੀ ਆਪਣੀ ਵੀਡੀਓ ਹੈ, ਇਸ ਤੋਂ ਇਲਾਵਾ ਹੋਰ ਕਿਸੇ ਦੀ ਨਹੀਂ ਹੈ।
ਉਨ੍ਹਾਂ ਕਿਹਾ ਕਿ ਜਿਸ ਵੇਲੇ ਜਾਣਕਾਰੀ ਮਿਲੀ ਸੀ, ਤਾਂ ਦੱਸਿਆ ਗਿਆ ਸੀ ਕਿ ਹੋਰ ਕੁੜੀਆਂ ਦੀਆਂ ਵੀਡੀਓਜ਼ ਹੋ ਸਕਦੀਆਂ ਹਨ। ਇਸ ਲਈ ਐੱਫ਼ਆਈਆਰ ਦਰਜ ਕਰਕੇ ਜਾਂਚ ਸ਼ੁਰੂ ਕੀਤੀ ਹੈ। ਹੁਣ ਜਾਂਚ ਵਿਚ ਸਾਹਮਣੇ ਆਇਆ ਹੈ, ਸਿਰਫ਼ ਉਸ ਨੇ ਆਪਣੀ ਵੀਡੀਓ ਭੇਜੀ ਹੈ। ਤੇ ਜਿਸ ਨੂੰ ਇਹ ਵੀਡੀਓ ਭੇਜੀ ਹੈ, ਉਹ ਉਸਦਾ ਬੁਆਏਫਰੈੰਡ ਹੋ ਸਕਦਾ ਹੈ।
ਯੂਨੀਵਰਸਿਟੀ ਪ੍ਰਸ਼ਾਸਨ ਨੇ ਖਾਰਜ ਕੀਤੇ ਇਲਜ਼ਾਮ
MMS ਕਾੰਡ ਨਾਲ ਜੁੜੇ ਇਸ ਪੂਰੇ ਮਾਮਲੇ ‘ਚ ਯੂਨੀਵਰਸਿਟੀ ਪ੍ਰਸ਼ਾਸਨ ‘ਤੇ ਵੀ ਇਲਜ਼ਾਮ ਲੱਗਿਆ ਕਿ ਉਹਨਾੰ ਵੱਲੋੰ ਪਹਿਲਾੰ ਮਾਮਲਾ ਦਬਾਉਣ ਦੀ ਕੋਸ਼ਿਸ਼ ਕੀਤੀ ਗਈ। ਯੂਨੀਵਰਸਿਟੀ ਦੀਆੰ ਵਿਦਿਆਰਥਣਾੰ ਨੇ ਹੀ ਇਹ ਇਲਜ਼ਾਮ ਲਗਾਏ ਹਨ। ਹਾਲਾੰਕਿ ਯੂਨੀਵਰਸਿਟੀ ਪ੍ਰਸ਼ਾਸਨ ਇਹਨਾੰ ਸਾਰੇ ਇਲਜ਼ਾਮਾੰ ਨੂੰ ਖਾਰਜ ਕਰ ਰਿਹਾ ਹੈ। ਯੂਨੀਵਰਸਿਟੀ ਪ੍ਰਸ਼ਾਸਨ ਦਾ ਕਹਿਣਾ ਹੈ ਕਿ ਜੇਕਰ ਅਸੀੰ ਮਾਮਲਾ ਦਬਾਉਣ ਦੀ ਕੋਸ਼ਿਸ਼ ਕਰਦੇ, ਤਾੰ ਖੁਦ ਪੁਲਿਸ ਨੂੰ ਨਾ ਬੁਲਾਉੰਦੇ ਅਤੇ FIR ਦਰਜ ਨਾ ਕਰਵਾਉੰਦੇ।
ਯੂਨੀਵਰਸਿਟੀ ਵੱਲੋੰ ਵਿਦਿਆਰਥਣਾੰ ਉੱਪਰ ਲਾਠੀਚਾਰਜ ਦੇ ਇਲਜ਼ਾਮਾੰ ਨੂੰ ਵੀ ਖਾਰਜ ਕੀਤਾ ਗਿਆ ਹੈ। ਦਰਅਸਲ, ਕੁਝ ਵੀਡੀਓਜ਼ ਸਾਹਮਣੇ ਆਈਆੰ ਸਨ ਜਿਹਨਾੰ ਵਿੱਚ ਪ੍ਰਦਰਸ਼ਨ ਕਰ ਰਹੀਆੰ ਕੁੜੀਆੰ ‘ਤੇ ਲਾਠੀਚਾਰਜ ਕੀਤਾ ਜਾ ਰਿਹਾ ਸੀ। ਬਾਅਦ ਵਿੱਚ ਪ੍ਰਸ਼ਾਸਨ ਨੇ ਲਾਠੀਚਾਰਜ ਦੀਆੰ ਖ਼ਬਰਾੰ ਦਾ ਖੰਡਨ ਕੀਤਾ ਅਤੇ ਕਿਹਾ ਕਿ ਕੋਈ ਲਾਠੀਚਾਰਜ ਨਹੀੰ ਕੀਤਾ ਗਿਆ।
ਮੁਲਜ਼ਮ ਮੁੰਡਾ-ਕੁੜੀ ਦੀ ਚੈਟ ਵੀ ਆਈ ਸਾਹਮਣੇ
ਇਸ ਸਭ ਦੇ ਵਿਚਾਲੇ ਮੁਲਜ਼ਮ ਮੁੰਡਾ-ਕੁੜੀ ਦੀ ਚੈਟ ਵੀ ਸਾਹਮਣੇ ਆ ਰਹੀ ਹੈ, ਜਿਸ ਵਿੱਚ ਕੁੜੀ ਨੂੰ ਮੁਲਜ਼ਮ ਮੁੰਡਾ ਸਾਰੇ ਕਾਨਟੈਕਟ ਡਿਲੀਟ ਕਰਨ ਲਈ ਕਹਿ ਰਿਹਾ ਹੈ। ਉਸਨੇ ਕਿਹਾ ਕਿ ਇੱਕ ਵਾਰ ਵਿੱਚ ਸਭ ਕਲੀਅਰ ਕਰ ਦਿਓ। ਇਸ ਚੈਟ ਵਿੱਚ ਇੱਕ ਫੋਲਡਰ ਡਿਲੀਟ ਕਰਨ ਅਤੇ ਸਕ੍ਰੀਨਸ਼ਾਟ ਸੈੰਡ ਕਰਨ ਦਾ ਜ਼ਿਕਰ ਹੈ।
ਜਾੰਚ ਅਜੇ ਜਾਰੀ ਹੈ…!!
ਬਹਿਰਹਾਲ, ਪੂਰਾ ਮਾਮਲਾ ਇਸ ਵਕਤ ਪੁਲਿਸ ਦੇ ਆਲਾ ਅਧਿਕਾਰੀਆੰ ਦੀ ਨਿਗਰਾਨੀ ਵਿੱਚ ਹੈ। ਇਸ ਮਾਮਲੇ ਵਿੱਚ ਸ਼ਿਮਲਾ ‘ਚ ਰਹਿੰਦੇ ਮੁਲਜ਼ਮ ਮੁੰਡੇ ਦੀ ਗ੍ਰਿਫ਼ਤਾਰੀ ਤੋੰ ਬਾਅਦ ਕਈ ਹੋਰ ਅਹਿਮ ਖੁਲਾਸੇ ਹੋਣ ਦੀ ਸੰਭਾਵਨਾ ਹੈ ਅਤੇ ਇਸ ਵਿੱਚ ਹੋਰ ਵੀ ਨਵੇੰ ਟਵਿਸਟ ਸਾਹਮਣੇ ਆ ਸਕਦੇ ਹਨ।
