ਚੰਡੀਗੜ੍ਹ। ਪੰਜਾਬ ਦੀ ਸਿਆਸਤ ‘ਚ ਸ਼ੁੱਕਰਵਾਰ ਦਾ ਦਿਨ ਬੇਹੱਦ ਅਹਿਮ ਰਹਿਣ ਵਾਲਾ ਹੈ। ਲੰਮੀ ਖਿੱਚੋਤਾਣ ਤੋਂ ਬਾਅਦ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਅਤੇ ਪੰਜਾਬ ਕਾਂਗਰਸ ਦੇ ਨਵੇਂ ਥਾਪੇ ਗਏ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਇਕੱਠੇ ਇੱਕ-ਮੰਚ ‘ਤੇ ਨਜ਼ਰ ਆਉਣਗੇ। ਸੀਐੱਮ ਨੇ ਸਿੱਧੂ ਦੇ ਤਾਜਪੋਸ਼ੀ ਸਮਾਗਮ ਦਾ ਸੱਦਾ ਕਬੂਲ ਕਰ ਲਿਆ ਹੈ।
ਪੰਜਾਬ ਕਾਂਗਰਸ ਦੇ ਨਵੇਂ ਥਾਪੇ ਗਏ ਕਾਰਜਕਾਰੀ ਪ੍ਰਧਾਨ ਕੁਲਜੀਤ ਸਿੰਘ ਨਾਗਰਾ ਅਤੇ ਸੰਗਤ ਸਿੰਘ ਗਿਲਜੀਆਂ ਨੇ ਸੀਐੱਮ ਦੇ ਫਾਰਮ ਹਾਊਸ ਪਹੁੰਚ ਕੇ ਉਹਨਾਂ ਨੂੰ ਤਾਜਪੋਸ਼ੀ ਸਮਾਗਮ ਲਈ ਸੱਦਾ ਦਿੱਤਾ।
ਮੀਟਿੰਗ ਤੋਂ ਬਾਅਦ ਦੋਵੇਂ ਵਿਧਾਇਕਾਂ ਨੇ ਕਿਹਾ ਕਿ ਸੀਐੱਮ ਨੇ ਉਹਨਾਂ ਦਾ ਸੱਦਾ ਕਬੂਲ ਕਰ ਲਿਆ ਹੈ। ਕਾਬਿਲੇਗੌਰ ਹੈ ਕਿ ਕੈਪਟਨ ਨੂੰ ਭੇਜੇ ਗਏ ਸੱਦੇ ਵਿੱਚ 58 ਵਿਧਾਇਕਾਂ ਦੇ ਦਸਤਖਤ ਹਨ।
ਚਾਹ ਦੀ ਚੁਸਕੀ ਮਿਟਾਏਗੀ ਕੁੜੱਤਣ?
ਜ਼ਿਕਰੇਖਾਸ ਹੈ ਕਿ ਤਾਜਪੋਸ਼ੀ ਸਮਾਗਮ ਤੋਂ ਪਹਿਲਾਂ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਪਾਰਟੀ ਦੇ ਸਾਰੇ ਵਿਧਾਇਕਾਂ, ਸਾਂਸਦਾਂ ਅਤੇ ਸੀਨੀਅਰ ਪਾਰਟੀ ਮੈਂਬਰਾਂ ਨੂੰ ਸਵੇਰੇ 10 ਵਜੇ ਪੰਜਾਬ ਭਵਨ ਵਿਖੇ ਚਾਹ ਲਈ ਸੱਦਿਆ ਗਿਆ ਹੈ। ਇਸ ਉਪਰੰਤ ਸਾਰੇ ਇਕੱਠੇ ਹੀ ਸਿੱਧੂ ਅਤੇ ਉਹਨਾਂ ਦੀ ਨਵੀਂ ਟੀਮ ਦੀ ਤਾਜਪੋਸ਼ੀ ਕਾਂਗਰਸ ਭਵਨ ਜਾਣਗੇ। ਸੀਐੱਮ ਨੇ ਖੁਦ ਸੋਸ਼ਲ ਮੀਡੀਆ ‘ਤੇ ਇਸ ਬਾਰੇ ਜਾਣਕਾਰੀ ਦਿੱਤੀ ਹੈ।
ਬਹਿਰਹਾਲ, ਹੁਣ ਵੇਖਣਾ ਦਿਲਚਸਪ ਰਹੇਗਾ ਕਿ ਕੈਪਟਨ-ਸਿੱਧੂ ਦੀ ਸ਼ੁੱਕਰਵਾਰ ਨੂੰ ਹੋਣ ਜਾ ਰਹੀ ਮੁਲਾਕਾਤ ਕੀ ਰੰਗ ਲਿਆਂਦੀ ਹੈ। ਕੀ ਚਾਹ ਦੀ ਚੁਸਕੀ ਦੋਵੇਂ ਆਗੂਆਂ ਵਿਚਾਲੇ ਕੁੜੱਤਣ ਖਤਮ ਕਰਕੇ ਚਾਸ਼ਨੀ ਦਾ ਕੰਮ ਕਰੇਗੀ…ਜਾਂ ਫਿਰ ਕੈਪਟਨ ਦਾ ਸਿੱਧੂ ਦੀ ਤਾਜਪੋਸ਼ੀ ਲਈ ਸੱਦਾ ਕਬੂਲ ਕਰਨਾ ਮਹਿਜ਼ ਇੱਕ ਸ਼ਿਸ਼ਟਾਚਾਰ ਹੀ ਸਾਬਿਤ ਹੋਵੇਗਾ ਅਤੇ ਇਸ ਸਮਾਗਮ ਤੋਂ ਬਾਅਦ ਵੀ ਇਹ ਦੂਰੀਆਂ ਇਸੇ ਤਰ੍ਹਾਂ ਬਰਕਰਾਰ ਰਹਿਣਗੀਆਂ।
