ਬਿਓਰੋ। 2022 ਦੀਆਂ ਚੋਣਾਂ ਵਿੱਚ ਜੇਕਰ ਕਾਂਗਰਸ ਸੱਤਾ ‘ਚ ਆਈ, ਤਾਂ ਸਿੱਧੂ ਨੂੰ ਵੱਡੀ ਜਿੰਮੇਵਾਰੀ ਮਿਲੇਗੀ। ਜੇਕਰ ਨਹੀਂ, ਤਾਂ ਉਸਦੇ ਲਈ ਸਿੱਧੂ ਦੀ ਕੋਈ ਜਵਾਬਦੇਹੀ ਨਹੀਂ ਹੋਵੇਗੀ। ਕੁਝ ਇਸੇ ਤਰ੍ਹਾਂ ਦੀ ਸ਼ਰਤ ‘ਤੇ ਨਵਜੋਤ ਸਿੰਘ ਸਿੱਧੂ ਨੂੰ ਚਰਨਜੀਤ ਸਿੰਘ ਚੰਨੀ ਦਾ ਚਿਹਰਾ ਬਤੌਰ ਸੀਐੱਮ ਫੇਸ ਅੱਗੇ ਕਰਨ ਲਈ ਮਨਾਇਆ ਗਿਆ। ਸੂਤਰ ਦੱਸਦੇ ਹਨ ਕਿ ਸਰਕਾਰ ਬਣਨ ‘ਤੇ ਉਹਨਾਂ ਨੂੰ ਵੱਡੀ ਜਿੰਮੇਵਾਰੀ ਦੇਣ ਦਾ ਰਾਹੁਲ ਗਾਂਧੀ ਨੇ ਵਾਅਦਾ ਕੀਤਾ ਹੈ। ਹਾਲਾਂਕਿ ਚੋਣਾਂ ਵਿੱਚ ਨੁਕਸਾਨ ਨਾ ਹੋਵੇ, ਇਸ ਲਈ ਇਸ ਫਾਰਮੂਲੇ ਨੂੰ ਫਿਲਹਾਲ ਸੀਕ੍ਰੇਟ ਰੱਖਣ ਲਈ ਕਿਹਾ ਗਿਆ ਹੈ।
ਬੰਦ ਕਮਰਾ ਮੀਟਿੰਗ ‘ਚ ਲੱਗੀ ਫਾਰਮੂਲੇ ‘ਤੇ ਮੁਹਰ
ਦਰਅਸਲ, ਐਤਵਾਰ ਨੂੰ ਰਾਹੁਲ ਗਾਂਧੀ ਦੀ ਰੈਲੀ ਤੋਂ ਪਹਿਲਾਂ ਉਹਨਾਂ ਵੱਲੋਂ ਸਿੱਧੂ ਨੂੰ ਮਨਾਉਣ ਲਈ ਬੰਦ ਕਮਰਾ ਮੀਟਿੰਗ ਕੀਤੀ ਗਈ ਸੀ। ਇੱਕ ਘੰਟੇ ਤੋਂ ਵੀ ਵੱਧ ਸਮੇਂ ਤੱਕ ਚੱਲੀ ਇਹ ਮੀਟਿੰਗ ਮਹਿਜ਼ ਰਾਹੁਲ ਅਤੇ ਸਿੱਧੂ ਵਿਚਕਾਰ ਸੀ। ਚਰਨਜੀਤ ਚੰਨੀ ਨੂੰ ਇਸ ਤੋਂ ਦੂਰ ਰੱਖਿਆ ਗਿਆ ਸੀ। ਇਸ ਮੀਟਿੰਗ ਦੌਰਾਨ ਸਿੱਧੂ ਨੇ ਰਾਹੁਲ ਨੂੰ ਪੰਜਾਬ ਦੇ ਹਾਲਾਤ ਸਮਝਾਅ ਅਤੇ ਚੋਣਾਂ ਵਿੱਚ ਬਹੁਮਤ ਦਵਾਉਣ ਦਾ ਦਾਅਵਾ ਵੀ ਠੋਕਿਆ। ਹਾਲਾਂਕਿ ਰਾਹੁਲ ਨੇ SC ਪਾਲੀਟਿਕਸ ਅਤੇ ਅਮਰਿੰਦਰ ਸਿੰਘ ਦੇ CM ਰਹਿੰਦੇ ਹੋਈ ਨੁਕਸਾਨ ਦੀ ਭਰਪਾਈ ਬਾਰੇ ਗੱਲ ਕੀਤੀ।
ਖੈਰ, ਇਸ ਮੀਟਿੰਗ ਵਿੱਚ ਫੈਸਲਾ ਹੋਇਆ ਕਿ ਸਰਕਾਰ ਦੇ ਸੱਤਾ ਵਿੱਚ ਆਉਣ ‘ਤੇ ਪੰਜਾਬ ਵਿੱਚ ਮਾਫੀਆ ਸਿੱਧੂ ਹੀ ਖਤਮ ਕਰਨਗੇ। ਯਾਨੀ ਸਿੱਧੂ ਨੂੰ ਨਵੀਂ ਸਰਕਾਰ ਵਿੱਚ ਐਕਸਾਈਜ਼ ਅਤੇ ਮਾਈਨਿੰਗ ਦਾ ਮੰਤਰਾਲਾ ਦਿੱਤਾ ਜਾਵੇਗਾ। ਸ਼ਰਤ ਇਹ ਵੀ ਰੱਖੀ ਗਈ ਕਿ ਇਸ ਮਹਿਕਮੇ ਵਿੱਚ ਸੀਐੱਮ ਦਾ ਇੱਕ ਹੱਦ ਤੱਕ ਕੋਈ ਵੀ ਦਖਲ ਨਹੀਂ ਹੋਵੇਗਾ। ਸਿੱਧੂ ਦੀ ਭੂਮਿਕਾ ਡਿਪਟੀ ਸੀਐੱਮ ਦੀ ਵੀ ਹੋ ਸਕਦੀ ਹੈ। ਚਰਚਾ ਇਹ ਵੀ ਹੈ ਕਿ ਇਸ ਤੋਂ ਬਾਅਦ ਸਿੱਧੂ ਨੇ ਦਿੱਲੀ ਤੋਂ ਆਏ ਲੀਡਰਾਂ ਨੂੰ ਵੀ ਸਾਫ ਕਹਿ ਦਿੱਤ ਕਿ ਚੋਣਾਂ ਵਿੱਚ ਜੇਕਰ ਕਾਂਗਰਸ ਪਾਰਟੀ ਹਾਰੀ, ਤਾਂ ਜਿੰਮੇਵਾਰੀ ਉਹਨਾਂ ਦੀ ਨਹੀਂ ਹੋਵੇਗੀ।
ਸਿੱਧੂ ਦੇ ਪੰਜਾਬ ਮਾਡਲ ਦਾ ਵੱਡਾ ਹਿੱਸਾ ਹੈ ਮਾਫੀਆ
ਸਿੱਧੂ ਅਤੇ ਰਾਹੁਲ ਵਿਚਕਾਰ ਬਣੀ ਇਹ ਸਹਿਮਤੀ ਇਸ ਲਈ ਵੀ ਅਹਿਮ ਹੈ, ਕਿਉਂਕਿ ਪੰਜਾਬ ‘ਚੋਂ ਮਾਫੀਆ ਰਾਜ ਖਤਮ ਕਰਨਾ ਸਿੱਧੂ ਦਾ ਵੱਡਾ ਏਜੰਡਾ ਹੈ। ਉਹਨਾਂ ਦੇ ਪੰਜਾਬ ਮਾਡਲ ਵਿੱਚ ਵੀ ਮਾਈਨਿੰਗ ਮਾਫੀਆ ਅਤੇ ਸ਼ਰਾਬ ਮਾਫੀਆ ਨੂੰ ਖਤਮ ਕਰਨਾ ਵੱਡੇ ਪੱਧਰ ‘ਤੇ ਸ਼ਾਮਲ ਹੈ। ਇਸਦੇ ਲਈ ਉਹ ਲਿਕਰ ਕਾਰਪੋਰੇਸ਼ਨ ਅਤੇ ਪੰਜਾਬ ਸਟੇਟ ਰੇਤ ਮਾਈਨਿੰਗ ਕਾਰਪੋਰੇਸ਼ਨ ਬਣਾਏ ਜਾਣ ਦਾ ਜਿਕਰ ਕਰਦੇ ਹਨ। ਸਿੱਧੂ ਅਕਸਰ ਇਹ ਵੀ ਕਹਿੰਦੇ ਹਨ ਕਿ ਪੰਜਾਬ ‘ਚੋਂ ਮਾਫੀਆ ਖਤਮ ਹੋਣ ਦੇ ਨਾਲ ਪੰਜਾਬ ਨੂੰ 50 ਹਜਾਰ ਕਰੋੜ ਦੀ ਕਮਾਈ ਹੋ ਸਕਦੀ ਹੈ।
ਕਾਂਗਰਸ ਚੋਣ ਹਾਰੀ, ਤਾਂ ਕੀ…?
ਅੰਦਰਲੀ ਗੱਲ ਕੁਝ ਵੀ ਹੋਵੇ, ਸਾਫ਼ ਹੈ ਕਿ ਚੋਣਾਂ ਵਿੱਚ ਹਾਰ-ਜਿੱਤ ਹੁਣ ਚੰਨੀ ਦੀ ਜਿੰਮੇਵਾਰੀ ਹੈ। ਸਿੱਧੂ ਪਿੱਛੇ ਜ਼ਰੂਰ ਹਟੇ ਹਨ, ਪਰ ਜੇਕਰ ਕਾਂਗਰਸ ਸੱਤਾ ‘ਚ ਨਾ ਆਈ ਤਾਂ ਅਗਲੇ 5 ਸਾਲਾਂ ਦੌਰਾਨ ਉਹਨਾਂ ਦਾ ਕਾਂਗਰਸ ‘ਚ ਹੀ ਵੱਡੇ ਸਿਆਸੀ ਦਿੱਗਜ ਦੇ ਤੌਰ ‘ਤੇ ਉਭਰਨਾ ਤੈਅ ਹੈ। ਉਸ ਵਕਤ ਸਿੱਧੂ ਦੇ ਮੁਕਾਬਲੇ ਕੋਈ ਵੀ ਖੜ੍ਹਾ ਨਹੀਂ ਹੋ ਸਕੇਗਾ। ਇਥੋਂ ਤੱਕ ਕਿ ਚੰਨੀ ਵੀ ਨਹੀਂ, ਕਿਉਂਕਿ ਕਾਂਗਰਸ ਹਾਰੀ ਤਾਂ ਚੰਨੀ ਹਾਸ਼ੀਏ ‘ਤੇ ਚਲੇ ਜਾਣਗੇ।
