ਬਿਓਰੋ। ਕਾਂਗਰਸ ਹਾਈਕਮਾਂਡ ਵੱਲੋਂ ਵਾਰ-ਵਾਰ ਸਮੂਹਿਕ ਅਗਵਾਈ ਵਿੱਚ ਚੋਣ ਲੜਨ ਦੀ ਗੱਲ ਕਹਿਣ ਦੇ ਬਾਵਜੂਦ ਕਾਂਗਰਸ ਵਿੱਚ ਸੀਐੱਮ ਫੇਸ ਨੂੰ ਲੈ ਕੇ ਸ਼ੁਰੂ ਹੋਇਆ ਘਮਸਾਣ ਥੰਮਦਾ ਨਜ਼ਰ ਨਹੀਂ ਆ ਰਿਹਾ। ਇਸ ਮੁਕਾਬਲੇ ਵਿੱਚ ਨਵਜੋਤ ਸਿੱਧੂ ਇਕੱਲੇ ਪੈਂਦੇ ਨਜ਼ਰ ਆ ਰਹੇ ਹਨ। ਓਧਰ ਚੰਨੀ ਦੇ ਸਮਰਥਨ ਵਿੱਚ ਮੰਤਰੀ ਲਾਮਬੰਦ ਹੋਣ ਲੱਗੇ ਹਨ ਅਤੇ ਖੁੱਲ੍ਹ ਕੇ ਚੰਨੀ ਦੇ ਹੱਕ ਵਿੱਚ ਅਵਾਜ਼ ਬੁਲੰਦ ਕਰ ਰਹੇ ਹਨ।
ਕਾਂਗਰਸ ਦੇ ਸੀਨੀਅਰ ਆਗੂ ਤੇ ਕੈਬਨਿਟ ਮੰਤਰੀ ਬ੍ਰਹਮ ਮਹਿੰਦਰਾ ਨੇ ਕਿਹਾ ਕਿ ਜਿਸ ਵਿਅਕਤੀ ਨੇ ਆਸ ਨਾਲੋਂ ਵੀ ਵੱਧ ਕੇ ਕੰਮ ਕੀਤਾ ਹੈ, ਉਹ ਇੱਕ ਹੀ ਹੈ ਤੇ ਹਾਈਕਮਾਂਡ ਨੁੰ ਸਪੱਸ਼ਟ ਫੈਸਲਾ ਲੈਣਾ ਚਾਹੀਦਾ ਹੈ ਤੇ ਪਾਰਟੀ ਵਰਕਰਾਂ ਵਿੱਚ ਦੁਵਿਧਾ ਨਹੀਂ ਰਹਿਣ ਦੇਣੀ ਚਾਹੀਦੀ। ਉਹਨਾਂ ਕਿਹਾ ਕਿ ਕਾਂਗਰਸ ਪਾਰਟੀ ਨੇ ਹੀ 2012 ਅਤੇ 2017 ਦੀਆਂ ਚੋਣਾਂ ਵਿੱਚ ਮੁੱਖ ਮੰਤਰੀ ਦੇ ਅਹੁਦੇ ਲਈ ਚਿਹਰੇ ਦਾ ਐਲਾਨ ਕਰਨ ਦੀ ਰਵਾਇਤ ਸ਼ੁਰੂ ਕੀਤੀ ਸੀ। ਇਹ ਰਵਾਇਤ ਹੁਣ ਵੀ ਜਾਰੀ ਰੱਖਣੀ ਚਾਹੀਦੀ ਹੈ ਤੇ ਮੁੱਖ ਮੰਤਰੀ ਦੇ ਅਹੁਦੇ ਲਈ ਚਿਹਰੇ ਦਾ ਐਲਾਨ ਬਿਨਾਂ ਹੋਰ ਦੇਰੀ ਦੇ ਕੀਤਾ ਜਾਣਾ ਚਾਹੀਦਾ ਹੈ।
ਤ੍ਰਿਪਤ ਬਾਜਵਾ ਵੀ ਚੰਨੀ ਦੇ ਸਮਰਥਨ ‘ਚ
ਕੈਬਨਿਟ ਮੰਤਰੀ ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਨੇ ਕਿਹਾ, “ਮੈਂ ਵੀ ਚਾਹੁੰਦਾ ਹਾਂ ਕਿ ਸੀਐੱਮ ਫੇਸ ਅਨਾਊਂਸ ਕਰਕੇ ਹੀ ਕਾਂਗਰਸ ਨੂੰ ਮੈਦਾਨ ਵਿੱਚ ਜਾਣਾ ਚਾਹੀਦਾ ਹੈ।“ ਉਨ੍ਹਾਂ ਕਿਹਾ, “ਹਾਲਾਂਕਿ ਫੈਸਲਾ ਹਾਈਕਮਾਂਡ ਨੇ ਕਰਨਾ ਹੈ, ਪਰ ਮੇਰੀ ਰਾਏ ਹੈ ਕਿ ਚਰਨਜੀਤ ਸਿੰਘ ਚੰਨੀ ਨੂੰ CM ਫੇਸ ਐਲਾਨ ਦੇਣਾ ਚਾਹੀਦਾ ਹੈ।“ ਹਾਲਾਂਕਿ ਉਹਨਾਂ ਨਾਲ ਹੀ ਕਿਹਾ ਕਿ ਪਾਰਟੀ ਜੋ ਵੀ ਫੈਸਲਾ ਕਰੇਗੀ, ਉਹ ਮਨਜ਼ੂਰ ਹੋਵੇਗਾ।
ਰੰਧਾਵਾ ਵੀ ਚੰਨੀ ਦੇ ਨਾਲ
ਓਧਰ ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ ਨੇ ਇਕ ਟੀਵੀ ਇੰਟਰਵਿਊ ਵਿੱਚ ਸੀਐੱਮ ਫੇਸ ਨੂੰ ਲੈ ਕੇ ਪੁੱਛੇ ਸਵਾਲ ‘ਤੇ ਕਿਹਾ ਕਿ ਸਾਡਾ ਸੀਐੱਮ ਚੰਨੀ ਹੈ ਅਤੇ ਇਸ ਵਿੱਚ ਕੋਈ ਦੋ ਰਾਏ ਨਹੀਂ ਹੈ। ਦੱਸ ਦਈਏ ਕਿ ਰੰਧਾਵਾ ਪਿਛਲੇ ਦਿਨੀਂ ਸਿੱਧੂ ਨੂੰ ਲੈ ਕੇ ਖੁੱਲ੍ਹ ਕੇ ਆਪਣੀ ਨਾਰਾਜ਼ਗੀ ਜਤਾ ਚੁੱਕੇ ਹਨ।
ਸਿੱਧੂ ਨਾਲ ਨਜ਼ਰ ਨਹੀਂ ਆ ਰਹੇ ਦਿੱਗਜ
ਦਿਲਚਸਪ ਕਿ ਕਾਂਗਰਸ ਦੀ ਇਸ ਅੰਦਰੂਨੀ ਜੰਗ ਵਿੱਚ ਸਿੱਧੂ ਇਕੱਲੇ ਪੈਂਦੇ ਨਜ਼ਰ ਆ ਰਹੇ ਹਨ। ਇਥੋਂ ਤੱਕ ਕਿ ਕੈਪਟਨ ਦੇ ਤਖਤਾਪਲਟ ਵਿੱਚ ਜੋ ਕਾਂਗਰਸੀ ਕਦੇ ਸਿੱਧੂ ਦੇ ਨਾਲ ਕਦਮਤਾਲ ਕਰ ਰਹੇ ਸਨ, ਉਹ ਵੀ ਹੁਣ ਨਾਲ ਨਜ਼ਰ ਨਹੀਂ ਆ ਰਹੇ। ਰਾਜਾ ਵੜਿੰਗ ਅਤੇ ਪਰਗਟ ਸਿੰਘ ਵਰਗੇ ਸਿੱਧੂ ਦੇ ਕਰੀਬੀ ਵੀ ਉਨ੍ਹਾਂ ਤੋਂ ਕਿਨਾਰਾ ਕਰਦੇ ਨਜ਼ਰ ਆ ਰਹੇ ਹਨ। ਅਜਿਹੇ ਵਿਚ ਸਿੱਧੂ ਦੀ ਰਾਹ ਆਸਾਨ ਨਹੀਂ ਹੈ।
ਪਹਿਲਾਂ ਸਿੱਧੂ ਨੇ ਹੀ ਚੁੱਕੀ ਸੀ CM ਫੇਸ ਐਲਾਨਣ ਦੀ ਮੰਗ
ਸੀਐੱਮ ਫੇਸ ਨੂੰ ਲੈ ਕੇ ਚੱਲ ਰਹੀ ਇਹ ਸਿਆਸੀ ਜੰਗ ਦਰਅਸਲ ਸਿੱਧੂ ਨੇ ਹੀ ਸ਼ੁਰੂ ਕੀਤੀ ਸੀ। ਹਾਲ ਹੀ ਵਿੱਚ ਸਿੱਧੂ ਨੇ ਕਿਹਾ ਸੀ ਕਿ ਕਾਂਗਰਸ ਨੂੰ ਆਪਣੀ ਬਰਾਤ ਦਾ ਲਾੜਾ ਐਲਾਨ ਦੇਣਾ ਚਾਹੀਦਾ ਹੈ। ਜੇਕਰ ਪਾਰਟੀ ਅਜਿਹਾ ਨਹੀਂ ਕਰਦੀ, ਤਾਂ ਉਸ ਨੂੰ ਨੁਕਸਾਨ ਹੋਵੇਗਾ। ਪਰ ਜਦੋਂ ਹਾਈਕਮਾਂਡ ਦਾ ਸਾਥ ਸਿੱਧੂ ਨੂੰ ਨਹੀਂ ਮਿਲਿਆ, ਤਾਂ ਉਹਨਾਂ ਦੇ ਸੁਰ ਬਦਲ ਗਏ। ਹੁਣ ਸਿੱਧੂ ਕਹਿ ਰਹੇ ਹਨ ਕਿ ਹਾਈਕਮਾਂਡ ਸਿਆਣੀ ਹੈ ਤੇ ਪੂਰੀ ਰਣਨੀਤੀ ਦੇ ਤਹਿਤ ਕੰਮ ਕਰ ਰਹੀ ਹੈ।
ਬਿਨ੍ਹਾਂ ਚਿਹਰੇ ਦੇ ਮੈਦਾਨ ਵਿੱਚ ਕਾਂਗਰਸ
ਬਹਿਰਹਾਲ, ਚੋਣ ਦੰਗਲ ਵਿੱਚ ਕਾਂਗਰਸ CM ਫੇਸ ਐਲਾਨ ਕਰਨ ਤੋਂ ਬੱਚ ਰਹੀ ਹੈ। ਪਾਰਟੀ ਦੇ ਸਾਹਮਣੇ ਸਿੱਧੂ ਤੇ ਚੰਨੀ ਵਿੱਚੋਂ ਕਿਸੇ ਇੱਕ ਨੂੰ ਚੁਣਨਾ ਮੁਸ਼ਕਿਲ ਹੈ। ਦੱਸ ਦਈਏ ਕਿ ਆਮ ਆਦਮੀ ਪਾਰਟੀ ਭਗਵੰਤ ਮਾਨ ਨੂੰ ਆਪਣਾ CM ਫੇਸ ਐਲਾਨ ਚੁੱਕੀ ਹੈ ਅਤੇ ਅਕਾਲੀ ਦਲ ਪਹਿਲਾਂ ਹੀ ਸੁਖਬੀਰ ਬਾਦਲ ਦੇ ਚਿਹਰੇ ਦੇ ਨਾਲ ਮੈਦਾਨ ਵਿੱਚ ਹੈ। ਅਜਿਹੇ ਵਿੱਚ ਕਾਂਗਰਸ ‘ਤੇ ਸੀਐੱਮ ਫੇਸ ਐਲਾਨੇ ਜਾਣ ਦਾ ਦਬਾਅ ਲਗਾਤਾਰ ਵਧਦਾ ਜਾ ਰਿਹਾ ਹੈ।
