ਬਿਓਰੋ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਲਈ ਹੋਈ ਵੋਟਿੰਗ ਤੋਂ ਬਾਅਦ ਚੰਡੀਗੜ੍ਹ ਵਿੱਚ ਕਾਂਗਰਸ ਦਾ ਮੰਥਨ ਹੋਇਆ, ਜਿਸ ਵਿੱਚ ਸੀਐੱਮ ਚਰਨਜੀਤ ਚੰਨੀ ਸਮੇਤ ਕਈ ਮੰਤਰੀ ਨਜ਼ਰ ਆਏ, ਪਰ ਨਵਜੋਤ ਸਿੱਧੂ ਗੈਰ-ਹਾਜ਼ਰ ਰਹੇ। ਇਸ ਮੀਟਿੰਗ ਵਿੱਚ ਪੰਜਾਬ ਕਾਂਗਰਸ ਦੇ ਇੰਚਾਰਜ ਹਰੀਸ਼ ਚੌਧਰੀ, ਸੀਐੱਮ ਚਰਨਜੀਤ ਸਿੰਘ ਚੰਨੀ, ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ, ਮੰਤਰੀ ਪਰਗਟ ਸਸਿੰਘ, ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ, ਸੁਖ ਸਰਕਾਰੀਆ ਅਤੇ ਭਾਰਤ ਭੂਸ਼ਣ ਆਸ਼ੂ ਸਮੇਤ ਕਈ ਵੱਡੇ ਆਗੂ ਮੌਜੂਦ ਸਨ।
ਸੂਤਰਾਂ ਦੀ ਮੰਨੀਏ, ਤਾਂ ਕਾਂਗਰਸ ਦਾ ਮੰਨਣਾ ਹੈ ਕਿ ਦੋਆਬਾ ਵਿੱਚ ਪਾਰਟੀ ਚੰਗਾ ਪ੍ਰਦਰਸ਼ਨ ਕਰ ਸਕਦੀ ਹੈ। ਇਥੇ 23 ਸੀਟਾਂ ਹਨ, ਜਿਹਨਾਂ ਵਿੱਚੋਂ ਕਾਂਗਰਸ ਨੇ ਪਿਛਲੀ ਵਾਰ 15 ਸੀਟਾਂ ਜਿੱਤੀਆਂ ਸਨ। ਇਸ ਵਾਰ ਵੀ ਕਾਂਗਰਸ ਨੂੰ ਇਥੋਂ ਚੰਗੀਆਂ ਸੀਟਾਂ ਜਿੱਤਣ ਦੀ ਉਮੀਦ ਹੈ। ਮਾਝਾ ਵਿੱਚ ਪਿਛਲੀ ਵਾਰ ਕਾਂਗਰਸ 25 ਵਿੱਚੋਂ 22 ਸੀਟਾਂ ਜਿੱਤੀ ਸੀ। ਇਸ ਵਾਰ ਵੀ ਕਾਂਗਰਸ ਇਥੇ ਬਿਹਤਰ ਕਰਨ ਦੀ ਉਮੀਦ ਲਗਾ ਰਹੀ ਹੈ।
ਮਾਲਵਾ ਵਿੱਚ ਪਿਛਲੀ ਵਾਰ ਕਾਂਗਰਸ ਨੇ 69 ਵਿੱਚੋਂ 40 ਸੀਟਾਂ ਜਿੱਤੀਆਂ ਸਨ। ਇਥੇ ਬੰਪਰ ਵੋਟਿੰਗ ਹੋਈ ਹੈ, ਇਸ ਲਈ ਕਾਂਗਰਸ ਨੂੰ ਨੁਕਸਾਨ ਦੀ ਚਿੰਤਾ ਹੈ। ਹਾਲਾਂਕਿ ਇਹ ਵੀ ਅਨੁਮਾਨ ਹੈ ਕਿ ਬੇਸ਼ੱਕ ਉਹ ਪਿਛਲੀ ਵਾਰ ਦੀ ਤਰ੍ਹਾਂ 40 ਸੀਟਾਂ ਨਾ ਜਿੱਤੇ, ਪਰ ਕੁਝ ਨਵੀਆਂ ਸੀਟਾਂ ਜਿੱਤ ਸਕਦੇ ਹਨ। ਕਾਂਗਰਸ ਨੂੰ ਉਮੀਦ ਹੈ ਕਿ ਸੀਐੱਮ ਚੰਨੀ ਦੇ ਚਲਦੇ ਕੁਝ SC ਵੋਟ ਬੈਂਕ ਜ਼ਰੂਰ ਉਹਨਾਂ ਦੇ ਹੱਕ ਵਿੱਚ ਆਵੇਗਾ। ਪਿਛਲੀ ਵਾਰ ਕਾਂਗਰਸ ਨੂੰ 77 ਸੀਟਾਂ ਮਿਲੀਆਂ ਸਨ, ਇਸ ਵਾਰ ਕਾਂਗਰਸ ਦਾ ਫੋਕਸ ਬਹੁਮਤ ਦੇ 59 ਦੇ ਅੰਕੜੇ ਤੱਕ ਪਹੁੰਚਣਾ ਹੈ।
ਸਿੱਧੂ ਨੂੰ ਦਰਕਿਨਾਰ ਕਰਕੇ ਚੰਨੀ ‘ਤੇ ਖੇਡਿਆ ਦਾਅ
ਕਾਂਗਰਸ ਨੇ ਇਹਨਾਂ ਚੋਣਾਂ ਵਿੱਚ ਨਵਜੋਤ ਸਿੰਘ ਸਿੱਧੂ ਨੂੰ ਦਰਕਿਨਾਰ ਕਰ ਦਿੱਤਾ ਸੀ। ਉਹ ਲਗਾਤਾਰ ਸੀਐੱਮ ਚਿਹਰੇ ‘ਤੇ ਦਾਅਵੇਦਾਰੀ ਠੋਕ ਰਹੇ ਸਨ। ਕਾਂਗਰਸ ਨੇ ਸਿੱਧੂ ਦੀ ਥਾਂ ਸੀਐੱਮ ਚਰਨਜੀਤ ਸਿੰਘ ਚੰਨੀ ‘ਤੇ ਦਾਅ ਖੇਡਿਆ। ਇਸਦੀ ਵੱਡੀ ਵਜ੍ਹਾ ਦੋਆਬਾ ਦਾ ਵੋਟ ਬੈਂਕ ਹੈ, ਜਿਸ ਵਿੱਚ ਫਿਲਹਾਲ ਚੰਨੀ ਫੈਕਟਰ ਨਜ਼ਰ ਆਇਆ ਹੈ। ਹਾਲਾਂਕਿ ਪੰਜਾਬ ਦੇ ਵੋਟਰਾਂ ਨੇ ਕੀ ਫੈਸਲਾ ਕੀਤਾ ਹੈ, ਇਸਦਾ ਪਤਾ 10 ਮਾਰਚ ਨੂੰ ਹੀ ਲੱਗੇਗਾ।
