ਚੰਡੀਗੜ੍ਹ। ਪੰਜਾਬ ਵਿੱਚ ਜਿਸ ਤਰ੍ਹਾਂ ਕਾਂਗਰਸ ਹਾਈਕਮਾਂਡ ਨੇ ਸਿੱਧੂ ਨੂੰ ਜਿਸ ਤਰ੍ਹਾਂ ਪ੍ਰੋਜੈਕਟ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ, ਉਸ ਤੋਂ ਸਾਬਕਾ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਕਿਸ ਕਦਰ ਖਫਾ ਹਨ, ਇਹ ਉਹਨਾਂ ਦੇ ਬਿਆਨਾਂ ਤੋਂ ਸਾਫ ਝਲਕਦਾ ਹੈ। ਕੈਪਟਨ ਦੇ ਇਹਨਾਂ ਬਿਆਨਾਂ ਤੋਂ ਬਾਅਦ ਕਾਂਗਰਸ ਤੇ ਕੈਪਟਨ ਦੀ ਲੜਾਈ ਚਾਰ ਕਦਮ ਹੋਰ ਅੱਗੇ ਵਧਦੀ ਨਜ਼ਰ ਆ ਰਹੀ ਹੈ।
ਸਿਆਸਤ ‘ਚ ਗੁੱਸੇ ਤੇ ਬਦਲੇ ਦੀ ਕੋਈ ਥਾਂ ਨਹੀਂ- ਕਾਂਗਰਸ
ਕੈਪਟਨ ਵੱਲੋਂ ਬੀਤੇ ਦਿਨ ਸਿੱਧੂ, ਰਾਹੁਲ ਗਾਂਧੀ ਤੇ ਪ੍ਰਿਅੰਕਾ ਗਾਂਧੀ ਖਿਲਾਫ਼ ਜਾਰੀ ਕੀਤੇ ਬਿਆਨ ‘ਤੇ ਬੋਲਦਿਆਂ ਕਾਂਗਰਸ ਬੁਲਾਰੇ ਸੁਪ੍ਰਿਆ ਸ਼੍ਰੀਨੇਤ ਨੇ ਕਿਹਾ, “ਸਿਆਸਤ ਵਿੱਚ ਗੁੱਸੇ, ਈਰਖਾ ਅਤੇ ਬਦਲੇ ਦੀ ਭਾਵਨਾ ਦੀ ਕੋਈ ਥਾਂ ਨਹੀਂ ਹੈ। ਅਸੀਂ ਉਮੀਦ ਕਰਦੇ ਹਾਂ ਕਿ ਕੈਪਟਨ ਆਪਣੀਆਂ ਕਹੀਆਂ ਗੱਲਾਂ ‘ਤੇ ਸਮਝਦਾਰੀ ਵਿਖਾਉਂਦੇ ਹੋਏ ਵਿਚਾਰ ਕਰਨਗੇ।” ਉਹਨਾਂ ਕਿਹਾ ਕਿ ਕੈਪਟਨ ਕਾਂਗਰਸ ਪਾਰਟੀ ਦੇ ਮਜਬੂਤ ਯੋਧਾ ਹਨ। ਕਾਂਗਰਸ ਨੇ ਉਹਨਾਂ ਨੂੰ 9 ਸਾਲ 9 ਮਹੀਨੇ ਮੁੱਖ ਮੰਤਰੀ ਬਣਿਆ ਹੈ।
ਕੈਪਟਨ ਨੂੰ ਇਸ਼ਾਰਾ…ਪਾਰਟੀ ਛੱਡਣਾ ਚਾਹੁਣ ਤਾਂ ਜਾ ਸਕਦੇ ਹਨ !!
ਇਸ ਦੌਰਾਨ ਸੁਪ੍ਰਿਆ ਨੇ ਕਿਹਾ, ”ਅਸੀਂ ਪਾਰਟੀ ਦੀ ਵਿਚਾਰਧਾਰਾ ਦੇ ਨਾਲ ਖੜ੍ਹੇ ਹਾਂ। ਜੋ ਇਸ ਲੜਾਈ ਵਿੱਚ ਸਾਡੇ ਨਾਲ ਖੜ੍ਹਿਆ ਹੈ, ਉਸਦੇ ਨਾਲ ਖੜ੍ਹੇ ਰਹਾਂਗੇ। ਜੋ ਸਾਨੂੰ ਛੱਡ ਕੇ ਜਾਣਾ ਚਾਹੁੰਦਾ ਹੈ, ਉਸ ‘ਤੇ ਮੈਂ ਟਿੱਪਣੀ ਨਹੀਂ ਕਰਨਾ ਚਾਹੁੰਦੀ।” ਸੁਪ੍ਰਿਆ ਦੇ ਇਸ ਬਿਆਨ ਨੂੰ ਕਾਂਗਰਸ ਹਾਈਕਮਾਂਡ ਵੱਲੋਂ ਸਾਫ ਤੌਰ ‘ਤੇ ਇਸ਼ਾਰੇ ਵਜੋਂ ਵੇਖਿਆ ਜਾ ਰਿਹਾ ਹੈ ਕਿ ਕੈਪਟਨ ਜੇਕਰ ਪਾਰਟੀ ਛੱਡ ਕੇ ਜਾਣਾ ਚਾਹੁੰਦੇ ਹਨ, ਤਾਂ ਜਾ ਸਕਦੇ ਹਨ।
ਕਾਂਗਰਸ ਨੂੰ ਕੈਪਟਨ ਨੇ ਇਸ ਲਹਿਜੇ ‘ਚ ਦਿੱਤਾ ਜਵਾਬ
ਕਾਂਗਰਸ ਵੱਲੋਂ ਇਸ ਬਿਆਨ ਦੇ ਜਵਾਬ ਵਿੱਚ ਕੈਪਟਨ ਨੇ ਇੱਕ ਵਾਰ ਫਿਰ ਹਾਈਕਮਾਂਡ ਪ੍ਰਤੀ ਬਾਗੀ ਰਵੱਈਏ ਵਿੱਚ ਹੀ ਜਵਾਬ ਦਿੱਤਾ। ਸੁਪ੍ਰਿਆ ਦੇ ਇਹ ਕਹਿਣ ‘ਤੇ ਕਿ ਸਿਆਸਤ ਵਿੱਚ ਗੁੱਸੇ ਦੀ ਕੋਈ ਥਾਂ ਨਹੀਂ ਹੈ। ਕੈਪਟਨ ਨੇ ਪੁੱਛਿਆ, “ਕੀ ਕਾਂਗਰਸ ਵਰਗੀ ਬੇਹੱਦ ਪੁਰਾਣੀ ਪਾਰਟੀ ਵਿੱਚ ਬੇਇੱਜ਼ਤੀ ਅਤੇ ਜਲਾਲਤ ਦੀ ਥਾਂ ਹੈ।” ਉਹਨਾਂ ਕਿਹਾ ਕਿ ਜੇਕਰ ਇੱਕ ਸੀਨੀਅਰ ਪਾਰਟੀ ਆਗੂ ਦੇ ਨਾਲ ਅਜਿਹਾ ਵਿਵਹਾਰ ਕੀਤਾ ਜਾਂਦਾ ਹੈ, ਤਾਂ ਵਰਕਰ ਨਾਲ ਕੀ ਹੁੰਦਾ ਹੋਵੇਗਾ।
Yes, there's no space for anger in politics. But is there space for humiliation & insult in a grand old party like @INCIndia? If a senior party leader like me can be treated like this, I wonder what the workers must go through!': @capt_amarinder to @SupriyaShrinate https://t.co/deEDRYlBMg
— Raveen Thukral (@RT_Media_Capt) September 23, 2021
ਕੈਪਟਨ ਨੇ ਸਿੱਧੂ ਸਣੇ ਹਾਈਕਮਾਂਡ ‘ਤੇ ਬੋਲਿਆ ਸੀ ਹਮਲਾ
ਦੱਸ ਦਈਏ ਕਿ ਕੈਪਟਨ ਅਮਰਿੰਦਰ ਸਿੰਘ ਨੇ ਹਾਈਕਮਾਂਡ ‘ਤੇ ਹਮਲਾ ਬੋਲਦੇ ਹੋਏ ਸਿੱਧੇ ਰਾਹੁਲ-ਪ੍ਰਿਅੰਕਾ ਦੀ ਅਗਵਾਈ ‘ਤੇ ਸਵਾਲ ਖੜ੍ਹੇ ਕੀਤੇ ਸਨ। ਉਹਨਾਂ ਨੇ ਕਿਹਾ ਸੀ ਕਿ ਰਾਹੁਲ ਤੇ ਪ੍ਰਿਅੰਕਾ ਗੈਰ-ਤਜ਼ਰਬੇਕਾਰ ਹਨ। ਉਹਨਾਂ ਦੇ ਸਲਾਹਕਾਰ ਉਹਨਾਂ ਨੂੰ ਗੁੰਮਰਾਹ ਕਰਦੇ ਹਨ। ਸਿੱਧੂ ‘ਤੇ ਵਰ੍ਹਦੇ ਹੋਏ ਕੈਪਟਨ ਨੇ ਕਿਹਾ ਕਿ ਉਹ ਦੇਸ਼ ਲਈ ਖਤਰਨਾਕ ਹਨ ਅਤੇ ਉਹਨਾਂ ਨੂੰ ਮੁੱਖ ਮੰਤਰੀ ਬਣਨ ਤੋਂ ਰੋਕਣ ਲਈ ਉਹ ਹਰ ਕੁਰਬਾਨੀ ਦੇਣ ਨੂੰ ਤਿਆਰ ਹਨ। ਉਹਨਾਂ ਇਥੋਂ ਤੱਕ ਕਿਹਾ ਕਿ 2022 ਦੀਆਂ ਚੋਣਾਂ ਵਿੱਚ ਉਹ ਸਿੱਧੂ ਖਿਲਾਫ਼ ਮਜਬੂਤ ਉਮੀਦਵਾਰ ਖੜ੍ਹਾ ਕਰਨਗੇ।
ਕੈਪਟਨ-ਕਾਂਗਰਸ ਦੀ ਲੜਾਈ ‘ਚੋਂ ਫਾਇਦਾ ਲੈਣ ਦੀ ਕੋਸ਼ਿਸ਼ ‘ਚ ਬੀਜੇਪੀ
ਓਧਰ ਇਸ ਪੂਰੀ ਬਗਾਵਤੀ ਲੜਾਈ ‘ਤੇ ਬੀਜੇਪੀ ਆਪਣੀਆਂ ਨਿਗਾਹਾਂ ਟਿਕਾਏ ਬੈਠੀ ਹੈ। ਕਾਂਗਰਸ ਤੋਂ ਬਾਗੀ ਹੋਏ ਕੈਪਟਨ ਅਮਰਿੰਦਰ ਸਿੰਘ ‘ਤੇ ਬੀਜੇਪੀ ਨੇ ਡੋਰੇ ਪਾਉਣੇ ਵੀ ਸ਼ੁਰੂ ਕਰ ਦਿੱਤੇ ਹਨ। ਹਰਿਆਣਾ ਸਰਕਾਰ ਵਿੱਚ ਮੰਤਰੀ ਅਨਿਲ ਵਿਜ ਨੇ ਕੈਪਟਨ ਨੂੰ ਰਾਸ਼ਟਰਵਾਦੀ ਦੱਸਦਿਆਂ ਸਿੱਧੂ ਧੜੇ ‘ਤੇ ਤਿੱਖਾ ਹਮਲਾ ਬੋਲਿਆ ਹੈ।
ਵਿਜ ਨੇ ਟਵੀਟ ਕੀਤਾ, “ਰਾਸ਼ਟਰਵਾਦੀ ਕੈਪਟਨ ਅਮਰਿੰਦਰ ਸਿੰਘ ਉਹਨਾਂ ਦੀ ਰਾਹਤ ਵਿੱਚ ਰੁਕਾਵਟ ਸਨ, ਇਸ ਲਈ ਉਹਨਾਂ ਦਾ ਸਿਆਸੀ ਕਤਲ ਕਰ ਦਿੱਤਾ ਗਿਆ। ਪੰਜਾਬ ਵਿੱਚ ਸਾਰੀਆਂ ਰਾਸ਼ਟਰਵਾਦੀ ਤਾਕਤਾਂ ਨੂੰ ਕਾਂਗਰਸ ਦੇ ਗਲਤ ਮਨਸੂਬਿਆਂ ਨੂੰ ਨਕਾਮ ਕਰਨ ਲਈ ਹੱਥ ਮਿਲਾਉਣਾ ਚਾਹੀਦਾ ਹੈ।”
Nationalist Capt. Amrinder Singh was hurdle in their way that is why he was Politically slain. All Nationalistic forces in Punjab should join hands to foil ill designes of Congress.
— ANIL VIJ MINISTER HARYANA (@anilvijminister) September 23, 2021
ਸਿੱਧੂ ਦੀ ਪਾਕਿ ਪੀਐੱਮ ਨਾਲ ਦੋਸਤੀ ‘ਤੇ ਹਮਲਾ ਬੋਲਦਿਆਂ ਉਹਨਾਂ ਕਿਹਾ, “ਪਾਕਿਸਤਾਨ ਸਮਰਥਕ ਅਤੇ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਅਤੇ ਪਾਕਿ ਫੌਜ ਮੁਖੀ ਜਾਵੇਦ ਬਾਜਵਾ ਅਤੇ ਉਹਨਾਂ ਦੇ ਸਹਿਯੋਗੀਆਂ ਨੂੰ ਪੰਜਾਬ ਵਿੱਚ ਸੱਤਾ ‘ਚ ਲਿਆਉਣ ਲਈ ਕਾਂਗਰਸ ਦੀ ਗਹਿਰੀ ਰਾਸ਼ਟਰ ਵਿਰੋਧੀ ਖਤਰਨਾਕ ਸਾਜਿਸ਼ ਹੈ, ਤਾਂ ਜੋ ਭਵਿੱਖ ਵਿੱਚ ਪੰਜਾਬ ਅਤੇ ਪਾਕਿਸਤਾਨ ਇਕੱਠੇ ਚੱਲ ਸਕਣ।”
There is a deep rooted anti National dangerous conspiracy of the Congress to bring pro Pakistan and friend of Pakistan President Imran Khan and Javed Bajwa Pak Army Chief Navjot Sidhu and his Aides to Power in Punjab so that in future Punjab and Pakistan could floak together.
— ANIL VIJ MINISTER HARYANA (@anilvijminister) September 23, 2021
ਬਹਿਰਹਾਲ, ਇਹ ਤਾਂ ਅਸੀਂ ਬਾਖੂਬੀ ਜਾਣਦੇ ਹਾਂ ਕਿ ਸਿਆਸਤ ਵਿੱਚ ਕਦੇ ਵੀ ਕੁਝ ਸਥਿਰ ਨਹੀਂ ਹੁੰਦਾ। ਅਜਿਹੇ ਵਿੱਚ ਕੈਪਟਨ ਸਿਆਸਤ ਵਿੱਚ ਆਪਣੀ ਨਵੀਂ ਪਾਰੀ ਨੂੰ ਕਿਥੇ ਤੇ ਕਿਵੇਂ ਵੇਖਦੇ ਹਨ, ਇਸਦਾ ਖੁਲਾਸਾ ਉਦੋਂ ਹੀ ਹੋਵੇਗਾ ਜਦੋਂ ਕੈਪਟਨ ਆਪਣੇ ਪੱਤੇ ਖੋਲ੍ਹਣਗੇ। ਫਿਲਹਾਲ ਉਹ ਨਵੀਂ ਪਾਰੀ ਬਾਰੇ ਪੁੱਛੇ ਜਾਣ ਵਾਲੇ ਕਿਸੇ ਵੀ ਸਵਾਲ ਦਾ ਜਵਾਬ ਦੇਣ ਤੋਂ ਗੁਰੇਜ਼ ਕਰਦੇ ਆ ਰਹੇ ਹਨ।
