ਚੰਡੀਗੜ੍ਹ। ਪੰਜਾਬ ਨੂੰ ਨਵਾਂ ਮੁੱਖ ਮੰਤਰੀ ਮਿਲਣ ਤੋਂ ਬਾਅਦ ਅਫ਼ਸਰ ਬਦਲਣ ਦਾ ਦੌਰ ਲਗਾਤਾਰ ਜਾਰੀ ਹੈ। ਇਸੇ ਤਹਿਤ ਵੀਰਵਾਰ ਨੂੰ IAS ਵਿਨੀ ਮਹਾਜਨ ਦੀ ਮੁੱਖ ਸਕੱਤਰ ਦੇ ਅਹੁਦੇ ਤੋਂ ਛੁੱਟੀ ਕਰ ਦਿੱਤੀ ਗਈ। ਵਿਨੀ ਦੀ ਥਾਂ 1990 ਬੈਚ ਦੇ IAS ਅਫ਼ਸਰ ਅਨਿਰੁੱਧ ਤਿਵਾੜੀ ਨੂੰ ਪੰਜਾਬ ਦਾ ਮੁੱਖ ਸਕੱਤਰ ਲਾਇਆ ਗਿਆ ਹੈ। ਮੁੱਖ ਸਕੱਤਰ ਵਜੋਂ ਅਨਿਰੁੱਧ ਤਿਵਾੜੀ ਨੇ ਆਪਣਾ ਕਾਰਜਭਾਰ ਵੀ ਸੰਭਾਲ ਲਿਆ ਹੈ। ਉਹਨਾਂ ਨੂੰ ਪਰਸੋਨਲ ਡਿਪਾਰਟਮੈਂਟ ਦੇ ਪ੍ਰਿੰਸੀਪਲ ਸੈਕਟਰੀ ਅਤੇ ਵਿਜੀਲੈਂਸ ਦਾ ਵੀ ਵਾਧੂ ਚਾਰਜ ਸੌਂਪਿਆ ਗਿਆ ਹੈ।
ਨਰਮ ਸੁਭਾਅ ਵਾਲੇ ਤੇਜ਼-ਤਰਾਰ ਅਫ਼ਸਰ ਹਨ ਤਿਵਾੜੀ
1990 ਬੈਚ ਦੇ IAS ਅਫ਼ਸਰ ਅਨਿਰੁੱਧ ਤਿਵਾੜੀ ਸੁਭਾਅ ਤੋਂ ਨਰਮ, ਪਰ ਇੱਕ ਤੇਜ਼-ਤਰਾਰ ਕਿਸਮ ਦੇ ਅਫ਼ਸਰ ਮੰਨੇ ਜਾਂਦੇ ਹਨ। ਮੁੱਖ ਸਕੱਤਰ ਬਣਾਏ ਜਾਣ ਤੋਂ ਪਹਿਲਾਂ ਅਨਿਰੁੱਧ ਤਿਵਾੜੀ ਪੰਜਾਬ ਸਰਕਾਰ ਦੇ ਖੇਤੀਬਾੜੀ ਅਤੇ ਕਿਸਾਨ ਭਲਾਈ, ਹੋਰਟੀਕਲਚਰ ਅਤੇ ਫੂਡ ਪ੍ਰੋਸੈਸਿੰਗ ਵਿਭਾਗ ਵਿੱਚ ਵਧੀਕ ਮੁੱਖ ਸਕੱਤਰ ਵਜੋਂ ਤੈਨਾਤ ਸਨ। ਇਸ ਤੋਂ ਇਲਾਵਾ ਉਹ PAU ਦੇ ਅੰਤਰਿਮ ਇੰਚਾਰਜ ਵੀ ਸਨ। CS ਬਣਨ ਤੋਂ ਬਾਅਦ ਵੀ ਇਹ ਚਾਰਜ ਫਿਲਹਾਲ ਉਹਨਾਂ ਦੇ ਕੋਲ ਹੀ ਰਹਿਣਗੇ।
ਚੰਨੀ ਦੇ CM ਬਣਦੇ ਹੀ ਤੈਅ ਸੀ ਵਿਦਾਈ !
ਵਿਨੀ ਮਹਾਜਨ ਨੂੰ ਫਿਲਹਾਲ ਕੋਈ ਨਵੀਂ ਤੈਨਾਤੀ ਨਹੀਂ ਦਿੱਤੀ ਗਈ ਹੈ। ਚਰਨਜੀਤ ਚੰਨੀ ਦੇ ਮੁੱਖ ਮੰਤਰੀ ਬਣਨ ਦੇ ਬਾਅਦ ਤੋਂ ਉਮੀਦ ਸੀ ਕਿ ਮੁੱਖ ਸਕੱਤਰ ਦੇ ਅਹੁਦੇ ਤੋਂ ਵਿਨੀ ਮਹਾਜਨ ਨੂੰ ਹਟਾਇਆ ਜਾਵੇਗਾ। ਹਾਲਾਂਕਿ ਸੀਐੱਮ ਨੇ ਇਸ ਵਿੱਚ 3 ਦਿਨ ਦਾ ਸਮਾਂ ਲਿਆ। ਦਰਅਸਲ, ਕੈਪਟਨ ਅਮਰਿੰਦਰ ਸਿੰਘ ਦੇ ਮੁੱਖ ਮੰਤਰੀ ਬਣਦੇ ਹੀ ਉਹਨਾਂ ਨੇ ਤਤਕਾਲੀ ਮੁੱਖ ਸਕੱਤਰ ਸਰਵੇਸ਼ ਕੌਸ਼ਲ ਨੂੰ ਹਟਾ ਦਿੱਤਾ ਸੀ।
ਸਭ ਤੋਂ ਪਾਵਰਫੁੱਲ ਕਪਲ ਸਨ ਵਿਨੀ ਅਤੇ ਦਿਨਕਰ ਗੁਪਤਾ
ਵਿਨੀ ਮਹਾਜਨ ਅਤੇ ਦਿਨਕਰ ਗੁਪਤਾ ਸਭ ਤੋਂ ਵੱਧ ਪਾਵਰਫੁੱਲ ਕਪਲ ਮੰਨੇ ਜਾਂਦੇ ਸਨ। ਵਿਨੀ ਮਹਾਜਨ ਜਿਥੇ ਕੈਪਟਨ ਸਰਕਾਰ ਵਿੱਚ ਮੁੱਖ ਸਕੱਤਰ ਦੇ ਅਹੁਦੇ ‘ਤੇ ਤੈਨਾਤ ਸਨ, ਉਥੇ ਹੀ ਉਹਨਾਂ ਦੇ ਪਤੀ ਦਿਨਕਰ ਗੁਪਤਾ ਸੂਬੇ ਦੇ DGP ਹਨ। ਬਹਿਰਹਾਲ ਹੁਣ ਵਿਨੀ ਨੂੰ ਹਟਾਏ ਜਾਣ ਤੋਂ ਬਾਅਦ ਦਿਨਕਰ ਗੁਪਤਾ ਦੀ ਵਿਦਾਈ ਵੀ ਤੈਅ ਮੰਨੀ ਜਾ ਰਹੀ ਹੈ।
ਦੋਵਾਂ ਦੀ ਤੈਨਾਤੀ ‘ਤੇ ਹੋਇਆ ਸੀ ਵਿਵਾਦ
ਜਦੋਂ ਵਿਨੀ ਮਹਾਜਨ ਨੂੰ ਪੰਜਾਬ ਵਿੱਚ ਮੁੱਖ ਸਕੱਤਰ ਦਾ ਅਹੁਦਾ ਸੌਂਪਿਆ ਗਿਆ ਸੀ. ਉਸ ਵੇਲੇ ਕਾਫੀ ਵਿਵਾਦ ਹੋਇਆ ਸੀ, ਕਿਉਂਕਿ ਕੇਬੀਐੱਸ ਸਿੱਧੂ, ਵਿਨੀ ਨਾਲੋਂ ਸੀਨੀਅਰ ਸਨ। ਪਰ ਕੈਪਟਨ ਦੇ ਕਰੀਬੀ ਹੋਣ ਦੇ ਚਲਦੇ ਵਿਨੀ ਮਹਾਜਨ ਨੂੰ ਮੁੱਖ ਸਕੱਤਰ ਲਾ ਦਿੱਤਾ ਗਿਆ। ਇਸੇ ਤਰ੍ਹਾਂ ਦਿਨਕਰ ਗੁਪਤਾ ਨੂੰ DGP ਬਣਾਏ ਜਾਣ ਵਕਤ ਵੀ ਵਿਵਾਦ ਹੋਇਆ ਸੀ, ਕਿਉਂਕਿ ਉਹਨਾਂ ਤੋਂ ਸੀਨੀਅਰ IPS ਅਫ਼ਸਰ ਵੀ ਰੇਸ ਵਿੱਚ ਸਨ। ਹਾਲਾਂਕਿ ਕੈਪਟਨ ਨੇ ਕਿਸੇ ਦੀ ਨਹੀਂ ਸੁਣੀ। ਦਿਨਕਰ ਗੁਪਤਾ ਦੇ ਵਿਰੋਧੀ ਮੁਹੰਮਦ ਮੁਸਤਫਾ ਇਸ ਵੇਲੇ ਨਵਜੋਤ ਸਿੱਧੂ ਦੇ ਰਣਨੀਤਕ ਸਲਾਹਕਾਰ ਹਨ।
DGP ਦੀ ਰੇਸ ‘ਚ 4 ਅਫ਼ਸਰ
ਵਿਨੀ ਮਹਾਜਨ ਤੋਂ ਬਾਅਦ ਹੁਣ DGP ਦਿਨਕਰ ਗੁਪਤਾ ਨੂੰ ਬਦਲੇ ਜਾਣ ਦਾ ਫੈਸਲਾ ਵੀ ਕਿਸੇ ਵੀ ਵਕਤ ਆ ਸਕਦਾ ਹੈ। ਦਿਨਕਰ ਗੁਪਤਾ ਦੀ ਜਗ੍ਹਾ ਲੈਣ ਲਈ ਸਿਧਾਰਥ ਚਟੋਪਾਧਿਆਏ ਦਾ ਨਾਂਅ ਸਾਹਮਣੇ ਆ ਰਿਹਾ ਹੈ। ਹਾਲਾਂਕਿ ਚਟੋਪਾਧਿਆਏ ਦੇ ਨਾਲ 3 ਹੋਰ IPS ਅਫ਼ਸਰ ਇਸ ਰੇਸ ਵਿੱਚ ਸ਼ਾਮਲ ਹਨ। ਇਕਬਾਲਪ੍ਰੀਤ ਸਿੰਘ ਸਹੋਤਾ, ਵੀਕੇ ਭਵਰਾ ਅਤੇ ਰੋਹਿਤ ਚੌਧਰੀ ਦੇ ਨਾਂਅ ਵਿੱਚ ਇਸ ਰੇਸ ਵਿੱਚ ਸ਼ਾਮਲ ਹਨ।
