ਬਿਓਰੋ। ਪੰਜਾਬ ਕਾਂਗਰਸ ਵਿੱਚ ਸੀਐੱਮ ਫੇਸ ਨੂੰ ਲੈ ਕੇ ਜਾਰੀ ਘਮਸਾਣ ਵਿਚਾਲੇ ਪਾਰਟੀ ਨੇ ਨਵਾਂ ਫਾਰਮੂਲਾ ਤਿਆਰ ਕਰ ਲਿਆ ਹੈ। ਸੂਤਰਾਂ ਮੁਤਾਬਕ, ਚਰਨਜੀਤ ਸਿੰਘ ਚੰਨੀ ਅਤੇ ਨਵਜੋਤ ਸਿੰਘ ਸਿੱਧੂ ਨੂੰ ਢਾਈ-ਢਾਈ ਸਾਲਾਂ ਲਈ ਸੀਐੱਮ ਦਾ ਚਿਹਰਾ ਬਣਾਇਆ ਜਾ ਸਕਦਾ ਹੈ। ਹਾਲਾਂਕਿ ਸਰਕਾਰ ਬਣਨ ਤੋਂ ਪਹਿਲਾਂ ਸੀਐੱਮ ਕੌਣ ਬਣੇਗਾ, ਇਸਦਾ ਫੈਸਲਾ ਚੁਣ ਕੇ ਆਏ ਪਾਰਟੀ ਦੇ ਵਿਧਾਇਕ ਕਰਨਗੇ। ਦਰਅਸਲ, ਪੰਜਾਬ ਚੋਣਾਂ ਵਿੱਚ ਵੋਟ ਬੈਂਕ ਦਾ ਗਣਿਤ ਅਜਿਹਾ ਹੈ ਕਿ ਕਾਂਗਰਸ ਕਿਸੇ ਇੱਕ ਦਾ ਨਾਂਅ ਲੈ ਕੇ ਰਿਸਕ ਨਹੀਂ ਲੈਣਾ ਚਾਹੁੰਦੀ।
ਦੱਸ ਦਈਏ ਕਿ ਕਾਂਗਰਸ ਐਤਵਾਰ ਨੂੰ ਸੀਐੱਮ ਦੇ ਚਿਹਰੇ ਦਾ ਐਲਾਨ ਕਰਨ ਜਾ ਰਹੀ ਹੈ। ਇਸਦੇ ਲਈ ਰਾਹੁਲ ਗਾਂਧੀ ਪੰਜਾਬ ਆ ਰਹੇ ਹਨ। ਉਹ ਲੁਧਿਆਣਾ ਤੋਂ ਵਰਚੁਅਲ ਰੈਲੀ ਦੇ ਜ਼ਰੀਏ ਦੁਪਹਿਰ 2 ਵਜੇ ਸੀਐੱਮ ਫੇਸ ਦਾ ਐਲਾਨ ਕਰਨਗੇ। ਰਾਹੁਲ ਦੀ ਵਰਚੁਅਲ ਰੈਲੀ ਨੂੰ ਪੰਜਾਬ ਦੀਆਂ 117 ਵਿਧਾਨ ਸਭਾ ਸੀਟਾਂ ‘ਤੇ LIVE ਟੈਲੀਕਾਸਟ ਕੀਤਾ ਜਾਵੇਗਾ।
CM ਫੇਸ ਲਈ ਚੰਨੀ ਜ਼ਰੂਰੀ ਕਿਉਂ?
ਚਰਨਜੀਤ ਸਿੰਘ ਚੰਨੀ ਨੂੰ ਸੀਐੱਮ ਚਿਹਰਾ ਨਹੀਂ ਬਣਾਉਣ ‘ਤੇ ਕਾਂਗਰਸ ਨੂੰ ਸਿੱਧੇ 32 ਫੀਸਦ ਦਲਿਤ ਵੋਟ ਬੈਂਕ ਦਾ ਨੁਕਸਾਨ ਹੋਵੇਗਾ। ਜੇਕਰ ਕਾਂਗਰਸ ਨੇ ਚੰਨੀ ਦਾ ਸਾਥ ਛੱਡਿਆ, ਤਾਂ ਦਲਿਤਾਂ ਵਿਚਕਾਰ ਗਲਤ ਮੈਸੇਜ ਜਾਵੇਗਾ। ਇਸ ਤੋਂ ਲੱਗੇਗਾ ਕਿ ਕਾਂਗਰਸ ਨੇ ਚੰਨੀ ਨੂੰ ਸਿਰਫ਼ ਵੋਟ ਬਟੋਰਨ ਲਈ ਹੀ ਕੰਮ ਚਲਾਊ ਸੀਐੱਮ ਬਣਾਇਆ ਹੋਇਆ ਸੀ।
ਕਾਂਗਰਸ ਫਿਲਹਾਲ ਚੰਨੀ ਦੇ 111 ਦਿਨਾਂ ਦੇ ਕੰਮਕਾਜ ‘ਤੇ ਹੀ ਵੋਟ ਮੰਗ ਰਹੀ ਹੈ। ਇਸ ਤੋਂ ਪਹਿਲਾਂ ਸਾਢੇ 4 ਸਾਲ ਦੀ ਸਰਕਾਰ ਵਾਲੇ ਕੈਪਟਨ ਅਮਰਿੰਦਰ ਸਿੰਘ ਬੀਜੇਪੀ ਦੇ ਨਾਲ ਗਠਜੋੜ ਕਰ ਚੁੱਕੇ ਹਨ। ਜੇਕਰ ਚੰਨੀ ਹੀ ਚਿਹਰਾ ਨਹੀਂ ਹੋਣਗੇ, ਤਾਂ ਕਾਂਗਰਸ ਕਿਸ ਅਧਾਰ ‘ਤੇ ਵੋਟ ਮੰਗੇਗੀ।
ਸਿੱਧੂ ਨੂੰ ਨਜ਼ਰਅੰਦਾਜ਼ ਕਰਨਾ ਵੀ ਅਸਾਨ ਨਹੀਂ
ਪੰਜਾਬ ਵਿੱਚ ਨਵਜੋਤ ਸਿੱਧੂ ਕਾਂਗਰਸ ਲਈ ਵੱਡਾ ਚਿਹਰਾ ਹਨ। ਸਿੱਧੂ ‘ਤੇ ਦਾਅ ਖੇਡ ਕੇ ਹੀ ਕਾਂਗਰਸ ਨੇ ਕੈਪਟਨ ਅਮਰਿੰਦਰ ਸਿੰਘ ਨੂੰ ਸੀਐੱਮ ਦੀ ਕੁਰਸੀ ਤੋਂ ਹਟਾਇਆ ਸੀ। ਸਿੱਧੂ ਦੇ ਕਹਿਣ ‘ਤੇ ਹੀ ਕਈ ਸੀਟਾਂ ‘ਤੇ ਟਿਕਟ ਦਿੱਤੀ ਗਈ। ਨਵਜੋਤ ਸਿੱਧੂ ਨੂੰ ਨਜ਼ਰਅੰਦਾਜ਼ ਕਰਕੇ ਪੰਜਾਬ ਵਿੱਚ ਸਿੱਧੇ 19 ਫੀਸਦ ਜੱਟ ਸਿੱਖ ਵੋਟ ਬੈਂਕ ਦਾ ਨੁਕਸਾਨ ਹੋ ਸਕਦਾ ਹੈ। ਕਾਂਗਰਸ ਇਹ ਮੈਸੇਜ ਨਹੀਂ ਦੇਣਾ ਚਾਹੁੰਦੀ ਕਿ ਉਹ ਪੰਜਾਬ ਵਿੱਚ ਸਿਰਫ਼ ਦਲਿਤਾਂ ‘ਤੇ ਹੀ ਦਾਅ ਖੇਡ ਰਹੀ ਹੈ। ਇਸ ਨਾਲ 69 ਸੀਟਾਂ ਵਾਲੇ ਸਭ ਤੋਂ ਵੱਡੇ ਮਾਲਵਾ ਖੇਤਰ ਵਿੱਚ ਕਾਂਗਰਸ ਦਾ ਨੁਕਸਾਨ ਹੋ ਸਕਦਾ ਹੈ।
ਕਾਂਗਰਸ ਨੂੰ ਡਰ ਹੈ ਕਿ ਜੇਕਰ ਸਿੱਧੂ ਸੀਐੱਮ ਚਿਹਰਾ ਨਾ ਬਣੇ, ਤਾਂ ਉਹ ਅਚਾਨਕ ਕੋਈ ਅਜਿਹਾ ਕਦਮ ਚੁੱਕ ਸਕਦੇ ਹਨ, ਜਿਸ ਨਾਲ ਚੋਣਾਂ ‘ਚ ਕਾਂਗਰਸ ਲਈ ਮੁਸ਼ਕਿਲ ਹੋ ਜਾਵੇਗੀ। ਸਿੱਧੂ ਪਹਿਲਾਂ ਵੀ DGP ਅਤੇ ਐਡਵੋਕੇਟ ਜਨਰਲ ਨਾ ਬਦਲੇ ਜਾਣ ਦੇ ਮੁੱਦੇ ‘ਤੇ ਅਸਤੀਫਾ ਦੇ ਕੇ ਸਭ ਨੂੰ ਹੈਰਾਨ ਕਰ ਚੁੱਕੇ ਹਨ।
ਹਾਈਕਮਾਂਡ ਦੇ ‘ਹੱਥ’ ‘ਚ ਹੀ ਰਹੇਗੀ ‘ਚਾਬੀ’
ਕਿਸੇ ਇੱਕ ਚਿਹਰੇ ਨੂੰ ਅੱਗੇ ਕਰਨਾ ਕਾਂਗਰਸ ਲਈ ਪੈਰਾਂ ‘ਤੇ ਕੁਹਾੜੀ ਮਾਰਨ ਵਰਗਾ ਹੈ। ਢਾਈ-ਢਾਈ ਸਾਲ ਦੇ ਫਾਰਮੂਲੇ ਤੋਂ ਬਾਅਦ ਨਵਜੋਤ ਸਿੱਧੂ ਅਤੇ ਚਰਨਜੀਤ ਚੰਨੀ ਆਪਣੇ ਸਮਰਥਕ ਉਮੀਦਵਾਰਾਂ ਨੂੰ ਜਿਤਾਉਣ ਲਈ ਪੂਰਾ ਜੋਰ ਲਗਾਉਣਗੇ, ਤਾਂ ਜੋ ਉਹ ਪਹਿਲਾਂ ਸੀਐੱਮ ਦੀ ਕੁਰਸੀ ਤੱਕ ਪਹੁੰਚ ਸਕਣ। ਇਸ ਨਾਲ ਕਾਂਗਰਸ ਪੂਰਾ ਜੋਰ ਲਗਾਏਗੀ ਕਿ ਸੱਤਾ ਵਿੱਚ ਵਾਪਸੀ ਕੀਤੀ ਜਾ ਸਕੇ। ਪਹਿਲਾਂ ਕਿਸ ਨੂੰ ਸੀਐੱਮ ਬਣਾਉਣਾ ਹੈ, ਇਸਦੀ ਚਾਬੀ ਕਾਂਗਰਸ ਹਾਈਕਮਾਂਡ ਕੋਲ ਹੀ ਰਹਿ ਜਾਵੇਗੀ। ਕਾਂਗਰਸ ਵਿੱਚ ਇਹੀ ਪਰੰਪਰਾ ਰਹੀ ਹੈ।
