ਬਿਓਰੋ। ਪੰਜਾਬ ਦੇ ਕਰੋੜਾਂ ਰੁਪਏ ਦੇ ਬਹੁਚਰਚਿਤ ਡਰੱਗਜ਼ ਕੇਸ ‘ਚ ਲਗਾਤਾਰ ਤਲਖ ਬਿਆਨਬਾਜੀ ਕਰਨਾ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੂੰ ਭਾਰੀ ਪੈ ਸਕਦਾ ਹੈ। ਸਿੱਧੂ ਦੇ ਖਿਲਾਫ਼ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਦੇ ਵਕੀਲ ਨੇ ਕ੍ਰਿਮੀਨਲ ਕੰਟੈਪਟ ਪਟੀਸ਼ਨ ਦਾਖਲ ਕੀਤੀ ਹੈ। ਇਸ ‘ਚ ਕਿਹਾ ਗਿਆ ਹੈ ਕਿ ਸਿੱਧੂ ਦੇ ਸੁਣਵਾਈ ਤੋਂ ਪਹਿਲਾਂ ਕੀਤੇ ਗਏ ਟਵੀਟ ਕੋਰਟ ਦੀ ਕਾਰਵਾਈ ‘ਚ ਦਬਾਅ ਬਣਾਉਣ ਅਤੇ ਅਦਾਲਤ ਦਾ ਅਕਸ ਖਰਾਬ ਕਰਨ ਵਾਲੇ ਹਨ। ਇਸ ਪਟੀਸ਼ਨ ‘ਚ ਸਿੱਧੂ ਦੇ ਟਵੀਟ ਵੀ ਲਾਏ ਗਏ ਹਨ।
ਹਰਿਆਣਾ AG ਦੇ ਸਾਹਮਣੇ ਪਟੀਸ਼ਨ ਦਾਖਲ
ਪੰਜਾਬ ‘ਚ ਇਸ ਵੇਲੇ ਐਡਵੋਕੇਟ ਜਨਰਲ ਨਹੀਂ ਹਨ, ਇਸ ਲਈ ਇਹ ਪਟੀਸ਼ਨ ਹਰਿਆਣਾ ਦੇ ਐਡਵੋਕੇਟ ਜਨਰਲ ਕੋਲ ਦਾਖਲ ਕੀਤੀ ਗਈ ਹੈ। ਇਸ ‘ਤੇ ਮੰਗਲਵਾਰ ਸਵੇਰੇ 11 ਵਜੇ ਸੁਣਵਾਈ ਹੋਵੇਗੀ। ਜੇਕਰ AG ਤੋਂ ਮਨਜੂਰੀ ਮਿਲ ਜਾਂਦੀ ਹੈ, ਤਾਂ ਫਿਰ ਹਾਈਕੋਰਟ ‘ਚ ਪਟੀਸ਼ਨ ਦਾਖਲ ਕਰ ਦਿੱਤੀ ਜਾਵੇਗੀ।
ਕੋਰਟ ਦੇ ਕੰਮ ‘ਚ ਦਖਲ ਦੇ ਰਹੇ ਸਿੱਧੂ- ਪਟੀਸ਼ਨਕਰਤਾ
ਪਟੀਸ਼ਨਕਰਤਾ ਵਕੀਲ ਪਰਮਪ੍ਰੀਤ ਸਿੰਘ ਬਾਜਵਾ ਨੇ ਕਿਹਾ, “ਬਹੁਚਰਚਿਤ ਡਰੱਗਜ਼ ਕੇਸ ਦੀ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ‘ਚ ਹੋਣ ਵਾਲੀ ਹਰ ਸੁਣਵਾਈ ਤੋਂ ਪਹਿਲਾਂ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੱਧੂ ਟਵੀਟ ਕਰਦੇ ਹਨ ਕਿ ਅੱਜ ਰਿਪੋਰਟ ਖੁੱਲ੍ਹ ਜਾਵੇਗੀ। ਅਜਿਹਾ ਕਰਕੇ ਸਿੱਧੂ ਇੱਕ ਤਰੀਕੇ ਨਾਲ ਹਾਈਕੋਰਟ ਨੂੰ ਡਾਇਰੈਕਸ਼ਨ ਦੇਣ ਦੀ ਕੋਸ਼ਿਸ਼ ਕਰ ਰਹੇ ਹਨ, ਜੋ ਉਚਿਤ ਨਹੀਂ ਹੈ। ਸਿੱਧੂ ਨੂੰ ਕੋਰਟ ਦੇ ਕੰਮਕਾਜ ਵਿੱਚ ਦਖਲ ਨਹੀਂ ਦੇਣਾ ਚਾਹੀਦਾ।
ਰਿਪੋਰਟ ਜਨਤੱਕ ਕਰਨ ਦੀ ਮੰਗ ਕਰ ਰਹੇ ਹਨ ਸਿੱਧੂ
ਪੰਜਾਬ ਦੇ ਬਹੁਚਰਚਿਤ ਡਰੱਗਜ਼ ਕੇਸ ਦੀ ਜਾਂਚ STF ਵੀ ਕਰ ਚੁੱਕੀ ਹੈ। STF ਆਪਣੀ ਰਿਪੋਰਟ ਸਰਕਾਰ ਅਤੇ ਹਾਈਕੋਰਟ ਦੋਵਾਂ ਨੂੰ ਸੌਂਪ ਚੁੱਕੀ ਹੈ, ਪਰ ਅਜੇ ਤੱਕ ਸਰਕਾਰ ਨੇ ਇਸ ਨੂੰ ਜਨਤੱਕ ਨਹੀਂ ਕੀਤਾ ਹੈ। ਸਰਕਾਰ ਨੂੰ ਕੋਰਟ ਤੋਂ ਹਰੀ ਝੰਡੀ ਮਿਲਣ ਦੀ ਦਰਕਾਰ ਹੈ। ਹਾਲਾਂਕਿ ਸਿੱਧੂ ਵਾਰ-ਵਾਰ ਕਹਿੰਦੇ ਰਹੇ ਹਨ ਕਿ ਰਿਪੋਰਟ ਖੋਲ੍ਹਣ ਨੂੰ ਲੈ ਕੇ ਕੋਈ ਬੰਦਸ਼ ਨਹੀਂ ਹੈ। ਸਰਕਾਰ ਚਾਹੇ, ਤਾਂ ਰਿਪੋਰਟ ਖੋਲ੍ਹ ਸਕਦੀ ਹੈ।
