ਬਿਓਰੋ। ਤਮਾਮ ਕੋਸ਼ਿਸ਼ਾਂ ਦੇ ਬਾਵਜੂਦ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਆਪਣੀ ਹੀ ਸਰਕਾਰ ਦੇ ਨਾਲ ਕਦਮ ਮਿਲਾ ਕੇ ਚੱਲਣ ਲਈ ਤਿਆਰ ਨਜ਼ਰ ਆ ਰਹੇ ਹਨ। ਪਿਛਲੇ ਹਫਤੇ ਜਦੋਂ ਵਿਧਾਨ ਸਭਾ ਵਿੱਚ ਸੀਐੱਮ ਚਰਨਜੀਤ ਚੰਨੀ ਅਤੇ ਸਿੱਧੂ ਨੇ ਮਿਲ ਕੇ ਅਕਾਲੀ ਦਲ ‘ਤੇ ਹਮਲਾ ਬੋਲਿਆ, ਤਾਂ ਲੱਗਿਆ ਕਿ ਹੁਣ ਸਰਕਾਰ ਅਤੇ ਪਾਰਟੀ ਮਿਲ ਕੇ ਕੰਮ ਕਰਨ ਨੂੰ ਤਿਆਰ ਹਨ। ਪਰ ਸਿੱਧੂ ਦੇ ਤਾਜਾ ਟਵੀਟਸ ਨੇ ਇੱਕ ਵਾਰ ਫਿਰ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।
ਸਿੱਧੂ ਨੇ ਹੁਣ ਟਵੀਟ ਜ਼ਰੀਏ ਚੰਨੀ ਸਰਕਾਰ ਦੇ ਸਾਹਮਣੇ ਨਵੀਂ ਮੰਗ ਰੱਖ ਦਿੱਤੀ ਹੈ। ਉਹਨਾਂ ਕਿਹਾ ਕਿ ਸਰਕਾਰ ਨੂੰ ਹਰ ਮਹੀਨੇ ਖਜਾਨੇ ਦੀ ਸਥਿਤੀ ਜਨਤੱਕ ਕਰਨੀ ਚਾਹੀਦੀ ਹੈ। ਭਲਾਈ ਸਕੀਮਾਂ ‘ਤੇ ਜੋ ਫੰਡ ਲੱਗ ਰਹੇ ਹਨ, ਉਹ ਕਮਾਈ ਹੈ ਜਾਂ ਕਰਜ਼, ਇਹ ਪੰਜਾਬ ਨੂੰ ਦੱਸਣਾ ਚਾਹੀਦਾ ਹੈ।
3 ਟਵੀਟਸ ‘ਚ ਸਵਾਲ ਵੀ, ਸਲਾਹ ਵੀ
ਸਿੱਧੂ ਨੇ ਟਵੀਟ ਕਰਕੇ ਕਿਹਾ, “ਅੱਜ ਪੰਜਾਬ ਦੀ ਹਕੀਕਤ ਇਹ ਹੈ ਕਿ ਪੰਜਾਬ ਭਾਰਤ ਦਾ ਸਭ ਤੋਂ ਵੱਧ ਕਰਜ਼ਈ ਸੂਬਾ ਹੈ। ਰਾਜ ਦੇ ਸਿਰ ਇਸਦੇ ਕੁੱਲ ਉਤਪਾਦਨ (GDP) ਦੇ 50% ਦੇ ਬਰਾਬਰ ਕਰਜ਼ਾ ਹੈ। ਅਸੀਂ ਆਪਣਾ ਅੱਧਾ ਖਰਚ ਮਹਿੰਗੇ ਕਰਜ਼ੇ ਦੇ ਸਿਰ ‘ਤੇ ਚਲਾ ਰਹੇ ਹਾਂ। ਅਸਲ ਮੁੱਦਿਆਂ ਜਿਨ੍ਹਾਂ ਦਾ ਹਰ ਪੰਜਾਬੀ ਅਤੇ ਪਾਰਟੀ ਵਰਕਰ ਹੱਲ ਮੰਗਦਾ ਹੈ, ਨੂੰ ਲੀਹੋਂ ਲਾਹੁਣ ਦੀ ਲੋੜ ਨਹੀਂ ਹੈ, ਕਿਉਂਕਿ 2022 ਤੋਂ ਬਾਅਦ ਵੀ ਪੰਜਾਬ ਨੇ ਜੀਣਾ ਹੈ।”
ਅਗਲੇ ਟਵੀਟ ‘ਚ ਸਿੱਧੂ ਨੇ ਲਿਖਿਆ, “ਵਿੱਤੀ ਜਵਾਬਦੇਹੀ ਅਤੇ ਪਾਰਦਰਸ਼ਤਾ ਪੰਜਾਬ ਮਾਡਲ ਦੇ ਥੰਮ੍ਹ ਹਨ। ਜਵਾਬਦੇਹੀ ਹਰ ਯੋਜਨਾ ਦੇ ਐਲਾਨ ਮੌਕੇ ਫੰਡਾਂ ਦੇ ਸਰੋਤ ਦੱਸਣ ਦੀ ਮੰਗ ਕਰਦੀ ਹੈ, ਸਰੋਤ ਭਾਵੇਂ ਸਰਕਾਰੀ ਆਮਦਨ ਹੋਵੇ ਜਾਂ ਮਹਿੰਗਾ ਕਰਜ਼ਾ। ਪਾਰਦਰਸ਼ਤਾ ਹਰ ਮਹੀਨੇ ਸੂਬੇ ਦੀ ਵਿੱਤੀ ਹਾਲਤ ਦੀ ਸਥਿਤੀ ਜਨਤਕ ਕਰਨ ਦੀ ਮੰਗ ਕਰਦੀ ਹੈ।”
ਸਿੱਧੂ ਨੇ ਅੱਗੇ ਲਿਖਿਆ, “ਕਰਜ਼ਾ ਚੁੱਕੀ ਜਾਣਾ ਵਿਕਾਸ ਦਾ ਰਾਹ ਨਹੀਂ ਹੈ ! ਟੈਕਸ ਕਰਜ਼ਿਆਂ ਨੂੰ ਮੋੜਣ ਦੇ ਰਾਹ ਨਹੀਂ ਸਗੋਂ ਵਿਕਾਸ ਦੇ ਰੂਪ ਵਿੱਚ ਲੋਕਾਂ ਕੋਲ ਵਾਪਸ ਜਾਣਾ ਚਾਹੀਦਾ ਹੈ। ਇਸ ਸੰਕਟ ਦੇ ਹੱਲ ਵਾਲੇ ਮਾਡਲ ਦਾ ਮਤਲਬ ਰਾਜ ਦੇ ਆਮਦਨ ਸਰੋਤਾਂ ਦੀ ਚੋਰੀ ਨੂੰ ਰੋਕਣਾ, ਸਰਕਾਰੀ ਖਜ਼ਾਨੇ ਨੂੰ ਭਰਨਾ ਅਤੇ ਆਮਦਨ ਪੈਦਾ ਕਰਕੇ ਇੱਕ ਕਲਿਆਣਕਾਰੀ ਰਾਜ ਖੜ੍ਹਾ ਕਰਨਾ ਹੈ।”
Borrowing is not the way forward! Taxes should not go to settle debt but go back to the people in the form of development. Solution oriented model is to stop theft of State’s resources, fill up public exchequer and create a Welfare State through income generation.#JittegaPunjab
— Navjot Singh Sidhu (@sherryontopp) November 15, 2021
ਕਰਜ਼ ਨੂੰ ਲੈ ਕੇ ਪਹਿਲਾਂ ਵੀ ਚੁੱਕੇ ਸਵਾਲ
ਅਜਿਹਾ ਪਹਿਲੀ ਵਾਰ ਨਹੀਂ ਹੈ ਕਿ ਜਦੋਂ ਸਿੱਧੂ ਨੇ ਖਜਾਨੇ ਨੂੰ ਲੈ ਕੇ ਨਿਸ਼ਾਨਾ ਸਾਧਿਆ ਹੋਵੇ। ਹਾਲ ਹੀ ‘ਚ ਚੰਨੀ ਸਰਕਾਰ ਵੱਲੋਂ ਬਿਜਲੀ ਅਤੇ ਪੈਟਰੋਲ-ਡੀਜ਼ਲ ‘ਤੇ ਦਿੱਤੀ ਗਈ ਰਾਹਤ ਉੱਪਰ ਸਿੱਧੂ ਨੇ ਇਹ ਕਹਿੰਦੇ ਹੋਏ ਸਵਾਲ ਚੁੱਕਿਆ ਸੀ ਕਿ ਪੰਜਾਬ ਨੂੰ ਲੌਲੀਪੌਪ ਦੀ ਨਹੀਂ, ਅਸਲ ਰੋਡਮੈਪ ਦੀ ਲੋੜ ਹੈ। ਸਿੱਧੂ ਨੇ ਇਹ ਵੀ ਕਿਹਾ ਸੀ ਕਿ…ਕੀ ਪੰਜਾਬ ਸਰਕਾਰ ਇਹਨਾਂ ਰਾਹਤਾਂ ਨੂੰ 5 ਸਾਲਾਂ ਤੱਕ ਜਾਰੀ ਰੱਖ ਸਕੇਗੀ? ਪਿਛਲੇ ਦਿਨੀਂ ਸਿੱਧੂ ਨੇ ਇਹ ਵੀ ਕਿਹਾ ਸੀ ਕਿ ਜੇਕਰ ਪੰਜਾਬ ਦੀ ਹਾਲਤ ਨਾ ਸੁਧਰੀ, ਤਾਂ ਇਥੇ ਗ੍ਰਹਿ ਯੁੱਧ ਵਰਗੇ ਹਾਲਾਤ ਬਣ ਸਕਦੇ ਹਨ।
