ਦਿੱਲੀ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਨੂੰ ਮਹਿਜ਼ 10 ਦਿਨਾਂ ਦਾ ਸਮਾਂ ਬਾਕੀ ਹੈ। ਇਸ ਵਿਚਾਲੇ ਬੀਜੇਪੀ ਆਪਣਾ ਕੁਨਬਾ ਵਧਾਉਣ ਵਿੱਚ ਲੱਗੀ ਹੈ। ਬੀਜੇਪੀ ਨੂੰ ਉਸ ਵੇਲੇ ਹੋਰ ਮਜ਼ਬੂਤੀ ਮਿਲੀ, ਜਦੋਂ ਰੈਸਲਿੰਗ ਦੀ ਦੁਨੀਆ ਦੇ ਨਾਮੀ ਚਿਹਰੇ ‘ਦ ਗ੍ਰੇਟ ਖਲੀ’ ਨੇ ਬੀਜੇਪੀ ਜ਼ਰੀਏ ਸਿਆਸੀ ਅਖਾੜੇ ਵਿੱਚ ਪੈਰ ਧਰ ਲਿਆ ਹੈ। ਸਾਬਕਾ WWE ਚੈਂਪੀਅਨ ਦਲੀਪ ਸਿੰਘ ਰਾਣਾ ਉਰਫ ਦ ਗ੍ਰੇਟ ਖਲੀ ਬੀਜੇਪੀ ਵਿੱਚ ਸ਼ਾਮਲ ਹੋ ਗਏ ਹਨ। ਕੇਂਦਰੀ ਮੰਤਰੀ ਜਿਤੇਂਦਰ ਸਿੰਘ ਅਤੇ ਬੀਜੇਪੀ ਸਾਂਸਦ ਸੁਨੀਤਾ ਦੁੱਗਲ ਨੇ ਉਹਨਾਂ ਨੂੰ ਪਾਰਟੀ ਵਿੱਚ ਸ਼ਾਮਲ ਕਰਵਾਇਆ।
ਪੰਜਾਬ ਲਈ ਪ੍ਰਚਾਰ ਕਰਨਗੇ ਖਲੀ
‘ਦ ਗ੍ਰੇਟ ਖਲੀ’ ਪੰਜਾਬ ਚੋਣਾਂ ਵਿੱਚ ਬੀਜੇਪੀ ਲਈ ਪ੍ਰਚਾਰ ਕਰਦੇ ਵੀ ਨਜ਼ਰ ਆ ਸਕਦੇ ਹਨ। ਖਲੀ ਪੰਜਾਬ ਦਾ ਇੱਕ ਵੱਡਾ ਚਿਹਰਾ ਹਨ। ਬੇਸ਼ੱਕ ਉਹ ਹਿਮਾਚਲ ਪ੍ਰਦੇਸ਼ ਦੇ ਰਹਿਣ ਵਾਲੇ ਹਨ, ਪਰ ਉਹਨਾਂ ਨੂੰ ਪਛਾਣ ਪੰਜਾਬ ਨੇ ਦਵਾਈ ਹੈ। ਖਲੀ ਪੰਜਾਬ ਪੁਲਿਸ ਵਿੱਚ ਸੇਵਾ ਨਿਭਾ ਚੁੱਕੇ ਹਨ। ਇਸ ਤੋਂ ਬਾਅਦ ਹੀ ਉਹ ਰੈਸਲਿਗ ਜ਼ਰੀਏ ਵਿਸ਼ਵ ਪੱਧਰ ‘ਤੇ ਫੇਮਸ ਹੋਏ। ਇਸ ਤੋਂ ਬਾਅਦ ਉਹਨਾਂ ਨੇ ਜਲੰਧਰ ਵਿੱਚ ਹੀ ਕੌਂਟੀਨੈਂਟਲ ਰੈਸਲਿੰਗ ਅਕੈਡਮੀ ਖੋਲ੍ਹੀ, ਜਿਥੇ ਨੌਜਵਾਨਾਂ ਨੂੰ ਕੁਸ਼ਤੀ ਦੇ ਦਾਅ-ਪੇਚ ਸਿਖਾਏ ਜਾਂਦੇ ਹਨ।
PM ਮੋਦੀ ਤੋਂ ਪ੍ਰਭਾਵਿਤ ਹੋ ਕੇ BJP ‘ਚ ਆਇਆ- ਖਲੀ
ਬੀਜੇਪੀ ਜੁਆਇਨ ਕਰਨ ਮੌਕੇ ਖਲੀ ਨੇ ਕਿਹਾ ਕਿ ਬੀਜੇਪੀ ਵਿੱਚ ਆ ਕੇ ਉਹਨਾਂ ਨੂੰ ਕਾਫੀ ਚੰਗਾ ਲੱਗ ਰਿਹਾ। ਉਹਨਾਂ ਕਿਹਾ, “WWE ਵਿੱਚ ਨਾਮ ਅਤੇ ਦੌਲਤ ਦੀ ਕਮੀ ਨਹੀਂ ਸੀ, ਪਰ ਦੇਸ਼ ਪ੍ਰਤੀ ਪਿਆਰ ਮੈਨੂੰ ਵਾਪਸ ਖਿੱਚ ਲਿਆਇਆ। ਪੀਐੱਮ ਨਰੇਂਦਰ ਮੋਦੀ ਦੇ ਕੰਮ ਨੂੰ ਵੇਖ ਕੇ ਮੈਂ ਬੀਜੇਪੀ ਵਿੱਚ ਆਇਆ ਹਾਂ। ਬੀਜੇਪੀ ਦੀ ਨੀਤੀ ਭਾਰਤ ਨੂੰ ਅੱਗੇ ਵਧਾਉਣ ਦੀ ਹੈ। ਇਸੇ ਤੋਂ ਪ੍ਰਭਾਵਿਤ ਹੋ ਕੇ ਮੈਂ ਬੀਜੇਪੀ ਜੁਆਇਨ ਕੀਤੀ। ਪਾਰਟੀ ਮੇਰੀ ਡਿਊਟੀ ਜਿਥੇ ਲਗਾਏਗੀ, ਮੈਂ ਪੂਰੀ ਕੋਸ਼ਿਸ਼ ਕਰਾਂਗਾ ਕਿ ਉਸ ‘ਤੇ ਖਰਾ ਉਤਰ ਸਕਾਂ।”
ਕੇਜਰੀਵਾਲ ਨੂੰ ਵੀ ਮਿਲੇ, AAP ‘ਚ ਜਾਣ ਦੀ ਸੀ ਚਰਚਾ
ਦਿਲਚਸਪ ਹੈ ਕਿ ਕਰੀਬ 3 ਮਹੀਨੇ ਪਹਿਲਾਂ ਵੀ ‘ਦ ਗ੍ਰੇਟ ਖਲੀ’ ਦੇ ਸਿਆਸੀ ਅਖਾੜੇ ਵਿੱਚ ਉਤਰਨ ਦੀ ਚਰਚਾ ਛਿੜੀ ਸੀ, ਜਦੋਂ ਉਹਨਾਂ ਨੇ ਦਿੱਲੀ ਵਿੱਚ ‘ਆਪ’ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨਾਲ ਮੁਲਾਕਾਤ ਕੀਤੀ ਸੀ। ਇਸ ਤੋਂ ਬਾਅਦ ਸਿਆਸੀ ਹਲਕਿਆਂ ਵਿੱਚ ਇਸ ਚਰਚਾ ਹੋਣ ਲੱਗੀ ਕਿ ਸ਼ਾਇਦ ਉਹ ‘ਆਪ’ ਦੇ ਜ਼ਰੀਏ ਪੰਜਾਬ ਦੇ ਚੋਣ ਪਿੜ ਵਿੱਚ ਉਤਰਣਗੇ। ਹਾਲਾਂਕਿ ਅਜਿਹਾ ਨਹੀਂ ਹੋਇਆ, ਤੇ ਹੁਣ ਅਚਾਨਕ ਖਲੀ ਨੇ ਬੀਜੇਪੀ ਜੁਆਇਨ ਕਰਕੇ ਸਭ ਨੂੰ ਹੈਰਾਨ ਕਰ ਦਿੱਤਾ।
