ਬਿਓਰੋ। ਪੰਜਾਬ ਦੇ ਡਿਪਟੀ ਸੀਐੱਮ ਸੁਖਜਿੰਦਰ ਸਿੰਘ ਰੰਧਾਵਾ ਦੇ ਜਵਾਈ ਤਰੁਣਵੀਰ ਲਹਿਲ ਨੂੰ ਐਡੀਸ਼ਨਲ ਐਡਵੋਕੇਟ ਜਨਰਲ ਲਗਾਉਣ ‘ਤੇ ਸਿਆਸੀ ਬਵਾਲ ਮਚ ਗਿਆ ਹੈ। ਦਿਲਚਸਪ ਹੈ ਕਿ ਵਿਰੋਧੀਆਂ ਦੇ ਨਾਲ-ਨਾਲ ਕਾਂਗਰਸੀ ਆਗੂਆਂ ਨੇ ਵੀ ਰੰਧਾਵਾ ਦੇ ਖਿਲਾਫ਼ ਮੋਰਚਾ ਖੋਲ੍ਹ ਦਿੱਤਾ ਹੈ ਅਤੇ ਸਵਾਲ ਚੁੱਕਣ ਵਾਲਿਆਂ ਵਿੱਚ ਸਭ ਤੋਂ ਅੱਗੇ ਉਹ ਹਨ, ਜਿਹਨਾਂ ਦੇ ਬੇਟੇ ਨੂੰ ਸਰਕਾਰੀ ਨੌਕਰੀ ਦੇਣ ‘ਤੇ ਖੂਬ ਸਿਆਸਤ ਹੋਈ ਸੀ ਅਤੇ ਉਹਨਾਂ ਦੇ ਬੇਟੇ ਨੇ ਨੌਕਰੀ ਦੀ ਪੇਸ਼ਕਸ਼ ਠੁਕਰਾ ਦਿੱਤੀ ਸੀ।
ਘਰ ਦੇ ਗ੍ਰਹਿ ਮੰਤਰੀ ਬਣ ਗਏ ਰੰਧਾਵਾ- ਬਾਜਵਾ
ਕਾਂਗਰਸੀ ਵਿਧਾਇਕ ਫਤਿਹਜੰਗ ਬਾਜਵਾ ਨੇ ਕਿਹਾ, “ਜਦੋਂ ਸਾਬਕਾ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਨੇ ਮੇਰੇ ਪੁੱਤਰ ਅਰਜੁਨ ਪ੍ਰਤਾਪ ਬਾਜਵਾ ਨੂੰ DSP ਦੀ ਨੌਕਰੀ ਦਿੱਤੀ, ਤਾਂ ਰੰਧਾਵਾ ਨੇ ਬੜੇ ਸਵਾਲ ਖੜ੍ਹੇ ਕੀਤੇ ਸਨ ਕਿ ਅਸੀਂ ਲੋਕਾਂ ਵਿੱਚ ਕਿਵੇਂ ਜਾਵਾਂਗੇ? ਤੁਸੀਂ ਆਪਣੇ ਵਿਧਾਇਕਾਂ ਦੇ ਪੁੱਤਰਾਂ ਨੂੰ ਨੌਕਰੀ ਦੇ ਰਹੇ ਹੋ। ਅਸੀਂ ਤਾਂ ਇਹ ਨੌਕਰੀ ਠੁਕਰਾ ਦਿੱਤੀ। ਮੈਂ ਰੰਧਾਵਾ ਤੋਂ ਪੁੱਛਣਾ ਚਾਹੁੰਦਾ ਹਾਂ ਕਿ ਉਹ ਪੰਜਾਬ ਦੇ ਗ੍ਰਹਿ ਮੰਤਰੀ ਹਨ ਜਾਂ ਆਪਣੇ ਘਰ ਦੇ? ਹਰ ਚੀਜ਼ ਆਪਣੇ ਘਰ ਵਿੱਚ ਲਿਆ ਰਹੇ ਹਨ। ਕੀ ਆਪਣੇ ਜਵਾਈ ਨੂੰ ਐਡੀਸ਼ਨਲ AG ਲਗਾਉਣਾ ਠੀਕ ਹੈ?”
ਕੈਪਟਨ ਸਰਕਾਰ ‘ਚ ਰਿਜੈਕਟ ਹੋਈ ਸੀ ਅਪੀਲ- ਬਾਜਵਾ
ਬਾਜਵਾ ਨੇ ਕਿਹਾ ਕਿ ਜਦੋਂ ਕੈਪਟਨ ਅਮਰਿੰਦਰ ਸਿੰਘ ਦੀ ਸਰਕਾਰ ਸੀ, ਉਦੋਂ ਵੀ ਤਰੁਣਵੀਰ ਨੇ ਅਪਲਾਈ ਕੀਤਾ ਸੀ। ਉਸ ਵੇਲੇ ਅਤੁਲ ਨੰਦਾ ਸੂਬੇ ਦੇ ਐਡਵੋਕੇਟ ਜਨਰਲ ਸਨ। ਤਰੁਣਵੀਰ ਯੋਗ ਨਹੀਂ ਸਨ ਅਤੇ ਅਪੀਲ ਰਿਜੈਕਟ ਹੋ ਗਈ ਸੀ। ਹੁਣ ਰੰਧਾਵਾ ਨੇ ਆਪਣੇ ਅਹੁਦੇ ਦਾ ਗਲਤ ਇਸਤੇਮਾਲ ਕਰਕੇ ਜਵਾਈ ਨੂੰ ਐਡੀਸ਼ਨਲ AG ਨਿਯੁਕਤ ਕਰਵਾ ਦਿੱਤਾ। ਉਹਨਾਂ ਨੇ ਤੰਜ ਕਸਿਆ ਕਿ ਸਿੱਧੇ ਐਡਵੋਕੇਟ ਜਨਰਲ ਹੀ ਬਣਵਾ ਲੈਂਦੇ।
ਸ਼ੂਗਰਫੈੱਡ ਅਤੇ ਮਾਰਕਫੈੱਡ ਪੈਨਲ ‘ਚ ਵੀ ਤਰੁਣਵੀਰ- ਬਾਜਵਾ
ਉਹਨਾਂ ਨੇ ਰੰਧਾਵਾ ਨੂੰ ਕਿਹਾ, “ਦੂਜਿਆਂ ‘ਤੇ ਉਂਗਲੀ ਚੁੱਕਣ ‘ਤੇ ਤਿੰਨ ਉਂਗਲੀਆਂ ਆਪਣੇ ਵੱਲ ਵੀ ਹੁੰਦੀਆਂ ਹਨ। ਮੈਂ ਤਾਂ ਨੌਕਰੀ ਤਿਆਗ ਦਿੱਤੀ, ਪਰ ਤੁਸੀਂ ਇਹ ਸਾਬਿਤ ਕਰ ਦਿੱਤਾ ਕਿ ਗ੍ਰਹਿ ਮੰਤਰਾਲਾ ਤੁਹਾਡੇ ਘਰ ਦਾ ਹੈ। ਸਹਿਕਾਰੀ ਵਿਭਾਗ ਵੀ ਰੰਧਾਵਾ ਦੇ ਕੋਲ ਹੈ। ਇਸਦੇ ਸ਼ੂਗਰਫੈੱਡ ਅਤੇ ਮਾਰਕਫੈੱਡ ਦੇ ਐਡਵੋਕੇਟ ਪੈਨਲ ਵਿੱਚ ਵੀ ਤਰੁਣਵੀਰ ਹਨ।”
ਤ੍ਰਿਪਤ ਬਾਜਵਾ ਅਤੇ ਸਰਕਾਰੀਆ ਨੂੰ ਵੀ ਘੇਰਿਆ
ਕਾਂਗਰਸੀ ਵਿਧਾਇਕ ਫਤਿਹਜੰਗ ਸਿੰਘ ਬਾਜਵਾ ਨੇ ਰੰਧਾਵਾ ਦੇ ਨਾਲ-ਨਾਲ ਮਾਝਾ ਬ੍ਰਿਗੇਡ ਦੇ 2 ਹੋਰ ਵੱਡੇ ਮੰਤਰੀਆਂ ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਅਤੇ ਸੁਖਬਿੰਦਰ ਸਿੰਘ ਸੁਖ ਸਰਕਾਰੀਆ ਨੂੰ ਵੀ ਲਪੇਟੇ ਵਿੱਚ ਲੈ ਲਿਆ। ਫਤਿਹਜੰਗ ਬਾਜਵਾ ਨੇ ਕਿਹਾ ਕਿ ਤ੍ਰਿਪਤ ਬਾਜਵਾ ਤੇ ਸਰਕਾਰੀਆ ਨੇ ਵੀ ਆਪਣੇ ਅਹੁਦੇ ਦਾ ਗਲਤ ਇਸਤੇਮਾਲ ਕੀਤਾ ਅਤੇ ਪਰਿਵਾਰ ਦੇ ਲੋਕਾਂ ਨੂੰ ਐਡਜਸਟ ਕਰਨ ਦਾ ਕੰਮ ਕੀਤਾ ਹੈ। ਉਹਨਾਂ ਨੇ ਤ੍ਰਿਪਤ ਬਾਜਵਾ ਦੇ ਕਰੀਬੀਆਂ ‘ਤੇ ISIS ਨਾਲ ਸਬੰਧ ਹੋਣ ਤੱਕ ਦਾ ਵੀ ਇਲਜਾਮ ਲਗਾ ਦਿੱਤਾ ਅਤੇ NIA ਤੋਂ ਜਾਂਚ ਦੀ ਵੀ ਮੰਗ ਕੀਤੀ।
