ਚੰਡੀਗੜ੍ਹ, September 5, 2022
ਪੰਜਾਬ ਦੇ ਸਾਬਕਾ ਜੰਗਲਾਤ ਮੰਤਰੀ ਸਾਧੂ ਸਿੰਘ ਧਰਮਸੋਤ ਨੂੰ ਪੰਜਾਬ-ਹਰਿਆਣਾ ਹਾਈਕੋਰਟ ਨੇ ਵੱਡੀ ਰਾਹਤ ਦਿੰਦਿਆੰ ਰੈਗੂਲਰ ਬੇਲ ਦੇ ਦਿੱਤੀ ਹੈ। ਇਸ ਮਾਮਲੇ ਵਿੱਚ ਸਾਬਕਾ ਮੰਤਰੀ ਸੰਗਤ ਸਿੰਘ ਗਿਲਜੀਆੰ ਦੇ ਭਤੀਜੇ ਦਲਜੀਤ ਗਿਲਜੀਆੰ ਨੂੰ ਵੀ ਜ਼ਮਾਨਤ ਮਿਲ ਗਈ ਹੈ। ਧਰਮਸੋਤ ਅਤੇ ਦਲਜੀਤ ਗਿਲਜੀਆੰ ਭ੍ਰਿਸ਼ਟਾਚਾਰ ਦੇ ਮਾਮਲੇ ‘ਚ ਜੇਲ੍ਹ ਵਿੱਚ ਬੰਦ ਹਨ।
ਮਾਮਲੇ ਦੀ ਪਿਛਲੀ ਸੁਣਵਾਈ ਦੌਰਾਨ ਪੰਜਾਬ ਸਰਕਾਰ ਅਤੇ ਸਾਬਕਾ ਮੰਤਰੀ ਦੇ ਵਕੀਲਾੰ ਵਿਚਕਾਰ ਤਿੱਖੀ ਬਹਿਸ ਹੋਈ ਸੀ, ਜਿਸ ਤੋੰ ਬਾਅਦ ਹਾਈਕੋਰਟ ਨੇ ਫ਼ੈਸਲਾ ਸੁਰੱਖਿਅਤ ਰੱਖ ਲਿਆ ਸੀ।
ਰੁੱਖਾੰ ਦੀ ਵਾਢੀ ਦੇ ਬਦਲੇ ਰਿਸ਼ਵਤ ਦੇ ਇਲਜ਼ਾਮ
ਸਾਬਕਾ ਮੰਤਰੀ ਸਾਧੂ ਸਿੰਘ ਧਰਮਸੋਤ ‘ਤੇ ਇਲਜ਼ਾਮ ਹੈ ਕਿ ਮੰਤਰੀ ਰਹਿੰਦਿਆੰ ਉਹਨਾੰ ਨੇ ਰੁੱਖਾੰ ਦੀ ਵਾਢੀ ਦੇ ਬਦਲੇ ਕਰੋੜਾੰ ਦੀ ਰਿਸ਼ਵਤ ਲਈ। ਇਸ ਵਿੱਚ ਰੁੱਖਾੰ ਦੀ ਵਾਢੀ ਲਈ ਇਜਾਜ਼ਤ ਦੇਣਾ, ਅਧਿਕਾਰੀਆੰ ਦੇ ਟਰਾੰਸਫਰ, ਖਰੀਦਦਾਰੀ ਅਤੇ NoC ਜਾਰੀ ਕਰਨਾ ਸ਼ਾਮਲ ਸੀ। ਇਸੇ ਦੇ ਚਲਦੇ ਧਰਮਸੋਤ ਖਿਲਾਫ਼ ਭ੍ਰਿਸ਼ਟਾਚਾਰ ਰੋਕੂ ਐਕਟ ਦੇ ਤਹਿਤ ਕੇਸ ਦਰਜ ਕੀਤਾ ਗਿਆ ਸੀ ਅਤੇ 7 ਜੂਨ ਨੂੰ ਅਮਲੋਹ ‘ਚ ਉਹਨਾੰ ਦੇ ਘਰੋੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ।
DFO ਤੇ ਕਾੰਟ੍ਰੈਕਟਰ ਨੇ ਕੀਤਾ ਸੀ ਖੁਲਾਸਾ
ਧਰਮਸੋਤ ਖਿਲਾਫ਼ ਇਹ ਕੇਸ ਮੋਹਾਲੀ ਦੇ ਜ਼ਿਲ੍ਹਾ ਜੰਗਲਾਤ ਅਧਿਕਾਰੀ ਗੁਰਅਮਨਪ੍ਰੀਤ ਸਿੰਘ ਅਤੇ ਕਾੰਟ੍ਰੈਕਟਰ ਹਰਮਿੰਦਰ ਸਿੰਘ ਹਮੀ ਵੱਲੋੰ ਕੀਤੇ ਗਏ ਖੁਲਾਸੇ ਤੋੰ ਬਾਅਦ ਦਰਜ ਕੀਤਾ ਗਿਆ ਸੀ। ਇਹਨਾੰ ਦੋਵਾੰ ਨੂੰ ਇੱਕ ਸਟਿੰਗ ਅਪਰੇਸ਼ਨ ਸਾਹਮਣੇ ਆਉਣ ਤੋੰ ਬਾਅਦ ਰਿਸ਼ਵਤ ਮੰਗਣ ਦੇ ਇਲਜ਼ਾਮਾੰ ਦੇ ਚਲਦੇ 2 ਜੂਨ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। FIR ਮੁਤਾਬਕ, ਧਰਮਸੋਤ ਇੱਕ ਸਥਾਨਕ ਪੱਤਰਕਾਰ ਕਮਲਜੀਤ ਸਿੰਘ ਅਤੇ ਉਹਨਾੰ ਦੇ ਮੀਡੀਆ ਅਡਵਾਈਜ਼ਰ ਚਮਕੌਰ ਸਿੰਘ ਦੇ ਜ਼ਰੀਏ ਰਿਸ਼ਵਤ ਦੀ ਮੰਗ ਕਰਦੇ ਸਨ। ਇਹਨਾੰ ਦੋਵਾੰ ਨੂੰ ਵੀ ਮੰਤਰੀ ਦੇ ਨਾਲ ਕਾਬੂ ਕੀਤਾ ਗਿਆ।
ਸੰਗਤ ਸਿੰਘ ਗਿਲਜੀਆੰ ਨੂੰ ਅਗਾਊੰ ਜ਼ਮਾਨਤ
ਇਸੇ ਕੇਸ ‘ਚ ਸੰਗਤ ਸਿੰਘ ਗਿਲਜੀਆੰ ਵੀ ਮੁਲਜ਼ਮ ਹਨ, ਜਿਹਨਾੰ ਨੂੰ ਹਾਈਕੋਰਟ ਤੋੰ ਅਗਾਊੰ ਜ਼ਮਾਨਤ ਮਿਲੀ ਹੋਈ ਹੈ। ਹਾਲਾੰਕਿ ਉਹਨਾੰ ਦੇ ਭਤੀਜੇ ਦਲਜੀਤ ਸਿੰਘ ਗਿਲਜੀਆੰ ਨੂੰ ਵਿਜੀਲੈੰਸ ਨੇ ਗ੍ਰਿਫ਼ਤਾਰ ਕਰ ਲਿਆ ਸੀ, ਜਿਸਦੇ ਬਾਅਦ ਤੋੰ ਉਹ ਜੇਲ੍ਹ ਵਿੱਚ ਬੰਦ ਸਨ। ਪਰ ਹੁਣ ਧਰਮਸੋਤ ਦੇ ਨਾਲ-ਨਾਲ ਦਲਜੀਤ ਸਿੰਘ ਗਿਲਜੀਆੰ ਨੂੰ ਵੀ ਜ਼ਮਾਨਤ ਦੇ ਦਿੱਤੀ ਗਈ ਹੈ।
