ਬਿਓਰੋ। ਕੇਂਦਰ ਸਰਕਾਰ ਦੇ ਖਿਲਾਫ਼ ਇੱਕ ਸਾਲ ਤੋਂ ਚੱਲ ਰਿਹਾ ਅੰਦੋਲਨ ਖਤਮ ਕਰਨ ਤੋਂ ਬਾਅਦ ਹੁਣ ਕਿਸਾਨ ਆਗੂ ਸਿਆਸਤ ਵਿੱਚ ਉਤਰਨ ਲੱਗੇ ਹਨ। ਸ਼ੁਰੂਆਤ ਹਰਿਆਣਾ ਦੇ ਵੱਡੇ ਕਿਸਾਨ ਆਗੂ ਗੁਰਨਾਮ ਸਿੰਘ ਚਢੂਨੀ ਨੇ ਕੀਤੀ। ਸ਼ਨੀਵਾਰ ਨੂੰ ਚੰਡੀਗੜ੍ਹ ਵਿੱਚ ਪ੍ਰੈੱਸ ਕਾਨਫ਼ਰੰਸ ਕਰਕੇ ਚਢੂਨੀ ਨੇ ਆਪਣੀ ਸਿਆਸੀ ਪਾਰਟੀ ਦਾ ਐਲਾਨ ਕਰ ਦਿੱਤਾ।
ਚਢੂਨੀ ਨੇ ਆਪਣੀ ਸਿਆਸੀ ਪਾਰਟੀ ਦਾ ਨਾਂਅ ਸੰਯੁਕਤ ਸੰਘਰਸ਼ ਪਾਰਟੀ ਰੱਖਿਆ ਹੈ। ਚਢੂਨੀ ਆਪਣੀ ਪਾਰਟੀ ਗਦੀ ਸ਼ੁਰੂਆਤ ਪੰਜਾਬ ਤੋਂ ਕਰਨ ਜਾ ਰਹੇ ਹਨ। ਉਹਨਾਂ ਕਿਹਾ ਕਿ ਪੰਜਾਬ ਵਿੱਚ ਅਸੀਂ ਸਾਰੇ 117 ਸੀਟਾਂ ‘ਤੇ ਚੋਣ ਲੜਾਂਗੇ। ਕਿਸੇ ਨਾਲ ਗਠਜੋੜ ਨਹੀਂ ਹੋਵੇਗਾ। ਉਹਨਾਂ ਸਾਫ ਕੀਤਾ ਕਿ ਉਹ ਖੁਦ ਚੋਣ ਨਹੀਂ ਲੜਨਗੇ। ਉਹਨਾਂ ਨੂੰ ਰਿਛਪਾਲ ਸਿੰਘ ਜੋਡਾਮਾਜਰਾ ਨੂੰ ਪਾਰਟੀ ਦਾ ਪੰਜਾਬ ਪ੍ਰਧਾਨ ਨਿਯੁਕਤ ਕੀਤਾ ਹੈ।
ਅੱਜ ਚੰਡੀਗੜ੍ਹ ਪ੍ਰੈੱਸ ਕਾਨਫਰੰਸ 'ਚ ਪਾਰਟੀ ਦਾ ਐਲਾਨ, ਸੰਯੁਕਤ ਸੰਘਰਸ਼ ਪਾਰਟੀ ਦੇ ਨਾਂ 'ਤੇ ਲੜੇਗੀ ਪੰਜਾਬ ਚ ਚੋਣਾਂ pic.twitter.com/jEcgXXvMKf
— Gurnam Singh Charuni (@GurnamsinghBku) December 18, 2021
ਨੌਜਵਾਨਾਂ ਨੂੰ ਬਾਹਰ ਜਾਣ ਤੋਂ ਰੋਕਣਾ ਪਏਗਾ- ਚਢੂਨੀ
ਚਢੂਨੀ ਨੇ ਕਿਹਾ ਕਿ ਕਿਸਾਨ, ਮਜ਼ਦੂਰ ਅਤੇ ਵਪਾਰੀ ਨੂੰ ਇਕਜੁੱਟ ਹੋਣਾ ਪਏਗਾ। ਪੰਜਾਬ ਵਿੱਚ ਨੌਜਵਾਨ ਪਰੇਸ਼ਾਨ ਹਨ। ਜਿਹਨਾਂ ਅੰਗ੍ਰੇਜਾਂ ਨੂੰ ਕੱਢਿਆ ਸੀ, ਸਾਡਾ ਨੌਜਵਾਨ ਉਹਨਾਂ ਅੰਗ੍ਰੇਜਾਂ ਕੋਲ ਹੀ ਜਾ ਰਿਹਾ ਹੈ। ਪੰਜਾਬ ਦੇ ਅੰਦਰ ਕਾਰੋਬਾਰ ਅਤੇ ਰੁਜ਼ਗਾਰ ਨਹੀਂ ਹੈ। ਹਰ ਸੰਭਵ ਕੋਸ਼ਿਸ਼ ਕਰਾਂਗੇ ਕਿ ਪੰਜਾਬ ਵਿੱਚ ਹਰ ਵਿਅਕਤੀ ਨੂੰ ਰੁਜ਼ਗਾਰ ਮਿਲੇ। ਚਢੂਨੀ ਨੇ ਕਿਹਾ ਕਿ ਸਿਸਟਮ ਵਿੱਚ ਸੁਧਾਰ ਲਈ ਸਿਆਸਤ ‘ਚ ਆਉਣਾ ਜ਼ਰੂਰੀ ਹੈ।
ਪੰਜਾਬ ‘ਚ ਅਫੀਮ ਦੀ ਖੇਤੀ ਦੀ ਲੋੜ- ਚਢੂਨੀ
ਚਢੂਨੀ ਨੇ ਕਿਹਾ ਕਿ ਖੇਤੀਬਾੜੀ ਵਿੱਚ ਵੱਡੇ ਬਦਲਾਅ ਦੀ ਲੋੜ ਹੈ। ਖੇਤੀ ਦੀ ਵਿਦੇਸ਼ਾਂ ਵਿੱਚ ਡਿਮਾਂਡ ਹੋ ਸਕਦੀ ਹੈ। ਪੈਦਾ ਕਰਨ ਤੋਂ ਲੈ ਕੇ ਖਪਤਕਾਰ ਤੱਕ ਦਾ ਕਾਰੋਬਾਰ ਕਿਸਾਨ ਦੇ ਕੋਲ ਹੋਵੇਗਾ। ਅਜਿਹੀ ਖੇਤੀ ਕੀਤੀ ਜਾਵੇਗੀ, ਜਿਸਦੀ ਵਿਦੇਸ਼ਾਂ ਵਿੱਚ ਡਿਮਾਂਡ ਹੋਵੇ। ਅਫੀਮ ਦੀ ਖੇਤੀ ਸ਼ੁਰੂ ਕਰੀਏ, ਤਾਂ ਪੰਜਾਬ ਤਰੱਕੀ ਕਰ ਸਕਦਾ ਹੈ। ਅਫੀਮ ਨਸ਼ਾ ਨਹੀਂ ਹੈ, ਕਮਾਈ ਵੀ ਹੈ। ਇਸ ਨੂੰ ਮਜਾਕ ਵਿੱਚ ਨਾ ਲੈਣਾ।
ਪੰਜਾਬ ਤੋਂ ਸ਼ੁਰੂਆਤ ਕਿਉਂ?
ਪਾਰਟੀ ਦੇ ਪੰਜਾਬ ਪ੍ਰਧਾਨ ਜੋਡਾਮਾਜਰਾ ਨੇ ਦੱਸਿਆ ਸੀ ਉਹਨਾਂ ਨੇ ਬੰਗਾਲ ਵਿੱਚ ਵੀ ਮਿਸ਼ਨ ਚਲਾਇਆ ਅਤੇ ਉਥੇ ਬੀਜੇਪੀ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਹੁਣ ਜਦੋਂ ਮਿਸ਼ਨ ਪੰਜਾਬ ਦੀ ਗੱਲ ਆਈ, ਤਾਂ ਸੋਚਿਆ ਕਿਸਦੀ ਮਦਦ ਕਰਾਂਗੇ, ਕਿਉਂਕਿ ਅਕਾਲੀ ਦਲ ਅਤੇ ਕਾਂਗਰਸ ਦੋਵੇਂ ਹੀ ਦੋਸ਼ੀ ਹਨ। ‘ਆਪ’ ਨੇ ਵੀ ਕਦੇ ਕਾਰਪੋਰੇਟ ਦਾ ਵਿਰੋਧ ਨਹੀਂ ਕੀਤਾ। ਬਹਿਰਹਾਲ ਵਿਕਲਪ ਨਾ ਹੋਣ ਦੇ ਚਲਦੇ ਸਾਨੂੰ ਪੰਜਾਬ ਵਿੱਚ ਆਪਣੀ ਪਾਰਟੀ ਬਣਾਉਣੀ ਪਈ।
