ਬਿਓਰੋ। ਪਾਕਿਸਤਾਨ ਦੇ ਗੁਰਦੁਆਰਾ ਕਰਤਾਰਪੁਰ ਸਾਹਿਬ ਵਿੱਚ ਆਸਥਾ ਨਾਲ ਖਿਲਵਾੜ ਦਾ ਨਵਾਂ ਮਾਮਲਾ ਸਾਹਮਣ ਆਇਆ ਹੈ। ਇਥੇ ਗੁਰਦੁਆਰੇ ‘ਚ ਆਈ ਸੰਗਤ ਨੂੰ ਜਿਸ ਪੈਕੇਟ ‘ਚ ਪ੍ਰਸਾਦ ਦਿੱਤਾ ਜਾਂਦਾ ਹੈ, ਉਸਦੇ ਲਈ ਸਿਗਰੇਟ ਦੇ ਰੈਪਰ ਦਾ ਇਸਤੇਮਾਲ ਕੀਤਾ ਗਿਆ ਹੈ। ਇੰਨਾ ਹੀ ਨਹੀਂ, ਕੜਾਹ ਪ੍ਰਸਾਦਿ (ਦੇਗ) ਲਈ ਵਰਤੇ ਜਾਂਦੇ ਡੋਨੇ-ਪੱਤਲਾਂ ਲਈ ਵੀ ਇਹਨਾਂ ਰੈਪਰ ਨੂੰ ਹੀ ਵਰਤਿਆ ਗਿਆ ਹੈ।
ਜਿਕਰਯੋਗ ਹੈ ਕਿ ਇਹ ਬੇਅਦਬੀ ਨਾ ਸਿਰਫ਼ ਗੁਰਦੁਆਰਾ ਕਰਤਾਰਪੁਰ ਸਾਹਿਬ ਵਿਖੇ ਹੋ ਰਹੀ ਹੈ, ਬਲਕਿ ਗੁਰਦੁਆਰਾ ਨਨਕਾਣਾ ਸਾਹਿਬ ਵਿਖੇ ਵੀ ਇਸੇ ਤਰ੍ਹਾਂ ਦੇ ਪੈਕੇਟ ਦੀ ਵਰਤੋਂ ਕੀਤੀ ਜਾ ਰਹੀ ਹੈ। ਇਸ ਬੇਅਦਬੀ ਨੂੰ ਲੈ ਕੇ ਪਾਕਿਸਤਾਨ ਦੇ ਨਾਲ-ਨਾਲ ਭਾਰਤ ਦੇ ਸਿੱਖ ਭਾਈਚਾਰੇ ਵਿੱਚ ਵੀ ਕਾਫੀ ਰੋਸ ਹੈ।
ਦਿੱਲੀ ਸਿੱਖ ਗੁਰਦੁਆਰਾ ਮੈਨੇਜਮੈਂਟ ਕਮੇਟੀ ਦੇ ਸਾਬਕਾ ਪ੍ਰਧਾਨ ਅਤੇ ਬੀਜੇਪੀ ਆਗੂ ਮਨਜਿੰਦਰ ਸਿੰਘ ਸਿਰਸਾ ਨੇ ਇਸ ਨੂੰ ਕਦੇ ਨਾ ਮੁਆਫ਼ ਕੀਤਾ ਜਾਣ ਵਾਲਾ ਗੁਨਾਹ ਕਰਾਰ ਦਿੱਤਾ। ਉਹਨਾਂ ਕਿਹਾ, “ਇਹ ਸਿੱਖ ਆਸਥਾ ਦੇ ਨਾਲ ਖਿਲਵਾੜ ਹੈ। ਤੰਬਾਕੂ ਨਾਲ ਬਣੇ ਡੋਨੇ-ਪੱਤਲਾਂ ਵਿੱਚ ਪ੍ਰਸਾਦ ਦਿੱਤਾ ਜਾ ਰਿਹਾ ਹੈ। ਇਸਸ ਤੋਂ ਵੱਡਾ ਪਾਪ ਹੋਰ ਕੀ ਹੋ ਸਕਦਾ ਹੈ? ਪਾਕਿਸਤਾਨ ‘ਚ ਸਿੱਖਾਂ ਦੀ ਗਿਣਤੀ ਘੱਟ ਬਚੀ ਹੈ, ਇਸ ਲਈ ਹੁਣ ਉਹਨਾਂ ਦੀ ਸੁਣਵਾਈ ਨਹੀਂ ਹੋ ਰਹ। ਇਸਦੇ ਲਈ ਜਿੰਮੇਵਾਰ ਅਧਿਕਾਰੀਆਂ ਦੇ ਖਿਲਾਫ਼ ਕਾਰਵਾਈ ਕਰਕੇ ਉਹਨਾਂ ਨੂੰ ਜੇਲ੍ਹ ਭੇਜਿਆ ਜਾਣਾ ਚਾਹੀਦਾ ਹੈ।“
Sikh sentiments hurt repetitively in Pak
This time Sangat given Kadah Prashad in Cigarette wrapper pages at Gurdwara Sri Kartarpur Sahib. This smacks of a conspiracy to hurt our faith & harass minority Sikhs in Pak. Earlier, they allowed models to shoot at Gurdwara Sahib premises pic.twitter.com/P1G1RXqs9Q— Manjinder Singh Sirsa (@mssirsa) December 17, 2021
ਮਾਡਲ ਦੇ ਫੋਟੋਸ਼ੂਟ ‘ਤੇ ਵੀ ਹੋਇਆ ਸੀ ਵਿਵਾਦ
ਕਾਬਿਲੇਗੌਰ ਹੈ ਕਿ ਇਸ ਤੋਂ ਪਹਿਲਾਂ ਪਾਕਿਸਤਾਨ ਦੇ ਗੁਰਦੁਆਰਾ ਕਰਤਾਰਪੁਰ ਸਾਹਿਬ ਵਿੱਚ ਇੱਕ ਮਾਡਲ ਦੇ ਫੋਟੋਸ਼ੂਟ ਨੂੰ ਲੈ ਵੀ ਕਾਫੀ ਵਿਵਾਦ ਹੋਇਆ ਸੀ। ਦਰਅਸਲ, ਲਾਹੌਰ ਦੀ ਮਾਜਲ ਸਵਾਲਾ ਲਾਲਾ ਨੇ ਬਿਨ੍ਹਾਂ ਸਿਰ ਢਕੇ ਗੁਰਦੁਆਰੇ ਦੇ ਸਾਹਮਣੇ ਇੱਕ ਕਲੌਥ ਸਟੋਰ ਲਈ ਫੋਟੋਸ਼ੂਟ ਕਰਵਾਇਆ ਸੀ। ਹਾਲਾਂਕਿ, ਇਸ ਮਾਮਲਾ ਭਖਣ ਤੋਂ ਬਾਅਦ ਮਾਡਲ ਨੇ ਮੁਆਫੀ ਮੰਗ ਲਈ ਸੀ ਅਤੇ ਸੋਸ਼ਲ ਮੀਡੀਆ ਤੋਂ ਉਸ ਦੀਆਂ ਤਸਵੀਰਾਂ ਵੀ ਹਟਾ ਦਿੱਤੀਆਂ ਗਈਆਂ ਸਨ।
ਬਾਬੇ ਨਾਨਕ ਦੀ ਪਵਿੱਤਰ ਛੋਹ ਪ੍ਰਾਪਤ ਧਰਤੀ
ਪਹਿਲੀ ਪਾਤਸ਼ਾਹੀ ਸ੍ਰੀ ਗੁਰੂ ਨਾਨਕ ਦੇਵ ਜੀ ਨੇ ਆਪਣੇ ਜੀਵਨ ਦੇ ਆਖਰੀ ਦਿਨ ਪਾਕਿਸਤਾਨ ਦੇ ਕਰਤਾਰਪੁਰ ਵਿਖੇ ਗੁਜਾਰੇ ਸਨ। ਭਾਰਤ-ਪਾਕਿਸਤਾਨ ਦੀ ਵੰਡ ਤੋਂ ਬਾਅਦ ਕਰਤਾਰਪੁਰ ਪਾਕਿਸਤਾਨ ਵਿੱਚ ਚਲਾ ਗਿਆ। ਇਸਦੇ ਬਾਵਜੂਦ ਸਿੱਖ ਭਾਈਚਾਰੇ ਦੇ ਮਨਾਂ ਵਿੱਚ ਹਮੇਸ਼ਾ ਇਸ ਪਵਿੱਤਰ ਧਰਤੀ ਦੇ ਦਰਸ਼ਨ-ਦੀਦਾਰੇ ਦੀ ਤਲਬ ਰਹਿੰਦੀ ਹੈ। ਸਿੱਖ ਹੀ ਨਹੀਂ, ਬਲਕਿ ਹਰ ਭਾਈਚਾਰੇ ਦੇ ਮਨ ਵਿੱਚ ਬਾਬੇ ਨਾਨਕ ਪ੍ਰਤੀ ਕਾਫੀ ਸ਼ਰਧਾ-ਭਾਵਨਾ ਹੈ।
ਇਸੇ ਸ਼ਰਧਾ-ਭਾਵਨਾ ਨੂੰ ਮੁੱਖ ਰਖਦਿਆਂ ਭਾਰਤ-ਪਾਕਿਸਤਾਨ ਦੀਆਂ ਸਰਕਾਰਾਂ ਵੱਲੋਂ ਕਰਤਾਰਪੁਰ ਲਾਂਘਾ ਬਣਾਇਆ ਗਿਆ, ਜਿਸਦੇ ਜ਼ਰੀਏ ਪੰਜਾਬ ਦੀ ਸੰਗਤ ਗੁਰਦਾਸਪੁਰ ਤੋਂ ਮਹਿਜ਼ 7 ਕਿੱਲੋਮੀਟਰ ਦੂਰ ਗੁਰਦੁਆਰਾ ਸਾਹਿਬ ਦੇ ਦਰਸ਼ਨ-ਦੀਦਾਰੇ ਹੁਣ ਬੇਹੱਦ ਅਸਾਨੀ ਨਾਲ ਕਰ ਸਕਦੀ ਹੈ। ਹਾਲਾਂਕਿ ਕੋਰੋਨਾ ਦੇ ਚਲਦੇ ਕਰੀਬ ਡੇਢ ਸਾਲ ਤੱਕ ਇਹ ਲਾਂਘਾ ਬੰਦ ਰਿਹਾ, ਪਰ ਹਾਲ ਹੀ ਵਿੱਚ ਪਹਿਲੀ ਪਾਤਸ਼ਾਹੀ ਦੇ ਪ੍ਰਕਾਸ਼ ਪੁਰਬ ਮੌਕੇ ਇਸ ਨੂੰ ਸੰਗਤ ਲਈ ਖੋਲ੍ਹ ਦਿੱਤਾ ਗਿਆ।
