ਬਿਓਰੋ। ਦਿੱਲੀ ਦੀਆਂ ਬਰੂਹਾਂ ‘ਤੇ ਇੱਕ ਸਾਲ ਤੱਕ ਅੰਦੋਲਨ ਕਰਨ ਵਾਲੇ ਕਿਸਾਨਾਂ ਦੀ ਆਖਰਕਾਰ ਘਰ ਵਾਪਸੀ ਹੋ ਗਈ ਹੈ।
ਪੂਰੇ 380 ਦਿਨਾਂ ਬਾਅਦ ਕਿਸਾਨਾਂ ਦੇ ਜੱਥੇ ਸ਼ਨੀਵਾਰ ਨੂੰ ਨੱਚ-ਗਾ ਕੇ ਜਸ਼ਨ ਮਨਾਉਂਦੇ ਸਿੰਘੂ ਅਤੇ ਟਿਕਰੀ ਬਾਰਡਰ ਤੋਂ ਰਵਾਨਾ ਹੋਏ।
ਸਿੰਘੂ ਬਾਰਡਰ ਤੋਂ ਕਿਸਾਨਾਂ ਦਾ ਇੱਕ ਵੱਡਾ ਕਾਫਿਲਾ ‘ਫਤਹਿ ਮਾਰਚ’ ਦੇ ਰੂਪ ਵਿੱਚ ਰਵਾਨਾ ਹੋਇਆ। ‘ਫਤਹਿ ਮਾਰਚ’ ਸਿੱਖਾਂ ਦੇ ਪਾਵਨ ਸਰੂਪ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਹਜੂਰੀ ਹੇਠ ਕੱਢਿਆ ਗਿਆ, ਜਿਸਦੀ ਅਗਵਾਈ ਸਿੱਖ ਮਰਿਆਦਾ ਤਹਿਤ ਪੰਜ ਪਿਆਰਿਆਂ ਨੇ ਹੀ ਕੀਤੀ।
ਸਿੰਘੂ ਬਾਰਡਰ ਤੋਂ ਜਦੋਂ ਕਿਸਾਨ ਰਵਾਨਾ ਹੋਏ, ਤਾਂ ‘ਸਰਬੱਤ ਦੇ ਭਲੇ’ ਦੇ ਅਰਦਾਸ ਵੀ ਕੀਤੀ ਗਈ। ਘਰ ਵਾਪਸੀ ਦੇ ਦੌਰਾਨ ਕਿਸਾਨਾਂ ਵਿੱਚ ਜ਼ਬਰਦਸਤ ਉਤਸ਼ਾਹ ਨਜ਼ਰ ਆਇਆ। ਹਰ ਪਾਸੇ ਕਿਸਾਨ ਭੰਗੜੇ ਪਾਉਂਦੇ ਨਜ਼ਰ ਆਏ।
ਘਰ ਪਰਤ ਰਹੇ ਕਿਸਾਨਾਂ ਦਾ ਵੱਖ-ਵੱਖ ਥਾਵਾਂ ‘ਤੇ ਸ਼ਾਨਦਾਰ ਸਵਾਗਤ ਕੀਤਾ ਜਾ ਰਿਹਾ ਹੈ। ਕਈ ਥਾਈਂ ਡਰੋਨ ਰਾਹੀਂ ਵੀ ਫੁੱਲ ਬਰਸਾਏ ਗਏ।
ਇੰਨਾ ਹੀ ਨਹੀਂ, ਜਗ੍ਹਾ-ਜਗ੍ਹਾ ਕਿਸਾਨਾਂ ਲਈ ਲੰਗਰ ਦੇ ਵੀ ਖਾਸ ਇੰਤਜਾਮ ਕੀਤੇ ਗਏ।
ਤਿੰਨ ਖੇਤੀ ਕਾਨੂੰਨਾਂ ਦੇ ਵਿਰੋਧ ਵਿੱਚ 26 ਨਵੰਬਰ, 2020 ਨੂੰ ਕਿਸਾਨਾਂ ਨੇ ਦਿੱਲੀ ਕੂਚ ਕੀਤਾ ਸੀ। ਉਸ ਵਕਤ ਉਹਨਾਂ ਨੂੰ ਪ੍ਰਸ਼ਾਸਨ ਨੇ ਜਗ੍ਹਾ-ਜਗ੍ਹਾ ਬਲ ਦਾ ਇਸਤੇਮਾਲ ਕਰਕੇ ਰੋਕਣ ਦੀ ਕੋਸ਼ਿਸ਼ ਕੀਤੀ ਸੀ।
ਹੁਣ 380 ਦਿਨਾਂ ਬਾਅਦ ਹਾਲਾਤ ਬਦਲ ਚੁੱਕੇ ਹਨ। ਹੁਣ ਕਿਸਾਨ ‘ਵਿਜੇ’ ਹਾਸਲ ਕਰਕੇ ਮਹਾਰਾਜਾ ਵਾਂਗ ਘਰਾਂ ਨੂੰ ਪਰਤ ਰਹੇ ਹਨ।
ਕਿਸਾਨ ਆਗੂ ਹੁਣ ਸੋਮਵਾਰ ਨੂੰ ਦਰਬਾਰ ਸਾਹਿਬ ਜਾਣਗੇ ਅਤੇ ਵਾਹਿਗੁਰੂ ਦਾ ਸ਼ੁਕਰਾਨਾ ਕਰਨਗੇ।
