ਬਿਓਰੋ। ਤਮਿਲਨਾਡੂ ਦੇ ਕੁੰਨੂਰ ਵਿੱਚ ਹੋਏ ਹੈਲੀਕਾਪਟਰ ਹਾਦਸੇ ‘ਚ ਸ਼ਹੀਦ ਹੋਏ ਪੰਜਾਬ ਦੇ ਗੁਰਸੇਵਕ ਸਿੰਘ ਦਾ ਪਰਿਵਾਰ ਆਪਣੇ ਪੁੱਤਰ ਦੇ ਆਖਰੀ ਦੀਦਾਰ ਨੂੰ ਵੀ ਤਰਸ ਰਿਹਾ ਹੈ। ਤਰਨਤਾਰਨ ਦੇ ਸ਼ਹੀਦ ਨਾਇਕ ਗੁਰਸੇਵਕ ਸਿੰਘ ਦੀ ਮ੍ਰਿਤਕ ਦੇਹ ਦੀ ਪਛਾਣ ਅਜੇ ਤੱਕ ਨਹੀਂ ਹੋ ਸਕੀ ਹੈ। ਉਹਨਾਂ ਦੀ ਮ੍ਰਿਤਕ ਦੇਹ ਨੂੰ ਪੰਜਾਬ ਲਿਆਉਣ ਵਿੱਚ ਅਜੇ 3-4 ਦਿਨ ਦਾ ਸਮਾਂ ਲੱਗ ਸਕਦਾ ਹੈ।
ਸ਼ਹੀਦਾਂ ਦੀਆਂ ਮ੍ਰਿਤਕ ਦੇਹਾਂ ਨੂੰ ਫਿਲਹਾਲ ਦਿੱਲੀ ਦੇ ਪਾਲਮ ਏਅਰਪੋਰਟ ਵਿਖੇ ਰੱਖਿਆ ਗਿਆ ਹੈ। ਸਰੀਰ ਝੁਲਸ ਜਾਣ ਦੇ ਚਲਦੇ ਪਛਾਣ ਨਹੀਂ ਹੋ ਰਹੀ। ਅਜਿਹੇ ਵਿੱਚ ਪਰਿਵਾਰਾਂ ਤੋਂ DNA ਜਾਂਚ ਲਈ ਸੈਂਪਲ ਲਏ ਗਏ ਹਨ। ਗੁਰਸੇਵਕ ਸਿੰਘ ਦੇ ਘਰ ਬੀਤੇ ਕੱਲ੍ਹ ਦਿੱਲੀ ਤੋਂ 2 ਆਰਮੀ ਜਵਾਨ ਪਹੁੰਚੇ, ਜਿਹਨਾਂ ਨੇ ਸ਼ਹੀਦ ਗੁਰਸੇਵਕ ਦੇ ਪਿਤਾ ਦਾ ਬਲੱਡ ਸੈਂਪਲ ਲਿਆ ਅਤੇ ਦਿੱਲੀ ਰਵਾਨਾ ਹੋ ਗਏ।
ਕਿਸੇ ਵੀ ਮ੍ਰਿਤਕ ਦੇਹ ਦੇ ਹੱਥ ‘ਚ ਕੜਾ ਨਹੀਂ
ਸ਼ਹੀਦ ਗੁਰਸੇਵਕ ਦੇ ਭਰਾ ਜਸਵਿੰਦਰ ਸਿੰਘ ਨੇ ਦੱਸਿਆ ਕਿ ਅਜੇ ਤੱਕ ਸ਼ਹੀਦ ਭਰਾ ਦੀ ਪਛਾਣ ਨਹੀਂ ਹੋ ਸਕੀ ਹੈ। ਉਹਨਾਂ ਦਾ ਭਰਾ ਹਮੇਸ਼ਾ ਆਪਣੇ ਹੱਥ ਵਿੱਚ ਕੜਾ ਪਾ ਕੇ ਰਖਦਾ ਸੀ, ਪਰ ਹਾਦਸੇ ਤੋਂ ਬਾਅਦ ਜਿੰਨੀਆਂ ਵੀ ਮ੍ਰਿਤਕ ਦੇਹਾਂ ਮਿਲੀਆਂ, ਉਹਨਾਂ ਵਿੱਚੋਂ ਕਿਸੇ ਦੇ ਹੱਥ ਵਿੱਚ ਕੜਾ ਨਹੀਂ ਹੈ। ਪਰਿਵਾਰ ਨੂੰ ਹੁਣ DNA ਰਿਪੋਰਟ ਦਾ ਇੰਤਜਾਰ ਹੈ। ਇਸ ਤੋਂ ਬਾਅਦ ਤੋਂ ਸਭ ਸਪੱਸ਼ਟ ਹੋਵੇਗਾ।
ਡੇਢ ਮਹੀਨੇ ਪਹਿਲਾਂ ਛੁੱਟੀ ‘ਤੇ ਆਏ ਸਨ
ਗੁਰਸੇਵਕ ਸਿੰਘ ਡੇਢ ਮਹੀਨੇ ਪਹਿਲਾਂ ਛੁੱਟੀ ‘ਤੇ ਆਏ ਸਨ ਅਤੇ 14 ਨਵੰਬਰ ਨੂੰ ਹੀ ਛੁੱਟੀ ਕੱਟ ਕੇ ਵਾਪਸ ਡਿਊਟੀ ‘ਤੇ ਗਏ। ਛੁੱਟੀਆਂ ਦੇ ਦੌਰਾਨ ਉਹ ਪਰਿਵਾਰ ਦੇ ਨਾਲ ਬਾਬਾ ਬੁੱਢਾ ਸਾਹਿਬ ਵੀ ਗਏ ਸਨ। ਗੁਰਸੇਵਕ ਦੇ 3 ਬੱਚਿਆਂ ਵਿੱਚੋਂ ਵੱਡੀ ਧੀ ਸਿਮਰਨ 9 ਸਾਲ ਅਤੇ ਛੋਟੀ ਧੀ ਗੁਰਲੀਨ 7 ਸਾਲਾਂ ਦੀ ਹੈ। ਬੇਟਾ ਫਤਿਹ ਸਿੰਘ ਸਿਰਫ਼ 3 ਸਾਲ ਦਾ ਹੈ। ਗੁਰਸੇਵਕ ਆਪਣੇ ਬੱਚਿਆਂ ਨੂੰ ਬੇਹੱਦ ਪਿਆਰ ਕਰਦੇ ਸਨ ਅਤੇ ਡਿਊਟੀ ਦੇ ਦੌਰਾਨ ਚਾਹੇ ਜਿੰਨੇ ਵੀ ਥਕੇ ਹੋਣ, ਲਗਭਗ ਰੋਜਾਨਾ ਬੱਚਿਆਂ ਨਾਲ ਫੋਨ ‘ਤੇ ਗੱਲ ਕਰਦੇ ਸਨ।
