ਬਿਓਰੋ। ਦੁਨੀਆ ਦਾ ਸਭ ਤੋਂ ਲੰਮਾ ਅੰਦੋਲਨ ਕਹੇ ਜਾਣ ਵਾਲਾ ਕਿਸਾਨ ਅੰਦੋਲਨ ਹੁਣ ਖਤਮ ਹੋ ਚੁੱਕਿਆ ਹੈ। ਵੀਰਵਾਰ ਨੂੰ ਸੰਯੁਕਤ ਕਿਸਾਨ ਮੋਰਚੇ ਵੱਲੋਂ ਅੰਦੋਲਨ ਖਤਮ ਕਰਨ ਦੇ ਐਲਾਨ ਦੇ ਨਾਲ ਹੀ ਕਿਸਾਨਾਂ ਦੀ ਘਰ ਵਾਪਸੀ ਵੀ ਸ਼ੁਰੂ ਹੋ ਗਈ ਹੈ।
ਸਿੰਘੂ ਅਤੇ ਟਿਕਰੀ ਬਾਰਡਰ ‘ਤੇ ਹਰ ਪਾਸੇ ਕਿਸਾਨ ਆਪਣਾ ਸਾਮਾਨ ਪੈਕ ਕਰਨ ਵਿੱਚ ਲੱਗੇ ਹਨ।
ਅੰਦੋਲਨ ਦੌਰਾਨ ਕਈ ਕਿਸਾਨਾਂ ਨੇ ਪੱਕੇ ਮਕਾਨ ਵੀ ਬਣਾਏ। ਹੁਣ ਉਹਨਾਂ ਨੂੰ ਤੋੜਿਆ ਜਾ ਰਿਹਾ ਹੈ ਅਤੇ ਇੱਟਾਂ ਇਕੱਠੀਆਂ ਕੀਤੀਆਂ ਜਾ ਰਹੀਆਂ ਹਨ।
ਘਰ ਵਾਪਸੀ ਵਿਚਾਲੇ ਬਾਰਡਰ ‘ਤੇ ਜਸ਼ਨ ਦੀਆਂ ਤਸਵੀਰਾਂ ਵੀ ਨਜ਼ਰ ਆ ਰਹੀਆਂ ਹਨ। ਕਿਸਾਨ ਭੰਗੜੇ ਪਾ ਰਹੇ ਹਨ ਅਤੇ ਮਠਿਆਈਆਂ ਵੰਡ ਕੇ ਮੋਰਚਾ ਫਤਹਿ ਕਰਨ ਦੀ ਵਧਾਈ ਦੇ ਰਹੇ ਹਨ।
ਦਿੱਲੀ ਦੇ ਬਾਰਡਰ ‘ਤੇ ਕਾਫੀ ਵੱਡਾ ਏਰੀਆ ਖਾਲੀ ਹੋ ਚੁੱਕਿਆ ਹੈ। ਹਾਲਾਂਕਿ ਹਾਈਵੇ ਨੂੰ ਪੂਰੀ ਤਰ੍ਹਾਂ ਚਾਲੂ ਹੋਣ ਵਿੱਚ ਅਜੇ ਕੁਝ ਸਮਾਂ ਲੱਗ ਸਕਦਾ ਹੈ।
ਕਿਸਾਨ ਆਗੂ ਸ਼ਨੀਵਾਰ ਨੂੰ ਵੱਡੇ ਜੱਥਿਆਂ ਦੇ ਨਾਲ ਰਵਾਨਾ ਹੋਣਗੇ। ਇਸ ਤੋਂ ਪਹਿਲਾਂ ਕਿਸਾਨ ਆਗੂ ਦਿੱਲੀ ਦੇ ਗੁਰਦੁਆਰਾ ਬੰਗਲਾ ਸਾਹਿਬ ਵਿਖੇ ਨਤਮਸਤਕ ਹੋਣ ਲਈ ਪਹੁੰਚੇ। ਇਸ ਦੌਰਾਨ ਬਲਬੀਰ ਸਿੰਘ ਰਾਜੇਵਾਲ ਅਤੇ ਰਾਕੇਸ਼ ਟਿਕੈਤ ਸਣੇ ਕਈ ਆਗੂ ਮੌਜੂਦ ਸਨ।
ਖੇਤੀ ਕਾਨੂੰਨ ਵਾਪਸੀ ਦੀ ਮੰਗ ਨੂੰ ਲੈ ਕੇ ਕਿਸਾਨਾਂ ਨੇ 26 ਨਵੰਬਰ, 2020 ਨੂੰ ਦਿੱਲੀ ਕੂਚ ਕੀਤਾ ਸੀ। ਉਸ ਵਕਤ ਕਿਸੇ ਨੇ ਨਹੀਂ ਸੋਚਿਆ ਸੀ ਕਿ ਇਹ ਅੰਦੋਲਨ ਕਿੰਨਾ ਲੰਮਾ ਚੱਲੇਗਾ।
ਇੱਕ ਸਾਲ ਤੱਕ ਅੰਦੋਲਨ ਰੱਦ ਕਰਨ ਤੋਂ ਸਾਫ਼ ਇਨਕਾਰ ਕਰਦੀ ਰਹੀ ਕੇਂਦਰ ਸਰਕਾਰ ਨੂੰ ਆਖਰਕਾਰ ਝੁਕਣਾ ਪਿਆ। 19 ਨਵੰਬਰ, 2021 ਨੂੰ ਪੀਐੱਮ ਮੋਦੀ ਨੇ ਕਾਨੂੰਨ ਵਾਪਸੀ ਦਾ ਐਲਾਨ ਕੀਤਾ ਅਤੇ ਜਲਦ ਹੀ ਇਸਦੀ ਸੰਵਿਧਾਨਕ ਪ੍ਰਕਿਰਿਆ ਵੀ ਮੁਕੰਮਲ ਕਰ ਲਈ ਗਈ।
ਕਿਸਾਨ ਜਦੋਂ ਇਸ ‘ਤੇ ਵੀ ਨਾ ਮੰਨੇ, ਤਾਂ ਸਰਕਾਰ ਨੇ ਬਾਕੀ ਮੰਗਾਂ ਵੀ ਮੰਨ ਲਈਆਂ ਅਤੇ ਆਖਰ ਘਰ ਵਾਪਸੀ ਦਾ ਰਸਤਾ ਸਾਫ਼ ਹੋ ਗਿਆ।
ਹਾਲਾਂਕਿ ਕਿਸਾਨ ਆਗੂਆਂ ਦਾ ਕਹਿਣਾ ਹੈ ਕਿ ਅਜੇ ਅੰਦੋਲਨ ਖਤਮ ਨਹੀਂ ਹੋਇਆ ਹੈ। ਸਰਕਾਰ ਨੇ ਜੇਕਰ ਵਾਅਦੇ ਮੁਤਾਬਕ, MSP ‘ਤੇ ਗਾਰੰਟੀ ਕਾਨੂੰਨ ਨਾ ਬਣਾਇਆ, ਤਾਂ 15 ਜਨਵਰੀ ਤੋਂ ਬਾਅਦ ਮੁੜ ਅੰਦੋਲਨ ਸ਼ੁਰੂ ਕੀਤਾ ਜਾ ਸਕਦਾ ਹੈ।
