ਬਿਓਰੋ। ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਆਪਣੇ ਇੱਕ ਹੋਰ ਐਲਾਨ ‘ਤੇ ਘਿਰ ਗਏ ਹਨ। ਦਰਅਸਲ, ਪਿਛਲੇ ਦਿਨੀਂ ਲੁਧਿਆਣਾ ਦੌਰੇ ‘ਤੇ ਗਏ ਸੀਐੱਮ ਚੰਨੀ ਅਚਾਨਕ ਆਟੋ ਚਾਲਕਾਂ ਵਿਚਕਾਰ ਪਹੁੰਚ ਗਏ ਅਤੇ ਉਹਨਾਂ ਦੀਆਂ ਪਰੇਸ਼ਾਨੀਆਂ ਸੁਣਦੇ ਹੋਏ ਮੌਕੇ ‘ਤੇ ਹੀ ਕਈ ਵੱਡੇ ਐਲਾਨ ਕਰ ਦਿੱਤੇ। ਸੀਐੱਮ ਨੇ ਐਲਾਨ ਕੀਤਾ ਕਿ ਆਟੋ ਚਾਲਕਾਂ ਦਾ ਸਾਰਾ ਜੁਰਮਾਨਾ ਮੁਆਫ਼ ਹੋਵੇਗਾ, ਪਰ ਸੀਐੱਮ ਦੇ ਐਲਾਨ ਤੋਂ 18 ਦਿਨ ਬਾਅਦ ਵੀ ਇਹ ਵਾਅਦਾ ਹਕੀਕਤ ਵਿੱਚ ਨਹੀਂ ਬਦਲਿਆ ਹੈ।
ਲੁਧਿਆਣਾ ਵਿੱਚ ਆਟੋ ਚਾਲਕ ਜਦੋਂ ਰੀਜਨਲ ਟਰਾਂਸਪੋਰਟ ਅਥਾਰਿਟੀ (RTA) ਦਫ਼ਤਰ ‘ਚ ਪਹੁੰਚੇ, ਤਾਂ ਉਹਨਾਂ ਨੂੰ ਦੱਸਿਆ ਗਿਆ ਕਿ ਕੋਈ ਜੁਰਮਾਨਾ ਮੁਆਫ਼ ਨਹੀਂ ਹੋਵੇਗਾ। ਕਿਹਾ ਗਿਆ ਕਿ ਅਜੇ ਤੱਕ ਸਰਕਾਰ ਨੇ ਕੋਈ ਨੋਟੀਫਿਕੇਸ਼ਨ ਜਾਰੀ ਨਹੀਂ ਕੀਤੀ ਹੈ। ਇਸ ਨਾਲ ਆਟੋ ਚਾਲਕ ਭੜਕ ਗਏ ਹਨ ਅਤੇ ਸੀਐੱਮ ਦੇ ਖਿਲਾਫ਼ ਸੜਕ ‘ਤੇ ਉਤਰ ਆਏ ਹਨ। ਲੁਧਿਆਣਾ ਵਿੱਚ ਆਟੋ ਚਾਲਕਾਂ ਵੱਲੋਂ ਪ੍ਰਦਰਸ਼ਨ ਕੀਤਾ ਗਿਆ।
ਕੇਜਰੀਵਾਲ ਨੇ ਵੀ ਸੀਐੱਮ ਨੂੰ ਘੇਰਿਆ
ਆਮ ਆਦਮੀ ਪਾਰਟੀ ਦੇ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਵੀ ਸੀਐੱਮ ਚੰਨੀ ‘ਤੇ ਹਮਲਾ ਬੋਲਿਆ ਹੈ। ਕੇਜਰੀਵਾਲ ਨੇ ਟਵਿਟਰ ‘ਤੇ ਲਿਖਿਆ ਕਿ ਝੂਠੇ ਐਲਾਨ ਕਰਕੇ ਜਨਤਾ ਨੂੰ ਬੇਵਕੂਫ ਬਣਾਉਣਾ ਗੰਦੀ ਸਿਆਸਤ ਹੈ। ਇੱਕ ਦਿਨ ਤਾਂ ਸੱਚ ਸਾਹਮਣੇ ਆ ਹੀ ਜਾਂਦਾ ਹੈ। ਚੰਨੀ ਸਾਬ੍ਹ ਦੇ ਝੂਠੇ ਐਲਾਨਾਂ ਦਾ ਸੱਚ ਵੀ ਜਨਤਾ ਦੇ ਸਾਹਮਣੇ ਆਉਣ ਲੱਗਿਆ ਹੈ। ਉਹਨਾਂ ਦਾ ਮਕਸਦ ਸਿਰਫ਼ ਝੂਠੇ ਵਾਅਦੇ ਕਰਕੇ ਚੋਣ ਜਿੱਤਣਾ ਹੈ। ਜਨਤਾ ਦੇ ਭਲੇ ਨਾਲ ਇਹਨਾਂ ਦਾ ਕੋਈ ਲੈਣਾ-ਦੇਣਾ ਨਹੀਂ।
झूठे एलान करके जनता को बेवक़ूफ़ बनाना गंदी राजनीति है। एक दिन तो सच सामने आ ही जाता है। चन्नी साहिब के झूठे एलानों का सच भी जनता के सामने आने लगा है। उनका मक़सद केवल झूठे वादे करके चुनाव जीतना है। जनता के भले से उन्हें कोई लेना देना नहीं। pic.twitter.com/vp9OJd9S5F
— Arvind Kejriwal (@ArvindKejriwal) December 10, 2021
ਅਚਾਨਕ ਆਟੋ ਚਾਲਕਾਂ ਦੇ ਕੋਲ ਪਹੁੰਚੇ ਸਨ ਸੀਐੱਮ
ਜਿਕਰਯੋਗ ਹੈ ਕਿ ਚੰਨੀ 22 ਨਵੰਬਰ ਨੂੰ ਲੁਧਿਆਣਾ ਦੇ ਆਤਮ ਨਗਰ ਵਿਧਾਨ ਸਭਾ ਹਲਕੇ ਵਿੱਚ ਚੋਣ ਰੈਲੀ ਕਰਨ ਪਹੁੰਚੇ ਸਨ। ਇਸ ਤੋਂ ਪਹਿਲਾਂ ਉਹ ਆਟੋ ਚਾਲਕਾਂ ਦੇ ਸਟੈਂਡ ‘ਤੇ ਅਚਾਨਕ ਪਹੁੰਚ ਗਏ। ਇਥੇ ਉਹਨਾਂ ਨੇ ਸਟੈਂਡ ‘ਤੇ ਹੀ ਆਟੋ ਚਾਲਕਾਂ ਨਾਲ ਚਾਹ ਪੀਤੀ। ਐਲਾਨ ਕੀਤਾ ਗਿਆ ਕਿ ਉਹਨਾਂ ਦੇ ਆਟੋ ਦੇ ਚਲਾਨ 1 ਰੁਪਏ ਵਿੱਚ ਭੁਗਤਾਏ ਜਾਣਗੇ। ਇਸਦੇ ਲਈ ਇੱਕ ਸਰਟੀਫਿਕੇਟ ਵੀ ਜਾਰੀ ਹੋਵੇਗਾ। ਉਹਨਾਂ ਵੱਲੋਂ ਉਥੇ ਹੀ ਇੱਕ ਬੈਂਚ ‘ਤੇ ਖੜ੍ਹੇ ਹੋ ਕੇ ਆਟੋ ਚਾਲਕਾਂ ਨੂੰ ਸੰਬੋਧਿਤ ਵੀ ਕੀਤਾ ਗਿਆ ਸੀ। ਇਸ ਦੌਰਾਨ ਨਵਜੋਤ ਸਿੱਧੂ ਵੀ ਸੀਐੱਮ ਦੇ ਨਾਲ ਮੌਜੂਦ ਸਨ।
ਕੇਜਰੀਵਾਲ ਤੋਂ ਮੁੱਦਾ ਖੋਹਣ ਦੀ ਕੋਸ਼ਿਸ਼ ‘ਚ ਉਲਟਾ ਪਿਆ ਦਾਅ !
ਦਰਅਸਲ, ਜਿਸ ਦਿਨ ਚੰਨੀ ਲੁਧਿਆਣਾ ਵਿੱਚ ਆਟੋ ਚਾਲਕਾਂ ਦੇ ਕੋਲ ਪਹੁੰਚੇ ਸਨ, ਉਸੇ ਦਿਨ ਸ਼ਾਮ ਨੂੰ ਕੇਜਰੀਵਾਲ ਵੀ ਪਹੁੰਚੇ ਸਨ। ਕੇਜਰੀਵਾਲ ਤੋਂ ਮੁੱਦਾ ਖੋਹਣ ਦੀ ਕੋਸ਼ਿਸ਼ ਵਿੱਚ ਹੀ ਸੀਐੱਮ ਉਹਨਾਂ ਦੇ ਵਿਚਕਾਰ ਪਹੁੰਚ ਗਏ ਸਨ ਅਤੇ ਕਈ ਐਲਾਨ ਕੀਤੇ ਸਨ। ਕੇਜਰੀਵਾਲ ਵੀ ਉਹਨਾਂ ਨੂੰ ਮਾਤ ਦੇਣ ਲਈ ਰਾਤ ਨੂੰ ਆਟੋ ਚਾਲਕ ਦੇ ਘਰ ਡਿਨਰ ਕਰਨ ਲਈ ਪਹੁੰਚ ਗਏ ਸਨ। ਇਸ ਦੌਰਾਨ ਉਹਨਾਂ ਨੇ ਕਿਹਾ ਸੀ ਕਿ ਉਹਨਾਂ ਦੀ ਸਰਕਾਰ ਆਉਣ ‘ਤੇ ਆਟੋ ਚਾਲਕਾਂ ਦੇ ਸਾਰੇ ਮਸਲੇ ਹੱਲ ਕਰ ਦੇਣਗੇ।
ਲੁਧਿਆਣਾ ‘ਚ ਆਟੋ ਚਾਲਕਾਂ ਦਾ ਵੱਡਾ ਵੋਟ ਬੈਂਕ
ਲੁਧਿਆਣਾ ਵਿੱਚ ਇਸ ਵੇਲੇ 30 ਹਜਾਰ ਆਟੋ ਚੱਲ ਰਹੇ ਹਨ ਅਤੇ ਅਜੇ ਤੱਕ 800 ਚਲਾਨ ਸਾਹਮਣੇ ਆ ਚੁੱਕੇ ਹਨ। RTA ਵੱਲੋਂ ਅਜੇ ਤੱਕ 7 ਆਟੋ ਹੀ ਛੱਡੇ ਗਏ ਹਨ, ਜਦਕਿ ਬਾਕੀਆਂ ਨੂੰ ਆਟੋ ਨਹੀਂ ਦਿੱਤੇ ਜਾ ਰਹੇ। ਦੱਸਿਆ ਜਾ ਰਿਹਾ ਹੈ ਕਿ ਇੱਕ ਰੁਪਏ ਜੁਰਮਾਨੇ ਦਾ ਨੋਟੀਫਿਕੇਸ਼ਨ ਸਰਕਾਰ ਵੱਲੋਂ ਅਜੇ ਜਾਰੀ ਨਹੀਂ ਕੀਤਾ ਗਿਆ ਹੈ, ਜਿਸ ਕਾਰਨ ਆਟੋ ਨਹੀਂ ਦਿੱਤੇ ਜਾ ਸਕਦੇ।
