October 4, 2022
(Patiala)
ਪਟਿਆਲਾ ਵਿੱਚ ਤੈਨਾਤ DSP ਸੰਜੀਵ ਸਾਗਰ ਖਿਲਾਫ਼ ਬਲਾਤਕਾਰ ਦਾ ਕੇਸ ਦਰਜ ਕੀਤਾ ਗਿਆ ਹੈ। DSP ਖਿਲਾਫ਼ ਇਹ ਕੇਸ ਉਹਨਾਂ ਦੇ ਘਰ ਵਿੱਚ ਕਿਰਾਏ ‘ਤੇ ਰਹਿਣ ਵਾਲੀ ਮਹਿਲਾ ਦੀ ਸ਼ਿਕਾਇਤ ‘ਤੇ ਦਰਜ ਹੋਇਆ ਹੈ। ਮਹਿਲਾ ਨੇ ਪੁਲਿਸ ਨੂੰ ਦੱਸਿਆ ਕਿ ਉਹ DSP ਦੇ ਘਰ ਬਤੌਰ ਕਿਰਾਏਦਾਰ ਰਹਿ ਰਹੀ ਸੀ। ਇਸੇ ਦੌਰਾਨ ਸੰਜੀਵ ਸਾਗਰ ਨੇ ਉਸ ਨਾਲ ਬਲਾਤਕਾਰ ਕੀਤਾ। ਮਹਿਲਾ ਮੁਤਾਬਕ, DSP ਦਾ ਗੰਨਮੈਨ ਸਤਬੀਰ ਅਤੇ ਪਰਿਵਾਰਕ ਮੈਂਬਰ ਵੀ ਉਸਦਾ ਗਲਤ ਕੰਮ ਵਿੱਚ ਸਾਥ ਦਿੰਦੇ ਸਨ।
ਫਿਲਹਾਲ DSP ਦੀ ਗ੍ਰਿਫ਼ਤਾਰੀ ਨਹੀਂ
ਪੀੜਤਾ ਦੇ ਗੰਭੀਰ ਇਲਜ਼ਾਮ ਲਗਾਉਣ ‘ਤੇ ਪਟਿਆਲਾ ਪੁਲਿਸ ਨੇ DSP ਸੰਜੀਵ ਸਾਗਰ ਦੇ ਖਿਲਾਫ਼ ਕੇਸ ਦਰਜ ਕਰਕੇ ਅਗਾਮੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਹਾਲਾਂਕਿ, ਮੁਲਜ਼ਮ ਨੂੰ ਫਿਲਹਾਲ ਗ੍ਰਿਫ਼ਤਾਰ ਨਹੀਂ ਕੀਤਾ ਗਿਆ ਹੈ। ਇਲਜ਼ਾਮ ਹਨ ਕਿ ਮਾਮਲੇ ਦੀ ਸ਼ਿਕਾਇਤ ਤੋਂ ਬਾਅਦ ਜਾਂਚ ਲਈ ਗਠਿਤ SIT ਵੀ ਪੀੜਤਾ ਨੂੰ ਵਾਰ-ਵਾਰ ਬਰਨਾਲਾ ਦੇ ਪੁਲਿਸ ਥਾਣੇ ਬੁਲਾਉਂਦੀ ਰਹੀ, ਪਰ ਸੁਣਵਾਈ ਨਹੀਂ ਹੋਈ।
ਮਹਿਲਾ ਨੇ ਕਿਹਾ ਕਿ SIT ਦੇ ਮੈਂਬਰ DSP ਸੰਜੀਵ ਕੁਮਾਰ ਦੇ ਸਾਥੀ ਮੁਲਾਜ਼ਮ ਜਾਂ ਉਹਨਾਂ ਦੇ ਜੂਨੀਅਰ ਹੋਣ ਦੇ ਕਾਰਨ ਮਾਮਲੇ ਦੀ ਨਿਰਪੱਖ ਜਾਂਚ ਨਹੀਂ ਕਰ ਰਹੇ ਸਨ। ਹੁਣ ਮਾਮਲਾ ਮੀਡੀਆ ਵਿੱਚ ਆਉਣ ਤੋਂ ਬਾਅਦ ਪੁਲਿਸ ਨੇ ਐਕਸ਼ਨ ਲਿਆ ਅਤੇ ਪੁਲਿਸ ਨੇ ਆਖਰਕਾਰ ਕੇਸ ਦਰਜ ਕਰ ਲਿਆ। ਮਹਿਲਾ ਨੇ ਪੁਲਿਸ ਨੂੰ ਕੇਸ ਨਾਲ ਸਬੰਧਤ ਕੁਝ ਆਡੀਓ ਰਿਕਾਰਡਿੰਗ ਵੀ ਸੌੰਪੇ ਹਨ।
ਮਾਮਲੇ ਦੀ ਜਾਂਚ ‘ਚ ਜੁਟੀ ਪੁਲਿਸ
ਫਿਲਹਾਲ ਪਟਿਆਲਾ ਪੁਲਿਸ ਪੂਰੇ ਮਾਮਲੇ ਦੀ ਜਾਂਚ ਕਰ ਰਹੀ ਹੈ। ਪੁਲਿਸ ਵੱਲੋਂ DSP ਸੰਜੀਵ ਸਾਗਰ ‘ਤੇ ਲੱਗੇ ਇਲਜ਼ਾਮਾਂ, ਪੀੜਤਾ ਕਿੰਨੇ ਸਮੇਂ ਤੋਂ ਮੁਲਜ਼ਮ ਦੇ ਮਕਾਨ ਵਿੱਚ ਬਤੌਰ ਕਿਰਾਏਦਾਰ ਰਹਿ ਰਹੀ ਸੀ, ਵਾਇਸ ਰਿਕਾਰਡਿੰਗ ਦੀ ਸੱਚਾਈ ਕੀ ਹੈ ਅਤੇ ਹੋਰ ਸਬੂਤਾਂ ਦੀ ਜਾਂਚ ਵਿੱਚ ਜੁਟੀ ਹੈ।
