ਚੰਡੀਗੜ੍ਹ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਸੂਬੇ ਵਿੱਚ ਸਿਆਸੀ ਜੋੜ-ਤੋੜ ਦੇ ਮਾਮਲੇ ਨੇ ਜੋਰ ਫੜਿਆ ਹੋਇਆ ਹੈ। ਖਾਸਕਰ ਬੀਜੇਪੀ ਸੂਬੇ ਵਿੱਚ ਆਪਣਾ ਕੁਨਬਾ ਵਧਾਉਣ ਵਿੱਚ ਲੱਗੀ ਹੈ। ਇਸੇ ਤਹਿਤ ਕੈਪਟਨ ਅਮਰਿੰਦਰ ਸਿੰਘ ਦੀ ਸਰਕਾਰ ਵਿੱਚ ਮੰਤਰੀ ਰਹੇ ਰਾਣਾ ਗੁਰਮੀਤ ਸੋਢੀ ਬੀਜੇਪੀ ਵਿੱਚ ਸ਼ਾਮਲ ਹੋ ਗਏ ਹਨ। ਬੀਜੇਪੀ ਦੇ ਪੰਜਾਬ ਚੋਣ ਇੰਚਾਰਜ ਅਤੇ ਕੇਂਦਰੀ ਮੰਤਰੀ ਗਜੇਂਦਰ ਸਿੰਘ ਸ਼ੇਖਾਵਤ ਨੇ ਉਹਨਾਂ ਦਾ ਪਾਰਟੀ ਵਿੱਚ ਸਵਾਗਤ ਕੀਤਾ।
Delighted to be a part of BJP family and work for the development of Punjab
Thanking @gssjodhpur Ji @byadavbjp Ji @SomParkashBJP Ji and Dinesh Gautam Ji for extending such a warm welcome 🙏🏻 https://t.co/BIHWMLnpUI
— Rana Gurmit S Sodhi (@iranasodhi) December 21, 2021
ਮੋਦੀ ਤੇ ਸ਼ਾਹ ਦੀ ਤਾਰੀਫ਼ ‘ਚ ਪੜ੍ਹੇ ਕਸੀਦੇ
ਬੀਜੇਪੀ ਜੁਆਇਨ ਕਰਦਿਆਂ ਹੀ ਸਾਬਕਾ ਮੰਤਰੀ ਰਾਣਾ ਗੁਰਮੀਤ ਸੋਢੀ ਪੀਐੱਮ ਨਰੇਂਦਰ ਮੋਦੀ ਅਤੇ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦੇ ਸੋਹਲੇ ਗਾਉਂਦੇ ਨਜ਼ਰ ਆਏ। ਸਰਹੱਦੀ ਸੂਬੇ ਹੋਣ ਦੇ ਨਾਤੇ ਪੰਜਾਬ ਵਿੱਚ ਲਗਾਤਾਰ ਵਧਦੀਆਂ ਅਪਰਾਧਿਕ ਗਤੀਵਿਧੀਆਂ ਬਾਰੇ ਬੋਲਦਿਆਂ ਸੋਢੀ ਨੇ ਕਿਹਾ, “ਪੰਜਾਬ ਦੀ ਸ਼ਾਂਤੀ ਅਤੇ ਆਪਸੀ ਭਾਈਚਾਰਕ ਸਾਂਝ ਨੂੰ ਜੋ ਖ਼ਤਰਾ ਹੈ, ਉਸ ਨੂੰ ਪਾਰ ਪਾਉਣਾ ਮੌਜੂਦਾ ਸਰਕਾਰ ਦੇ ਵੱਸ ਦਾ ਰੋਗ ਨਹੀਂ।” ਪੀਐੱਮ ਤੇ ਸ਼ਾਹ ਬਾਰੇ ਬੋਲਦਿਆਂ ਰਾਣਾ ਸੋਢੀ ਨੇ ਕਿਹਾ ਕਿ ਹਿੰਦੁਸਤਾਨ ਨੂੰ ਅਜਿਹੇ ਲੀਡਰਾਂ ਦੀ ਲੋੜ ਹੈ। ਉਹਨਾਂ ਕਿਹਾ, “ਪੀਐੱਮ ਨੂੰ ਮੇਰੀ ਵਿਨਤੀ ਹੈ ਕਿ ਪੰਜਾਬ ਨੂੰ ਬਚਾਉਣ ਵੱਲ ਧਿਆਨ ਕਰੋ। ਪੰਜਾਬ ਨੂੰ ਮੋਦੀ, ਉਹਨਾਂ ਦੀ ਸਰਕਾਰ ਤੇ ਬੀਜੇਪੀ ਹੀ ਬਚਾ ਸਕਦੀ ਹੈ।”
Joining @BJP4India to honour my commitment to work for Punjab & Punjabiyat. Humbled with warm welcome given by Honble HM @AmitShah Ji who is equally passionate about making Punjab the most developed state of India.Thanking the party leadership for their trust & this warm welcome. pic.twitter.com/VEzxkbDTDL
— Rana Gurmit S Sodhi (@iranasodhi) December 21, 2021
ਕੈਪਟਨ ਦੇ ਕਰੀਬੀ ਹੋਣ ਕਾਰਨ ਗਈ ਸੀ ਕੁਰਸੀ !
ਦਰਅਸਲ, ਰਾਣਾ ਗੁਰਮੀਤ ਸੋਢੀ ਕੈਪਟਨ ਸਰਕਾਰ ਵਿੱਚ ਸੂਬੇ ਦੇ ਖੇਡ ਮੰਤਰੀ ਸਨ। ਜਦੋਂ ਕੈਪਟਨ ਅਮਰਿੰਦਰ ਸਿੰਘ ਨੂੰ ਸੀਐੱਮ ਅਹੁਦੇ ਤੋਂ ਹਟਾਇਆ ਗਿਆ, ਤਾਂ ਰਾਣਾ ਸੋਢੀ ਵੀ ਨਿਸ਼ਾਨੇ ‘ਤੇ ਆ ਗਏ ਸਨ। ਨਵੇਂ ਸਿਰੇ ਤੋਂ ਮੰਤਰੀਆਂ ਦੇ ਨਾਂਅ ਤੈਅ ਹੋਏ, ਤਾਂ ਸੋਢੀ ਨੂੰ ਮੰਤਰੀਮੰਡਲ ਤੋਂ ਬਾਹਰ ਕਰ ਦਿੱਤਾ ਗਿਆ। ਜਾਹਿਰ ਸੀ ਕਿ ਉਹਨਾਂ ਨੂੰ ਕੈਪਟਨ ਦੇ ਕਰੀਬੀ ਹੋਣ ਦਾ ਖਾਮਿਆਜਾ ਭੁਗਤਣਾ ਪਿਆ।
ਬਗਾਵਤ ਦੇ ਘਟਨਾਕ੍ਰਮ ਦੌਰਾਨ ਕੈਪਟਨ ਦੇ ਨਾਲ ਰਹੇ !
ਦਿਲਚਸਪ ਇਹ ਵੀ ਹੈ ਕਿ ਜਦੋਂ ਸਿੱਧੂ ਧੜੇ ਵੱਲੋਂ ਕੈਪਟਨ ਅਮਰਿੰਦਰ ਸਿੰਘ ਖਿਲਾਫ਼ ਸੂਬੇ ਵਿੱਚ ਬਗਾਵਤ ਦਾ ਝੰਡਾ ਬੁਲੰਦ ਕੀਤਾ ਗਿਆ ਸੀ, ਤਾਂ ਰਾਣਾ ਗੁਰਮੀਤ ਸੋਢੀ ਉਹਨਾਂ ਦੇ ਨਾਲ ਮੋਢੇ ਨਾਲ ਮੋਢਾ ਜੋੜ ਕੇ ਖੜ੍ਹੇ ਨਜ਼ਰ ਆਏ। ਇਥੋਂ ਤੱਕ ਕ ਕੈਪਟਨ ਦੇ ਸ਼ਕਤੀ ਪ੍ਰਦਰਸ਼ਨ ਲਈ ਰਾਣਾ ਸੋਢੀ ਨੇ ਹੀ ਆਪਣੇ ਘਰ ਵਿੱਚ ਡਿਨਰ ਪਾਰਟੀ ਰੱਖੀ ਸੀ।
ਕੋਈ ਹੋਰ ਜਿੰਮੇਵਾਰੀ ਦਾ ਦਿੱਤਾ ਗਿਆ ਸੀ ਭਰੋਸਾ !
ਮੰਤਰੀਮੰਡਲ ਤੋਂ ਬਾਹਰ ਕੀਤੇ ਜਾਣ ਮਗਰੋਂ ਰਾਣਾ ਸੋਢੀ ਸਣੇ ਤਮਾਮ ਆਗੂਆਂ ਨਾਲ ਰਾਹੁਲ ਗਾਂਧੀ ਨੇ ਮੁਲਾਕਾਤ ਕੀਤੀ ਸੀ, ਜਿਸ ਦੌਰਾਨ ਉਹਨਾਂ ਨੂੰ ਪਾਰਟੀ ਵਿੱਚ ਉਚਿਤ ਜਿੰਮੇਵਾਰੀ ਤੇ ਸਨਮਾਨ ਦੇਣ ਦਾ ਭਰੋਸਾ ਦਿੱਤਾ ਗਿਆ ਸੀ। ਹਾਲਾਂਕਿ ਜਦੋਂ ਕਾਂਗਰਸ ਵਿੱਚ ਚੋਣਾਂ ਨਾਲ ਸਬੰਧਤ ਕਮੇਟੀਆਂ ਦਾ ਗਠਨ ਕੀਤਾ ਗਿਆ, ਤਾਂ ਰਾਣਾ ਸੋਢੀ ਨੂੰ ਅਜਿਹੀ ਕੋਈ ਅਹਿਮ ਜਿੰਮੇਵਾਰੀ ਨਹੀਂ ਦਿੱਤੀ ਗਈ। ਇਸੇ ਦੇ ਬਾਅਦ ਤੋਂ ਹੀ ਉਹ ਪਾਰਟੀ ਤੋਂ ਨਰਾਜ਼ ਚੱਲ ਰਹੇ ਸਨ। ਕਾਬਿਲੇਗੌਰ ਹੈ ਕਿ ਹਾਈਕਮਾਂਡ ਨੇ ਪ੍ਰਤਾਪ ਸਿੰਘ ਬਾਜਵਾ ਨੂੰ ਮੈਨੀਫੈਸਟੋ ਕਮੇਟੀ ਅਤੇ ਸੁਨੀਲ ਜਾਖੜ ਨੂੰ ਕੈਂਪੇਨ ਕਮੇਟੀ ਦਾ ਚੇਅਰਮੈਨ ਬਣਾ ਕੇ ਖੁਸ਼ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ।
2 ਸੀਟਾਂ ਤੋਂ ਟਿਕਟ ਦੇ ਚਾਹਵਾਨ ਰਾਣਾ ਸੋਢੀ
ਸਿਆਸੀ ਗਲਿਆਰਿਆਂ ਵਿੱਚ ਚਰਚਾ ਹੈ ਕਿ ਰਾਣਾ ਗੁਰਮੀਤ ਸਿੰਘ ਸੋਢੀ ਇਸ ਵਾਰ ਆਪਣੇ ਪਰਿਵਾਰ ਲਈ 2 ਟਿਕਟਾਂ ਚਾਹੁੰਦੇ ਹਨ। ਫਿਰੋਜ਼ਪੁਰ ਦੀ ਗੁਰੂ ਹਰਸਹਾਏ ਤੋਂ 4 ਵਾਰ ਵਿਧਾਇਕ ਬਣ ਚੁੱਕੇ ਰਾਣਾ ਸੋਢੀ ਮੌਜੂਦਾ ਸਮੇਂ ਵਿੱਚ ਵੀ ਇਥੋਂ ਹੀ ਵਿਧਾਇਕ ਹਨ, ਪਰ ਇਸ ਵਾਰ ਉਹ ਬੀਜੇਪੀ ਦੀ ਟਿਕਟ ‘ਤੇ ਇਥੋਂ ਆਪਣੇ ਪੁੱਤਰ ਅਨੁਮੀਤ ਸਿੰਘ ਹੀਰਾ ਸੋਢੀ ਜਾਂ ਧੀ ਐਡਵੋਕੇਟ ਗਾਇਤਰੀ ਬੇਦੀ ‘ਚੋਂ ਕਿਸੇ ਨੂੰ ਚੋਣ ਲੜਾ ਸਕਦੇ ਹਨ। ਜੇਕਰ ਅਜਿਹਾ ਹੋਇਆ, ਤਾਂ ਰਾਣਾ ਸੋਢੀ ਖੁਦ ਫਿਰੋਜ਼ਪੁਰ ਸ਼ਹਿਰੀ ਸੀਟ ਤੋਂ ਆਪਣੀ ਕਿਸਮਤ ਅਜ਼ਮਾ ਸਕਦੇ ਹਨ।
