ਮੁਕਤਸਰ। ਸ਼ਹਿਰ ਦੇ ਗੋਨਿਆਣਾ ਚੌਂਕ ਨੇੜੇ ਬੁੱਧਵਾਰ ਨੂੰ ਗੈਂਗਸਟਰ ਸ਼ਿਆਮ ਲਾਲ ਉਰਫ ਸ਼ਾਮਾ ਦਾ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ। ਜਾਣਕਾਰੀ ਮੁਤਾਬਕ, 6 ਹਮਲਾਵਰ 2 ਮੋਟਰਸਾਈਕਲਾਂ ‘ਤੇ ਸਵਾਰ ਹੋ ਕੇ ਆਏ ਹਨ, ਜਿਹਨਾਂ ਨੇ ਗੈਂਗਸਟਰ ਸ਼ਾਮਾ ‘ਤੇ ਤਾਬੜਤੋੜ ਗੋਲੀਆਂ ਚਲਾਉਣੀਆਂ ਸ਼ੁਰੂ ਕਰ ਦਿੱਤੀਆਂ। ਇਸ ਗੋਲੀਬਾਰੀ ਵਿੱਚ ਸ਼ਾਮਾ ਦੀ ਮੌਤ ਹੋ ਗਈ।
ਦਰਅਸਲ, ਸ਼ਾਮਾ ਆਪਣੇ ਕੁਝ ਸਾਥੀਆਂ ਦੇ ਨਾਲ ਬੱਸ ਸਟੈਂਡ ਪੁਲਿਸ ਚੌਂਕੀ ਵਿੱਚ ਕਿਸੇ ਝਗੜੇ ਵਿੱਚ 2 ਧਿਰਾਂ ਦ ਰਾਜੀਨਾਮਾ ਕਰਵਾਉਣ ਲਈ ਆਇਆ ਸੀ। ਵਾਪਸੀ ਵੇਲੇ ਜਦੋਂ ਸ਼ਾਮਾ ਗੋਨਿਆਣਾ ਚੌਂਕ ਨੇੜੇ ਪਹੁੰਚਿਆ, ਤਾਂ ਹਮਲਾਵਰਾਂ ਨੇ ਫਾਇਰਿੰਗ ਸ਼ੁਰੂ ਕਰ ਦਿੱਤਾ। ਸ਼ਾਮਾ ਖੁਦ ਨੂੰ ਬਚਾਉਣ ਦੀ ਕੋਸ਼ਿਸ਼ ਵਿੱਚ ਆਪਣੇ ਘਰ ਵੱਲ ਭੱਜਿਆ, ਪਰ ਹਮਲਾਵਰਾਂ ਨੇ ਉਸਦਾ ਪਿੱਛਾ ਨਹੀਂ ਛੱਡਿਆ ਅਤੇ ਫਾਇਰਿੰਗ ਕਰਦੇ ਰਹੇ। ਗੋਲੀਬਾਰੀ ਵਿਚਾਲੇ ਉਹ ਕਿਸੇ ਘਰ ਵਿੱਚ ਵੜ ਗਿਆ ਅਤੇ ਪੌੜੀਆਂ ਚੜ੍ਹਨ ਲੱਗਿਆ। ਹਮਲਾਵਰ ਵੀ ਉਸਦੇ ਪਿੱਛੇ ਘਰ ਵਿੱਚ ਵੜੇ ਅਤੇ ਫਾਇਰਿੰਗ ਕਰਦੇ ਰਹੇ। ਗੋਲੀਆਂ ਲੱਗਣ ਨਾਲ ਲਹੂਲੁਹਾਨ ਹੋਇਆ ਸ਼ਾਮਾ ਪੌੜੀਆਂ ਤੋਂ ਡਿੱਗ ਗਿਆ ਅਤੇ ਉਸਦੀ ਮੌਤ ਹੋ ਗਈ। ਮਕਾਨ ਦੇ ਆਸਪਾਸ ਅਤੇ ਅੰਦਰ ਖੂਨ ਹੀ ਖੂਨ ਬਿਖਰਿਆ ਹੋਇਆ ਸੀ। ਇਸ ਹਮਲੇ ਵਿੱਚ ਸ਼ਾਮਾ ਦੇ ਵੱਡੇ ਭਰਾ ਦੀ ਲੱਤ ਵਿੱਚ ਵੀ ਗੋਲੀ ਵੱਜੀ ਹੈ, ਜਿਸ ਨੂੰ ਇਲਾਜ ਲਈ ਹਸਪਤਾਲ ਦਾਖਲ ਕਰਵਾਇਆ ਗਿਆ ਹੈ।
ਮੌਕੇ ‘ਤੇ ਮੋਟਰਸਾਈਕਲ ਛੱਡ ਕੇ ਭੱਜੇ ਹਮਲਾਵਰ
ਸ਼ਾਮਾ ਦਾ ਕਤਲ ਕਰਨ ਤੋਂ ਬਾਅਦ ਹਮਲਾਵਰ ਇੱਕ ਮੋਟਰਸਾਈਕਲ ਉਥੇ ਹੀ ਛੱਡ ਕੇ ਫਰਾਰ ਹੋ ਗਏ। ਦਰਅਸਲ, ਸ਼ਾਮਾ ਨੂੰ ਮਾਰਨ ਲਈ 6 ਹਮਲਾਵਰ 2 ਮੋਟਰਸਾਈਕਲ(ਬੁਲੇਟ ਅਤੇ ਡਿਸਕਵਰ) ‘ਤੇ ਸਵਾਰ ਹੋ ਕੇ ਆਏ ਸਨ। ਕਤਲ ਕਰਨ ਤੋਂ ਬਾਅਦ 3 ਹਮਲਾਵਰ ਬੁਲੇਟ ‘ਤੇ ਫਰਾਰ ਹੋ ਗਏ, ਜਦਕਿ ਡਿਸਕਵਰ ਮੋਟਰਸਾਈਕਲ ਮੌਕੇ ‘ਤੇ ਹੀ ਛੱਡ ਕੇ ਪੈਦਲ ਫਾਇਰਿੰਗ ਕਰਦੇ ਹੋਏ ਗੋਨਿਆਣਾ ਪਿੰਡ ਵੱਲ ਚਲੇ ਗਏ। ਬੁਲੇਟ ‘ਤੇ ਫਰਾਰ ਹੋਏ ਮੁਲਜ਼ਮਾਂ ਨੇ ਸੇਤੀਆ ਪੇਪਰ ਮਿਰਲ ਨੇੜੇ ਇੱਕ ਕਾਰ ਨੂੰ ਪਿੱਛੋਂ ਟੱਕਰ ਮਾਰ ਕੇ ਗੰਨ ਪੁਆਇੰਟ ‘ਤੇ ਕਾਰ ਖੋਹ ਲਈ ਅਤੇ ਉਸ ‘ਤੇ ਫਰਾਰ ਹੋ ਗਏ।
