ਚੰਡੀਗੜ੍ਹ। ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਦੇ ਅਸਤੀਫੇ ਤੋਂ ਬਾਅਦ ਪਾਰਟੀ ਵਿੱਚ ਜ਼ਬਰਦਸਤ ਉਥਲ-ਪੁਥਲ ਹੈ। ਪੂਰੇ ਵਿਵਾਦ ‘ਤੇ ਹਾਈਕਮਾਂਡ ਫਿਲਹਾਲ ਖਾਮੋਸ਼ ਹੈ ਅਤੇ ਮਸਲੇ ਨੂੰ ਸੁਲਝਾਉਣ ਦੀ ਜਿੰਮੇਵਾਰੀ ਸੀਐੱਮ ਚਰਨਜੀਤ ਚੰਨੀ ਨੂੰ ਸੌਂਪੀ ਹੈ। ਚੰਨੀ ਨੇ ਸਿੱਧੂ ਨੂੰ ਮਨਾਉਣ ਲਈ ਕੈਬਨਿਟ ਮੰਤਰੀ ਪਰਗਟ ਸਿੰਘ ਅਤੇ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਦੀ ਜਿੰਮੇਵਾਰੀ ਲਾਈ ਹੈ, ਪਰ ਸਿੱਧੂ ਦੇ ਤੇਵਰ ਦੱਸ ਰਹੇ ਹਨ ਕਿ ਉਹ ਆਪਣੀ ਮਨਵਾ ਕੇ ਹੀ ਅਸਤੀਫਾ ਵਾਪਸ ਲੈਣਗੇ।
ਸਿੱਧੂ ਅੱਗੇ ਝੁਕਣ ਨੂੰ ਤਿਆਰ ਚੰਨੀ..!
ਸ਼ਾਇਦ ਸੀਐੱਮ ਚਰਨਜੀਤ ਸਿੰਘ ਚੰਨੀ ਵੀ ਸਿੱਧੂ ਦੀ ਨਰਾਜ਼ਗੀ ਮੋਲ ਨਹੀਂ ਲੈਣਾ ਚਾਹੁੰਦੇ। ਲਿਹਾਜਾ ਉਹ ਆਪਣੇ ਫੈਸਲੇ ਤੋਂ ਪਿੱਛੇ ਹਟਣ ਲਈ ਵੀ ਤਿਆਰ ਹਨ। ਬੁੱਧਵਾਰ ਨੂੰ ਜਦੋਂ ਮੁੱਖ ਮੰਤਰੀ ਤੋਂ ਸਿੱਧੂ ਦੀ ਨਰਾਜ਼ਗੀ ਬਾਰੇ ਸਵਾਲ ਕੀਤਾ ਗਿਆ, ਤਾਂ ਉਹਨਾਂ ਕਿਹਾ, “ਜੇਕਰ ਮੈਨੂੰ ਲੱਗੇਗਾ ਕਿ ਕਿਸੇ ਫੈਸਲੇ ਨਾਲ ਲੋਕਾਂ ਵਿਚਕਾਰ ਗਲਤ ਸੰਦੇਸ਼ ਜਾ ਰਿਹਾ ਹੈ, ਤਾਂ ਮੈਨੂੰ ਪਿੱਛੇ ਹਟਣ ਤੋਂ ਕੋਈ ਇਤਰਾਜ਼ ਨਹੀਂ।”
ਮੁੱਖ ਮੰਤਰੀ ਦੀ ਨਵਜੋਤ ਸਿੱਧੂ ਨੂੰ ਨਸੀਹਤ !
ਇਸ ਦੌਰਾਨ ਸੀਐੱਮ ਚਰਨਜੀਤ ਚੰਨੀ ਨੇ ਇਸ਼ਾਰਿਆਂ-ਇਸ਼ਾਰਿਆਂ ਵਿੱਚ ਸਿੱਧੂ ਨੂੰ ਨਸੀਹਤ ਵੀ ਦੇ ਦਿੱਤੀ। ਚੰਨੀ ਨੇ ਕਿਹਾ, “ਪਾਰਟੀ ਪ੍ਰਧਾਨ ਪਰਿਵਾਰ ਦਾ ਮੁਖੀਆ ਹੁੰਦਾ ਹੈ। ਉਸ ਨੂੰ ਪਰਿਵਾਰ ਵਿੱਚ ਬਹਿ ਕੇ ਮਜਬੂਤੀ ਨਾਲ ਆਪਣੀ ਗੱਲ ਰੱਖ ਕੇ ਸਾਰਿਆਂ ਨੂੰ ਸਹਿਮਤ ਕਰਵਾਉਣਾ ਚਾਹੀਦਾ ਹੈ। ਜੇਕਰ ਕੁਝ ਗਲਤ ਲੱਗ ਰਿਹਾ ਹੈ, ਤਾਂ ਇਸ ਬਾਰੇ ਦੱਸਣਾ ਚਾਹੀਦਾ ਹੈ।” ਹਾਲਾਂਕਿ ਚੰਨੀ ਨੇ ਇਹ ਜ਼ਰੂਰ ਕਿਹਾ ਕਿ ਉਹ ਪੰਜਾਬ ਦੇ ਮੁੱਦਿਆਂ ਤੋਂ ਪਿੱਛੇ ਨਹੀਂ ਹਟਣਗੇ।
ਦੋਵੇਂ ਆਗੂਆਂ ਨੇ ਫੋਨ ‘ਤੇ ਵੀ ਕੀਤੀ ਗੱਲ
ਸੀਐੱਮ ਚਰਨਜੀਤ ਚੰਨੀ ਨੇ ਨਵਜੋਤ ਸਿੱਧੂ ਨਾਲ ਫੋਨ ‘ਤੇ ਵੀ ਗੱਲ ਕੀਤੀ। ਉਹਨਾਂ ਕਿਹਾ, “ਜੇਕਰ ਸਿੱਧੂ ਨੂੰ ਕੁਝ ਗਲਤੀਆਂ ਲੱਗ ਰਹੀਆਂ ਹਨ, ਤਾਂ ਉਹ ਦੱਸ ਸਕਦੇ ਹਨ। ਉਹਨਾਂ ਨੇ ਕਿਹਾ ਹੈ ਕਿ ਮੁਲਾਕਾਤ ਦਾ ਟਾਈਮ ਦੇਣਗੇ।”
