October 18, 2022
(Chandigarh)
ਪੰਜਾਬ ਦੇ ਰਾਜਪਾਲ ਬਨਵਾਰੀ ਲਾਲ ਪੁਰੋਹਿਤ ਅਤੇ ਮਾਨ ਸਰਕਾਰ ਵਿਚਕਾਰ ਤਕਰਾਰ ਘੱਟ ਹੋਣ ਦੀ ਬਜਾਏ ਲਗਾਤਾਰ ਵੱਧ ਰਹੀ ਹੈ। ਹੁਣ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ, ਲੁਧਿਆਣਾ ਦੇ ਵਾਈਸ ਚਾਂਸਲਰ ਨੂੰ ਲੈ ਕੇ ਦੋਵੇਂ ਆਹਮੋ-ਸਾਹਮਣੇ ਹਨ। ਦਰਅਸਲ, ਰਾਜਪਾਲ ਨੇ ਵੀਸੀ ਡਾ. ਸਤਬੀਰ ਗੋਸਲ ਦੀ ਨਿਯੁਕਤੀ ਨੂੰ ਗੈਰ-ਕਾਨੂੰਨੀ ਦੱਸਿਆ ਹੈ। ਰਾਜਪਾਲ ਨੇ ਸਰਕਾਰ ਨੂੰ ਚਿੱਠੀ ਲਿਖ ਕੇ ਤੁਰੰਤ ਵੀਸੀ ਨੂੰ ਹਟਾਉਣ ਲਈ ਕਿਹਾ ਹੈ।
ਦਰਅਸਲ, PAU ਵਿੱਚ ਇੱਕ ਸਾਲ ਤੋਂ ਵੀਸੀ ਦਾ ਅਹੁਦਾ ਖਾਲੀ ਪਿਆ ਸੀ। ਮਾਨ ਸਰਕਾਰ ਨੇ ਕਰੀਬ 2 ਮਹੀਨੇ ਪਹਿਲਾਂ ਮਸ਼ਹੂਰ ਖੋਜਕਰਤਾ ਡਾ. ਸਤਬੀਰ ਸਿੰਘ ਗੋਸਲ ਨੂੰ ਨਵਾਂ ਵੀਸੀ ਨਿਯੁਕਤ ਕੀਤਾ ਸੀ।
ਰਾਜਪਾਲ ‘ਤੇ ਭੜਕੇ ਮਾਨ ਦੇ ਮੰਤਰੀ
ਰਾਜਪਾਲ ਦੀ ਚਿੱਠੀ ‘ਤੇ ਮਾਨ ਸਰਕਾਰ ਨੇ ਸਖਤ ਇਤਰਾਜ਼ ਜਤਾਉਂਦੇ ਹੋਏ ਰਾਜਪਾਲ ‘ਤੇ ਜ਼ੋਰਦਾਰ ਹਮਲਾ ਬੋਲਿਆ ਹੈ। ਕੈਬਨਿਟ ਮੰਤਰੀ ਕੁਲਦੀਪ ਧਾਲੀਵਾਲ ਨੇ ਕਿਹਾ ਕਿ ਰਾਜਪਾਲ ਨੂੰ ਇਸ ਤਰ੍ਹਾਂ ਦੀਆਂ ਚਿੱਠੀਆਂ ਲਿਖਣ ਤੋਂ ਪਹਿਲਾਂ ਕਾਨੂੰਨ ਪੜ੍ਹਨਾ ਚਾਹੀਦਾ ਹੈ। ਉਹਨਾਂ ਨੇ ਕਿਹਾ ਕਿ ਵੀਸੀ ਦੀ ਨਿਯੁਕਤੀ ਵਿੱਚ ਕੁਝ ਵੀ ਗਲਤ ਨਹੀਂ ਹੈ। ਧਾਲੀਵਾਲ ਨੇ ਕਿਹਾ ਕਿ ਰਾਜਪਾਲ ਨੂੰ ਖੇਤੀਬਾੜੀ ਯੂਨੀਵਰਸਿਟੀ ਦੇ ਗਠਨ ਬਾਰੇ ਕੋਈ ਜਾਣਕਾਰੀ ਨਹੀਂ ਹੈ। ਉਹਨਾਂ ਨੂੰ ਇਹ ਤੱਕ ਨਹੀਂ ਪਤਾ ਕਿ ਖੇਤੀਬਾੜੀ ਯੂਨੀਵਰਸਿਟੀ UGC ਐਕਟ ਦੇ ਤਹਿਤ ਨਹੀਂ, ਬਲਕਿ ਪੰਜਾਬ ਐਂਡ ਹਰਿਆਣਾ ਐਗ੍ਰੀਕਲਚਰ ਐਕਟ 1970 ਦੇ ਤਹਿਤ ਆਉਂਦੀ ਹੈ।
ਕੈਬਨਿਟ ਮੰਤਰੀ @KuldeepSinghAAP ਜੀ ਦੀ ਅਹਿਮ ਪ੍ਰੈੱਸ ਕਾਨਫ਼ਰੰਸ ਪੰਜਾਬ ਭਵਨ, ਚੰਡੀਗੜ੍ਹ ਤੋਂ Live https://t.co/KVIWaXGUaX
— AAP Punjab (@AAPPunjab) October 18, 2022
ਧਾਲੀਵਾਲ ਨੇ ਕਿਹਾ ਕਿ ਰਾਜਪਾਲ ਨਿਯਮ ਕਾਨੂੰਨ ਨੂੰ ਤਾਕ ‘ਤੇ ਰੱਖ ਕੇ ਰਾਜਨੀਤੀ ਕਰ ਰਹੇ ਹਨ। ਉਹਨਾਂ ਨੂੰ ਇਸਦੇ ਲਈ ਪੰਜਾਬੀਆਂ ਤੋਂ ਮੁਆਫ਼ੀ ਮੰਗਣੀ ਚਾਹੀਦੀ ਹੈ। ਧਾਲੀਵਾਲ ਨੇ ਕਿਹਾ ਕਿ ਗੁਜਰਾਤ ਵਿੱਚ ਆਮ ਆਦਮੀ ਪਾਰਟੀ ਦੇ ਵਧਦੇ ਗ੍ਰਾਫ ਨੂੰ ਵੇਖ ਕੇ ਬੀਜੇਪੀ ਬੌਖਲਾਈ ਹੋਈ ਹੈ। ਇਹ ਪੱਤਰ ਵੀ ਉਸੇ ਬੌਖਲਾਹਟ ਦਾ ਨਤੀਜਾ ਹੈ।
ਧਾਲੀਵਾਲ ਨੇ ਕਿਹਾ ਕਿ ਰਾਜਪਾਲ ਬੀਜੇਪੀ ਦੀ ਲਿਖੀ ਸਕ੍ਰਿਪਟ ‘ਤੇ ਕੰਮ ਕਰ ਰਹੀ ਹੈ। ਧਾਲੀਵਾਲ ਨੇ ਕਿਹਾ ਕਿ ਲਗਦਾ ਹੈ ਰਾਜਪਾਲ ਵੱਲੋਂ ਭੇਜਿਆ ਗਿਆ ਪੱਤਰ ਵੀ ਬੀਜੇਪੀ ਦਫਤਰ ਵਿਖੇ ਤਿਆਰ ਹੋਇਆ ਹੈ। ਧਾਲੀਵਾਲ ਨੇ ਕਿਹਾ ਕਿ ਜੇਕਰ ਰਾਜਪਾਲ ਨੇ ਸਿਆਸਤ ਕਰਨੀ ਹੈ, ਤਾਂ ਉਹ ਸਿਆਸੀ ਮੈਦਾਨ ਵਿੱਚ ਕਰਨ ਅਤੇ ਚੋਣ ਲੜ ਕੇ ਵਿਖਾਉਣ।
ਬੀਜੇਪੀ ਦਾ ‘ਆਪ’ ‘ਤੇ ਪਲਟਵਾਰ
ਓਧਰ ਇਸ ਪੂਰੇ ਵਿਵਾਦ ਨੂੰ ਲੈ ਕੇ ਬੀਜੇਪੀ ਨੇ ਵੀ ‘ਆਪ’ ‘ਤੇ ਪਲਟਵਾਰ ਕੀਤਾ ਹੈ। ਬੀਜੇਪੀ ਆਗੂ ਸੁਨੀਲ ਜਾਖੜ ਨੇ ਟਵੀਟ ਕਰਕੇ ਕਿਹਾ, “ਕੀ ਇਹ ‘नाच न जाने आँगन टेढ़ा’ ਦਾ ਮਾਮਲਾ ਹੈ? ਜਾਂ ਇੱਕ ਨਰਾਜ਼ ਨੌਕਰਸ਼ਾਹੀ ‘ਆਪ’ ਸਰਕਾਰ ਨੂੰ ਨੀਵਾਂ ਵਿਖਾ ਰਹੀ ਹੈ? ਕਿਉਂਕਿ ਲਗਦਾ ਹੈ ਕਿ ਖੇਤੀਬਾੜੀ ਮੰਤਰੀ ਨੂੰ ਕਿਸੇ ਨੂੰ ਦੱਸਿਆ ਨਹੀਂ ਕਿ ਰਾਜਪਾਲ PAU ਦੇ ਚਾਂਸਲਰ ਹਨ ਅਤੇ ਇਸ ਨਾਤੇ VC ਦੀ ਨਿਯੁਕਤੀ ਲਈ PAU ਬੋਰਡ ਦੇ ਫ਼ੈਸਲੇ ਨੂੰ ਉਹਨਾਂ ਦੀ ਮਨਜ਼ੂਰੀ ਜ਼ਰੂਰੀ ਹੈ।”
Is it a case of
नाच न जाने आँगन टेढ़ा
or a miffed bureaucracy showing the rookie AAP govt down ?
Because no one seems to have informed the Agriculture Minister that Governor is the Chancellor of PAU-and as such his approval is 'a must' for PAU board's decision appointing a VC.— Sunil Jakhar (@sunilkjakhar) October 18, 2022
ਅਕਾਲੀ ਦਲ ਨੇ ਵੀ ਰਾਜਪਾਲ ‘ਤੇ ਚੁੱਕੇ ਸਵਾਲ
ਅਜੇ ਤੱਕ ਰਾਜਪਾਲ ਅਤੇ ਸਰਕਾਰ ਦੇ ਝਗੜੇ ਨੂੰ ਲੈ ਕੇ ਸਰਕਾਰ ‘ਤੇ ਸਵਾਲ ਚੁੱਕ ਰਹੇ ਅਕਾਲੀ ਦਲ ਦਾ ਇਸ ਮਾਮਲੇ ਵਿੱਚ ਰੁਖ ਵੱਖਰਾ ਹੈ। ਪਾਰਟੀ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨੇ ਰਾਜਪਾਲ ਵੱਲੋਂ ਵੀਸੀ ਦੀ ਨਿਯੁਕਤੀ ਰੱਦ ਕਰਨ ਨੂੰ ਗਲਤ ਕਰਾਰ ਦਿੱਤਾ ਹੈ। ਸੁਖਬੀਰ ਨੇ ਕਿਹਾ, “ਮੈਂ ਪੰਜਾਬ ਦੇ ਰਾਜਪਾਲ ਮਾਣਯੋਗ ਬਨਵਾਰੀ ਲਾਲ ਪਰੋਹਿਤ ਜੀ ਨੂੰ ਬੇਨਤੀ ਕਰਦਾ ਹਾਂ ਕਿ ਉਹ ਸਾਡੀ ਸੂਬੇ ਦੀ ਸ਼ਾਨਦਾਰ ਖੇਤੀਬਾੜੀ ਯੂਨੀਵਰਸਿਟੀ- ਪੀਏਯੂ ਲੁਧਿਆਣਾ ਦੇ ਕੰਮਕਾਜ ਵਿੱਚ ਦਖਲਅੰਦਾਜੀ ਨਾ ਕਰਨ ਅਤੇ ਇਸਦੇ ਨਵ-ਨਿਯੁਕਤ ਵਾਈਸ ਚਾਂਸਲਰ ਡਾ. ਸਤਬੀਰ ਸਿੰਘ ਗੋਸਲ ਨੂੰ ਹਟਾਉਣ ਦੇ ਫੈਸਲੇ ਬਾਰੇ ਪੁਨਰਵਿਚਾਰ ਕਰਨ। ਪੀਏਯੂ ਦਾ ਪ੍ਰਬੰਧਕੀ ਬੋਰਡ ਯੂਨੀਵਰਸਿਟੀ ਦੇ ਵੀਸੀ ਨੂੰ ਨਿਯੁਕਤ ਕਰਨ ਲਈ ਸਮਰੱਥ ਹੈ। ਇਹ ਨਿਯੁਕਤੀ ਸੰਘੀ ਢਾਂਚੇ ਦੇ ਸਿਧਾਂਤ ਦੇ ਅਨੁਸਾਰ ਹੈ ਅਤੇ ਇਸਦਾ ਸਤਿਕਾਰ ਕੀਤਾ ਜਾਣਾ ਚਾਹੀਦਾ ਹੈ।”
I urge Guv @Banwarilalpurohit not to interfere in functioning of our premier Agri Varsity- PAU & review decision to remove newly appointed VC Dr Satbir S Gosal. PAU's Board of Mgt is within its powers to appoint VC. It's in line with principle of federalism & should be respected. pic.twitter.com/OA8mLmJ3lT
— Sukhbir Singh Badal (@officeofssbadal) October 18, 2022
ਇਹ ਝਗੜਾ ਪੰਜਾਬ ਲਈ ਚੰਗਾ ਨਹੀਂ- ਵੜਿੰਗ
ਓਧਰ ਕਾਂਗਰਸ ਦੇ ਸੂਬਾ ਪ੍ਰਧਾਨ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਨੇ ਵੀ ਇਸ ‘ਤੇ ਟਵੀਟ ਕੀਤਾ। ਉਹਨਾਂ ਕਿਹਾ, “ਉਘੇ ਵਿਗਿਆਨੀ ਡਾ. ਸਤਬੀਰ ਗੋਸਲ ਨੂੰ ਪੀਏਯੂ ਦੇ ਵੀਸੀ ਦੇ ਅਹੁਦੇ ਤੋਂ ਹਟਾਉਣ ਦੇ ਹੁਕਮ ਦਿੱਤੇ ਗਏ ਹਨ, ਕਿਉਂਕਿ ਮਾਨਯੋਗ ਰਾਜਪਾਲ ਅਨੁਸਾਰ ਯੂਜੀਸੀ ਦੇ ਨਿਯਮਾਂ ਦੀ ਪਾਲਣਾ ਕੀਤੇ ਬਿਨਾਂ ਨਿਯੁਕਤੀ ਗੈਰ-ਕਾਨੂੰਨੀ ਸੀ। ਹਾਲਾਂਕਿ ਇਸ ਦੀ ਜ਼ਿੰਮੇਵਾਰੀ ‘ਆਪ’ ਸਰਕਾਰ ਦੀ ਹੈ, ਫਿਰ ਵੀ ਰਾਜ ਭਵਨ ਅਤੇ ਪੰਜਾਬ ਸਰਕਾਰ ਵਿਚਾਲੇ ਟਕਰਾਅ ਸੂਬੇ ਲਈ ਠੀਕ ਨਹੀਂ ਹੈ।
Sad eminent scientist Dr Satbir Gosal has been ordered to be removed as PAU VC, as appointment according to Hon Governor was illegal, without following UGC norms.
While onus for it is on @AAPPunjab govt,
confrontation between Raj Bhawan and Punjab govt is not good for the state. pic.twitter.com/XpjXPcGYx8— Amarinder Singh Raja Warring (@RajaBrar_INC) October 18, 2022
ਕਾਂਗਰਸ ਤਾਂ ਸੀਐੱਮ ਭਗਵੰਤ ਮਾਨ ਨੂੰ ਚੰਗੇ ਸਲਾਹਕਾਰ ਨਿਯੁਕਤ ਕਰਨ ਦੀ ਸਲਾਹ ਦੇ ਰਹੀ ਹੈ। ਕਾਂਗਰਸ ਸਾਂਸਦ ਰਵਨੀਤ ਬਿੱਟੂ ਨੇ ਟਵਿਟਰ ‘ਤੇ ਲਿਖਿਆ, “ਮੈਂ ਭਗਵੰਤ ਮਾਨ ਨੂੰ ਸਲਾਹ ਦਿੰਦਾ ਹਾਂ ਕਿ ਉਹ ਸਰਕਾਰ ਦੇ ਸਮੁੱਚੇ ਕੰਮਕਾਜ ਦਾ ਮਜ਼ਾਕ ਉਡਾਉਣ ਦੀ ਬਜਾਏ ਆਪਣੇ ਆਲੇ-ਦੁਆਲੇ ਹੋਰ ਕਾਬਲ ਅਤੇ ਪੇਸ਼ੇਵਰ ਸਲਾਹਕਾਰ ਨਿਯੁਕਤ ਕਰਨ। VC ਫ਼ਰੀਦਕੋਟ ਅਤੇ ਹੁਣ PAU ਸਰਕਾਰ ਦੇ ਕੰਮਕਾਜ ਦੀਆਂ ਸ਼ਾਨਦਾਰ ਮਿਸਾਲਾਂ ਹਨ।”
I advise Bhagwant Mann to appoint more capable and professional advisors around him rather than making mockery of the entire working of the Government. VC Faridkot and now PAU are glaring examples of Govt working.
— Ravneet Singh Bittu (@RavneetBittu) October 18, 2022
ਬਾਬਾ ਫ਼ਰੀਦ ਯੂਨੀਵਰਸਿਟੀ ਦੇ ਵੀਸੀ ‘ਤੇ ਵੀ ਫਸਿਆ ਸੀ ਪੇਚ
ਇਸ ਤੋਂ ਪਹਿਲਾਂ ਬਾਬਾ ਫਰੀਦ ਯੂਨੀਵਰਸਿਟੀ ਆਫ ਹੈਲਥ ਸਾਇੰਸ ਫ਼ਰੀਦਕੋਟ ਦੇ ਵਾਈਸ ਚਾਂਸਲਰ ਨੂੰ ਲੈ ਕੇ ਵੀ ਵਿਵਾਦ ਹੋ ਚੁੱਕਿਆ ਹੈ। ਸਰਕਾਰ ਨੇ ਇਸ ਨੂੰ ਡਾ. ਗੁਰਪ੍ਰੀਤ ਸਿੰਘ ਵਾਂਡਰ ਦੇ ਨਾਂਅ ਨੂੰ ਮਨਜ਼ੂਰੀ ਦਿੱਤੀ ਸੀ, ਪਰ ਰਾਜਪਾਲ ਨੇ ਨਿਯਮਾਂ ਦੀ ਪਾਲਣਾ ਨਾ ਕੀਤੇ ਜਾਣ ਦਾ ਹਵਾਲਾ ਦੇ ਕੇ ਇਸ ਨੂੰ ਰੱਦ ਕਰ ਦਿੱਤਾ ਸੀ। ਇਸ ਘਟਨਾਕ੍ਰਮ ਤੋਂ ਬਾਅਦ ਵਾਂਡਰ ਨੇ ਖੁਦ ਹੀ ਵੀਸੀ ਨਾ ਬਣਨ ਦੀ ਇੱਛਾ ਜਤਾਈ।
ਵਿਧਾਨ ਸਭਾ ਸੈਸ਼ਨ ਨੂੰ ਲੈ ਕੇ ਸ਼ੁਰੂ ਹੋਈ ਤਕਰਾਰ
ਜ਼ਿਕਰੇਖਾਸ ਹੈ ਕਿ ਰਾਜਪਾਲ ਅਤੇ CM ਵਿਚਕਾਰ ਲਗਾਤਾਰ ਤਕਰਾਰ ਚੱਲ ਰਹੀ ਹੈ। VC ਤੋਂ ਪਹਿਲਾਂ ਰਾਜਪਾਲ ਅਤੇ ਸਰਕਾਰ ਵਿਚਕਾਰ ਵਿਧਾਨ ਸਭਾ ਸੈਸ਼ਨ ਨੂੰ ਲੈ ਕੇ ਵਿਵਾਦ ਹੋ ਚੁੱਕਿਆ ਹੈ। ਉਸ ਤੋਂ ਬਾਅਦ ਏਅਰ ਸ਼ੋਅ ਵਿੱਚ ਸੀਐੱਮ ਦੀ ਗੈਰ-ਮੌਜੂਦਗੀ ਨੂੰ ਲੈ ਕੇ ਰਾਜਪਾਲ ਨੇ ਰਾਸ਼ਟਰਪਤੀ ਦੇ ਸਾਹਮਣੇ ਸਵਾਲ ਚੁੱਕੇ ਸਨ। ਤੇ ਹੁਣ 2 ਯੂਨੀਵਰਸਿਟੀਆਂ ਦੇ ਵੀਸੀ ਦੇ ਮੁੱਦੇ ‘ਤੇ ਦੋਵੇਂ ਆਹਮੋ-ਸਾਹਮਣੇ ਹਨ।
