ਬਿਓਰੋ। ਪੰਜਾਬ ਕਾਂਗਰਸ ਵਿੱਚ ਨਵੇਂ ਸਿਰਿਓਂ ਛਿੜੇ ਘਮਸਾਣ ਦਾ ਮਾਮਲਾ ਇੱਕ ਵਾਰ ਫਿਰ ਹਾਈਕਮਾਂਡ ਦੇ ਦਰਬਾਰ ਪਹੁੰਚ ਗਿਆ ਹੈ। ਪੰਜਾਬ ਕਾਂਗਰਸ ਇੰਚਾਰਜ ਹਰੀਸ਼ ਰਾਵਤ ਨੇ ਸ਼ਨੀਵਾਰ ਨੂੰ ਕਾਂਗਰਸ ਨੇਤਾ ਰਾਹੁਲ ਗਾਂਧੀ ਨਾਲ ਮੁਲਾਕਾਤ ਕੀਤੀ ਅਤੇ ਉਨ੍ਹਾਂ ਨੂੰ ਸਾਰੀ ਸਥਿਤੀ ਤੋਂ ਜਾਣੂੰ ਕਰਵਾਇਆ। ਇਸ ਤੋਂ ਬਾਅਦ ਰਾਵਤ ਨੇ ਮੀਡੀਆ ਨੂੰ ਦੱਸਿਆ ਕਿ ਉਹ ਅਗਲੇ 2 ਤੋਂ 3 ਦਿਨਾਂ ਵਿੱਚ ਚੰਡੀਗੜ੍ਹ ਜਾਣਗੇ ਅਤੇ ਮੁੱਖ ਮੰਤਰੀ ਸਣੇ ਸੂਬਾ ਕਾਂਗਰਸ ਪ੍ਰਧਾਨ ਨੂੰ ਮਿਲਣਗੇ।
ਰਾਹੁਲ ਗਾਂਧੀ ਤੋਂ ਪਹਿਲਾਂ ਹਰੀਸ਼ ਰਾਵਤ ਨੇ ਸ਼ੁੱਕਰਵਾਰ ਨੂੰ ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਨਾਲ ਮੁਲਾਕਾਤ ਕੀਤੀ। ਸੋਨੀਆ ਨਾਲ ਮੁਲਾਕਾਤ ਤੋਂ ਬਾਅਦ ਰਾਵਤ ਨੇ ਕਿਹਾ ਕਿ ਉਹਨਾਂ ਨੇ ਆਪਣੀ ਗੱਲ ਕਾਂਗਰਸ ਪ੍ਰਧਾਨ ਦੇ ਸਾਹਮਣੇ ਰੱਖ ਦਿੱਤੀ ਹੈ। ਉਹਨਾਂ ਕਿਹਾ ਕਿ ਹੁਣ ਸੋਨੀਆ ਗਾਂਧੀ ਦੇ ਮਾਰਗਦਰਸ਼ਨ ਦਾ ਇੰਤਜਾਰ ਰਹੇਗਾ।
ਪੰਜਾਬ ਕਾਂਗਰਸ ‘ਚ ਕਿਉਂ ਛਿੜਿਆ ਘਮਸਾਣ?
ਦਰਅਸਲ 3 ਦਿਨ ਪਹਿਲਾਂ, ਕੈਪਟਨ ਦੇ 4 ਮੰਤਰੀਆਂ ਅਤੇ ਕਈ ਵਿਧਾਇਕਾਂ ਨੇ ਉਹਨਾਂ ਦੇ ਵਿਰੁੱਧ ਖੁੱਲ੍ਹਾ ਮੋਰਚਾ ਖੋਲ੍ਹਦੇ ਹੋਏ ਬਗਾਵਤ ਕਰ ਦਿੱਤੀ ਸੀ। ਸਿੱਧੂ ਧੜੇ ਤੋਂ ਆਉਣ ਵਾਲੇ ਇਹਨਾਂ ਮੰਤਰੀਆਂ ਤੇ ਵਿਧਾਇਕਾਂ ਨੇ ਕੈਪਟਨ ‘ਤੇ ਅਕਾਲੀ ਦਲ ਨਾਲ ਮਿਲੀਭੁਗਤ ਦਾ ਇਲਜਾਮ ਲਾਉਂਦੇ ਹੋਏ ਉਹਨਾਂ ਨੂੰ ਹਟਾਏ ਜਾਣ ਦੀ ਮੰਗ ਤੱਕ ਕਰ ਦਿੱਤੀ। ਇਹਨਾਂ ਬਾਗੀ ਆਗੂਆਂ ਨੇ ਦੇਹਰਾਦੂਨ ਜਾ ਕੇ ਹਰੀਸ਼ ਰਾਵਤ ਨਾਲ ਮੁਲਾਕਾਤ ਵੀ ਕੀਤੀ ਸੀ।
ਸਿੱਧੂ ਦੇ ਬਿਆਨ ‘ਤੇ ਵੀ ਬਵਾਲ
ਬਗਾਵਤ ਦੇ ਇਸ ਬਵੰਡਰ ਵਿਚਾਲੇ ਨਵਜੋਤ ਸਿੱਧੂ ਦਾਇੱਕ ਬਿਆਨ ਵੀ ਖੂਬ ਚਰਚਾ ਵਿੱਚ ਹੈ। ਦਰਅਸਲ, ਸਿੱਧੂ ਨੇ ਵੀਰਵਾਰ ਨੂੰ ਅੰਮ੍ਰਿਤਸਰ ਵਿੱਚ ਵਪਾਰੀਆਂ ਦੇ ਪ੍ਰੋਗਰਾਮ ਵਿੱਚ ਕਾਂਗਰਸ ਹਾਈਕਮਾਂਡ ਵੱਲ ਇਸ਼ਾਰਾ ਕਰਦੇ ਹੋਏ ਕਿਹਾ ਕਿ ਜੇਕਰ ਉਨ੍ਹਾਂ ਨੂੰ ਫੈਸਲੇ ਲੈਣ ਦੀ ਖੁੱਲ੍ਹ ਨਾ ਦਿੱਤੀ ਗਈ, ਤਾਂ ਉਹ ਇੱਟ ਨਾਲ ਇੱਟ ਖੜਕਾ ਦੇਣਗੇ।
ਕੈਪਟਨ ਵੀ ਵਿਖਾ ਰਹੇ ਹਨ ਤਾਕਤ
ਸਿੱਧੂ ਧੜੇ ਦੀ ਬਗਾਵਤ ਵਿਚਾਲੇ, ਕੈਪਟਨ ਅਮਰਿੰਦਰ ਸਿੰਘ ਵੀ ਆਪਣੇ ਕੈਂਪ ਨੂੰ ਮਜ਼ਬੂਤ ਕਰਨ ਵਿੱਚ ਲੱਗੇ ਹਨ। ਕੈਪਟਨ ਦੇ ਕਰੀਬੀ ਦੋਸਤ ਅਤੇ ਸਾਥੀ ਮੰਤਰੀ ਰਾਣਾ ਸੋਢੀ ਨੇ ਵੀਰਵਾਰ ਸ਼ਾਮ ਨੂੰ ਉਨ੍ਹਾਂ ਦੇ ਘਰ ਡਿਨਰ ਪਾਰਟੀ ਰੱਖੀ, ਜਿਸ ਵਿੱਚ 60 ਦੇ ਕਰੀਬ ਵਿਧਾਇਕ ਇਕੱਠੇ ਹੋਏ। ਕੈਪਟਨ ਧੜੇ ਨੇ ਇਸਦੇ ਜ਼ਰੀਏ ਹਾਈਕਮਾਂਡ ਨੂੰ ਆਪਣੀ ਤਾਕਤ ਦਿਖਾਉਣ ਦੀ ਕੋਸ਼ਿਸ਼ ਕੀਤੀ।
ਕੈਪਟਨ ਧੜੇ ਦੇ ਨਿਸ਼ਾਨੇ ‘ਤੇ ਸਿੱਧੂ
ਸ਼ਹਿ-ਮਾਤ ਦੀ ਇਸ ਖੇਡ ਦੇ ਦੌਰਾਨ, ਦੋਵੇਂ ਪਾਸਿਓਂ ਜ਼ੁਬਾਨੀ ਹਮਲੇ ਵੀ ਜਾਰੀ ਹਨ। ਕੈਪਟਨ ਦੇ ਕਰੀਬੀ ਸਾਂਸਦ ਮਨੀਸ਼ ਤਿਵਾੜੀ ਨੇ ਸਿੱਧੂ ਵੱਲੋਂ ਦਿੱਤੇ ਇੱਟ ਨਾ ਇੱਟ ਖੜਕਾਉਣ ਵਾਲੇ ਬਿਆਨ ਨੂੰ ਸੋਸ਼ਲ ਮੀਡੀਆ ‘ਤੇ ਸ਼ੇਅਰ ਕਰਦਿਆਂ ਸ਼ਾਇਰਾਨਾ ਅਟੈਕ ਕੀਤਾ। ਉਹਨਾਂ ਟਵਿਟਰ ‘ਤੇ ਲਿਖਿਆ, “ਆਹ ਭੀ ਭਰਤੇ ਹੈਂ ਤੋਹ ਹੋ ਜਾਤੇ ਹੈਂ ਬਦਨਾਮ…ਵੋਹ ਕਤਲ ਭੀ ਕਰਤੇ ਹੈੰ, ਤੋਹ ਚਰਚਾ ਨਹੀਂ ਹੋਤੀ।“
