December 3, 2022
ਰਾਜਸਥਾਨ ਦੇ ਸੀਕਰ ਵਿੱਚ ਨਾਮੀ ਗੈਂਗਸਟਰ ਰਾਜੂ ਠੇਠ ਨੂੰ ਗੋਲੀਆਂ ਮਾਰ ਕੇ ਮੌਤ ਦੇ ਘਾਟ ਉਤਾਰ ਦਿੱਤਾ ਗਿਆ। ਸੀਕਰ ਦੇ ਪਿਪਰਾਲੀ ਰੋਡ ‘ਤੇ ਰਾਜੂ ਦੇ ਘਰ ਦੇ ਬਾਹਰ ਹੀ ਕਤਲ ਦੀ ਇਸ ਵਾਰਦਾਤ ਨੂੰ ਅੰਜਾਮ ਦਿੱਤਾ ਗਿਆ। ਹਮਲਾਵਰਾਂ ਦੀਆਂ ਤਸਵੀਰਾਂ CCTV ਵਿੱਚ ਵੀ ਕੈਦ ਹੋਈਆਂ ਹਨ, ਜਿਸ ਵਿੱਚ ਉਹਨਾਂ ਨੂੰ ਕਤਲ ਕਰਦੇ ਅਤੇ ਹਵਾ ਵਿੱਚ ਫਾਇਰਿੰਗ ਕਰਦੇ ਵੇਖਿਆ ਜਾ ਸਕਦਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਰੋਹਿਤ ਦਾ ਕਤਲ ਉਸਦੇ ਘਰ ਦੇ ਬਾਹਰ ਹੀ ਕੀਤਾ ਗਿਆ ਹੈ।
ਲਾਰੈਂਸ ਗੈਂਗ ਨੇ ਲਈ ਜ਼ਿੰਮੇਵਾਰੀ
ਰਾਜੂ ਠੇਠ ਦੇ ਕਤਲ ਦੀ ਜ਼ਿੰਮੇਵਾਰੀ ਲਾਰੈਂਸ ਬਿਸ਼ਨੋਈ ਦੇ ਖਾਸ ਗੁਰਗੇ ਰੋਹਿਤ ਗੋਦਾਰਾ ਨੇ ਲਈ ਹੈ। ਰੋਹਿਤ ਦੇ ਨਾਂਅ ਤੋਂ ਸੋਸ਼ਲ ਮੀਡੀਆ ‘ਤੇ ਇੱਕ ਪੋਸਟ ਪਾਈ ਗਈ ਹੈ, ਜਿਸ ਵਿੱਚ ਇਸ ਕਤਲ ਨੂੰ 2 ਗੈਂਗਸਟਰਾਂ ਦੇ ਕਤਲ ਦਾ ਬਦਲਾ ਦੱਸਿਆ ਗਿਆ। ਪੋਸਟ ਵਿੱਚ ਲਿਖਿਆ ਗਿਆ:-
ਅੱਜ ਜਿਹੜਾ ਰਾਜੂ ਠੇਠ ਦਾ ਕਤਲ ਹੋਇਆ, ਉਸਦੀ ਸੰਪੂਰਨ ਜ਼ਿੰਮੇਵਾਰੀ ਮੈਂ ਰੋਹਿਤ ਗੋਦਾਰਾ(ਲਾਰੈਂਸ ਬਿਸ਼ਨੋਈ ਗਰੁੱਪ) ਲੈਂਦਾ ਹਾਂ। ਇਹ ਸਾਡੇ ਵੱਡੇ ਭਰਾ ਆਨੰਦਪਾਲ ਜੀ ਅਤੇ ਬਲਬੀਰ ਜੀ ਦੇ ਕਤਲ ਵਿੱਚ ਸ਼ਾਮਲ ਸੀ, ਜਿਸਦਾ ਬਦਲਾ ਅੱਜ ਅਸੀਂ ਇਸ ਨੂੰ ਮਾਰ ਕੇ ਪੂਰਾ ਕੀਤਾ ਹੈ। ਰਹੀ ਗੱਲ ਸਾਡੇ ਹੋਰ ਦੁਸ਼ਮਣਾਂ ਦੀ, ਤਾਂ ਉਹਨਾਂ ਨਾਲ ਵੀ ਜਲਦ ਮੁਲਾਕਾਤ ਹੋਵੇਗੀ। ਜੈ ਬਜਰੰਗ ਬਲੀ।
ਕੌਣ ਸੀ ਰਾਜੂ ਠੇਠ..?
ਰਾਜੂ ਠੇਠ ਰਾਜਸਥਾਨ ਦਾ ਨਾਮੀ ਗੈਂਗਸਟਰ ਮੰਨਿਆ ਜਾਂਦਾ ਹੈ। ਉਹ RTG ਦੇ ਨਾਂਅ ਤੋਂ ਆਪਣਾ ਗੈਂਗ ਚਲਾਉਂਦਾ ਸੀ। ਜੇਲ੍ਹ ਵਿੱਚ ਰਹਿੰਦਿਆਂ ਵੀ ਉਹ ਫਿਰੌਤੀ ਦਾ ਕਾਰੋਬਾਰ ਚਲਾਉਂਦਾ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਰਾਜੂ ਲਗਜ਼ਰੀ ਲਾਈਫ ਜੀਉਣ ਦਾ ਸ਼ੌਕੀਨ ਸੀ। ਉਹ ਹਮੇਸ਼ਾ ਕਾਰਾਂ ਅਤੇ ਬਾਈਕ ਦੇ ਕਾਫਲੇ ਨਾਲ ਨਿਕਲਦਾ ਸੀ। ਉਸ ਨੂੰ ‘ਸੀਕਰ ਬੌਸ’ ਦੇ ਨਾਂਅ ਨਾਲ ਜਾਣਿਆ ਜਾਂਦਾ ਸੀ, ਜਿਸ ਤੋਂ ਅੰਦਾਜ਼ਾ ਲਾਇਆ ਜਾ ਸਕਦਾ ਹੈ ਕਿ ਉਸਦੀ ਸਾਖ ਸੀਕਰ ਵਿੱਚ ਕਿਸ ਤਰ੍ਹਾਂ ਦੀ ਹੋਵੇਗੀ।
ਰਾਜੂ ਠੇਠ ਦੀ ਲਾਰੈਂਸ ਗੈਂਗ ਨਾਲ ਦੁਸ਼ਮਣੀ ਇਹਨਾਂ ਪੁਆਇੰਟਸ ‘ਚ ਸਮਝੋ…
- ਰਾਜੂ ਠੇਠ ਦੀ ਦੁਸ਼ਮਣੀ ਰਾਜਸਥਾਨ ਦੇ ਨਾਮੀ ਗੈਂਗਸਟਰ ਆਨੰਦਪਾਲ ਨਾਲ ਸੀ।
- ਆਨੰਦਪਾਲ ਨੂੰ ਮਾਰਨ ਲਈ ਰਾਜੂ ਠੇਠ ਨੇ ਹਮਲਾ ਕਰਵਾਇਆ ਸੀ, ਪਰ ਆਨੰਦਪਾਲ ਬਚ ਗਿਆ ਅਤੇ ਉਸਦਾ ਸਾਥੀ ਬਲਬੀਰ ਮਾਰਿਆ ਗਿਆ।
- ਬਾਅਦ ਵਿੱਚ ਗੈਂਗਸਟਰ ਆਨੰਦਪਾਲ ਨੂੰ ਐਨਕਾਊਂਟਰ ‘ਚ ਮਾਰ ਗਿਰਾਇਆ ਗਿਆ।
- ਐਨਕਾਊਂਟਰ ‘ਚ ਮਾਰੇ ਜਾਣ ਤੋਂ ਬਾਅਦ ਆਨੰਦਪਾਲ ਦੇ ਗੈਂਗ ਦੀ ਕਮਾਨ ਲੇਡੀ ਡੌਨ ਅਨੁਰਾਧਾ ਨੇ ਸੰਭਾਲ ਲਈ।
- ਅਨੁਰਾਧਾ ਨੇ ਗੈਂਗਸਟਰ ਲਾਰੈਂਸ ਬਿਸ਼ਨੋਈ ਅਤੇ ਕਾਲਾ ਜਠੇੜੀ ਗੈਂਗ ਨਾਲ ਹੱਥ ਮਿਲਾ ਲਿਆ।
- ਇਸ ਗੈਂਗਵਾਰ ਦੇ ਪਿੱਛੇ ਰੰਜਿਸ਼ ਨੂੰ ਵਜ੍ਹਾ ਮੰਨਿਆ ਜਾ ਰਿਹਾ ਹੈ ਅਤੇ ਅਸਲ ਦਿਮਾਗ ਅਨੁਰਾਧਾ ਦਾ ਦੱਸਿਆ ਜਾ ਰਿਹਾ ਹੈ।
- ਹਾਲਾਂਕਿ ਕਤਲ ਦੀ ਜ਼ਿੰਮੇਵਾਰੀ ਲਾਰੈਂਸ ਦੇ ਗੁਰਗੇ ਰੋਹਿਤ ਗੋਦਾਰਾ ਨੇ ਲਈ ਹੈ।
- ਰੋਹਿਤ ਇਸ ਵਕਤ ਭਾਰਤ ਤੋਂ ਬਾਹਰ ਅਜ਼ਰਬਾਈਜਾਨ ਵਿੱਚ ਲੁਕਿਆ ਹੋਇਆ ਹੈ।
