ਨਵੀਂ ਦਿੱਲੀ। ਪੰਜਾਬ ‘ਚ ਵਿਧਾਨ ਸਭਾ ਚੋਣਾਂ ਸਿਰ ‘ਤੇ ਹਨ। ਬਾਵਜੂਦ ਇਸਦੇ ਸੂਬਾ ਕਾਂਗਰਸ ਖਾਸਕਰ ਕੈਪਟਨ ਅਮਰਿੰਦਰ ਸਿੰਘ ਅਤੇ ਨਵਜੋਤ ਸਿੰਘ ਸਿੱਧੂ ਵਿਚਾਲੇ ਕੁਝ ਵੀ ਠੀਕ ਨਹੀਂ ਲੱਗ ਰਿਹਾ। ਅਜਿਹੇ ‘ਚ ਇੱਕ ਸਵਾਲ ਸਿਆਸੀ ਗਲਿਆਰਿਆਂ ‘ਚ ਆਮ ਹੈ ਕਿ ਦੋਵੇਂ ਆਗੂ ਮਿਲ ਕੇ ਚੋਣਾਂ ‘ਚ ਕਾਂਗਰਸ ਦੀ ਨਈਆ ਕਿਵੇਂ ਪਾਰ ਲਗਾਉਣਗੇ।
ਨਿਊਜ਼ ਏਜੰਸੀ ANI ਨੇ ਇਸ ਸਵਾਲ ਦਾ ਜਵਾਬ ਜਦੋਂ ਕਾਂਗਰਸੀ ਸਾਂਸਦ ਗੁਰਜੀਤ ਔਜਲਾ ਤੋਂ ਲੈਣ ਦੀ ਕੋਸ਼ਿਸ਼ ਕੀਤੀ, ਤਾਂ ਔਜਲਾ ਨੇ ਕਿਹਾ ਕਿ ਉਹਨਾਂ ਨੂੰ ਪੂਰਾ ਭਰੋਸਾ ਹੈ ਕਿ ਦੋਵੇਂ ਆਗੂ ਪੰਜਾਬ ਦੀਆਂ ਚੋਣਾਂ ‘ਚ ਪਾਰਟੀ ਨੂੰ ਜਿੱਤ ਵੱਲ ਲਿਜਾਉਣਗੇ।
‘ਸਭ ਨੂੰ ਪਾਰਟੀ ਪਲੇਟਫਾਰਮ ‘ਤੇ ਗੱਲ ਕਹਿਣ ਦਾ ਹੱਕ’
ਸੋਨੀਆ ਗਾਂਧੀ ਤੇ ਕੈਪਟਨ ਦੀ ਮੁਲਾਕਾਤ ਬਾਰੇ ਬੋਲਦਿਆਂ ਔਜਲਾ ਨੇ ਕਿਹਾ, “ਨਵੇਂ ਥਾਪੇ ਗਏ ਪ੍ਰਧਾਨ ਨੂੰ ਪਾਰਟੀ ਫੋਰਮ ‘ਤੇ ਜੋ ਵੀ ਸ਼ਿਕਾਇਤਾਂ ਹੋਣ, ਉਹਨਾਂ ਵੱਲ ਧਿਆਨ ਨਹੀਂ ਦੇਣਾ ਚਾਹੀਦਾ। ਤਿੰਨੇ ਆਗੂ ਪਾਰਟੀ ‘ਚ ਸੀਨੀਅਰ ਹਨ। ਕੈਪਟਨ ਸਾਬ੍ਹ ਨੇ ਕੁਝ ਵੀ ਆਨ ਰਿਕਾਰਡ ਨਹੀਂ ਕਿਹਾ। ਸਾਨੂੰ ਨਹੀਂ ਪਤਾ ਕਿ ਮੀਟਿੰਗ ‘ਚ ਕੀ ਹੋਇਆ। ਜੋ ਵੀ ਗੱਲਾਂ ਕਹੀਆਂ ਜਾ ਰਹੀਆਂ ਹਨ, ਉਹ ਪਾਰਟੀ ਪਲੇਟਫਾਰਮ ‘ਤੇ ਹੋਣੀਆਂ ਚਾਹੀਦੀਆਂ ਹਨ। ਸਿੱਧੂ ਸਾਬ੍ਹ ਨੇ ਵੀ ਜੋ ਕਹਿਣਾ, ਉਹ ਪਾਰਟੀ ਪਲੇਟਫਾਰਮ ‘ਤੇ ਕਹਿ ਸਕਦੇ ਹਨ। ਸਾਨੂੰ ਸਾਰਿਆਂ ਨੂੰ ਨਾਲ ਲੈ ਕੇ ਚੱਲਣਾ ਹੋਵੇਗਾ। ਮੈਨੂੰ ਭਰੋਸਾ ਹੈ ਕਿ ਦੋਵੇਂ ਆਗੂ ਇਕੱਠੇ ਕੰਮ ਕਰਨਗੇ ਅਤੇ 2022 ਦੀਆਂ ਵਿਧਾਨ ਸਭਾ ਚੋਣਾਂ ਜਿਤਾਉਣ ‘ਚ ਪਾਰਟੀ ਦੀ ਮਦਦ ਕਰਨਗੇ।”
ਕੈਪਟਨ ਨੇ ਸੋਨੀਆ ਨੂੰ ਕੀਤੀ ਸੀ ਸਿੱਧੂ ਦੀ ਸ਼ਿਕਾਇਤ !
ਕਾਬਿਲੇਗੌਰ ਹੈ ਕਿ ਮੰਗਲਵਾਰ ਨੂੰ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਨੇ ਦਿੱਲੀ ‘ਚ ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਨਾਲ ਮੁਲਾਕਾਤ ਕੀਤੀ ਸੀ। ਸੂਤਰ ਦੱਸਦੇ ਹਨ ਕਿ ਇਸ ਮੁਲਾਕਾਤ ਦੌਰਾਨ ਕੈਪਟਨ ਨੇ ਸੋਨੀਆ ਗਾਂਧੀ ਦੇ ਸਾਹਮਣੇ ਸਿੱਧੂ ਦੀ ਬਿਆਨਬਾਜੀ ਦਾ ਮੁੱਦਾ ਚੁੱਕਿਆ ਹੈ। ਕੈਪਟਨ ਨੇ ਕਿਹਾ ਕਿ ਸਿੱਧੂ ਦੀ ਆਪਣੀ ਹੀ ਸਰਕਾਰ ਖਿਲਾਫ਼ ਕੀਤੀ ਜਾ ਰਹੀ ਬਿਆਨਬਾਜੀ ਨਾਲ ਉਹਨਾਂ ਦੀ ਪਾਰਟੀ ਨੂੰ ਅਗਾਮੀ ਚੋਣਾਂ ‘ਚ ਨੁਕਸਾਨ ਝੱਲਣਾ ਪੈ ਸਕਦਾ ਹੈ।
