ਟੋਕਿਓ। ਟੋਕਿਓ ਓਲੰਪਿਕਸ ‘ਚ ਇਸ ਵਾਰ ਭਾਰਤੀ ਹਾਕੀ ਟੀਮ ਨੇ ਇਤਿਹਾਸ ਰਚ ਦਿੱਤਾ ਹੈ। ਭਾਰਤੀ ਹਾਕੀ ਟੀਮ 49 ਸਾਲਾਂ ਦਾ ਸੋਕਾ ਖਤਮ ਕਰਕੇ ਆਖਰ ਸੈਮੀਫਾਈਨਲ ‘ਚ ਪਹੁੰਚ ਗਈ ਹੈ। ਸੈਮੀਫਾਈਨਲ ‘ਚ ਹੁਣ ਟੀਮ ਇੰਡੀਆ ਦਾ ਸਾਹਮਣਾ 3 ਅਗਸਤ ਨੂੰ ਬੈਲਜੀਅਮ ਨਾਲ ਹੋਵੇਗਾ। ਇਸ ਤੋਂ ਬਾਅਦ ਦੂਜਾ ਸੈਮੀਫਾਈਨਲ ਇਸੇ ਦਿਨ ਆਸਟ੍ਰੇਲੀਆ ਅਤੇ ਜਰਮਨੀ ਵਿਚਕਾਰ ਖੇਡਿਆ ਜਾਵੇਗਾ। 5 ਅਗਸਤ ਨੂੰ ਟੌਪ-2 ਟੀਮਾਂ ਫਾਈਨਲ ‘ਚ ਆਹਮੋ-ਸਾਹਮਣੇ ਹੋਣਗੀਆਂ।
ਕੁਆਰਟਰ ਫਾਈਨਲ ‘ਚ ਟੀਮ ਇੰਡੀਆ ਨੇ ਗ੍ਰੇਟ ਬ੍ਰਿਟੇਨ ਨੂੰ 3-1 ਦੇ ਫਰਕ ਨਾਲ ਮਾਤ ਦਿੱਤੀ ਹੈ। ਟੀਮ ਲਈ ਦਿਲਪ੍ਰੀਤ ਸਿੰਘ ਨੇ 7ਵੇਂ, ਗੁਰਜੰਚ ਸਿੰਘ ਨੇ 16ਵੇਂ ਅਤੇ ਹਾਰਦਿਕ ਸਿੰਘ ਨੇ 57ਵੇਂ ਮਿੰਟ ‘ਚ ਗੋਲ ਕੀਤਾ।
ਇਸ ਤੋਂ ਪਹਿਲਾਂ ਆਖਰੀ ਵਾਰ 1972 ‘ਚ ਭਾਰਤੀ ਹਾਕੀ ਟੀਮ ਨੇ ਸੈਮੀਫਾਈਨਲ ‘ਚ ਜਗ੍ਹਾ ਬਣਾਈ ਸੀ। ਹਾਲਾਂਕਿ 1980 ‘ਚ ਭਾਰਤ ਨੇ ਗੋਲਡ ਮੈਡਲ ਆਪਣੇ ਨਾੰਅ ਕੀਤਾ ਸੀ, ਪਰ ਉਸ ਵੇਲੇ ਓਲੰਪਿਕ ‘ਚ ਸੈਮੀਫਾਈਨਲ ਫੌਰਮੈਟ ਨਹੀਂ ਸੀ। ਗਰੁੱਪ ਸਟੇਜ ਤੋਂ ਬਾਅਦ ਸਭ ਤੋਂ ਵੱਧ ਪੁਆਇੰਟ ਵਾਲੀਆਂ 2 ਟੀਮਾਂ ਨੇ ਸਿੱਧੇ ਫਾਈਨਲ ਮੁਕਾਬਲਾ ਖੇਡਿਆ ਸੀ। ਭਾਰਤ ਨੇ 6 ਟੀਮਾਂ ਦੇ ਪੂਲ ‘ਚ ਦੂਜੇ ਨੰਬਰ ‘ਚ ਰਹਿ ਕੇ ਫਾਈਨਲ ਦੀ ਟਿਕਟ ਹਾਸਲ ਕੀਤੀ ਸੀ।
