ਟੋਕਿਓ। ਭਾਰਤੀ ਪੁਰਸ਼ ਹਾਕੀ ਟੀਮ ਤੋਂ ਬਾਅਦ ਮਹਿਲਾ ਟੀਮ ਨੇ ਵੀ ਟੋਕਿਓ ਓਲੰਪਿਕ ‘ਚ ਇਤਿਹਾਸ ਰਚਿਆ ਹੈ। ਮਹਿਲਾ ਹਾਕੀ ਟੀਮ ਨੇ ਪਹਿਲੀ ਵਾਰ ਓਲੰਪਿਕ ਦੇ ਸੈਮੀਫਾਈਨਲ ‘ਚ ਆਪਣੇ ਲਈ ਜਗ੍ਹਾ ਪੱਕੀ ਕੀਤੀ ਹੈ। ਭਾਰਤ ਨੇ ਕੁਆਰਟਰ ਫਾਈਨਲ ਮੁਕਾਬਲੇ ‘ਚ 3 ਵਾਰ ਦੇ ਓਲੰਪਿਕ ਚੈਂਪੀਅਨ ਆਸਟ੍ਰੇਲੀਆ ਨੂੰ 1-0 ਨਾਲ ਮਾਤ ਦਿੱਤੀ।
ਕੁਆਰਟਰ ਫਾਈਨਲ ‘ਚ ਭਾਰਤ ਲਈ ਇੱਕਮਾਤਰ ਗੋਲ 22ਵੇਂ ਮਿੰਟ ‘ਚ ਗੁਰਜੀਤ ਕੌਰ ਵੱਲੋਂ ਪੈਨਲਟੀ ਕਾਰਨਰ ‘ਤੇ ਕੀਤਾ ਗਿਆ। ਹੁਣ 4 ਅਗਸਤ ਨੂੰ ਸੈਮੀਫਾਈਨਲ ‘ਚ ਟੀਮ ਇੰਡੀਆ ਦ ਸਾਹਮਣਾ ਅਰਜਨਟੀਨਾ ਨਾਲ ਹੋਵੇਗਾ।
ਪਹਿਲੇ ਹਾਫ ‘ਚ ਬਰਾਬਰੀ ਦਾ ਮੁਕਾਬਲਾ
ਕੁਆਰਟਰ ਫਾਈਨਲ ਦੇ ਪਹਿਲੇ ਹਾਫ ‘ਚ ਦੋਵੇਂ ਟੀਮਾਂ ਵਿਚਾਲੇ ਦਿਲਚਸਪ ਮੁਕਾਬਲਾ ਵੇਖਣ ਨੂੰ ਮਿਲਿਆ। ਦੋਵੇਂ ਹੀ ਟੀਮਾਂ ਨੇ ਗੋਲ ਕਰਨ ਦਾ 1-1 ਮੌਕਾ ਗਵਾਇਆ। ਮੈਚ ਦੇ ਦੂਜੇ ਹੀ ਮਿੰਟ ਆਸਟ੍ਰੇਲੀਆ ਦੀ ਫਾਰਵਰਡ ਖਿਡਾਰਨ ਨੇ ਭਾਰਤੀ ਗੋਲ ‘ਤੇ ਅਟੈਕ ਕੀਤਾ। ਹਾਲਾਂਕਿ ਭਾਰਤੀ ਡਿਫੈਂਡਰਸ ਦੇ ਅੱਗੇ ਉਹਨਾਂ ਦੀ ਨਹੀਂ ਚੱਲ ਸਕੀ।
ਇਸ ਤੋਂ ਬਾਅਦ ਭਾਰਤ ਨੇ ਖੇਡ ਦੇ 9ਵੇਂ ਮਿੰਟ ‘ਚ ਗੋਲ ਕਰਨ ਦਾ ਮੌਕਾ ਬਣਾਇਆ, ਪਰ ਰਾਣੀ ਰਾਮਪਾਲ ਚੂਕ ਗਏ। ਵੰਦਨਾ ਕਟਾਰੀਆ ਦੇ ਪਾਸ ‘ਤੇ ਰਾਣੀ ਨੇ ਸਟ੍ਰੌਕ ਲਿਆ, ਪਰ ਗੇਂਦ ਗੋਲਪੋਸਟ ‘ਤੇ ਜਾ ਵੱਜੀ।
ਦੂਜੇ ਹਾਫ ‘ਚ ਭਾਰਤ ਨੇ ਵਿਖਾਇਆ ਕਮਾਲ
ਭਾਰਤੀ ਟੀਮ ਨੇ ਦੂਜੇ ਹਾਫ ‘ਚ ਕਮਾਲ ਦੀ ਖੇਡ ਖੇਡੀ। ਆਸਟ੍ਰੇਲੀਆ ਨੂੰ ਤੀਜੇ ਕੁਆਰਟਰ ‘ਚ 2 ਪੈਨਲਟੀ ਕਾਰਨਰ ਮਿਲੇ। ਹਾਲਾਂਕਿ ਉਹ ਗੋਲ ਕਰਨ ‘ਚ ਨਾਕਾਮ ਰਹੇ। ਆਖਰੀ 2 ਕੁਆਰਟਰ ‘ਚ ਆਸਟ੍ਰੇਲੀਆਈ ਟੀਮ ਡੋਮੀਨੇਟਿੰਗ ਹੋ ਕੇ ਖੇਡੀ। ਟੀਮ ਕੋਲ ਗੋਲ ਕਰਨ ਦੇ ਕਈ ਮੌਕੇ ਸਨ, ਪਰ ਟੀਮ ਭਾਰਤੀ ਡਿਫੈਂਸ ਨੂੰ ਨਹੀਂ ਤੋੜ ਸਕੀ।
ਪਹਿਲੀ ਵਾਰ ਸੈਮੀਫਾਈਨਲ ‘ਚ ਭਾਰਤ
1980 ‘ਚ ਭਾਰਤੀ ਮਹਿਲਾ ਹਾਕੀ ਟੀਮ ਨੇ ਪਹਿਲੀ ਵਾਰ ਹਿੱਸਾ ਲਿਆ ਸੀ। ਹਾਲਾਂਕਿ ਉਸ ਵੇਲੇ ਸੈਮੀਫਾਈਨਲ ਫਾਰਮੈਟ ਨਹੀਂ ਸੀ। ਗਰੁੱਪ ਸਟੇਜ ਤੋਂ ਬਾਅਦ ਸਭ ਤੋਂ ਵੱਧ ਪੁਆਇੰਟ ਵਾਲੀਆਂ 2 ਟੀਮਾਂ ਸਿੱਧੇ ਫਾਈਨਲ ਖੇਡੀਆਂ ਸਨ। ਉਸ ਵੇਲੇ ਭਾਰਤੀ ਟੀਮ 6 ਟੀਮਾਂ ਦੇ ਪੂਲ ‘ਚ ਚੌਥੇ ਨੰਬਰ ‘ਤੇ ਰਹੀ ਸੀ। ਇਸ ਤੋਂ ਬਾਅਦ 2016 ਰਿਓ ਓਲੰਪਿਕਸ ‘ਚ ਟੀਮ ਇੰਡੀਆ 12ਵੇਂ ਨੰਬਰ ‘ਤੇ ਰਹੀ ਸੀ।
