ਬਿਓਰੋ। ਦੁਨੀਆ ਭਰ ‘ਚ ਦੇਸ਼ ਦਾ ਨਾੰਅ ਰੋਸ਼ਨ ਕਰਨ ਵਾਲੀ ਇੰਟਰਨੈਸ਼ਨਲ ਅਥਲੀਟ ਮਾਨ ਕੌਰ 105 ਸਾਲਾਂ ਦੀ ਉਮਰ ‘ਚ ਇਸ ਫਾਨੀ ਸੰਸਾਰ ਨੂੰ ਅਲਵਿਦਾ ਆਖ ਗਏ ਹਨ। ਸ਼ਨੀਵਾਰ ਦੁਪਹਿਰ ਡੇਢ ਵਜੇ ਉਹਨਾਂ ਨੇ ਡੇਰਾਬਸੀ ਦੇ ਇੱਕ ਨਿੱਜੀ ਹਸਪਤਾਲ ‘ਚ ਆਖਰੀ ਸਾਹ ਲਏ। ਮਾਨ ਕੌਰ ਕੈਂਸਰ ਨਾਲ ਪੀੜਤ ਸਨ ਅਤੇ ਪਿਛਲੇ ਕਈ ਮਹੀਨਿਆਂ ਤੋਂ ਆਯੁਰਵੇਦਿਕ ਇਲਾਜ ਕਰਵਾ ਰਹੇ ਸਨ।
ਚੰਡੀਗੜ੍ਹ ਦੀ ਰਹਿਣ ਵਾਲੀ ਮਾਨ ਕੌਰ ਨੇ ਉਮਰ ਦੇ ਉਸ ਪੜਾਅ ‘ਚ ਮੈਦਾਨ ‘ਤੇ ਭੱਜਣਾ ਸ਼ੁਰੂ ਕੀਤਾ, ਜਦੋਂ ਜ਼ਿੰਦਗੀ ਦੀ ਕਲਪਨਾ ਕਰਨਾ ਵੀ ਮੁਸ਼ਕਿਲ ਹੈ। ਮਾਨ ਕੌਰ ਨੇ ਉਸ ਵੇਲੇ ਸਭ ਤੋਂ ਵੱਧ ਸੁਰਖੀਆਂ ਬਟੋਰੀਆਂ, ਜਦੋਂ ਉਹਨਾਂ ਨੇ 102 ਸਾਲ ਦੀ ਉਮਰ ‘ਚ ਨਿਊਜ਼ੀਲੈਂਡ ਦੇ ਔਕਲੈਂਡ ‘ਚ 100 ਮੀਟਰ ਰੇਸ ‘ਚ ਗੋਲਡ ਮੈਡਲ ਹਾਸਲ ਕੀਤਾ ਸੀ। ਇਸਦੇ ਨਾਲ ਹੀ ਉਹਨਾਂ ਨੇ ਔਕਲੈਂਡ ਨੇ ਸਕਾਈ ਟਾਵਰ ‘ਤੇ ਸਕਾਈ ਵੌਕ ਕਰਕੇ ਨਵਾਂ ਵਿਸ਼ਵ ਰਿਕਾਰਡ ਬਣਾਇਆ ਸੀ। ਇਹ ਸਕਾਈ ਟਾਵਰ ਸ਼ਹਿਰ ਤੋਂ 192 ਂਮੀਟਰ ਦੀ ਉਚਾਈ ‘ਤੇ ਸੀ। ਮਾਨ ਨੇ ਇਹ ਸਕਾਈ ਵੌਕ ਆਪਣੇ ਬੇਟੇ ਦਾ ਹੱਥ ਫੜ ਕੇ ਖੜ੍ਹੇ ਹੋ ਗਏ ਸਨ।
ਰਾਸ਼ਟਰਪਤੀ ਤੇ PM ਵੀ ਹਨ ਮੁਰੀਦ
ਮਾਨ ਕੌਰ ਦੀਆਂ ਉਪਲਬਧੀਆਂ ਦੇ ਚਲਦੇ ਉਹਨਾਂ ਨੂੰ ਸਾਲ 2019 ‘ਚ ਰਾਸ਼ਟਰਪਤੀ ਰਾਮਨਾਥ ਕੋਵਿੰਦ ਵੱਲੋਂ ਨਾਰੀ ਸ਼ਕਤੀ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਗਿਆ ਸੀ। ਰਾਸ਼ਟਰਪਤੀ ਭਵਨ ਵਿੱਚ ਸਨਮਾਨ ਲੈਣ ਲਈ ਉਹ ਜਿਸ ਫੁਰਤੀ ਨਾਲ ਪਹੁੰਚੇ ਸਨ, ਉਸ ਨੂੰ ਵੇਖ ਕੇ ਰਾਸ਼ਟਰਪਤੀ ਵੀ ਹੈਰਾਨ ਰਹਿ ਗਏ। ਇਸ ਤੋਂ ਇਲਾਵਾ ਪੀਐੱਮ ਹਾਊਸ ‘ਚ ਇੱਕ ਮੁਲਾਕਾਤ ਦੌਰਾਨ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਵੀ ਉਹਨਾਂ ਦੀ ਫਿਟਨੈੱਸ ਵੇਖ ਕੇ ਉਹਨਾਂ ਦੇ ਅੱਗੇ ਹੱਥ ਜੋੜ ਕੇ ਖੜ੍ਹੇ ਹੋ ਗਏ ਸਨ। ਇਸੇ ਦੇ ਚਲਦੇ ਗਿਨੀਜ਼ ਬੁਕ ਆਫ ਵਰਲਡ ਰਿਕਾਰਡ ‘ਚ ਵੀ ਉਹਨਾਂ ਦਾ ਨਾੰਅ ਦਰਜ ਹੋਇਆ ਸੀ।
10 ਸਿੱਖ ਪ੍ਰਭਾਵਸ਼ਾਲੀ ਮਹਿਲਾਵਾਂ ‘ਚੋਂ ਇੱਕ ਸਨ ਮਾਨ ਕੌਰ
ਵੱਖ-ਵੱਖ ਖੇਡਾਂ ਅਤੇ ਉਮਰ ਵਰਗ ਦੀ ਕੈਟੇਗਰੀ ‘ਚ ਖੇਡਦੇ ਹੋਏ ਮਾਨ ਕੌਰ ਨੇ 8 ਵਰਲਡ ਰਿਕਾਰਡ ਬਣਾਏ ਸਨ। ਦੁਨੀਆ ਦੀਆਂ 10 ਮਸ਼ਹੂਰ ਸਿੱਖ ਪ੍ਰਭਾਵਸ਼ਾਲੀ ਮਹਿਲਾਵਾਂ ‘ਚ ਵੀ ਉਹਨਾਂ ਦਾ ਨਾੰਅ ਦਰਜ ਹੋ ਚੁੱਕਿਆ ਸੀ। ਉਹ ਦੁਨੀਆ ਦੇ 25 ਦੇਸ਼ਾਂ ‘ਚ ਆਯੋਜਿਤ ਹੋਣ ਵਾਲੀਆਂ ਮਾਸਟਰ ਗੇਮਜ਼ ‘ਚ ਹਿੱਸਾ ਲੈ ਚੁੱਕੇ ਸਨ, ਜਿਹਨਾਂ ‘ਚ ਉਹਨਾਂ ਨੇ 35 ਮੈਡਲ ਆਪਣੇ ਨਾੰਅ ਕੀਤੇ ਸਨ।
ਟੋਕਿਓ ਓਲੰਪਿਕਸ ‘ਚ ਸ਼ਾਮਲ ਹੋਣ ਦਾ ਸੀ ਪ੍ਰੋਗਰਾਮ
ਜਾਣਕਾਰੀ ਮੁਤਾਬਕ, ਮਾਨ ਕੌਰ ਦਾ ਟੋਕਿਓ ਓਲੰਪਿਕਸ ‘ਚ ਅਥਲੀਟਾਂ ਦੀ ਹੌਂਸਲਾਅਫਜ਼ਾਈ ਲਈ ਜਾਣ ਦਾ ਪ੍ਰੋਗਰਾਮ ਸੀ। ਮਾਨ ਕੌਰ ਦੇ ਆਉਣ ਦੀ ਖ਼ਬਰ ਜਪਾਨ ਦੇ ਅਖਬਾਰਾਂ ਅਤੇ ਟੀਵੀ ‘ਚ ਕਾਫੀ ਦਿਨ ਪਹਿਲਾਂ ਚੱਲ ਚੁੱਕੀ ਸੀ, ਪਰ ਅਫਸੋਸ ਕਿ ਜਪਾਨ ਜਾਣ ਤੋਂ ਪਹਿਲਾਂ ਹੀ ਉਹ ਦੁਨੀਆ ਤੋਂ ਰੁਖਸਤ ਹੋ ਗਏ।
