ਚੰਡੀਗੜ੍ਹ। ਪੰਜਾਬ ਦੀਆਂ ਚੋਣਾਂ ਬਾਲੀਵੁੱਡ ਅਦਾਕਾਰ ਸੋਨੂੰ ਸੂਦ ਲਈ ਬੇਹੱਦ ਅਹਿਮ ਹਨ, ਕਿਉਂਕਿ ਇਸ ਵਾਰ ਉਹਨਾਂ ਦੀ ਭੈਣ ਮਾਲਵਿਕਾ ਸੂਦ ਸੱਚਰ ਵੀ ਚੋਣ ਮੈਦਾਨ ਵਿੱਚ ਕਿਸਮਤ ਅਜ਼ਮਾ ਰਹੇ ਹਨ। ਹਾਲਾਂਕਿ ਪੰਜਾਬ ‘ਚ ਵੋਟਿੰਗ ਦੌਰਾਨ ਇੱਕ ਵਕਤ ਅਜਿਹਾ ਆਇਆ, ਜਦੋਂ ਚੋਣ ਕਮਿਸ਼ਨ ਨੂੰ ਉਹਨਾਂ ‘ਤੇ ਐਕਸ਼ਨ ਲੈਣਾ ਪਿਆ। ਚੋਣ ਕਮਿਸ਼ਨ ਨੇ ਸੋਨੂੰ ਦੀ ਕਾਰ ਨੂੰ ਜ਼ਬਤ ਕਰਕੇ ਪੁਲਿਸ ਥਾਣੇ ਵਿੱਚ ਬੰਦ ਕਰ ਦਿੱਤਾ। ਨਾਲ ਹੀ ਉਹਨਾਂ ਨੂੰ ਵੀ ਘਰ ਅੰਦਰ ਹੀ ਰਹਿਣ ਦਾ ਆਦੇਸ਼ ਦਿੱਤਾ ਹੈ।
ਅਕਾਲੀ ਦਲ ਦੀ ਸ਼ਿਕਾਇਤ ‘ਤੇ ਕਾਰਵਾਈ
ਦਰਅਸਲ, ਸੋਨੂੰ ਸੂਦ ‘ਤੇ ਇਲਜਾਮ ਹੈ ਕਿ ਉਹਨਾਂ ਨੇ ਵੋਟਿੰਗ ਦੌਰਾਨ ਮੋਗਾ ਸ਼ਹਿਰ ਦੇ ਬੂਥਾਂ ਅੰਦਰ ਜ਼ਬਰਨ ਵੜ ਕੇ ਵੋਟਰਾਂ ਨੂੰ ਪ੍ਰਭਾਵਿਤ ਕਰਨ ਦੀ ਕੋਸ਼ਿਸ਼ ਕੀਤੀ। ਜਾਣਕਾਰੀ ਮੁਤਾਬਕ, ਅਕਾਲੀ ਦਲ ਵੱਲੋਂ ਚੋਣ ਕਮਿਸ਼ਨ ਨੂੰ ਇਸ ਬਾਰੇ ਸ਼ਿਕਾਇਤ ਕੀਤੀ ਗਈ, ਜਿਸ ਤੋਂ ਬਾਅਦ ਕਮਿਸ਼ਨ ਦੀ ਇੱਕ ਟੀਮ ਨੇ ਸੋਨੂੰ ਦਾ ਪਿੱਛਾ ਕੀਤਾ। ਟੀਮ ਵੱਲੋਂ ਇਹਨਾਂ ਇਲਜਾਮਾਂ ਦੇ ਚਲਦਿਆਂ ਸੋਨੂੰ ਨੂੰ ਰਾਹ ‘ਚ ਰੋਕਿਆ ਗਿਆ, ਉਹਨਾਂ ਦੀ ਕਾਰ ਜ਼ਬਤ ਕੀਤੀ ਗਈ ਅਤੇ ਦੂਜੀ ਗੱਡੀ ਜ਼ਰੀਏ ਘਰ ਭੇਜ ਦਿੱਤਾ ਗਿਆ।
ਸੋਨੂੰ ਸੂਦ ਨੇ ਖਾਰਜ ਕੀਤੇ ਇਲਜਾਮ
ਓਧਰ ਸੋਨੂੰ ਸੂਦ ਨੇ ਆਪਣੇ ‘ਤੇ ਲੱਗੇ ਇਲਜਾਮਾਂ ਨੂੰ ਖਾਰਜ ਕਰਦਿਆਂ ਕਿਹਾ ਕਿ ਉਹ ਸਿਰਫ਼ ਸਮਰਥਕਾਂ ਤੋਂ ਰਿਪੋਰਟ ਲੈ ਰਹੇ ਸਨ, ਨਾ ਕਿ ਵੋਟਰਾਂ ਨੂੰ ਪ੍ਰਭਾਵਿਤ ਕਰ ਰਹੇ ਸਨ। ਇਸਦੇ ਨਾਲ ਹੀ ਉਹਨਾਂ ਨੇ ਇਹ ਵੀ ਇਲਜਾਮ ਲਗਾਇਆ ਹੈ ਕਿ ਵਿਰੋਧੀਆਂ ਵੱਲੋਂ ਮੋਗਾ ਹਲਕੇ ‘ਚ ਪੈਸੇ ਦੇ ਕੇ ਵੋਟਾਂ ਖਰੀਦੀਆਂ ਜਾ ਰਹੀਆਂ ਸਨ। ਇਹਨਾਂ ਇਲਜਾਮਾਂ ਦੇ ਅਧਾਰ ‘ਤੇ ਸੋਨੂੰ ਨੇ ਚੋਣ ਕਮਿਸ਼ਨ ਤੋਂ ਕਾਰਵਾਈ ਦੀ ਮੰਗ ਕੀਤੀ ਹੈ।
Other Candidates in #Moga Constituency are buying votes.@ECISVEEP should take immediate action regarding the same.@DproMoga @MogaPolice @DGPPunjabPolice @PunjabPoliceInd
— sonu sood (@SonuSood) February 20, 2022
SSP ਤੋਂ ਰਿਪੋਰਟ ਤਲਬ
ਮੋਗਾ ਦੇ ਜਿਲ੍ਹਾ ਚੋਣ ਅਫ਼ਸਰ DC ਹਰੀਸ਼ ਨੱਈਅਰ ਵੀ ਇਸ ਮਾਮਲੇ ਨੂੰ ਲੈ ਕੇ ਕਾਫੀ ਗੰਭੀਰ ਨਜ਼ਰ ਆ ਰਹੇ ਹਨ। ਉਹਨਾਂ ਨੇ SSP ਤੋਂ ਪੂਰੇ ਮਾਮਲੇ ਦੀ ਰਿਪੋਰਟ ਤਲਬ ਕੀਤੀ ਹੈ।
