ਬਿਓਰੋ। ਹਰਿਆਣਾ ਦੇ ਮੁੱਖ ਮੰਤਰੀ ਮਨੋਹਰ ਲਾਲ ਖੱਟਰ ਨੇ ਕਿਸਾਨਾਂ ‘ਤੇ ਡੰਡਾ ਚੁੱਕਣ ਵਾਲੇ ਬਿਆਨ ਨੂੰ ਵਾਪਸ ਲੈ ਲਿਆ ਹੈ। ਨਾਲ ਹੀ ਮਾਮਲੇ ਵਿੱਚ ਆਪਣਾ ਸਪੱਸ਼ਟੀਕਰਨ ਵੀ ਦਿੱਤਾ ਹੈ। ਉਹਨਾਂ ਨੇ ਕਿਹਾ, “ਮੈਂ ਡੰਡਾ ਚੁੱਕਣ ਦੀ ਗੱਲ ਆਤਮ-ਰੱਖਿਆ ਦੇ ਸਬੰਧ ਵਿੱਚ ਕਹੀ ਸੀ। ਜਿਹਨਾਂ ਕਿਸਾਨਾਂ ਨੂੰ ਬਿਆਨ ਰਾਸ ਨਹੀਂ ਆਇਆ, ਉਹਨਾਂ ਨੂੰ ਦੱਸਣਾ ਚਾਹੁੰਦਾ ਹਾਂ ਕਿ ਮੈਂ ਆਪਣਾ ਬਿਆਨ ਵਾਪਸ ਲੈਂਦਾ ਹਾਂ।“
ਆਖਰ ਸੀਐੱਮ ਨੇ ਕਿਹਾ ਕੀ ਸੀ?
3 ਅਕਤੂਬਰ ਨੂੰ ਚੰਡੀਗੜ੍ਹ ਵਿੱਚ ਬੀਜੇਪੀ ਵਰਕਰਾਂ ਦੀ ਇੱਕ ਬੈਠਕ ਵਿੱਚ ਮੁੱਖ ਮੰਤਰੀ ਮਨੋਹਰ ਲਾਲ ਨੇ ਕਿਹਾ ਸੀ ਕਿ ਕਿਸਾਨਾਂ ਦੀਆਂ ਕੁਝ ਨਵੀਆਂ ਜਥੇਬੰਦੀਆਂ ਉਭਰ ਰਹੀਆਂ ਹਨ, ਉਹਨਾਂ ਨੂੰ ਹੁਣ ਉਤਸ਼ਾਹਿਤ ਕਰਨਾ ਪਏਗਾ। ਉਹਨਾਂ ਨੂੰ ਅੱਗੇ ਲਿਆਉਣਾ ਪਏਗਾ, ਖਾਸਕਰ ਉੱਤਰ-ਪੱਛਮੀ ਹਰਿਆਣਾ ਵਿੱਚ। ਦੱਖਣੀ ਹਰਿਆਣਾ ਵਿੱਚ ਇਹ ਸਮੱਸਿਆ ਜਿਆਦਾ ਨਹੀਂ ਹੈ, ਪਰ ਉੱਤਰ-ਪੱਛਮੀ ਹਰਿਆਣਾ ਦੇ ਹਰ ਜਿਲ੍ਹੇ ਵਿੱਚ ਆਪਣੇ 500-700 ਕਿਸਾਨ ਜਾਂ 1000 ਲੋਕ ਖੜ੍ਹੇ ਕਰੋ, ਉਹਨਾਂ ਨੂੰ ਵਲੰਟੀਅਰ ਬਣਾਓ।”
ਮੁੱਖ ਮੰਤਰੀ ਨੇ ਲੋਕਾਂ ਨੂੰ ਪੁੱਛਿਆ ਕਿ ਉਹਨਾਂ ਦੇ ਬਿਆਨ ਦਾ ਮਤਲਬ ਕੌਣ ਦੱਸੇਗਾ? ਇਸ ‘ਤੇ ਸਾਹਮਣੇ ਬੈਠੇ ਲੋਕਾਂ ‘ਚੋਂ ਕੁਝ ਅਵਾਜ਼ ਆਉਂਦੀ ਹੈ, ਜਿਸ ਨੂੰ ਸੁਣ ਕੇ ਮੁੱਖ ਮੰਤਰੀ ਕਹਿੰਦੇ ਹਨ- “ਜੈਸੇ ਕੋ ਤੈਸਾ।” ਫੇਰ ਹਲਕਾ ਜਿਹਾ ਮੁਸਕੁਰਾਉਂਦੇ ਹੋਏ ਸੀਐੱਮ ਨੇ ਕਿਹਾ- “ਚੁੱਕ ਲਓ ਡੰਡੇ, ਠੀਕ ਹੈ?“
ਇਸ ‘ਤੇ ਕੁਝ ਲੋਕਾਂ ਦੇ ਤਾਲੀਆਂ ਵਜਾਉਣ ਦੀ ਅਵਾਜ਼ ਆਉਂਦੀ ਹੈ, ਤਾਂ ਕੁਝ ਲੋਕ ਕਹਿੰਦੇ ਹਨ ਕਿ ਫਿਰ ਤਾਂ ਜੇਲ੍ਹ ਜਾਣਾ ਪਏਗਾ ਇਸ ‘ਤੇ ਮੁੱਖ ਮੰਤਰੀ ਕਹਿੰਦੇ ਹਨ, “ਉਹ ਵੀ ਵੇਖ ਲਵਾਂਗੇ ਤੇ ਦੂਜੀ ਗੱਲ ਇਹ ਹੈ ਕਿ ਜਦੋਂ ਡੰਡੇ ਚੁੱਕੋਗੇ, ਤਾਂ ਜ਼ਮਾਨਤ ਦੀ ਪਰਵਾਹ ਨਾ ਕਰਿਓ। ਮਹੀਨਾ, 2 ਮਹੀਨਾ, 6 ਮਹੀਨੇ ਅੰਦਰ ਰਹਿ ਆਓਗੇ, ਤਾਂ ਵੱਡੇ ਲੀਡਰ ਆਪਣੇ-ਆਪ ਬਣ ਜਾਓਗੇ।”
ਹੁਣ ਸਫਾਈ ਵਿੱਚ ਕੀ ਬੋਲੇ ਸੀਐੱਮ?
ਮੁੱਖ ਮੰਤਰੀ ਮਨੋਹਰ ਲਾਲ ਸ਼ੁੱਕਰਵਾਰ ਨੂੰ ਨਰਾਤਿਆਂ ਦੇ ਮੌਕੇ ਪੰਚਕੂਲਾ ਵਿੱਚ ਮਾਤਾ ਮਨਸਾ ਦੇਵੀ ਵਿੱਚ ਨਤਮਸਤਕ ਹੋਣ ਲਈ ਪਹੁੰਚੇ ਸਨ। ਬਾਅਦ ਵਿੱਚ ਮੀਡੀਆ ਨਾਲ ਗੱਲ ਕਰਦੇ ਹੋਏ ਸੀਐੱਮ ਨੇ ਕਿਹਾ ਕਿ ਮਾਂ ਨੇ ਅੱਜ ਮੈਨੂੰ ਕਿਹਾ ਕਿ ਮੈਂ ਹਰੇਕ ਨੂੰ ਸ਼ਕਤੀ ਪ੍ਰਦਾਨ ਕਰਦੀ ਹਾਂ। ਤੁਹਾਨੂੰ ਵੀ ਸ਼ਕਤੀ ਪ੍ਰਦਾਨ ਕਰਦੀ ਹਾਂ। ਸਮਾਜ ਨੂੰ ਹੀ ਸ਼ਕਤੀ ਪ੍ਰਦਾਨ ਕਰਦੀ ਹਾਂ।
ਉਸ ਵੇਲੇ ਮੈਨੂੰ ਲੱਗਿਆ ਕਿ ਪਿਛਲੇ ਦਿਨੀਂ ਮੈਂ ਇੱਕ ਬਿਆਨ ਦਿੱਤਾ ਸੀ, ਜੋ ਮੈਂ ਆਤਮਰੱਖਿਆ ਦੇ ਨਾਤੇ ਦਿੱਤਾ ਸੀ। ਉਸਦਾ ਬੇਹੱਦ ਪ੍ਰਚਾਰ ਕੀਤਾ ਜਾ ਰਿਹਾ ਹੈ ਕਿ ਮੁੱਖ ਮੰਤਰੀ ਨੇ ਕਿਸਾਨਾਂ ‘ਤੇ ਡੰਡਾ ਚੁੱਕਣ ਦੀ ਗੱਲ ਕਹੀ, ਪਰ ਉਹ ਮੈਂ ਕਿਸੇ ਬੁਰੀ ਭਾਵਨਾ ਨਾਲ ਨਹੀਂ ਕੀਤਾ। ਆਤਮਰੱਖਿਆ ਦੇ ਕਾਰਨ ਕਿਹਾ ਸੀ। ਫਿਰ ਵੀ ਸਾਡੇ ਕੁਝ ਕਿਸਾਨ ਆਗੂ, ਕੁਝ ਅੰਦੋਲਨਕਾਰੀ ਜਿਹਨਾਂ ਨੂ ਉਹ ਰਾਸ ਨਹੀਂ ਆਇਆ, ਜਗ੍ਹਾ-ਜਗ੍ਹਾ ਵਿਰੋਧ ਕਰ ਰਹੇ ਹਨ। ਮਾਂ ਮਨਸਾ ਦੇਵੀ, ਸ਼ਕਤੀ ਦਾਇਨੀ ਸ਼ਕਤੀ ਪੀਠ ਨੇ ਵਿਸ਼ਵਾਸ ਦਵਾਇਆ ਹੈ ਕਿ ਉਹ ਸਾਰਿਆਂ ਦੀ ਰੱਖਿਆ ਕਰਨਗੇ। ਸਭ ਤੋਂ ਪਹਿਲਾਂ ਤਾਂ ਉਹਨਾਂ ਕਿਸਾਨ ਭਰਾਵਾਂ ਨੂੰ ਦੱਸਣਾ ਚਾਹੁੰਦਾ ਹਾਂ ਕਿ ਮੈਂ ਆਪਣਾ ਬਿਆਨ ਵਾਪਸ ਲੈਂਦਾ ਹਾਂ, ਕਿਉਂਕਿ ਮੈਂ ਨਹੀਂ ਚਾਹੁੰਦਾ ਕਿ ਹਰਿਆਣਾ ਵਿੱਚ ਕਾਨੂੰਨ-ਵਿਵਸਥਾ ਦੀ ਸਥਿਤੀ ਵਿਗੜੇ। ਸ਼ਾਂਤੀ ਭੰਗ ਹੋਵੇ। ਉਹਨਾਂ ਕਿਹਾ ਕਿ ਸ਼ਾਂਤੀਪੂਰਣ ਅੰਦੋਲਨ ਕਰਨਾ ਸਾਰਿਆਂ ਦਾ ਹੱਕ ਹੈ।
