ਬਿਓਰੋ। ਲੁਧਿਆਣਾ ਕੋਰਟ ਕੰਪਲੈਕਸ ਵਿੱਚ ਹੋਏ ਬੰਬ ਧਮਾਕੇ ਲਈ RDX ਦਾ ਇਸਤੇਮਾਲ ਕੀਤਾ ਗਿਆ ਸੀ। ਪੰਜਾਬ ਪੁਲਿਸ ਦੀ ਫਾਰੈਂਸਿਕ ਜਾਂਚ ਵਿੱਚ ਇਹ ਖੁਲਾਸਾ ਹੋਇਆ ਹੈ। ਹਾਲਾਂਕਿ, ਧਮਾਕੇ ਕਾਰਨ ਪਾਣੀ ਦੀ ਪਾਈਪਲਾਈਨ ਫੱਟ ਗਈ, ਜਿਸਦੇ ਚਲਦੇ ਭਾਰੀ ਮਾਤਰਾ ਵਿੱਚ ਵਿਸਫੋਟਕ ਵਹਿ ਗਿਆ।
DGP ਸਿਧਾਰਥ ਚਟੋਪਾਧਿਆਏ ਮੁਤਾਬਕ, ਹਮਲੇ ਦੇ ਪਿੱਛੇ ਡਰੱਗ ਮਾਫੀਆ, ਗੈਂਗਸਟਰ ਅਤੇ ਪਾਕਿਸਤਾਨ ਅਧਾਰਤ ਖਾਲਿਸਤਾਨੀ ਦਹਿਸ਼ਤਗਰਦਾਂ ਦਾ ਹੱਥ ਹੈ। ਧਮਾਕੇ ਵਿੱਚ ਮਾਰਿਆ ਗਿਆ ਗਗਨਦੀਪ ਹੀ ਕੋਰਟ ਵਿੱਚ ਬੰਬ ਪਲਾਂਟ ਕਰਨ ਲਈ ਗਿਆ ਸੀ। ਗਗਨਦੀਪ ਕਿਸੇ ਵਕਤ ਪੰਜਾਬ ਪੁਲਿਸ ਦਾ ਮੁਲਾਜ਼ਮ ਹੁੰਦਾ ਸੀ। ਉਹ ਖੰਨਾ ਦਾ ਰਹਿਣ ਵਾਲਾ ਸੀ। 2 ਸਾਲ ਪਹਿਲਾਂ ਗਗਨਦੀਪ ਨੂੰ ਨਸ਼ੇ ਦੇ ਮਾਮਲੇ ਵਿੱਚ ਬਰਖ਼ਾਸਤ ਕੀਤਾ ਗਿਆ ਸੀ। 2 ਸਾਲ ਦੀ ਕੈਦ ਕੱਟਣ ਤੋਂ ਬਾਅਦ 8 ਸਤੰਬਰ ਨੂੰ ਹੀ ਉਹ ਜੇਲ੍ਹ ਤੋਂ ਰਿਹਾਅ ਹੋਇਆ ਸੀ।
ਤਾਰ ਜੋੜਦੇ ਵਕਤ ਧਮਾਕਾ ਹੋ ਗਿਆ
DGP ਨੇ ਕਿਹਾ ਕਿ ਗਗਨਦੀਪ ਨੇ ਬੰਬ ਕਿਤੇ ਹੋਰ ਪਲਾਂਟ ਕਰਨਾ ਸੀ ਅਤੇ ਉਹ ਬਾਥਰੂਮ ਵਿੱਚ ਬੰਬ ਦੇ ਤਾਰ ਜੋੜਨ ਲਈ ਗਿਆ ਸੀ। ਅਸੈਂਬਲ ਕਰਦੇ ਵਕਤ ਹੀ ਬੰਬ ਫੱਟ ਗਿਆ। ਗਣੀਮਤ ਰਹੀ ਕਿ ਉਸ ਵੇਲੇ ਗਗਨਦੀਪ ਉਥੇ ਇਕੱਲਾ ਸੀ। ਉਹਨਾਂ ਕਿਹਾ ਕਿ ਸ਼ੁਰੂਆਤ ਵਿੱਚ ਗਗਨਦੀਪ ਇਕਲੌਤਾ ਇਸ ਸਾਜਿਸ਼ ਦਾ ਹਿੱਸਾ ਲੱਗ ਰਿਹਾ ਸੀ, ਪਰ ਇਸ ਵਿੱਚ ਹੋਰ ਲੋਕ ਵੀ ਸ਼ਾਮਲ ਹੋ ਸਕਦੇ ਹਨ।
ਗਗਨਦੀਪ ਦੇ ਪਾਕਿਸਤਾਨ ਨਾਲ ਜੁੜੇ ਤਾਰ
DGP ਸਿਧਾਰਥ ਚਟੋਪਾਧਿਆਏ ਨੇ ਕਿਹਾ ਕਿ ਸ਼ੁਰੂਆਤੀ ਜਾਂਚ ਵਿੱਚ ਸਬੂਤ ਮਿਲੇ ਹਨ ਕਿ ਮ੍ਰਿਤਕ ਗਗਨਦੀਪ ਸਿੰਘ ਦੇ ਸਰਹੱਦ ਪਾਰ ਯਾਨੀ ਪਾਕਿਸਤਾਨ ਵਿੱਚ ਬੈਠੇ ਨਸ਼ਾ ਤਸਕਰਾਂ ਨਾਲ ਲਿੰਕ ਸਨ। ਹਾਲਾਂਕਿ ਪੁਲਿਸ ਇਸਦੀ ਜਾਂਚ ਕਰ ਰਹੀ ਹੈ। ਜਿਕਰਯੋਗ ਹੈ ਕਿ ਮ੍ਰਿਤਕ ਗਗਨਦੀਪ ਸਿੰਘ ਦਾ ਪਾਕਿਸਤਾਨ ਵਿੱਚ ਬੈਠੇ ਬੱਬਰ ਖਾਲਸਾ ਇੰਟਰਨੈਸ਼ਨਲ ਨਾਲ ਜੁੜੇ ਹਰਵਿੰਦਰ ਸਿੰਘ ਰਿੰਦਾ ਨਾਲ ਕਾਂਟੈਕਟ ਸਾਹਮਣੇ ਆ ਰਹੇ ਹਨ।
ਰਿਕਾਰਡ ਰੂਮ ਉਡਾਉਣਾ ਚਾਹੁੰਦਾ ਸੀ ਗਗਨਦੀਪ
ਸ਼ੁਰੂਆਤੀ ਜਾਂਚ ਵਿੱਚ ਇਹ ਵੀ ਸਾਹਮਣੇ ਆਇਆ ਹੈ ਕਿ ਗਗਨਦੀਪ ਦੀ ਧਮਾਕੇ ਤੋਂ ਅਗਲੇ ਹੀ ਦਿਨ ਕੋਰਟ ਵਿੱਚ ਪੇਸ਼ੀ ਸੀ। ਉਹ ਲੁਧਿਆਣਾ ਕੋਰਟ ਦਾ ਰਿਕਾਰਡ ਰੂਮ ਉਡਾਉਣਾ ਚਾਹੁੰਦਾ ਸੀ। ਉਸਦੀ ਯੋਜਨਾ ਸੀ ਕਿ ਰਿਕਾਰਡ ਰੂਮ ਨਸ਼ਟ ਹੋਣ ਨਾਲ ਉਸਦੇ ਕੇਸ ਨਾਲ ਜੁੜੇ ਰਿਕਾਰਡ ਨਸ਼ਟ ਹੋ ਜਾਣਗੇ ਅਤੇ ਉਹ ਕੇਸ ਤੋਂ ਬੱਚ ਜਾਵੇਗਾ। ਇਹ ਵੀ ਖਦਸ਼ਾ ਹੈ ਕਿ ਜਿਵੇਂ ਦਹਿਸ਼ਤਵਾਦ ਦੇ ਦੌਰ ਵਿੱਚ ਜੱਜਾਂ ‘ਤੇ ਅਟੈਕ ਹੋਏ ਸਨ, ਇਸ ਵਿੱਚ ਵੀ ਕੁਝ ਇਸੇ ਤਰ੍ਹਾਂ ਦੀ ਨੀਅਤ ਹੋ ਸਕਦੀ ਹੈ।
ਪੰਜਾਬ ‘ਚ ਸਾਹਮਣੇ ਆ ਰਿਹਾ ਖਤਰਨਾਕ ‘ਕੌਕਟੇਲ’
DGP ਚਟੋਪਾਧਿਆਏ ਨੇ ਇਹ ਵੀ ਕਿਹਾ ਕਿ ਪੰਜਾਬ ਵਿੱਚ ਹੁਣ ਕਰਾਈਮ ਦੇ ਪਿੱਛੇ ਖਤਰਨਾਕ ‘ਕੌਕਟੇਲ’ ਨਜ਼ਰ ਆ ਰਿਹਾ ਹੈ। ਉਹਨਾਂ ਕਿਹਾ ਕਿ ਇਸ ਵਿੱਚ ਨਸ਼ਾ ਤਸਕਰ, ਆਰਗੇਨਾਈਜ਼ਡ ਕਰਾਈਮ ਅਤੇ ਦਹਿਸ਼ਤਵਾਦ ਦਾ ਮੇਲ ਸਾਹਮਣੇ ਆ ਰਿਹਾ ਹੈ। ਉਹਨਾਂ ਕਿਹਾ ਕਿ ਡਰੱਗ ਮਾਫੀਆ, ਗੈਂਗਸਟਰ ਅਤੇ ਫਿਰ ਉਹਨਾਂ ਦੇ ਅੱਤਵਾਦ ਨਾਲ ਮਿਲਣ ਦੀ ਵਜ੍ਹਾ ਨਾਲ ਇਹ ਕਾਫੀ ਖਤਰਨਾਕ ਸਥਿਤੀ ਹੈ।
ਗਗਨਦੀਪ ਨੂੰ RDX ਡਿਲੀਵਰ ਕਰਨ ਵਾਲੇ ਦੀ ਤਲਾਸ਼
ਜਾਂਚ ਵਿੱਚ ਸਪੱਸ਼ਟ ਹੋ ਚੁੱਕਿਆ ਹੈ ਕਿ ਲੁਧਿਆਣਾ ਬਲਾਸਟ ਵਿੱਚ RDX ਦਾ ਇਸਤੇਮਾਲ ਕੀਤਾ ਗਿਆ? ਜਾਂਚ ਏਜੰਸੀਆਂ ਇਹ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੀਆਂ ਹਨ ਕਿ ਜੋ ਬੰਬ ਬਲਾਸਟ ਹੋਇਆ, ਉਹ ਗਗਨਦੀਪ ਨੂੰ ਕਿਸਨੇ ਦਿੱਤਾ? ਕਿੰਨੇ ਹੋਰ ਲੋਕ ਇਸ ਮੋਡਿਊਲ ਦਾ ਹਿੱਸਾ ਹਨ? ਇਸ ਬਲਾਸਟ ਵਿੱਚ ਕਿੰਨਾ RDX ਇਸਤੇਮਾਲ ਕੀਤਾ ਗਿਆ? ਗਗਨਦੀਪ ਨੂੰ ਇਸਦੀ ਡਿਲੀਵਰੀ ਕਿਥੋਂ ਮਿਲੀ? ਇਸ ਬਲਾਸਟ ਦਾ ਮਕਸਦ ਕੀ ਸੀ? ਅਤੇ ਗਗਨਦੀਪ ਕਿਸਦੇ ਕਹਿਣ ‘ਤੇ ਬੰਬ ਫਿੱਟ ਕਰਨ ਪਹੁੰਚਿਆ?
ਗਗਨਦੀਪ ਸਿੰਘ ਦੇ ਸਾਥੀਆਂ ਦੀ ਤਲਾਸ਼
ਸਾਲ 2019 ਵਿੱਚ ਡਰੱਗਜ਼ ਕੇਸ ‘ਚ ਗ੍ਰਿਫ਼ਤਾਰ ਹੋਣ ਤੋਂ ਬਾਅਦ ਪੰਜਾਬ ਪੁਲਿਸ ਤੋਂ ਬਰਖ਼ਾਸਤ ਕੀਤੇ ਗਏ ਗਗਨਦੀਪ ਸਿੰਘ ਦੇ ਨਾਲ ਉਸ ਵਕਤ ਕੁਝ ਹੋਰ ਲੋਕ ਵੀ ਸਨ। ਵੀਰਵਾਰ ਨੂੰ ਬੰਬ ਲਗਾਉਂਦੇ ਸਮੇਂ ਹੋਏ ਧਮਾਕੇ ਵਿੱਚ ਗਗਨਦੀਪ ਸਿੰਘ ਦੀ ਮੌਤ ਤੋਂ ਬਾਅਦ ਪੰਜਾਬ ਪੁਲਿਸ ਹੁਣ ਉਸਦੇ ਬਾਕੀ ਸਾਥੀਆਂ ਦਾ ਰਿਕਾਰਡ ਖੰਗਾਲ ਰਹੀ ਹੈ। ਪੰਜਾਬ ਪੁਲਿਸ ਨੂੰ ਸ਼ੱਕ ਹੈ ਕਿ ਇਹਨਾਂ ‘ਚੋਂ ਕੋਈ ਇਸ ਬਲਾਸਟ ਵਿੱਚ ਵੀ ਸ਼ਾਮਲ ਹੋ ਸਕਦਾ ਹੈ।
8 ਸਾਲ ਪੁਲਿਸ ਵਿੱਚ ਰਿਹਾ ਗਗਨਦੀਪ
ਖੰਨਾ ਦੇ ਗੁਰੂ ਤੇਗ ਬਹਾਦਰ ਲਲਹੇੜੀ ਦਾ ਰਹਿਣ ਵਾਲਾ ਗਗਨਦੀਪ ਸਿੰਘ 2011 ਵਿੱਚ ਬਤੌਰ ਕਾਂਸਟੇਬਲ ਪੰਜਾਬ ਪੁਲਿਸ ਵਿੱਚ ਭਰਤੀ ਹੋਇਆ ਸੀ। ਉਹ ਖੰਨਾ ਦੇ ਨਾਲ-ਨਾਲ ਮਾਛੀਵਾੜਾ ਅਤੇ ਸਮਰਾਲਾ ਥਾਣਿਆਂ ਵਿੱਚ ਵੀ ਤੈਨਾਤ ਰਿਹਾ। ਉਸਦੇ ਬਾਰੇ ਪਤਾ ਲੱਗਿਆ ਹੈ ਕਿ ਉਹ ਚੁੱਪ-ਚਾਪ ਕੰਮ ਕਰਨ ਵਾਲਾ ਸ਼ਖਸ ਸੀ। ਉਸਦਾ ਵਿਆਹ ਹੋ ਚੁੱਕਿਆ ਸੀ ਅਤੇ ਇੱਕ ਬੱਚੀ ਦਾ ਪਿਤਾ ਸੀ।
ਹੱਥ ‘ਤੇ ਖੰਡੇ ਦਾ ਟੈਟੂ ਬਣਵਾਇਆ ਹੋਇਆ ਸੀ
ਗਗਨਦੀਪ ਛੋਟੇ ਕੱਦ ਦਾ ਭਲਵਾਨ ਦੀ ਤਰ੍ਹਾਂ ਨਜ਼ਰ ਆਉਣ ਵਾਲਾ ਸ਼ਖਸ ਸੀ। ਉਸਨੇ ਆਪਣੇ ਹੱਥ ‘ਤੇ ਖੰਡੇ ਦਾ ਟੈਟੂ ਬਣਵਾਇਆ ਹੋਇਆ ਸੀ। ਇਸ ਟੈਟੂ ਦੇ ਜ਼ਰੀਏ ਪੁਲਿਸ ਨੇ ਮ੍ਰਿਤਕ ਦੀ ਪਛਾਣ ਸ਼ੁਰੂ ਕੀਤੀ, ਪਰ ਬਾਅਦ ਵਿੱਚ ਮਲਬੇ ‘ਚੋਂ ਮੋਬਾਈਲ ਅਤੇ ਡੌਂਗਲ ਮਿਲਣ ਨਾਲ ਸੁਰੱਖਿਆ ਏਜੰਸੀਆਂ ਨੂੰ ਜਲਦੀ ਹੀ ਇਸ ਦਿਸ਼ਾ ਵਿੱਚ ਕਾਮਯਾਬੀ ਹੱਥ ਲੱਗ ਗਈ।
