ਬਿਓਰੋ। ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਦੀ ਸੁਰੱਖਿਆ ‘ਚ ਹੋਈ ਕੁਤਾਹੀ ਦੇ ਮਾਮਲੇ ਨੂੰ ਲੈ ਕੇ ਪੰਜਾਬ ਦੀ ਸਿਆਸਤ ਪੂਰੇ ਸਿਖਰਾਂ ‘ਤੇ ਹੈ। ਕਾਂਗਰਸ ਲਗਾਤਾਰ ਇਸ ਸਟੈਂਡ ‘ਤੇ ਕਾਇਮ ਹੈ ਕਿ ਬੀਜੇਪੀ ਵੱਲੋਂ ਇੱਕ ਸੋਚੀ-ਸਮਝੀ ਸਾਜਿਸ਼ ਦੇ ਤਹਿਤ ਇਹ ਡਰਾਮਾ ਰਚਿਆ ਗਿਆ, ਜਦਕਿ ਅਸਲ ਵਿੱਚ ਬੀਜੇਪੀ ਆਪਣੀ ਰੈਲੀ ਦੇ ਫਲਾਪ ਸ਼ੋਅ ਤੋਂ ਧਿਆਨ ਭਟਕਾਉਣਾ ਚਾਹੁੰਦੀ ਸੀ।
ਬੀਜੇਪੀ ਦੇ ਤੋਤੇ ਹਨ ਕੈਪਟਨ- ਸਿੱਧੂ
ਇਸੇ ਮੁੱਦੇ ਨੂੰ ਲੈ ਕੇ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੇ ਅੱਜ ਪ੍ਰੈੱਸ ਕਾਨਫ਼ਰੰਸ ਕਰਕੇ ਬੀਜੇਪੀ ‘ਤੇ ਖੂਬ ਹਮਲੇ ਬੋਲੇ। ਬੀਜੇਪੀ ‘ਤੇ ਵਰ੍ਹਦਿਆਂ ਸਿੱਧੂ ਨੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਵੀ ਲਪੇਟੇ ਵਿੱਚ ਲੈ ਲਿਆ। ਸਿੱਧੂ ਨੇ ਕੈਪਟਨ ਨੂੰ ਬੀਜੇਪੀ ਦਾ ਤੋਤਾ ਦੱਸ ਦਿੱਤਾ। ਉਹਨਾਂ ਕਿਹਾ, “ਬੀਜੇਪੀ ਅਤੇ ਉਸਦੇ ਕੁਝ ਤੋਤਿਆਂ ਨੇ ਸਕਿਓਰਿਟੀ ਦਾ ਰੱਟਾ ਲਗਾਇਆ ਹੋਇਆ ਹੈ। ਸਭ ਤੋਂ ਵੱਡਾ ਤੋਤਾ ਤਾਂ ਸਾਡਾ ਸਾਬਕਾ ਮੁੱਖ ਮੰਤਰੀ ਹੈ, ਜਿਸ ਨੂੰ ਬੀਜੇਪੀ ਥੋੜ੍ਹੀ ਜਿਹੀ ਚੂਰੀ ਪਾਉਂਦੀ ਹੈ, ਉਹ ਕਹਿੰਦਾ ਹੈ- ਸਕਿਓਰਿਟੀ..ਸਕਿਓਰਿਟੀ..ਸਕਿਓਰਿਟੀ..।”
ਸਿੱਧੂ ਨੇ ਕੈਪਟਨ ਵੱਲੋਂ ਸੂਬੇ ‘ਚ ਰਾਸ਼ਟਰਪਤੀ ਰਾਜ ਲਗਾਏ ਜਾਣ ਦੀ ਮੰਗ ਨੂੰ ਲੈ ਕੇ ਵੀ ਹਮਲਾ ਬੋਲਿਆ। ਉਹਨਾਂ ਕਿਹਾ, “ਜਿਹੜੇ ਵੀ ਪੰਜਾਬ ‘ਚ ਰਾਸ਼ਟਰਪਤੀ ਰਾਜ ਲਾਉਣ ਦੀ ਮੰਗ ਕਰ ਰਹੇ ਹਨ, ਉਹ ਸਾਰੇ ਤੋਤੇ ਹਨ। ਬੀਜੇਪੀ ਚੂਰੀ ਸੁੱਟਦੀ ਹੈ, ਤਾਂ ਕਹਿੰਦੇ ਹਨ- ਰਾਸ਼ਟਰਪਤੀ ਰਾਜ..ਰਾਸ਼ਟਰਪਤੀ ਰਾਜ..ਰਾਸ਼ਟਰਪਤੀ ਰਾਜ..।”
ਕੈਪਟਨ ਦੇ ਪੱਲੇ ਕੁਝ ਨਹੀਂ- ਸਿੱਧੂ
ਕੈਪਟਨ ਅਮਰਿੰਦਰ ਸਿੰਘ ‘ਤੇ ਬਿਨ੍ਹਾਂ ਨਾਂਅ ਲਏ ਹਮਲਾ ਬੋਲਦੇ ਹੋਏ ਸਿੱਧੂ ਨੇ ਕਿਹਾ, “ਜਿਹੜੇ ਰਾਸ਼ਟਰਪਤੀ ਰਾਜ ਦੀ ਗੱਲ ਕਰਦੇ ਹਨ, ਇਹਨਾਂ ਦੇ ਪੱਲੇ ਕੁਝ ਨਹੀਂ। ਇਹਨਾਂ ਨੂੰ ਚੋਣਾਂ ਵਿੱਚ 3 ਸੀਟਾਂ ਵੀ ਹਾਸਲ ਨਹੀਂ ਹੋਣੀਆਂ।”
500 ਲੋਕਾਂ ਨੂੰ ਕਿਵੇਂ ਭਾਸ਼ਣ ਦਿੰਦੇ PM- ਸਿੱਧੂ
ਪ੍ਰਧਾਨ ਮੰਤਰੀ ਦੀ ਸੁਰੱਖਿਆ ‘ਚ ਕੁਤਾਹੀ ਦੇ ਇਲਜਾਮਾਂ ਨੂੰ ਖਾਰਜ ਕਰਦਿਆਂ ਸਿੱਧੂ ਨੇ ਕਿਹਾ, “ਬੀਜੇਪੀ ਨੇ ਇਹ ਪੂਰਾ ਡਰਾਮਾ ਕਰਕੇ ਬੇਇੱਜ਼ਤੀ ਤੋਂ ਬਚਣ ਦੀ ਕੋਸ਼ਿਸ਼ ਕੀਤੀ ਹੈ। 70 ਹਜਾਰ ਕੁਰਸੀਆਂ ‘ਤੇ ਜੇਕਰ 500 ਬੰਦਾ ਬੈਠਿਆ ਹੋਵੇ, ਤਾਂ ਦੇਸ਼ ਦਾ ਪ੍ਰਧਾਨ ਮੰਤਰੀ ਉਸ ਨੂੰ ਕਿਵੇਂ ਅਡ੍ਰੈੱਸ ਕਰਦਾ। ਇਹ ਤਾਂ ਸਾਡਾ ਸਾਬਕਾ ਮੁੱਖ ਮੰਤਰੀ ਬੇਸ਼ਰਮ ਸੀ, ਜੋ ਖਾਲੀ ਕੁਰਸੀਆਂ ਨੂੰ ਅਡ੍ਰੈੱਸ ਕਰ ਗਿਆ।” ਸਿੱਧੂ ਨੇ ਕਿਹਾ ਕਿ ਪੀਐੱਮ ਵੱਲੋਂ ਹਵਾਈ ਮਾਰਗ ਦੀ ਬਜਾਏ ਸੜਕ ਮਾਰਗ ਰਾਹੀਂ ਜਾਣ ਦੀ ਯੋਜਨਾ ਅਚਾਨਕ ਬਣਾਉਣਾ ਉਹਨਾਂ ਦੀ ਯੋਜਨਾ ਦਾ ਹਿੱਸਾ ਸੀ।
ਕਿਸਾਨ ਹਿੰਸਾ ਨਹੀਂ ਕਰ ਸਕਦੇ- ਸਿੱਧੂ
ਇਸ ਦੌਰਾਨ ਸਿੱਧੂ ਕਿਸਾਨਾਂ ਦੇ ਸਮਰਥਨ ‘ਚ ਵੀ ਖੜ੍ਹੇ ਨਜ਼ਰ ਆਏ। ਉਹਨਾਂ ਕਿਹਾ, “ਮੈਂ ਮੰਨਦਾ ਹਾਂ ਕਿ ਦੇਸ਼ ਦੇ 60 ਫੀਸਦ ਕਿਸਾਨ ਤੁਹਾਡੇ ਖਿਲਾਫ਼ ਖੜ੍ਹੇ ਹੋ ਸਕਦੇ ਹਨ, ਪਰ ਇੱਕ ਵੀ ਹਿੰਸਾ ਦਾ ਸਹਾਰਾ ਨਹੀਂ ਲੈ ਸਕਦਾ। ਤੁਹਾਨੂੰ ਕਿਸੇ ਤੋਂ ਵੀ ਜਾਨ ਦਾ ਖ਼ਤਰਾ ਨਹੀਂ ਹੈ।” ਉਹਨਾਂ ਕਿਹਾ ਕਿ ਬੀਜੇਪੀ ਇਹ ਸਭ ਕਰਕੇ ਪੰਜਾਬ ਅਤੇ ਪੰਜਾਬੀਅਤ ਨੂੰ ਬਦਨਾਮ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ। ਉਹਨਾਂ ਕਿਹਾ ਕਿ ਦੇਸ਼ ਦੇ ਪ੍ਰਧਾਨ ਮੰਤਰੀ ਦੀ ਕੀਮਤ ਬੱਚਾ-ਬੱਚਾ ਜਾਣਦਾ ਹੈ, ਤੁਸੀਂ ਆਪਣੀ ਜਾਨ ਨੂੰ ਖ਼ਤਰਾ ਦੱਸ ਕੇ ਪੰਜਾਬੀਆਂ ਦਾ ਅਪਮਾਨ ਕਰ ਰਹੇ ਹੋ।
ਇਸ ਦੌਰਾਨ ਸਿੱਧੂ ਨੇ ਸ਼ਹੀਦਾਂ ਦੀ ਸ਼ਹਾਦਤ ਦਾ ਵੀ ਜਿਕਰ ਕੀਤਾ। ਉਹਨਾਂ ਕਿਹਾ, “ਜਿੰਨੇ ਤਿਰੰਗੇ ਤੁਹਾਡੀ ਪਾਰਟੀ ਅਤੇ ਸੰਘ ਵੱਲੋਂ ਪੂਰੀ ਜਿੰਦਗੀ ਵਿੱਚ ਨਹੀਂ ਫਹਿਰਾਏ ਹੋਣਗੇ, ਸਾਡੇ ਪੰਜਾਬੀ ਓਨੇ ਤਿਰੰਗਿਆਂ ਵਿੱਚ ਲਿਪਟ ਕੇ ਘਰ ਪਹੁੰਚੇ ਹਨ।”
‘ਪੰਜਾਬ ਦਾ ਮਾਹੌਲ ਖਰਾਬ ਕਰਨਾ ਚਾਹੁੰਦੀ ਹੈ ਬੀਜੇਪੀ’
ਪੰਜਾਬ ਕਾਂਗਰਸ ਪ੍ਰਧਾਨ ਨੇ ਦਾਅਵਾ ਕੀਤਾ ਕਿ ਸੂਬੇ ਦਾ ਮਾਹੌਲ ਪੂਰੀ ਤਰ੍ਹਾਂ ਨਾਲ ਠੀਕ ਹੈ, ਪਰ ਬੀਜੇਪੀ ਚੋਣਾਂ ਤੋਂ ਪਹਿਲਾਂ ਮਾਹੌਲ ਖਰਾਬ ਕਰਨਾ ਚਾਹੁੰਦੀ ਹੈ। ਉਹਨਾਂ ਕਿਹਾ, “ਬੀਜੇਪੀ ਜਾਣਦੀ ਹੈ ਕਿ ਪੰਜਾਬ ‘ਚ ਉਸਦਾ ਕੋਈ ਅਧਾਰ ਨਹੀਂ, ਇਸ ਲਈ ਪੀਐੱਮ ਦੀ ਸੁਰੱਖਿਆ ਦੇ ਬਹਾਨੇ ਮਾਹੌਲ ਖਰਾਬ ਕਰਨ ਦੀ ਕੋਸ਼ਿਸ਼ ਹੋ ਰਹੀ ਹੈ। ਬੀਜੇਪੀ ਇਸਦੇ ਜ਼ਰੀਏ ਬਾਕੀ ਸੂਬਿਆਂ ਵਿੱਚ ਫਾਇਦਾ ਲੈਣਾ ਚਾਹੁੰਦੀ ਹੈ।” ਉਹਨਾਂ ਕਿਹਾ, “ਬੀਜੇਪੀ ਜਦੋਂ ਵੀ ਸਵਾਂਗ ਰਚਦੀ ਹੈ, ਉਦੋਂ ਮੁੱਦੇ ਲਗਭਗ ਖਤਮ ਹੋ ਜਾਂਦੇ ਹਨ। ਇਸੇ ਦਾ ਨਤੀਜਾ ਹੈ ਕਿ ਪਿਛਲੇ 4 ਦਿਨਾਂ ਤੋਂ ਪੰਜਾਬ ਦੇ ਮੁੱਦਿਆਂ ਦੀ ਗੱਲ ਹੀ ਨਹੀਂ ਹੋ ਰਹੀ।” ਇਸਦੇ ਨਾਲ ਹੀ ਉਹਨਾਂ ਸਵਾਲ ਚੁੱਕਿਆ ਕਿ ਹਮੇਸ਼ਾ ਪੰਜਾਬ ਦਾ ਮਾਹੌਲ ਚੋਣਾਂ ਦੇ ਨੇੜੇ ਆ ਕੇ ਹੀ ਕਿਉਂ ਖਰਾਬ ਕੀਤਾ ਜਾਂਦਾ ਹੈ।
