ਬਿਓਰੋ। ਅਕਾਲੀ ਆਗੂ ਬਿਕਰਮ ਮਜੀਠੀਆ ਨਾਲ ਫਸਵੇਂ ਚੋਣ ਮੁਕਾਬਲੇ ਵਿੱਚ ਫਸੇ ਨਵਜੋਤ ਸਿੰਘ ਸਿੱਧੂ ਦੇ ਸੁਰ ਹੁਣ ਬਦਲਣ ਲੱਗੇ ਹਨ। ਅੰਮ੍ਰਿਤਸਰ ਈਸਟ ਦੇ ਲੋਕਾਂ ਵਿਚਕਾਰ ਸਿੱਧੂ ਹੁਣ ਮੁਆਫੀ ਮੰਗ ਰਹੇ ਹਨ। ਸਿੱਧੂ ਨੇ ਮੰਨਿਆ ਕਿ ਉਹ ਆਪਣੇ ਵੋਟਰਾਂ ਤੋਂ 5 ਸਾਲ ਦੂਰ ਰਹੇ। ਉਹਨਾਂ ਕਿਹਾ ਕਿ ਹੁਣ ਉਹ ਆਪਣੀ ਇਸ ਗਲਤੀ ਨੂੰ ਸੁਧਾਰਣਗੇ ਅਤੇ ਜੇਕਰ ਰਾਤ ਨੂੰ 2 ਵਜੇ ਵੀ ਹਲਕੇ ਦੇ ਲੋਕ ਫੋਨ ਕਰਨਗੇ, ਤਾਂ ਉਹ ਫੋਨ ਚੁੱਕਣਗੇ।
ਸਿੱਧੂ ਨੇ ਕਿਹਾ ਕਿ ਉਹਨਾਂ ਦੀ ਪਤਨੀ ਤਾਂ ਲੋਕਾਂ ਕੋਲ ਆਉਂਦੀ ਰਹਿੰਦੀ ਹੈ ਅਤੇ ਸਾਰਿਆਂ ਦੇ ਸੰਪਰਕ ਵਿੱਚ ਹੈ। ਇਸ ਲਈ ਉਹਨਾਂ ਨੂੰ ਮੁਆਫ਼ ਕਰਨਾ ਬਣਦਾ ਹੈ। ਸਿੱਧੂ ਨੇ ਇਮਾਨਦਾਰੀ ਨਾਲ ਕੰਮ ਕਰਨ ਲਈ ਲੋਕਾਂ ਤੋਂ ਵੋਟ ਦੇਣ ਦੀ ਅਪੀਲ ਕੀਤੀ।
ਬ੍ਰਾਹਮਣ ਸਮਾਜ ਬਾਰੇ ਦਿੱਤੇ ਬਿਆਨ ‘ਤੇ ਮੰਗੀ ਮੁਆਫੀ
ਓਧਰ ਅਕਾਲੀ ਆਗੂ ਅਨਿਲ ਜੋਸ਼ੀ ਨੂ ਕਾਲਾ ਬ੍ਰਾਹਮਣ ਕਹਿ ਕੇ ਨਿਸ਼ਾਨੇ ‘ਤੇ ਆਏ ਸਿੱਧੂ ਨੇ ਬ੍ਰਾਹਮਣ ਸਮਾਜ ਤੋਂ ਵੀ ਮੁਆਫੀ ਮੰਗੀ ਹੈ। ਸਿੱਧੂ ਦਾ ਕਹਿਣਾ ਹੈ ਕਿ ਅਨਿਲ ਜੋਸ਼ੀ ਅਹਿਸਾਨ ਫਰਾਮੋਸ਼ ਹਨ। ਕਾਲਾ ਸ਼ਬਦ ਸਿਰਫ਼ ਅਨਿਲ ਜੋਸ਼ੀ ਲਈ ਸੀ। ਬ੍ਰਾਹਮਣ ਸਮਾਜ ਲਈ ਉਹਨਾਂ ਦੇ ਦਿਲ ਵਿੱਚ ਇੱਜ਼ਤ ਹੈ। ਜੇਕਰ ਉਹਨਾਂ ਤੋਂ ਗਲਤੀ ਹੋਈ ਹੈ, ਤਾਂ ਉਹ ਆਪਣਾ ਸਾਫਾ ਧਰਤੀ ‘ਤੇ ਲਗਾ ਕੇ ਮੁਆਫੀ ਮੰਗਦੇ ਹਨ।
ਪਹਿਲੀ ਵਾਰ ਕਰੜੇ ਮੁਕਾਬਲੇ ‘ਚ ਫਸੇ ਸਿੱਧੂ
ਦਰਅਸਲ, ਨਵਜੋਤ ਸਿੰਘ ਸਿੱਧੂ ਅਤੇ ਉਹਨਾਂ ਦੀ ਪਤਨੀ ਅਜੇ ਤੱਕ ਅੰਮ੍ਰਿਤਸਰ ਤੋਂ ਅਸਾਨੀ ਨਾਲ ਜਿੱਤਦੇ ਰਹੇ ਹਨ। ਪਿਛਲੀ ਵਾਰ ਸਿੱਧੂ ਕਰੀਬ 40 ਹਜਾਰ ਵੋਟਾਂ ਦੇ ਫਰਕ ਨਾਲ ਜਿੱਤੇ ਸਨ, ਪਰ ਇਸ ਵਾਰ ਕਰੜੇ ਮੁਕਾਬਲੇ ਵਿੱਚ ਫਸ ਗਏ ਹਨ। ਉਹਨਾਂ ਨੂੰ ਅਕਾਲੀ ਆਗੂ ਬਿਕਰਮ ਮਜੀਠੀਆ ਤੋਂ ਕਰੜੀ ਟੱਕਰ ਮਿਲ ਰਹੀ ਹੈ ਅਤੇ ਸਿੱਧੂ ਪੂਰੇ ਪੰਜਾਬ ਵਿੱਚ ਪ੍ਰਚਾਰ ਨਾ ਕਰਕੇ ਸਿਰਫ਼ ਆਪਣੇ ਹਲਕੇ ਵਿੱਚ ਸੀਮਤ ਹਨ ਅਤੇ ਗਲੀ-ਗਲੀ ਘੁੰਮ ਕੇ ਵੋਟ ਮੰਗ ਰਹੇ ਹਨ।
