ਬਿਓਰੋ। ‘ਆਪ’ ਕਨਵੀਨਰ ਅਰਵਿੰਦ ਕੇਜਰੀਵਾਲ ਦੇ ਜਿਨ੍ਹਾਂ ਐਲਾਨਾਂ ਨੂੰ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਲੌਲੀਪੌਪ ਦੱਸਦੇ ਰਹੇ, ਹੁਣ ਚੋਣ ਦੰਗਲ ਵਿੱਚ ਉਹ ਖੁਦ ਵੀ ਅਜਿਹੀ ਐਲਾਨਾਂ ਜ਼ਰੀਏ ਸਿਆਸੀ ਦਾਅ ਖੇਡਣ ਲੱਗੇ ਹਨ। ਭਦੌੜ ਰੈਲੀ ਵਿੱਚ ਸਿੱਧੂ ਨੇ ਮਹਿਲਾਵਾਂ ‘ਤੇ ਦਾਅ ਖੇਡ ਦਿੱਤਾ ਅਤੇ ਚੁਣਾਵੀ ਪਿਟਾਰਾ ਖੋਲ੍ਹਦੇ ਹੋਏ ਇੱਕ ਤੋਂ ਬਾਅਦ ਇੱਕ ਕਈ ਐਲਾਨ ਕੀਤੇ।
- ਕਾਂਗਰਸ ਸਰਕਾਰ ਬਣਨ ‘ਤੇ ਹਰ ਘਰੇਲੂ ਮਹਿਲਾ ਨੂੰ 2-2 ਹਜ਼ਾਰ ਰੁਪਏ ਪ੍ਰਤੀ ਮਹੀਨਾ ਮਿਲਣਗੇ।
- ਸਾਲ ਵਿੱਚ 8 ਗੈਸ ਸਲੰਡਰ ਮੁਫ਼ਤ ਮਿਲਣਗੇ। ਹਰ ਸਵਾ ਮਹੀਨੇ ਬਾਅਦ ਉਨ੍ਹਾਂ ਨੂੰ ਮੁਫ਼ਤ ਗੈਸ ਸਲੰਡਰ ਮਿਲੇਗਾ।
- ਮਹਿਲਾਵਾਂ ਦੇ ਨਾਂਅ ‘ਤੇ ਪ੍ਰਾਪਰਟੀ ਦੀ ਰਜਿਸਟਰੀ ਪੂਰੀ ਤਰ੍ਹਾਂ ਨਾਲ ਮੁਫ਼ਤ ਹੋਵੇਗੀ।
- ਪੰਜਵੀਂ ਪਾਸ ਵਿਦਿਆਰਥਣਾਂ ਨੂੰ 5 ਹਜ਼ਾਰ ਰੁਪਏ ਦਿੱਤੇ ਜਾਣਗੇ।
- 10ਵੀਂ ਪਾਸ ਵਿਦਿਆਰਥਣਾਂ ਨੂੰ 10 ਹਜ਼ਾਰ ਰੁਪਏ ਦਿੱਤੇ ਜਾਣਗੇ।
- ਬਾਰ੍ਹਵੀਂ ਪਾਸ ਵਿਦਿਆਰਥਣਾਂ ਨੂੰ 20 ਹਜ਼ਾਰ ਰੁਪਏ ਦਿੱਤੇ ਜਾਣਗੇ।
- ਕਾਲਜ ਪਾਸ ਕਰਨ ‘ਤੇ ਸਰਕਾਰ ਕੁੜੀਆਂ ਨੂੰ ਸਕੂਟੀ ਦੇਵੇਗੀ।
- ਹਰ ਪਿੰਡ ਵਿੱਚ ਮਹਿਲਾ ਕਮਾਂਡੋ ਬਟਾਲੀਅਨ ਬਣੇਗੀ, ਜੋ ਉੱਥੋਂ ਦੀ ਕੁੜੀਆਂ ਦੀ ਸੁਰੱਖਿਆ ਕਰੇਗੀ
ਇਸ ਤੋਂ ਪਹਿਲਾਂ ਆਮ ਆਦਮੀ ਪਾਰਟੀ ਨੇ ਸਰਕਾਰ ਬਣਨ ‘ਤੇ ਹਰ ਮਹਿਲਾ ਨੂੰ ਇੱਕ-ਇੱਕ ਹਜ਼ਾਰ ਰੁਪਏ ਦੇਣ ਦਾ ਐਲਾਨ ਕੀਤਾ ਸੀ। ਸਿੱਧੂ ਇਸ ਨੂੰ ਲੌਲੀਪੌਪ ਅਤੇ ਭੀਖ ਦੱਸ ਕੇ ਕਹਿੰਦੇ ਰਹੇ ਕਿ ‘ਆਪ’ ਝੂਠ ਬੋਲ ਰਹੀ ਹੈ, ਪਰ ਉਹ ਤਾਂ ਖੁਦ ਇਸ ਰਸਤੇ ਚੱਲ ਪਏ ਹਨ। ਸਿੱਧੂ ਮੁਤਾਬਕ, ਪੰਜਾਬ ਵਿੱਚ ਮਾਫੀਆ ਦੀ ਜੇਬ ‘ਚੋਂ ਪੈਸਾ ਕੱਢ ਕੇ ਉਹ ਮਹਿਲਾਵਾਂ ਨਾਲ ਕੀਤੇ ਵਾਅਦੇ ਪੂਰੇ ਕਰਨਗੇ।
Address from Bhadaur https://t.co/nwZwRsFlOi
— Navjot Singh Sidhu (@sherryontopp) January 3, 2022
‘ਆਪ’ ਨੇ ਸਿੱਧੂ ਦੇ ਐਲਾਨਾਂ ‘ਤੇ ਕੱਸਿਆ ਤੰਜ
ਸਿੱਧੂ ਵੱਲੋਂ ਮਹਿਲਾਵਾਂ ਲਈ ਕੀਤੇ ਨਵੇਂ ਐਲਾਨਾਂ ‘ਤੇ ਆਮ ਆਦਮੀ ਪਾਰਟੀ ਪੰਜਾਬ ਦੇ ਸਹਿ-ਇੰਚਾਰਜ ਰਾਘਵ ਚੱਡਾ ਨੇ ਤੰਜ ਕਸਿਆ। ਉਨ੍ਹਾਂ ਕਿਹਾ ਕਿ ਸਾਈਕਲ ਦਾ ਵੀ ਕੋਈ ਸਟੈਂਡ ਹੁੰਦਾ ਹੈ, ਪਰ ਸਿੱਧੂ ਦਾ ਨਹੀਂ ਹੈ। ਰਾਘਵ ਚੱਢਾ ਨੇ ਸਿੱਧੂ ਦੇ ਨਵੇਂ-ਪੁਰਾਣੇ ਵੀਡੀਓ ਟਵੀਟ ਕੀਤੇ, ਜਿਸ ਵਿੱਚ ਪਹਿਲਾਂ ਸਿੱਧੂ ਕਹਿ ਰਹੇ ਹਨ ਕਿ ਆਮ ਆਦਮੀ ਪਾਰਟੀ ਮਹਿਲਾਵਾਂ ਨੂੰ ਭਿਖਾਰੀ ਸਮਝਦੀ ਹੈ। ਇਸਦੇ ਨਾਲ ਹੀ ਨਵੇਂ ਵੀਡੀਓ ਵਿੱਚ ਉਹ ਖੁਦ ਹੀ ਮਹਿਲਾਵਾਂ ਨੂੰ ਰੁਪਏ ਦੇਣ ਦਾ ਐਲਾਨ ਕਰ ਰਹੇ ਹਨ।
ਕਾਂਗਰਸ ‘ਚ ਵੀ ਛਿੜ ਸਕਦਾ ਹੈ ਘਮਸਾਣ
ਦਿਲਚਸਪ ਹੈ ਕਿ ਨਵਜੋਤ ਸਿੰਘ ਸਿੱਧੂ ਨੇ ਜਿਸ ਰੈਲੀ ਵਿੱਚ ਇਹ ਤਮਾਮ ਐਲਾਨ ਕੀਤੇ, ਉਸ ਵਿੱਚ ਕਾਂਗਰਸ ਦਾ ਕੋਈ ਵੀ ਵੱਡਾ ਲੀਡਰ ਮੌਜੂਦ ਨਹੀਂ ਸੀ। ਚੋਣ ਵਾਅਦਿਆਂ ਲਈ ਪਾਰਟੀ ਨੇ ਪ੍ਰਤਾਪ ਬਾਜਵਾ ਦੀ ਅਗਵਾਈ ਵਿੱਚ ਮੈਨੀਫੈਸਟੋ ਕਮੇਟੀ ਦਾ ਗਠਨ ਕੀਤਾ ਹੋਇਆ ਹੈ। ਅਜਿਹੇ ਵਿੱਚ ਜੇਕਰ ਸਿੱਧੂ ਚੋਣ ਰੈਲੀਆਂ ਵਿੱਚ ਇਕੱਲੇ ਹੀ ਵਾਅਦਿਆਂ ਦੀ ਝੜੀ ਲਗਾ ਰਹੇ ਹਨ, ਤਾਂ ਫਿਰ ਮੈਨੀਫੈਸਟੋ ਕਮੇਟੀ ਦਾ ਕੀ ਵਜੂਦ ਰਹਿ ਜਾਏਗਾ, ਇਹ ਸਮਝਣਾ ਮੁਸ਼ਕਿਲ ਨਹੀਂ ਹੈ।
