ਬਿਓਰੋ। ਆਪਣੇ ਸਲਾਹਕਾਰਾਂ ਦੇ ਦੇਸ਼ ਵਿਰੋਧੀ ਬਿਆਨਾਂ ਨੂੰ ਲੈ ਕੇ ਨਵਜੋਤ ਸਿੰਘ ਸਿੱਧੂ ਚਹੁੰ-ਤਰਫਾ ਘਿਰ ਗਏ ਹਨ। ਨਾ ਸਿਰਫ ਵਿਰੋਧੀ, ਬਲਕਿ ਖੁਦ ਕਾਂਗਰਸ ਪਾਰਟੀ ਦੇ ਅੰਦਰੋਂ ਸਿੱਧੂ ਦੇ ਸਲਾਹਕਾਰਾਂ ਖਿਲਾਫ਼ ਅਵਾਜ਼ ਚੁੱਕੀ ਜਾ ਰਹੀ ਹੈ। ਪਰ ਸਿੱਧੂ ਫਿਲਹਾਲ ਖਾਮੋਸ਼ ਹਨ। ਉਹਨਾਂ ਵੱਲੋਂ ਹਾਲੇ ਤੱਕ ਇਸ ‘ਤੇ ਕੋਈ ਸਪੱਸ਼ਟੀਕਰਨ ਨਹੀਂ ਆਇਆ ਹੈ।
ਹਾਲਾਂਕਿ ਲਗਾਤਾਰ ਬਿਆਨਬਾਜੀ ਕਾਰਨ ਫਜੀਹਤ ਤੋਂ ਬਾਅਦ ਨਵਜੋਤ ਸਿੰਘ ਸਿੱਧੂ ਨੇ ਆਪਣੇ ਦੋਵੇਂ ਸਲਾਹਕਾਰਾਂ-ਮਾਲਵਿੰਦਰ ਮਾਲੀ ਅਤੇ ਡਾ. ਪਿਆਰੇ ਲਾਲ ਗਰਗ ਨੂੰ ਸੋਮਵਾਰ ਨੂੰ ਪਟਿਆਲਾ ਸੱਦਿਆ। ਇਥੇ ਸਿੱਧੂ ਦੇ ਨਾਲ ਦੋਵਾਂ ਦੀ ਕਰੀਬ 4 ਘੰਟਿਆਂ ਤੱਕ ਮੀਟਿੰਗ ਹੋਈ।
ਮੈਂ ਸਹੀ ਨੂੰ ਸਹੀ, ਗਲਤ ਨੂੰ ਗਲਤ ਕਹਾਂਗਾ- ਪਿਆਰੇ ਲਾਲ
ਨਵਜੋਤ ਸਿੰਘ ਸਿੱਧੂ ਦੇ ਨਾਲ ਬੈਠਕ ਤੋਂ ਬਾਅਦ ਗਰਗ ਨੇ ਕਿਹਾ, “ਉਹ ਮੇਰੀ ਸਲਾਹ ਨਹੀਂ, ਨਿੱਜੀ ਮਸ਼ਵਰਾ ਸੀ। ਮੈਂ ਸਹੀ ਨੂੰ ਸਹੀ ਅਤੇ ਗਲਤ ਨੂੰ ਗਲਤ ਕਹਿੰਦਾ ਰਹਾਂਗਾ। ਫਿਰ ਵੀ ਮੈਂ ਪੰਜਾਬ ਦੇ ਵਿਕਾਸ ਦੀ ਗੱਲ ਕਰਦਾ ਰਹਾਂਗਾ।”
ਨਰਮ ਪਏ ਮਾਲਵਿੰਦਰ ਮਾਲੀ ਦੇ ਤੇਵਰ
ਓਧਰ, ਮਾਲਵਿੰਦਰ ਮਾਲੀ ਨੇ ਕਿਹਾ, “ਸਾਰਿਆਂ ਨੂੰ ਆਪਣੀ ਗੱਲ ਕਹਿਣ ਦਾ ਹੱਕ ਹੈ। ਮੈਨੂੰ ਵੀ ਗੱਲ ਰੱਖਣ ਦਾ ਹੱਕ ਹੈ ਅਤੇ ਕੋਈ ਮੇਰੇ ਵਿਚਾਰਾਂ ਦੀ ਅਲੋਚਨਾ ਜਾਂ ਸੁਝਾਅ ਦਿੰਦਾ ਹੈ, ਤਾਂ ਮੈਂ ਉਸਦਾ ਵੀ ਸਨਮਾਨ ਕਰਦਾ ਹਾਂ। ਜੇਕਰ ਸਲਾਹਕਾਰ ਦੇ ਤੌਰ ‘ਤੇ ਮੈਂ ਨਵਜੋਤ ਸਿੱਧੂ ਨੂੰ ਸਲਾਹ ਦਿੰਦਾ ਹਾਂ, ਤਾਂ ਉਹਨਾਂ ਨੂੰ ਵੀ ਪੂਰਾ ਹੱਕ ਹੈ ਕਿ ਉਹ ਮੈਨੂੰ ਕੋਈ ਸੁਝਾਅ ਦੇਣ।”
ਹਾਈਕਮਾਂਡ ਨੇ ਦਿੱਤੇ ਕਾਰਵਾਈ ਦੇ ਸੰਕੇਤ
ਪੰਜਾਬ ਕਾਂਗਰਸ ਇੰਚਾਰਜ ਹਰੀਸ਼ ਰਾਵਤ ਨੇ ਸਿੱਧੂ ਦੇ 2 ਸਲਾਹਕਾਰਾਂ ਦੀਆਂ ਟਿੱਪਣੀਆਂ ਨੂੰ ਲੈ ਕੇ ਖੜ੍ਹੇ ਹੋਏ ਵਿਵਾਦ ‘ਤੇ ਕਿਹਾ ਕਿ ਇਹ ਲੋਕ ਪਾਰਟੀ ਵੱਲੋਂ ਨਿਯੁਕਤ ਨਹੀਂ ਕੀਤੇ ਗਏ, ਪਰ ਜੇਕਰ ਦੋਸ਼ੀ ਪਾਏ ਜਾਂਦੇ ਹਨ ਤਾਂ ਉਚਿਤ ਕਾਰਵਾਈ ਕੀਤੀ ਜਾਵੇਗੀ। ਰਾਵਤ ਮੁਤਾਬਕ, ਉਹਨਾਂ ਦੀ ਇਸ ਬਾਰੇ ਸਿੱਧੂ ਨਾਲ ਗੱਲ ਵੀ ਹੋਈ ਹੈ ਅਤੇ ਸਿੱਧੂ ਨੇ ਕਿਹਾ ਹੈ ਕਿ ਉਹਨਾਂ ਦੇ ਸਲਾਹਕਾਰਾਂ ਦੇ ਬਿਆਨਾਂ ਨੂੰ ਤੋੜ-ਮਰੋੜ ਕੇ ਪੇਸ਼ ਕੀਤਾ ਜਾ ਰਿਹਾ ਹੈ। ਹਾਲਾਂਕਿ ਨਾਲ ਹੀ ਉਹਨਾਂ ਕਿਹਾ ਕਿ ਉਹ ਆਪਣੇ ਪੱਧਰ ‘ਤੇ ਇਸ ਪੂਰੇ ਮਾਮਲੇ ਦੀ ਜਾਂਚ ਕਰਨਗੇ ਅਤੇ ਸੱਚਾਈ ਦਾ ਪਤਾ ਲਾਉਣਗੇ।
ਕਸ਼ਮੀਰ ਭਾਰਤ ਦਾ ਅਨਿੱਖੜਵਾਂ ਅੰਗ- ਰਾਵਤ
ਹਰੀਸ਼ ਰਾਵਤ ਨੇ ਇਹ ਵੀ ਸਪੱਸ਼ਟ ਕੀਤਾ ਕਿ ਉਹਨਾਂ ਦੀ ਪਾਰਟੀ ਦੀ ਹਮੇਸ਼ਾ ਤੋਂ ਇਹ ਰਾਏ ਰਹੀ ਹੈ ਅਤੇ ਅੱਜ ਵੀ ਹੈ ਕਿ ਜੰਮੂ-ਕਸ਼ਮੀਰ ਭਾਰਤ ਦਾ ਅਨਿੱਖੜਵਾਂ ਅੰਗ ਹੈ। ਅਤੇ ਕਾਂਗਰਸ ਪਾਰਟੀ ਕਿਸੇ ਦੇਸ਼ ਵਿਰੋਧੀ ਸੋਚ ਦਾ ਸਮਰਥਨ ਨਹੀਂ ਕਰਦੀ।
ਵਿਵਾਦਤ ਬਿਆਨ ‘ਚ ਮਾਲੀ ਨੇ ਕੀ ਕਿਹਾ ਸੀ?
ਦਰਅਸਲ, ਨਵਜੋਤ ਸਿੱਧੂ ਦੇ ਸਲਾਹਕਾਰਾਂ ‘ਚੋਂ ਇੱਕ ਮਾਲਵਿੰਦਰ ਸਿੰਘ ਮਾਲੀ ਨੇ ਅਫਗਾਨਿਸਤਾਨ ‘ਤੇ ਤਾਲਿਬਾਨ ਦੇ ਕਬਜੇ ਦਾ ਸਵਾਗਤ ਕੀਤਾ ਸੀ। ਇਸ ਤੋਂ ਬਾਅਦ ਮਾਲੀ ਨੇ ਕਸ਼ਮੀਰ ਨੂੰ ਇੱਕ ਵੱਖਰਾ ਦੇਸ਼ ਦੱਸਦੇ ਹੋਏ ਕਿਹਾ ਸੀ ਕਿ ਭਾਰਤ ਅਤੇ ਪਾਕਿਸਤਾਨ ਨੇ ਉਸ ‘ਤੇ ਨਜਾਇਜ਼ ਕਬਜਾ ਕੀਤਾ ਹੋਇਆ ਹੈ। ਉਹਨਾਂ ਕਿਹਾ ਸੀ ਕਿ ਕਸ਼ਮੀਰ ਨੂੰ ਅਜਾਦ ਕਰ ਦੇਣਾ ਚਾਹੀਦਾ ਹੈ।
ਪਿਆਰੇ ਲਾਲ ਗਰਗ ਨੇ ਪਾਕਿਸਤਾਨ ਵਿਰੋਧ ‘ਤੇ ਚੁੱਕੇ ਸਨ ਸਵਾਲ
ਸਿੱਧੂ ਦੇ ਦੂਜੇ ਸਲਾਹਕਾਰ ਪਿਆਰੇ ਲਾਲ ਗਰਗ ਨੇ ਵੀ ਕੈਪਟਨ ਦੀ ਪਾਕਿਸਤਾਨ ਵਿਰੋਧੀ ਟਿੱਪਣੀਆਂ ‘ਤੇ ਸਵਾਲ ਚੁੱਕੇ ਸਨ। ਗਰਗ ਨੇ ਕਿਹਾ ਸੀ ਕਿ ਇਸ ਨਾਲ ਪੰਜਾਬ ਦੇ ਹਿੱਤ ਪ੍ਰਭਾਵਿਤ ਹੋ ਰਹੇ ਹਨ। ਸਿੱਧੂ ਦੇ ਦੋਵੇਂ ਹੀ ਸਲਾਹਕਾਰਾਂ ਦੀਆਂ ਇਹਨਾਂ ਟਿੱਪਣੀਆਂ ਤੋਂ ਬਾਅਦ ਸਿਆਸੀ ਮਾਹੌਲ ਗਰਮਾ ਗਿਆ ਸੀ।
