ਬਿਓਰੋ। ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਦੀ ਪਿਛਲੇ ਪੰਜ ਸਾਲਾਂ ਵਿਚ ਕਮਾਈ ਘੱਟ ਹੋਈ ਹੈ। ਸਿੱਧੂ ਨੇ ਸ਼ਨੀਵਾਰ ਨੂੰ ਅੰਮ੍ਰਿਤਸਰ ਈਸਟ ਵਿਧਾਨ ਸਭਾ ਹਲਕੇ ਤੋਂ ਆਪਣਾ ਨਾਮਜ਼ਦਗੀ ਪੱਤਰ ਦਾਖ਼ਲ ਕੀਤਾ। ਉਨ੍ਹਾਂ ਨੇ ਇਸ ਵਿੱਚ ਆਪਣੀ ਜਾਇਦਾਦ ਦਾ ਜੋ ਬਿਓਰਾ ਦਿੱਤਾ ਹੈ, ਉਸ ਤੋਂ ਪਤਾ ਲੱਗਦਾ ਹੈ ਕਿ ਸਿੱਧੂ ਦੀ ਕਮਾਈ ਵਿੱਚ ਗਿਰਾਵਟ ਆਈ ਹੈ।
2017 ਵਿੱਚ ਦਿੱਤੇ ਗਏ ਐਫੀਡੇਵਿਟ ਵਿੱਚ ਨਵਜੋਤ ਸਿੰਘ ਸਿੱਧੂ ਦੀ ਆਮਦਨ 2.35 ਕਰੋੜ ਰੁਪਏ ਸੀ। ਉਸ ਵਕਤ ਉਹ ਰੋਜ਼ਾਨਾ ਛੋਟੇ ਪਰਦੇ ਦੇ ਚਰਚਿਤ ਸ਼ੋਅ ‘ਦ ਕਪਿਲ ਸ਼ਰਮਾ ਸ਼ੋਅ’ ਵਿੱਚ ਨਜ਼ਰ ਆਉਂਦੇ ਸਨ। ਹੁਣ ਉਨ੍ਹਾਂ ਦੀ ਆਮਦਨ ਸਿਰਫ਼ 22.58 ਲੱਖ ਅਤੇ ਪਤਨੀ ਦੀ 50 ਲੱਖ ਤੋਂ ਘੱਟ ਹੋ ਕੇ 26.56 ਲੱਖ ਰੁਪਏ ਹੋ ਗਈ ਹੈ।
ਅਚੱਲ ਜਾਇਦਾਦ ਦੀ ਗੱਲ ਕਰੀਏ, ਤਾਂ ਉਸਦੀ ਮਾਰਕਿਟ ਵੈਲਿਊ ਕਾਫੀ ਵੱਧ ਗਈ ਹੈ। ਸਿੱਧੂ ਦੀ ਗੱਡੀਆਂ ਦੀ ਵੈਲਿਊ ਵੀ ਘੱਟ ਨਹੀਂ ਹੋਈ ਹੈ। ਉਹਨਾਂ ਕੋਲ 2 ਲੈਂਡ ਕਰੂਜ਼ਰ ਹਨ, ਇਹਨਾਂ ‘ਚੋਂ ਇੱਕ ਦੀ ਵੈਲਿਊ 11 ਲੱਖ ਅਤੇ ਦੂਜੀ ਦੀ 1.08 ਕਰੋੜ ਰੁਪਏ ਹੈ। ਇੱਕ ਫਾਰਚੂਨਰ ਕਾਰ ਵੀ ਹੈ, ਜਿਸਦੀ ਕੀਮਤ 11.43 ਲੱਖ ਰੁਪਏ ਹੈ।
ਘੜੀਆਂ ਦਾ ਸ਼ੌਂਕ ਰਖਦੇ ਹਨ ਨਵਜੋਤ ਸਿੱਧੂ
ਨਵਜੋਤ ਸਿੱਧੂ ਘੜੀਆਂ ਦਾ ਵੀ ਸ਼ੌਂਕ ਰਖਦੇ ਹਨ। ਉਹਨਾਂ ਦੇ ਕੋਲ 44 ਲੱਖ ਦੀਆਂ ਘੜੀਆਂ ਹਨ। 2017 ਤੋਂ 2022 ਤੱਕ ਉਹਨਾਂ ਨੇ ਕੋਈ ਨਵੀਂ ਘੜੀ ਨਹੀਂ ਖਰੀਦੀ ਹੈ। ਇਸ ਤੋਂ ਇਲਾਵਾ ਉਹਨਾਂ ਕੋਲ ਰੱਖੀ ਜਵੈਲਰੀ ਦੀ ਕੀਮਤ 2017 ਵਿੱਚ 15 ਲੱਖ ਤੋਂ ਵੱਧ ਕੇ ਇਸ ਸਾਲ 30 ਲੱਖ ਅਤੇ ਪਤਨੀ ਦੀ ਜਵੈਲਰੀ 36.36 ਲੱਖ ਰੁਪਏ ਤੋਂ ਵੱਧ ਕੇ 70 ਲੱਖ ਰੁਪਏ ਹੋ ਗਈ ਹੈ।
ਘਰ ਦੀ ਵੈਲਿਊ 3.11 ਕਰੋੜ ਰੁਪਏ ਵਧੀ
ਨਵਜੋਤ ਸਿੱਧੂ ਦਾ ਹੋਲੀ ਸਿਟੀ ਸਥਿਤ ਘਰ ਬੇਹੱਦ ਵੱਡਾ ਹੈ। ਇਹ ਘਰ 51146 ਸਕੁਏਅਰ ਯਾਰਡ ਵਿੱਚ ਬਣਿਆ ਹੈ। ਇਸ ਨੂੰ ਬਣਾਉਣ ਵਿੱਚ ਹੀ 28.50 ਕਰੋੜ ਰੁਪਏ ਖਰਚ ਹੋਏ ਹਨ। 2017 ਵਿੱਚ ਇਸ ਘਰ ਦੀ ਵੈਲਿਊ 31.05 ਕਰੋੜ ਸੀ, ਹੁਣ ਇਸ ਘਰ ਦੀ ਵੈਲਿਊ 34.16 ਕਰੋੜ ਰੁਪਏ ਪਹੁੰਚ ਚੁੱਕੀ ਹੈ।
ਸਿੱਧੂ ਨੇ ਮੁਹੂਰਤ ਨਿਕਾਲ ਕੇ ਭਰੀ ਨਾਮਜ਼ਦਗੀ
ਠੀਕ 11.15 ਵਜੇ ਨਵਜੋਤ ਸਿੱਧੂ DC ਦਫ਼ਤਰ ਪਹੁੰਚੇ ਅਤੇ ਪਲ ਭਰ ਦੀ ਦੇਰੀ ਕੀਤੇ ਬਿਨ੍ਹਾਂ ਪਰਚਾ ਦਾਖਲ ਕੀਤਾ। ਸਿੱਧੂ ਨੇ ਨਾਮਜ਼ਦਗੀ ਅਭਿਜੀਤ ਮੁਹੂਰਤ ਵਿੱਚ ਭਰੀ। ਸ਼ਨੀਵਾਰ ਨੂੰ ਅਭਿਜੀਤ ਮੁਹੂਰਤ 11 ਵਜੇ ਸ਼ੁਰੂ ਹੋਇਆ ਸੀ ਅਤੇ 12.28 ਵਜੇ ਤੱਕ ਰਿਹਾ।
