ਦਿੱਲੀ। ਸਿੰਘੂ ਬਾਰਡਰ ‘ਤੇ ਨੌਜਵਾਨ ਦੇ ਕਤਲ ਤੋਂ ਕਰੀਬ 15 ਘੰਟਿਆਂ ਬਾਅਦ ਇੱਕ ਨਿਹੰਗ ਸਿੰਘ ਨੇ ਪੁਲਿਸ ਦੇ ਸਾਹਮਣੇ ਆਤਮ-ਸਮਰਪਣ ਕਰ ਦਿੱਤਾ ਹੈ। ਕੁੰਡਲੀ ਥਾਣੇ ਤੋਂ ਪੁਲਿਸ ਦੀ ਇੱਕ ਟੀਮ ਸ਼ੁੱਕਰਵਾਰ ਸ਼ਾਮ 6 ਵਜੇ ਸਿੰਘੂ ਬਾਰਡਰ ‘ਤੇ ਨਿਹੰਗਾਂ ਦੇ ਡੇਰੇ ‘ਤੇ ਪਹੁੰਚੀ, ਜਿਸ ਦੌਰਾਨ ਸਰਬਜੀਤ ਸਿੰਘ ਨਾਮੀ ਇੱਕ ਨਿਹੰਗ ਨੇ ਪੁਲਿਸ ਦੇ ਸਾਹਮਣੇ ਸਰੰਡਰ ਕਰ ਦਿੱਤਾ।
ਸਰੰਡਰ ਦੌਰਾਨ ਨਿਹੰਗ ਸਰਬਜੀਤ ਨੇ ਕਿਹਾ ਕਿ ਬੇਅਦਬੀ ਕਰਦੇ ਜੋ ਵੀ ਦੋਸ਼ੀ ਫੜੇ ਜਾਣਗੇ, ਉਹਨਾਂ ਨੂੰ ਇਸੇ ਤਰ੍ਹਾਂ ਦੀ ਸਜਾ ਦਿੱਤੀ ਜਾਵੇਗੀ। ਸਰਬਜੀਤ ਨੇ ਕਿਹਾ ਕਿ ਉਹਨਾਂ ਨੂੰ ਸਰਕਾਰ ਅਤੇ ਕਾਨੂੰਨ ‘ਤੇ ਕੋਈ ਭਰੋਸਾ ਨਹੀਂ ਹੈ। ਦੂਜੇ ਨਿਹੰਗਾਂ ਨੇ ਵੀ ਚੇਤਾਵਨੀ ਦਿੰਦਿਆਂ ਕਿਹਾ ਕਿ ਧਰਮ ਨੂੰ ਲੈ ਕੇ ਸਿਆਸਤ ਨਾ ਕੀਤੀ ਜਾਵੇ, ਨਹੀਂ ਤਾਂ ਅੰਜਾਮ ਸਾਰਿਆਂ ਨੇ ਵੇਖ ਲਿਆ।
ਸਰੰਡਰ ਤੋਂ ਪਹਿਲਾਂ ਪਾਇਆ ਗਿਆ ਸਿਰੋਪਾ
ਸੋਨੀਪਤ ਦੇ DSP ਵੀਰੇਂਦਰ ਰਾਏ ਦੀ ਅਗਵਾਈ ਵਾਲੀ ਟੀਮ ਜਦੋਂ ਨਿਹੰਗਾਂ ਦੇ ਪੰਡਾਲ ‘ਚ ਪਹੁੰਚੀ, ਤਾਂ ਸਰਬਜੀਤ ਸਿੰਘ ਪੁਲਿਸ ਟੀਮ ਦੇ ਨਾਲ ਹੀ ਪਹਿਲਾਂ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਦਰਸ਼ਨਾਂ ਲਈ ਗਿਆ। ਇਸ ਦੌਰਾਨ ਉਥੇ ਮੌਜੂਦ ਨਿਹੰਗਾਂ ਨੇ ‘ਜੋ ਬੋਲੇ ਸੋ ਨਿਹਾਲ’ ਦੇ ਨਾਅਰੇ ਲਗਾਏ। ਇਸਦੇ ਨਾਲ ਹੀ ਸਰੰਡਰ ਤੋਂ ਪਹਿਲਾਂ ਸਰਬਜੀਤ ਸਿੰਘ ਨੂੰ ਸਿਰੋਪਾ ਪਹਿਨਾਇਆ ਗਿਆ। ਸਰੰਡਰ ਤੋਂ ਬਾਅਦ ਸਰਬਜੀਤ ਨੇ ਕਿਹਾ ਕਿ ਇਹ ਕਿਸਾਨ ਅੰਦੋਲਨ ਦਾ ਨਹੀਂ, ਬਲਕਿ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੇਅਦਬੀ ਦਾ ਮਾਮਲਾ ਹੈ।
ਮੋਰਚੇ ਦਾ ਇਸ ਨਾਲ ਕੋਈ ਲੈਣਾ-ਦੇਣਾ ਨਹੀਂ- ਸਰਬਜੀਤ
ਸਰਬਜੀਤ ਸਿੰਘ ਨੇ ਕਿਹਾ, “ਦੇਰ ਰਾਤ ਕਰੀਬ 3 ਵਜੇ ਲਖਬੀਰ ਸਿੰਘ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਨੂੰ ਚੁੱਕ ਕੇ ਲਿਜਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ। ਉਸਨੇ ਉਥੇ ਪਏ ਰੁਮਾਲਾ ਸਾਹਿਬ ਨੂੰ ਬਿਖੇਰ ਦਿੱਤਾ। ਮੈਂ ਮੌਕੇ ‘ਤੇ ਪਹੁੰਚਿਆ ਅਤੇ ਉਸ ਨੂੰ ਦਬੋਚ ਲਿਆ।“ ਇਸਦੇ ਨਾਲ ਹੀ ਸਰਬਜੀਤ ਨੇ ਕਿਹਾ ਕਿ ਕਿਸਾਨ ਮੋਰਚੇ ਦਾ ਇਸ ਘਟਨਾ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਹੈ। ਮੋਰਚਾ ਹਮੇਸ਼ਾ ਹੀ ਨਿਹੰਗਾਂ ਤੋਂ ਵੱਖ ਰਿਹਾ ਹੈ।
ਪੂਰਾ ਦਿਨ ਕੁੰਡਲੀ ਥਾਣੇ ‘ਚ IG ਨੇ ਲਾਇਆ ਡੇਰਾ
ਇਸ ਵਾਰਦਾਤ ਤੋਂ ਬਾਅਦ ਰੋਹਤਕ ਰੇਂਜ ਦੇ IG ਸੰਦੀਪ ਖਿਰਵਾਰ ਸ਼ੁੱਕਰਵਾਰ ਦੁਪਹਿਰ ਨੂੰ ਕਰੀਬ ਸਵਾ 2 ਵਜੇ ਕੁੰਡਲੀ ਥਾਣੇ ਵਿੱਚ ਪਹੁੰਚੇ ਅਤੇ ਸੋਨੀਪਤ ਦੇ DC ਤੇ SP ਨਾਲ ਪੂਰਾ ਦਿਨ ਉਥੇ ਡੇਰਾ ਲਾ ਕੇ ਬੈਠੇ ਰਹੇ। ਤਿੰਨੇ ਅਧਿਕਾਰੀ ਇਸ ਦੌਰਾਨ ਲਗਾਤਾਰ ਨਿਹੰਗਾਂ ਅਤੇ ਕਿਸਾਨ ਅੰਦੋਲਨ ਨਾਲ ਜੁੜੇ ਆਗੂਆਂ ਨਾਲ ਗੱਲਬਾਤ ਕਰਦੇ ਰਹੇ, ਤਾਂ ਜੋ ਵਾਰਦਾਤ ਵਿੱਚ ਸ਼ਾਮਲ ਲੋਕਾਂ ਦਾ ਸਰੰਡਰ ਕਰਵਾਇਆ ਜਾ ਸਕੇ। ਸ਼ਾਮ ਕਰੀਬ ਸਾਢੇ 5 ਵਜੇ ਜਦੋਂ ਨਿਹੰਗ ਸਿੰਘ ਸਰਬਜੀਤ ਸਿੰਘ ਦਾ ਸਰੰਡਰ ਕਰਵਾਉਣ ਲਈ ਤਿਆਰ ਹੋ ਗਏ, ਤਾਂ IG ਸੰਦੀਪ ਖਿਰਵਾਰ ਨੇ DSP ਵਿਰੇਂਦਰ ਰਾਓ ਦੀ ਅਗਵਾਈ ਵਿੱਚ ਪੁਲਿਸ ਟੀਮ ਨਿਹੰਗਾਂ ਦੇ ਡੇਰੇ ਵਿੱਚ ਭੇਜ ਦਿੱਤੀ।
ਵੀਡੀਓ ਦੇ ਅਧਾਰ ‘ਤੇ ਹੋਰ ਗ੍ਰਿਫ਼ਤਾਰੀਆਂ ਵੀ ਸੰਭਵ
ਜਾਣਕਾਰੀ ਮੁਤਾਬਕ, ਇਸ ਮਾਮਲੇ ਵਿੱਚ ਸਾਹਮਣੇ ਆਈਆਂ ਵੀਡੀਓਜ਼ ਦੇ ਅਧਾਰ ‘ਤੇ ਪੁਲਿਸ ਹੋਰ ਲੋਕਾਂ ਨੂੰ ਵੀ ਗ੍ਰਿਫ਼ਤਾਰ ਕਰ ਸਕਦੀ ਹੈ। ਵੀਡੀਓਜ਼ ਤੋਂ ਇਹ ਤਾਂ ਸਾਫ਼ ਹੈ ਕਿ ਇਸ ਕਤਲ ਵਿੱਚ ਇੱਕ ਨਹੀਂ, ਬਲਕਿ 2 ਜਾਂ ਉਸ ਤੋਂ ਵੱਧ ਲੋਕ ਸ਼ਾਮਲ ਸਨ। ਅਜਿਹੇ ਵਿੱਚ ਪੁਲਿਸ ਸਰਬਜੀਤ ਤੋਂ ਪੁੱਛਗਿੱਛ ਕਰਨ ਦੇ ਨਾਲ-ਨਾਲ ਵੀਡੀਓਜ਼ ਨੂੰ ਵੀ ਖੰਗਾਲ ਰਹੀ ਹੈ। ਪੁਲਿਸ ਨੇ ਇਸ ਮਾਮਲੇ ਵਿੱਚ 302 ਅਤੇ 34 IPC ਦੇ ਤਹਿਤ ਕੇਸ ਦਰਜ ਕੀਤਾ ਹੈ।
ਦੋਸ਼ੀਆਂ ਨੂੰ ਬਖਸ਼ਿਆ ਨਹੀਂ ਜਾਵੇਗਾ- CM ਖੱਟਰ
ਸਿੰਘੂ ਬਾਰਡਰ ‘ਤੇ ਵਾਪਰੀ ਇਸ ਵਾਰਦਾਤ ‘ਤੇ ਹਰਿਆਣਾ ਦੇ ਮੁੱਖ ਮੰਤਰੀ ਮਨੋਹਰ ਲਾਲ ਨੇ ਕਿਹਾ ਕਿ ਕਿਸੇ ਵੀ ਦੋਸ਼ੀ ਨੂੰ ਬਖਸ਼ਿਆ ਨਹੀਂ ਜਾਵੇਗਾ। ਕਾਨੂੰਨ ਮੁਤਾਬਕ ਸਖਤ ਕਾਰਵਾਈ ਕੀਤੀ ਜਾਵੇਗੀ। ਮੁੱਖ ਮੰਤਰੀ ਵੱਲੋਂ ਇਸ ਮਾਮਲੇ ‘ਤੇ ਚੰਡੀਗੜ੍ਹ ਵਿੱਚ ਉੱਚ ਪੱਧਰੀ ਮੀਟਿੰਗ ਵੀ ਕੀਤੀ ਗਈ, ਜਿਸ ਦੌਰਾਨ ਉਹਨਾਂ ਗ੍ਰਹਿ ਮੰਤਰੀ ਅਤੇ ਹਰਿਆਣਾ ਪੁਲਿਸ ਨੂੰ ਮਾਮਲੇ ਵਿੱਚ ਨਿਰਪੱਖ ਕਾਰਵਾਈ ਦਾ ਆਦੇਸ਼ ਦਿੱਤਾ।
