ਬਠਿੰਡਾ। ਪੰਜਾਬ ਕਾਂਗਰਸ ‘ਚ ਕਲੇਸ਼ ਦਾ ਇੱਕ ਹੋਰ ਚੈਪਟਰ ਸ਼ੁਰੂ ਹੋ ਗਿਆ ਹੈ। ਇਸ ਵਾਰ ਝਗੜਾ ਖਜ਼ਾਨਾ ਮੰਤਰੀ ਮਨਪ੍ਰੀਤ ਬਾਦਲ ਅਤੇ ਕਾਂਗਰਸ ਦੇ ਤੇਜ਼-ਤਰਾਰ ਆਗੂ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਦਾ ਹੈ। ਹਾਲਾਂਕਿ ਖਜ਼ਾਨਾ ਮੰਤਰੀ ਖੁਦ ਖਾਮੋਸ਼ ਹਨ, ਪਰ ਉਹਨਾਂ ਵੱਲੋਂ ਮੋਰਚਾ ਉਹਨਾਂ ਦੇ ਸਾਲੇ ਨੇ ਸੰਭਾਲਿਆ ਹੋਇਆ ਹੈ।
ਅਕਾਲੀ ਆਗੂ ਦੇ ਵੀਡੀਓ ਤੋਂ ਵਧੀ ਤਕਰਾਰ
ਦਰਅਸਲ, ਬਠਿੰਡਾ ਦੇ ਸਾਬਕਾ ਵਿਧਾਇਕ ਤੇ ਸੀਨੀਅਰ ਅਕਾਲੀ ਆਗੂ ਸਰੂਪ ਚੰਦ ਸਿੰਗਲਾ ਨੇ ਐਤਵਾਰ ਨੂੰ ਸੋਸ਼ਲ ਮੀਡੀਆ ‘ਤੇ ਇੱਕ ਵੀਡੀਓ ਜਾਰੀ ਕਰਕੇ ਬੰਦ ਪਏ ਥਰਮਲ ਪਲਾਂਟ ‘ਚ ਨਜਾਇਜ਼ ਮਾਈਨਿੰਗ ਹੋਣ ਦਾ ਦਾਅਵਾ ਕੀਤਾ ਸੀ। ਸਿੰਗਲਾ ਦੇ ਇਸਦੇ ਪਿੱਛੇ ਸਿੱਧੇ ਮਨਪ੍ਰੀਤ ਬਾਦਲ ਅਤੇ ਉਹਨਾਂ ਦੇ ਸਾਲੇ ਜੈਜੀਤ ਜੋਹਲ ਦਾ ਹੱਥ ਦੱਸਿਆ ਸੀ।
ਰਾਜਾ ਵੜਿੰਗ ਨੇ ਕੀਤੀ ਜਾਂਚ ਦੀ ਮੰਗ
ਅਕਾਲੀ ਦਲ ਦੇ ਆਗੂ ਦੀ ਵੀਡੀਓ ਉਸ ਵੇਲੇ ਵੱਧ ਸੁਰਖੀਆਂ ‘ਚ ਆਈ, ਜਦੋਂ ਖੁਦ ਕਾਂਗਰਸ ਦੇ ਹੀ ਵਿਧਾਇਕ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਨੇ ਨਾ ਸਿਰਫ਼ ਸ਼ੇਅਰ ਕੀਤੀ, ਬਲਕਿ ਸੀਐੱਮ ਤੋਂ ਇਸਦੀ ਜਾਂਚ ਦੀ ਮੰਗ ਕਰ ਦਿੱਤੀ। ਆਪਣੇ ਟਵੀਟ ‘ਚ ਵੜਿੰਗ ਨੇ ਲਿਖਿਆ, “ਕੈਪਟਨ ਅਮਰਿੰਦਰ ਸਿੰਘ ਜੀ, ਕਿਰਪਾ ਕਰਕੇ ਉਹਨਾਂ ਲੋਕਾਂ ਖਿਲਾਫ਼ ਕਾਰਵਾਈ ਕਰੋ, ਜੋ ਉਸਦੇ ਪਿੱਛੇ ਹਨ। ਇਹ ਲੋਕ ਕਾਂਗਰਸ ਨੂੰ ਹੇਠਾਂ ਲਿਜਾਣ ਦਾ ਕੰਮ ਕਰ ਰਹੇ ਹਨ।”
.@Capt_amarinder ji Please take action against the people who are behind all this .
These are the people who are pulling Congress down pic.twitter.com/gqjovgxq0U— Amarinder Singh Raja (@RajaBrar_INC) June 27, 2021
ਵੜਿੰਗ ਨੂੰ ਮਨਪ੍ਰੀਤ ਦੇ ਸਾਲੇ ਦਾ ਜਵਾਬ
ਰਾਜਾ ਵੜਿੰਗ ਨੇ ਮਾਈਨਿੰਗ ਮਾਮਲੇ ਦੀ ਜਾਂਚ ਮੰਗੀ, ਤਾਂ ਮਨਪ੍ਰੀਤ ਬਾਦਲ ਦੇ ਸਾਲੇ ਨੇ ਇੱਕ ਪੁਰਾਣੇ ਕੇਸ ‘ਚ ਵੜਿੰਗ ਨੂੰ ਘੇਰ ਲਿਆ। ਮਸਲਾ ਰਾਜਾ ਵੜਿੰਗ ਦੇ ਸਾਲੇ ਨਾਲ ਜੁੜਿਆ ਹੈ। ਇੱਕ ਬਿਜਲੀ ਠੇਕੇਦਾਰ ਦੇ ਸੁਸਾਈਡ ਕੇਸ ‘ਚ ਵੜਿੰਗ ਦੇ ਸਾਲੇ ਦਾ ਨਾੰਅ ਆਇਆ ਸੀ। ਪੁਲਿਸ ‘ਤੇ ਉਹਨਾਂ ‘ਤੇ ਕੇਸ ਵੀ ਦਰਜ ਕੀਤਾ ਸੀ, ਪਰ ਉਸ ਤੋਂ ਬਾਅਦ ਮਾਮਲਾ ਠੰਢੇ ਬਸਤੇ ਪੈ ਗਿਆ। ਪਰ ਹੁਣ ਜੌਹਲ ਨੇ ਇਸ ਮਾਮਲੇ ‘ਚ ਜਾਂਚ ਦੀ ਮੰਗ ਕਰਦੇ ਹੋਏ ਫਿਰ ਹਵਾ ਦੇ ਦਿੱਤੀ।
ਜੌਹਲ ਨੇ ਲਿਖਿਆ, “ਦੁੱਧ ਦਾ ਦੁੱਧ ਤੇ ਪਾਣੀ ਦਾ ਪਾਣੀ ਹੋਣਾ ਚਾਹੀਦਾ ਹੈ। ਕੈਪਟਨ ਅਮਰਿੰਦਰ ਸਿੰਘ ਜੀ, ਜਿਹਨਾਂ ਲੋਕਾਂ ਉੱਪਰ ਇਹ ਇਲਜ਼ਾਮ ਹਨ ਉਹਨਾਂ ਦੀ ਜਾਂਚ ਹੋਣੀ ਚਾਹੀਦੀ ਹੈ ਅਤੇ ਦੋਸ਼ੀਆਂ ਉੱਪਰ ਬਣਦੀ ਕਾਰਵਾਈ ਹੋਣੀ ਚਾਹੀਦੀ ਹੈ।”
ਵੜਿੰਗ ਤੇ ਮਨਪ੍ਰੀਤ ਬਾਦਲ ਦੀ ਤਕਰਾਰ ਨਵੀਂ ਨਹੀਂ !
ਜ਼ਿਕਰਯੋਗ ਹੈ ਕਿ ਰਾਜਾ ਵੜਿੰਗ ਅਤੇ ਮਨਪ੍ਰੀਤ ਬਾਦਲ ਵਿਚਕਾਰ ਤਕਰਾਰ ਦੀਆਂ ਖ਼ਬਰਾਂ ਲੰਮੇ ਵਕਤ ਤੋਂ ਚੱਲ ਰਹੀਆਂ ਹਨ। 2019 ਦੀਆਂ ਲੋਕ ਸਭਾ ਚੋਣਾਂ ‘ਚ ਬਠਿੰਡਾ ‘ਚ ਵੜਿੰਗ ਦੀ ਹਾਰ ਦੇ ਬਾਅਦ ਤੋਂ ਦੋਵਾਂ ਦੇ ਰਿਸ਼ਤੇ ਠੀਕ ਨਹੀਂ ਦੱਸੇ ਜਾਂਦੇ..ਤੇ ਜਿਸ ਅੰਦਾਜ਼ ‘ਚ ਵੜਿੰਗ, ਮਨਪ੍ਰੀਤ ਬਾਦਲ ਨੂੰ ਘੇਰਨ ‘ਚ ਲੱਗੇ ਹਨ, ਉਸ ਤੋਂ ਕਾਫੀ ਕੁਝ ਸਾਫ਼ ਨਜ਼ਰ ਆ ਰਿਹਾ ਹੈ।
ਵੈਸੇ, ਇਹ ਪਹਿਲਾ ਮੌਕਾ ਨਹੀਂ ਜਦੋਂ ਵੜਿੰਗ ਨੇ ਮਨਪ੍ਰੀਤ ਬਾਦਲ ਦੇ ਖਿਲਾਫ਼ ਮੋਰਚਾ ਖੋਲ੍ਹਿਆ ਹੋਵੇ। ਇਸ ਤੋਂ ਪਹਿਲਾਂ ਪਿਛਲੇ ਮਹੀਨੇ ਜਦੋਂ ਬਠਿੰਡਾ ਦੇ ਇੱਕ ਸੀਨੀਅਰ ਕਾਂਗਰਸੀ ਆਗੂ ਮਨਪ੍ਰੀਤ ਦੀ ਸ਼ਿਕਾਇਤ ਲੈ ਕੇ ਚੰਡੀਗੜ੍ਹ ਪਹੁੰਚੇ ਸਨ, ਤਾਂ ਵੜਿੰਗ ਨੇ ਖੁੱਲ੍ਹੇ ਤੌਰ ‘ਤੇ ਉਹਨਾਂ ਦਾ ਸਾਥ ਦਿੱਤਾ ਸੀ।
ਵੜਿੰਗ ਦੀ ਸੀਟ ‘ਤੇ ਮਨਪ੍ਰੀਤ ਦੀ ਨਜ਼ਰ
ਦੋਵੇਂ ਆਗੂਆਂ ਦੇ ਰਿਸ਼ਤਿਆਂ ‘ਚ ਖਟਾਸ ਦਾ ਇੱਕ ਕਾਰਨ ਗਿੱਦੜਬਾਹਾ ਦੀ ਸੀਟ ਵੀ ਦੱਸੀ ਜਾਂਦੀ ਹੈ। ਚਰਚਾ ਹੈ ਕਿ ਮਨਪ੍ਰੀਤ ਬਾਦਲ 2022 ‘ਚ ਗਿੱਦੜਬਾਹਾ ਤੋਂ ਆਪਣੇ ਬੇਟੇ ਨੂੰ ਚੋਣ ਲੜਵਾਉਣਾ ਚਾਹੁੰਦੇ ਹਨ। ਪਿਛਲੇ ਦਿਨੀਂ ਗਿੱਦੜਬਾਹਾ ‘ਚ ਉਹਨਾਂ ਦੇ ਬੇਟੇ ਦੇ ਵੱਡੇ-ਵੱਡੇ ਹੋਰਡਿੰਗਜ਼ ਵੀ ਨਜ਼ਰ ਆਏ ਸਨ। ਦੱਸ ਦਈਏ ਕਿ ਕਾਂਗਰਸ ‘ਚ ਸ਼ਾਮਲ ਹੋਣ ਤੋਂ ਪਹਿਲਾਂ ਮਨਪ੍ਰੀਤ ਬਾਦਲ ਗਿੱਦੜਬਾਹਾ ਤੋਂ ਹੀ ਚੋਣ ਲੜਦੇ ਸਨ।
