ਚੰਡੀਗੜ੍ਹ। ਪੰਜਾਬ ਦੇ ਸੀਐੱਮ ਵਜੋਂ ਕਾਰਜਭਾਰ ਸੰਭਾਲਣ ਦੇ ਪਹਿਲੇ ਦਿਨ ਜਦੋਂ ਚਰਨਜੀਤ ਸਿੰਘ ਚੰਨੀ ਮੀਡੀਆ ਨਾਲ ਮੁਖਾਤਿਬ ਹੋਣ ਲੱਗੇ, ਤਾਂ ਬੇਹੱਦ ਭਾਵੁਕ ਅੰਦਾਜ਼ ਵਿੱਚ ਖੁਦ ਨੂੰ ਇੱਕ ਆਮ ਇਨਸਾਨ ਅਤੇ ਗਰੀਬਾਂ ਦਾ ਮੁੱਖ ਮੰਤਰੀ ਦੱਸਿਆ ਸੀ। ਅਜਿਹੇ ਵਿੱਚ ਇੱਕ ਚਾਰਟਰਡ ਪਲੇਨ ਜ਼ਰੀਏ ਉਹਨਾਂ ਦਾ ਦਿੱਲੀ ਦੌਰਾ ਵਿਰੋਧੀ ਪਾਰਟੀਆਂ ਨੂੰ ਰਾਸ ਨਹੀਂ ਆ ਰਿਹਾ।
ਦਰਅਸਲ, ਚੰਨੀ ਆਪਣੀ ਕੈਬਨਿਟ ਦੇ ਵਿਸਥਾਰ ਲਈ ਵਿਚਾਰ-ਚਰਚਾ ਕਰਨ ਦੇ ਮੰਤਵ ਹੇਠ ਸੂਬਾ ਕਾਂਗਰਸ ਇੰਚਾਰਜ ਹਰੀਸ਼ ਰਾਵਤ ਨੂੰ ਮਿਲਣ ਲਈ ਦਿੱਲੀ ਪਹੁੰਚੇ ਹਨ। ਦਿੱਲੀ ਲਈ ਰਵਾਨਾ ਹੋਣ ਤੋਂ ਪਹਿਲਾਂ ਸੂਬਾ ਕਾਂਗਰਸ ਪ੍ਰਧਾਨ ਨਵਜੋਤ ਸਿੱਧੂ ਨੇ ਇੱਕ ਟਵੀਟ ਕੀਤਾ, ਜਿਸ ਵਿੱਚ ਸਿੱਧੂ, ਚੰਨੀ ਅਤੇ ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ ਦੇ ਨਾਲ ਖੜ੍ਹੇ ਨਜ਼ਰ ਆ ਰਹੇ ਹਨ। ਇਸ ਫੋਟੋ ਵਿੱਚ ਸਾਰੇ ਆਗੂ ਚਾਰਟਰਡ ਪਲੇਨ ਦੇ ਅੱਗੇ ਖੜ੍ਹੇ ਹਨ। ਯਾਨੀ ਇਸੇ ਚਾਰਟਰਡ ਪਲੇਨ ਰਾਹੀਂ ਉਹ ਦਿੱਲੀ ਪਹੁੰਚੇ ਹਨ।
In line of duty !! pic.twitter.com/ljxxz5UeF9
— Navjot Singh Sidhu (@sherryontopp) September 21, 2021
ਸਿੱਧੂ ਵੱਲੋਂ ਟਵੀਟ ਕੀਤੀ ਇਸੇ ਫੋਟੋ ਨੂੰ ਅਧਾਰ ਬਣਾ ਕੇ ਵਿਰੋਧੀਆਂ ਨੇ ਹਮਲੇ ਬੋਲਣੇ ਸ਼ੁਰੂ ਕਰ ਦਿੱਤੇ। ਸ਼੍ਰੋਮਣੀ ਅਕਾਲੀ ਦਲ ਦੇ ਟਵਿਟਰ ਹੈਂਡਲ ਤੋਂ ਟਵੀਟ ਕੀਤਾ ਗਿਆ, “ਕਾਂਗਰਸੀ ਆਗੂ ਕਹਿੰਦੇ ਹਨ ਕਿ ਉਹ ਆਮ ਆਦਮੀ ਨਾਲ ਖੜ੍ਹੇ ਹਨ, ਪਰ ਚੰਡੀਗੜ੍ਹ ਤੋਂ ਦਿੱਲੀ 250 ਕਿੱਲੋਮੀਟਰ ਦਾ ਸਫ਼ਰ ਤੈਅ ਕਰਨ ਲਈ ਉਹ ਪ੍ਰਾਈਵੈੱਟ ਜੈੱਟ ਲੈਂਦੇ ਹਨ। ਕੀ ਉਥੇ ਜਾਣ ਲਈ ਆਮ ਫਲਾਈਟ ਨਹੀਂ ਹੈ ਜਾਂ ਕਾਰ ਵੀ ਤਾਂ ਇਸਤੇਮਾਲ ਕਰ ਸਕਦੇ ਸੀ। ਕੀ ਇਹ ਗਾਂਧੀ ਪਰਿਵਾਰ ਦੇ ਦਿੱਲੀ ਦਰਬਾਰ ਵਿੱਚ ਛਾਤੀ ਠੋਕਣ ਲਈ ਪ੍ਰੋਪੇਗੰਡਾ ਕੀਤਾ ਜਾ ਰਿਹਾ ਹੈ।”
After saying that they stand with the common man, INC leaders take private jets to travel just 250 KMs from Chandigarh to Delhi. Are there no normal flights or cars that can be used? Or is this chest thumping aimed at propagation of Gandhi family’s Delhi Darbar culture? https://t.co/tw8kglW5K1
— Shiromani Akali Dal (@Akali_Dal_) September 21, 2021
ਅਕਾਲੀ ਦਲ ਨੇ ਹਵਾਈ ਉਡਾਣਾਂ ‘ਤੇ 121 ਕਰੋੜ ਖਰਚੇ- ਕਾਂਗਰਸ
ਅਕਾਲੀ ਦਲ ਦੇ ਹਮਲਿਆਂ ਦਾ ਕਾਂਗਰਸ ਵਿਧਾਇਕ ਕੁਲਦੀਪ ਵੈਦ ਨੇ ਜਵਾਬ ਦਿੱਤਾ। ਉਹਨਾਂ ਕਿਹਾ ਕਿ ਅਕਾਲੀ ਦਲ ਨੂੰ ਚੰਨੀ ਦੇ ਦੌਰੇ ‘ਤੇ ਸਵਾਲ ਚੁੱਕਣ ਦਾ ਕੋਈ ਹੱਕ ਨਹੀਂ ਹੈ, ਕਿਉਂਕਿ ਪਿਛਲੀ ਸਰਕਾਰ ਦੌਰਾਨ ਉਹ ਹਵਾਈ ਉਡਾਣਾਂ ‘ਤੇ 121 ਕਰੋੜ ਰੁਪਏ ਖਰਚ ਕਰ ਚੁੱਕਿਆ ਹੈ।
CM ਨੇ 24 ਘੰਟਿਆਂ ‘ਚ ਯੂ-ਟਰਨ ਲਿਆ- ‘ਆਪ’
ਆਮ ਆਦਮੀ ਪਾਰਟੀ ਨੇ ਵੀ ਮੁੱਖ ਮੰਤਰੀ ਵੱਲੋਂ ਚਾਰਟਰਡ ਪਲੇਨ ਵਿੱਚ ਸਫਰ ਕਰਨ ਦੇ ਫੈਸਲੇ ‘ਤੇ ਸਵਾਲ ਚੁੱਕੇ। ‘ਆਪ’ ਨੇ ਕਿਹਾ ਕਿ ਚੰਨੀ ਤਾਂ ਸਮਾਜ ਸੁਧਾਰ ਦੀਆਂ ਵੱਡੀਆਂ ਗੱਲਾਂ ਕਰ ਰਹੇ ਸਨ, ਉਹਨਾਂ ਨੇ 24 ਘੰਟਿਆਂ ਅੰਦਰ ਹੀ ਯੂ-ਟਰਨ ਮਾਰ ਲਿਆ। ਉਹਨਾਂ ਕਿਹਾ ਕਿ ਇਸ ਨਾਲ ਕਾਂਗਰਸੀਆਂ ਦੇ ਮਨਸੂਬੇ ਅਤੇ ਕਲਚਰ ਦਾ ਪਤਾ ਲੱਗਦਾ ਹੈ।
‘ਆਪ’ ਨੂੰ ਕਾਂਗਰਸ ਨੇ ਇਸ ਲਹਿਜ਼ੇ ‘ਚ ਦਿੱਤਾ ਜਵਾਬ
ਆਮ ਆਦਮੀ ਪਾਰਟੀ ਦੇ ਇਲਜ਼ਾਮਾਂ ਦਾ ਵੀ ਕਾਂਗਰਸ ਪਾਰਟੀ ਨੇ ਜਵਾਬ ਦਿੱਤਾ। ਕਾਂਗਰਸ ਨੇ ਕਿਹਾ ਕਿ ਦਿੱਲੀ ਦੇ ਸੀਐੱਮ ਅਰਵਿੰਦ ਕੇਜਰੀਵਾਲ ਵਜੋਂ ਪ੍ਰਾਈਵੇਟ ਜੈੱਟ ਦਾ ਇਸਤੇਮਾਲ ਕਰਦੇ ਹਨ, ਉਦੋਂ ‘ਆਪ’ ਦੇ ਨੁਮਾਇੰਦੇ ਚੁੱਪ ਕਿਉਂ ਰਹਿੰਦੇ ਹਨ। ਹਾਲਾਂਕਿ ‘ਆਪ’ ਆਗੂ ਹਰਪਾਲ ਚੀਮਾ ਨੇ ਦਾਅਵਾ ਕੀਤਾ ਕਿ ਕੇਜਰੀਵਾਲ ਆਪਣੇ ਲਗਭਗ ਸਾਰੇ ਹਵਾਈ ਸਫਰ ਆਮ ਫਲਾਈਟਾਂ ਰਾਹੀਂ ਹੀ ਤੈਅ ਕਰਦੇ ਹਨ।
