ਬਿਓਰੋ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਇਸ ਵਾਰ ਅੰਮ੍ਰਿਤਸਰ ਈਸਟ ਸੀਟ ਸਭ ਤੋਂ ਹੌਟ ਸੀਟ ਬਣੀ ਹੋਈ ਹੈ। ਇੱਕ ਪਾਸੇ ਨਵਜੋਤ ਸਿੰਘ ਸਿੱਧੂ ਅਤੇ ਦੂਜੇ ਪਾਸੇ ਬਿਕਰਮ ਸਿੰਘ ਮਜੀਠੀਆ…ਦੋਵੇਂ ਦਿੱਗਜਾਂ ਵਿਚਕਾਰ ਜ਼ਬਰਦਸਤ ਲੜਾਈ ਵੇਖਣ ਨੂੰ ਮਿਲ ਰਹੀ ਹੈ। ਇਸ ਵਿਚਾਲੇ ਹੁਣ ਕੁਝ ਤਸਵੀਰਾਂ ਆਈਆਂ ਹਨ, ਜੋ ਨਵਜੋਤ ਸਿੰਘ ਸਿੱਧੂ ਨੂੰ ਪਰੇਸ਼ਾਨ ਕਰਨ ਵਾਲੀਆਂ ਹਨ।
ਦਰਅਸਲ, ਅੰਮ੍ਰਿਤਸਰ ਦੇ ਤਿਲਕ ਨਗਰ ਇਲਾਕੇ ਵਿੱਚ ਸਿੱਧੂ ਕਿਸੇ ਕਾਂਗਰਸੀ ਵਰਕਰ ਦੇ ਘਰ ਗਏ, ਜਿਥੇ ਉਹਨਾਂ ਲਈ ਦਰਵਾਜ਼ਾ ਨਹੀਂ ਖੋਲ੍ਹਿਆ ਗਿਆ। ਸਿੱਧੂ ਇਥੇ ਡੌਰ ਟੂ ਡੌਰ ਪ੍ਰਚਾਰ ਕਰਨ ਲਈ ਪਹੁੰਚੇ ਸਨ। ਤੰਗ ਗਲੀਆਂ ਹੋਣ ਦੇ ਚਲਦੇ ਉਥੇ ਗੱਡੀ ਨਹੀਂ ਜਾ ਸਕੀ, ਜਿਸਦੇ ਚਲਦੇ ਸਿੱਧੂ ਪੈਦਲ ਹੀ ਅੱਗੇ ਨਿਕਲ ਗਏ। ਉਥੇ ਇੱਕ ਕਾਂਗਰਸੀ ਵਰਕਰ ਦੇ ਘਰ ਮੀਟਿੰਗ ਸੀ, ਜਿਥੇ ਪਹਿਲਾਂ ਸਿੱਧੂ ਦੇ ਨਾਲ ਪਹੁੰਚੇ ਸਮਰਥਕਾਂ ਨੇ ਦਰਵਾਜ਼ਾ ਖੜਕਾਇਆ, ਪਰ ਕਿਸੇ ਨੇ ਦਰਵਾਜ਼ਾ ਨਹੀਂ ਖੋਲ੍ਹਿਆ।
ਜਿਸ ਘਰ ਦਾ ਦਰਵਾਜ਼ਾ ਨਹੀਂ ਖੋਲ੍ਹਿਆ ਗਿਆ ਸੀ, ਉਹ ਅਭਿਸ਼ੇਕ ਸ਼ੈਂਕੀ ਦਾ ਘਰ ਸੀ। ਸ਼ੈਂਕੀ ਕਿਸੇ ਵਕਤ ਹਮੇਸ਼ਾ ਨਵਜੋਤ ਕੌਰ ਸਿੱਧੂ ਦੇ ਨਾਲ ਚਲਦੇ ਸਨ। ਪਰ ਉਹਨਾਂ ਨੇ ਹੁਣ ਸਿੱਧੂ ਜੋੜੇ ਤੋਂ ਦੂਰੀ ਬਣਾ ਲਈ ਹੈ।
ਮਜੀਠੀਆ ਪਹੁੰਚੇ, ਤਾਂ ਸਵਾਗਤ ਹੋਇਆ
ਕਾਂਗਰਸੀ ਵਰਕਰ ਦੀ ਨਰਾਜ਼ਗੀ ਦਾ ਪਤਾ ਚਲਦੇ ਹੀ ਮਜੀਠੀਆ ਨੇ ਵੀ ਮੌਕੇ ਦਾ ਫ਼ਾਇਦਾ ਚੁੱਕਣ ਵਿੱਚ ਦੇਰ ਨਹੀਂ ਲਗਾਈ। ਸ਼ਨੀਵਾਰ ਨੂੰ ਉਥੇ ਬਿਕਰਮ ਮਜੀਠੀਆ ਪਹੁੰਚੇ, ਤਾਂ ਫੁੱਲਾਂ ਦੇ ਨਾਲ ਉਹਨਾਂ ਦਾ ਸਵਾਗਤ ਕੀਤਾ ਗਿਆ। ਮਜੀਠੀਆ ਨੇ ਕਿਹਾ ਕਿ ਜਿਸ ਵਿਅਕਤੀ ਨੇ ਆਪਣੇ ਹੀ ਲੋਕਾਂ ਨੂੰ 5 ਸਾਲਾਂ ਤੱਕ ਉਹਨਾਂ ਦਾ ਹਾਲ ਨਹੀਂ ਪੁੱਛਿਆ, ਉਹ ਜਨਤਾ ਦਾ ਹਾਲ ਕੀ ਪੁੱਛਣਗੇ।
ਇਹ ਹੈ ਨਰਾਜ਼ਗੀ ਦੀ ਵਜ੍ਹਾ !
ਕਾਂਗਰਸੀ ਵਰਕਰ ਰਹੇ ਸ਼ੈਂਕੀ ਨੇ ਕਿਹਾ ਕਿ 5 ਸਾਲ ਸਿੱਧੂ ਇਥੋਂ ਵਿਧਾਇਕ ਰਹੇ, ਪਰ ਉਹਨਾਂ ਦੇ ਇਲਾਕੇ ਵਿੱਚ ਆ ਕੇ ਉਹਨਾਂ ਨੇ ਇੱਕ ਵਾਰ ਵੀ ਲੋਕਾਂ ਦਾ ਹਾਲ ਨਹੀਂ ਪੁੱਛਿਆ। ਇਥੇ ਕੋਈ ਵਿਕਾਸ ਨਹੀਂ ਹੋਇਆ। ਜਦੋਂ ਲੋਕ ਉਹਨਾਂ ਦੇ ਘਰ ਆਪਣੀ ਮੁਸ਼ਕਿਲ ਲੈ ਕੇ ਜਾਂਦੇ ਸਨ, ਤਾਂ ਉਹਨਾਂ ਦੇ ਘਰਾਂ ਦਾ ਦਰਵਾਜ਼ਾ ਬੰਦ ਮਿਲਦਾ ਸੀ। ਸ਼ੈਂਕੀ ਨੇ ਕਿਹਾ ਕਿ ਇਹੀ ਵਜ੍ਹਾ ਹੈ ਕਿ ਜਦੋਂ ਸਿੱਧੂ ਇਥੇ ਆਏ, ਤਾਂ ਲੋਕਾਂ ਨੇ ਉਹਨਾਂ ਦੇ ਲਈ ਘਰਾਂ ਦੇ ਦਰਵਾਜ਼ੇ ਬੰਦ ਕਰ ਲਏ।
