ਚੰਡੀਗੜ੍ਹ। ਪੰਜਾਬ ਵਿੱਚ ਵਿਧਾਨ ਸਭਾ ਚੋਣਾਂ ਦੀਆਂ ਤਿਆਰੀਆਂ ਤੇਜ਼ ਹੋ ਗਈਆਂ ਹਨ। ਇਸ ਵਾਰ 117 ਵਿਧਾਨ ਸਭਾ ਸੀਟਾਂ ‘ਤੇ 2.09 ਕਰੋੜ ਵੋਟਰ ਵੋਟ ਭੁਗਤਾਉਣਗੇ, ਜਿਹਨਾਂ ਵਿੱਚ 99 ਲੱਖ ਮਹਿਲਾ ਵੋਟਰ ਹਨ। ਇਸ ਵਾਰ 24,689 ਬੂਥ ਬਣਾਏ ਗਏ ਹਨ। ਪਿਛਲੀ ਵਾਰ ਦੇ ਮੁਕਾਬਲੇ ਕਰੀਬ 1400 ਬੂਥ ਵਧਾਏ ਗਏ ਹਨ, ਤਾਂ ਜੋ ਕੋਵਿਡ ਪ੍ਰੋਟੋਕੋਲ ਦੀ ਪਾਲਣਾ ਹੋ ਸਕੇ। ਸੋਮਵਾਰ ਨੂੰ ਪੰਜਾਬ ਦੇ ਮੁੱਖ ਚੋਣ ਅਧਿਕਾਰੀ ਡਾ. ਐੱਸ. ਕਰੁਣਾ ਰਾਜੂ ਨੇ ਇਹ ਜਾਣਕਾਰੀ ਦਿੱਤੀ।
ਕੋਵਿਡ ਪ੍ਰੋਟੋਕਾਲ ਦੇ ਤਹਿਤ ਹੋਣਗੀਆਂ ਚੋਣਾਂ
ਚੋਣਾਂ ਦੌਰਾਨ ਕੋਵਿਡ ਪ੍ਰੋਟੋਕੋਲ ਦਾ ਪੂਰਾ ਖਿਆਲ ਰੱਖਿਆ ਜਾਵੇਗਾ। ਵੋਟਿੰਗ ਕੇਂਦਰਾਂ ‘ਤੇ ਸਾਰੇ ਵੋਟਰਾਂ ਦੀ ਸਕ੍ਰੀਨਿੰਗ ਹੋਵੇਗੀ। ਕਿਸੇ ਵੋਟਰ ਦਾ ਤਾਪਮਾਨ ਵੱਧ ਆਇਆ, ਤਾਂ ਉਸ ਨੂੰ ਆਈਸੋਲੇਸ਼ਨ ਰੂਮ ‘ਚ ਰੱਖਿਆ ਜਾਵੇਗਾ। ਹਾਲਾਂਕਿ ਉਹ ਅਖੀਰ ਵਿੱਚ ਵੋਟ ਭੁਗਤਾ ਸਕਣਗੇ। ਕੋਰੋਨਾ ਪਾਜੀਟਿਵ ਮਰੀਜ਼ ਵੀ ਵੋਟਿੰਗ ਕਰ ਸਕਣਗੇ। ਉਹਨਾਂ ਨੂੰ ਬੈਲੇਟ ਪੇਪਰ ਮੁਹੱਈਆ ਕਰਵਾਇਆ ਜਾਵੇਗਾ। ਉਹਨਾਂ ਦੀ ਵੋਟ ਲੈਣ ਲਈ ਚੋਣ ਕਮਿਸ਼ਨ ਦੀ ਟੀਮ PPE ਕਿੱਟ ਪਾ ਕੇ ਉਹਨਾਂ ਦੇ ਘਰ ਜਾਵੇਗੀ। ਇਸਦੇ ਨਾਲ ਹੀ ਪੋਲਿੰਗ ਸਟਾਫ ਲਈ ਵੈਕਸੀਨ ਦੀਆਂ ਦੋਵੇਂ ਡੋਜ਼ ਜ਼ਰੂਰੀ ਹੋਣਗੀਆਂ।
700 ਵਾਧੂ ਕੰਪਨੀਆਂ ਦੀ ਹੋਵੇਗੀ ਲੋੜ
ਮੁੱਖ ਚੋਣ ਅਧਿਕਾਰੀ ਨੇ ਦੱਸਿਆ ਕਿ ਪੰਜਾਬ ਵਿੱਚ ਚੋਣਾਂ ਦੌਰਾਨ ਸਖਤ ਸੁਰੱਖਿਆ ਰਹੇਗੀ। ਉਹਨਾਂ ਮੁਤਾਬਕ, ਪੰਜਾਬ ਭਰ ਲਈ ਕਰੀਬ 700 ਕੰਪਨੀਆਂ ਦੀ ਮੰਗ ਕੀਤੀ ਜਾਵੇਗੀ। ਡਾ. ਰਾਜੂ ਨੇ ਕਿਹਾ ਕਿ ਇਸ ਬਾਰੇ ਲਾਅ ਐਂਡ ਆਰਡਰ ਦੇ ਨੋਡਲ ਅਫਸਰ ਨਾਲ ਮੀਟਿੰਗ ਕਰਕੇ ਆਖਰੀ ਫੈਸਲਾ ਲਿਆ ਜਾਵੇਗਾ।
ਹਥਿਆਰ ਜਮ੍ਹਾਂ ਕਰਵਾਉਣ ਦੀ ਪ੍ਰਕਿਰਿਆ ਸ਼ੁਰੂ
ਪੰਜਾਬ ਵਿੱਚ 3 ਲੱਖ 8 ਹਜਾਰ ਲਾਇਸੈਂਸੀ ਹਥਿਆਰ ਹਨ। ਡਾ. ਰਾਜੂ ਨੇ ਕਿਹਾ ਕਿ ਇਹਨਾਂ ਵਿੱਚੋਂ ਕਰੀਬ 95% ਹਥਿਆਰ ਜਮ੍ਹਾਂ ਕਰਵਾਏ ਜਾਣਗੇ, ਜਿਸਦੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਗਈ ਹੈ। ਬਾਕੀ 5% ਸਕਿਓਰਿਟੀ ਸਟਾਫ ਅਤੇ ਜ਼ਰੂਰੀ ਕੰਮ ਦੇ ਕਾਰਨ ਜਮ੍ਹਾਂ ਨਹੀਂ ਹੋ ਸਕਣਗੇ।
ਗੁਆਂਢੀ ਸੂਬਿਆਂ ਦੇ ਬਾਰਡਰ ‘ਤੇ ਹੋਵੇਗੀ ਸਖਤੀ
ਡਾ. ਰਾਜੂ ਨੇ ਕਿਹਾ ਕਿ ਗੁਆਂਢੀ ਸੂਬਿਆਂ ਦੇ ਬਾਰਡਰ ‘ਤੇ ਸਖਤੀ ਕੀਤੀ ਜਾਵੇਗੀ। ਬਾਰਡਰ ਤੋਂ ਸ਼ਰਾਬ ਅਤੇ ਕ੍ਰਿਮੀਨਲ ਦੇ ਆਉਣ-ਜਾਣ ਦੀ ਸੰਭਾਵਨਾ ਬਣੀ ਰਹਿੰਦੀ ਹੈ। ਇਸ ਲਈ ਗੁਆਂਢੀ ਸੂਬਿਆਂ ਦੇ ਬਾਰਡਰ ਜਿਲ੍ਹਿਆਂ ਨਾਲ ਮੀਟਿੰਗ ਕੀਤੀ ਜਾਵੇਗੀ। ਪੰਜਾਬ ਦੇ ਡਵੀਜ਼ਨਲ ਕਮਿਸ਼ਨਰਾਂ ਨੂੰ ਇਹ ਜਿੰਮੇਵਾਰੀ ਸੌਂਪੀ ਗਈ ਹੈ।
ਬੈਂਕ ਟ੍ਰਾਂਜੈਕਸ਼ਨ ‘ਤੇ ਰਹੇਗੀ ਨਜ਼ਰ
ਚੋਣਾਂ ਦੌਰਾਨ ਬੈਂਕ ਦੀ ਟ੍ਰਾਂਜੈਕਸ਼ਨ ‘ਤੇ ਨਜ਼ਰ ਰਹੇਗੀ। ਡਾ. ਰਾਜੂ ਨੇ ਕਿਹਾ ਕਿ ਜਿਸਦੇ ਅਕਾਊਂਟ ਵਿੱਚ ਪਿਛਲੇ ਕੁਝ ਸਾਲਾਂ ‘ਚ ਜਿਆਦਾ ਲੈਣ-ਦੇਣ ਨਹੀਂ ਹੋਇਆ, ਪਰ ਅਚਾਨਕ ਇਹ ਵਧਿਆ ਤਾਂ ਇਸਦੀ ਜਾਂਚ ਕੀਤੀ ਜਾਵੇਗੀ। ਇਸਦੇ ਲਈ ਇਨਕਮ ਟੈਕਸ, ਐਕਸਾਈਜ਼, GST, ਬੈਂਕ ਅਤੇ NCB ਦੇ ਨਾਲ ਇਨਕਮ ਟੈਕਸ ਦਾ ਇੰਟੈਲੀਜੈਂਸ ਵਿੰਗ ਵੀ ਕੰਮ ਕਰੇਗਾ।
