ਬਿਓਰੋ। ਕੈਪਟਨ ਅਮਰਿੰਦਰ ਸਿੰਘ ਪੰਜਾਬ ਦੀ ਸਿਆਸਤ ਦਾ ਉਹ ਚਿਹਰਾ ਹਨ, ਜਿਹਨਾਂ ਦੇ ਦਮ ‘ਤੇ ਕਾਂਗਰਸ ਨੇ ਪੰਜਾਬ ਵਿੱਚ ਪਿਛਲੀ ਵਾਰ ਸੱਤਾ ‘ਚ ਧਮਾਕੇਦਾਰ ਵਾਪਸੀ ਕੀਤੀ ਸੀ। ਪਰ ਸੱਤਾ ਵਿੱਚ ਰਹਿੰਦਿਆਂ ਉਹਨਾਂ ‘ਤੇ ਬੀਜੇਪੀ ਅਤੇ ਅਕਾਲੀ ਦਲ ਨਾਲ ਮਿਲੀਭੁਗਤ ਦੇ ਇਲਜਾਮ ਲੱਗਣ ਲੱਗੇ, ਜਿਸਦੀ ਸ਼ੁਰੂਆਤ ਸਭ ਤੋਂ ਪਹਿਲਾਂ ਨਵਜੋਤ ਸਿੰਘ ਸਿੱਧੂ ਨੇ ਕੀਤੀ।
2019 ਦੀਆਂ ਲੋਕ ਸਭਾ ਚੋਣਾਂ ਅਤੇ ਉਸ ਦੌਰਾਨ ਬਠਿੰਡਾ ਵਿੱਚ ਹੋਈ ਪ੍ਰਿਅੰਕਾ ਗਾਂਧੀ ਦੀ ਰੈਲੀ ਤਾਂ ਤੁਹਾਨੂੰ ਯਾਦ ਹੀ ਹੋਵੇਗੀ, ਜਿਸ ਵਿੱਚ ਸਿੱਧੂ ਨੇ ਪ੍ਰਿਅੰਕਾ ਗਾਂਧੀ ਅਤੇ ਖੁਦ ਕੈਪਟਨ ਅਮਰਿੰਦਰ ਸਿੰਘ ਦੇ ਸਾਹਮਣੇ ਸ਼ਰੇਆਮ ਮੰਚ ‘ਤੇ ਕੈਪਟਨ ਅਤੇ ਅਕਾਲੀ ਦਲ-ਬੀਜੇਪੀ ਵਿਚਕਾਰ 75-25 ਦੀ ਪਾਰਟਨਰਸ਼ਿਪ ਦਾ ਇਲਜਾਮ ਲਗਾਇਆ ਸੀ। ਉਸੇ ਦੇ ਬਾਅਦ ਤੋਂ ਕਾਂਗਰਸ ਅੰਦਰ ਕੈਪਟਨ ਖਿਲਾਫ਼ ਧੜਾ ਬਣਨਾ ਸ਼ੁਰੂ ਹੋ ਗਿਆ, ਜੋ 5 ਮਹੀਨੇ ਪਹਿਲਾਂ ਉਹਨਾਂ ਨੂੰ ਸੀਐੱਮ ਦੀ ਕੁਰਸੀ ਤੋਂ ਹਟਾਉਣ ਵਿੱਚ ਵੀ ਕਾਮਯਾਬ ਰਿਹਾ। ਉਸ ਵਕਤ ਤਾਂ ਪ੍ਰਿਅੰਕਾ ਗਾਂਧੀ ਨੇ ਕੁਝ ਨਹੀਂ ਕਿਹਾ, ਪਰ ਅੱਜ ਜਦੋਂ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨਹੀਂ, ਬਲਕਿ ਸੀਐੱਮ ਚਰਨਜੀਤ ਸਿੰਘ ਚੰਨੀ ਹਨ ਅਤੇ ਕੈਪਟਨ ਬੀਜੇਪੀ ਨਾਲ ਗਠਜੋੜ ਵਿੱਚ ਚੋਣਾਂ ਲੜ ਰਹੇ ਹਨ, ਅਜਿਹੇ ਵਿੱਚ ਉਹਨਾਂ ਦਾ ਕੈਪਟਨ ਖਿਲਾਫ਼ ਹਮਲਾਵਰ ਰੁਖ ਵੀ ਵੇਖਣ ਨੂੰ ਮਿਲਿਆ।
ਕਾਂਗਰਸ ਪਾਰਟੀ ਲਈ ਪ੍ਰਚਾਰ ਕਰਨ ਹਿੱਤ ਐਤਵਾਰ ਨੂੰ ਪੰਜਾਬ ਪਹੁੰਚੇ ਪ੍ਰਿਅੰਕਾ ਗਾਂਧੀ ਨੇ ਕੋਟਕਪੂਰਾ ਅਤੇ ਧੂਰੀ ਵਿੱਚ ਚੋਣ ਰੈਲੀਆਂ ਨੂੰ ਸੰਬੋਧਿਤ ਕੀਤਾ। ਇਸ ਦੌਰਾਨ ਪ੍ਰਿਅੰਕਾ ਨੇ ਪਹਿਲੀ ਵਾਰ ਸ਼ਰੇਆਮ ਕੈਪਟਨ ਅਮਰਿੰਦਰ ਸਿੰਘ ਦੀ ਅਗਵਾਈ ਵਾਲੀ ਸਰਕਾਰ ‘ਤੇੇ ਸਵਾਲ ਚੁੱਕੇ ਅਤੇ ਕਿਹਾ ਕਿ ਉਹਨਾਂ ਨੂੰ ਮਜਬੂਰੀ ਵਿੱਚ ਸਰਕਾਰ ਬਦਲਣੀ ਪਈ।
‘ਦਿੱਲੀ ਤੋਂ BJP ਚਲਾ ਰਹੀ ਸੀ ਕਾਂਗਰਸ ਦੀ ਸਰਕਾਰ’
ਕੈਪਟਨ ਅਮਰਿੰਦਰ ਸਿੰਘ ਦਾ ਨਾਂਅ ਲਏ ਬਿਨ੍ਹਾਂ ਪ੍ਰਿਅੰਕਾ ਗਾਂਧੀ ਨੇ ਕਿਹਾ, “ਅਸੀਂ ਸਮਝ ਗਏ ਸੀ ਕਿ ਕੁਝ ਗਲਤ ਹੋ ਰਿਹਾ ਸੀ। ਸਾਡੀ ਪੰਜਾਬ ਦੀ ਕਾਂਗਰਸ ਸਰਕਾਰ ਦਿੱਲੀ ਤੋਂ ਚੱਲਣ ਲੱਗ ਪਈ ਸੀ। ਦਿੱਲੀ ਤੋਂ ਵੀ ਸਰਕਾਰ ਨੂੰ ਕਾਂਗਰਸ ਨਹੀਂ, ਬਲਕਿ ਬੀਜੇਪੀ ਚਲਾ ਰਹੀ ਸੀ। ਜਿਹੜੀ ਮਿਲੀਭੁਗਤ ਚੱਲ ਰਹੀ ਸੀ, ਉਹ ਖੁੱਲ੍ਹ ਕੇ ਸਾਹਮਣੇ ਆ ਗਈ ਸੀ। ਇਸ ਲਈ ਸਰਕਾਰ ਬਦਲਣੀ ਪਈ।”
ਚਰਨਜੀਤ ਚੰਨੀ ਦੀਆਂ ਤਾਰੀਫ਼ਾਂ ਦੇ ਬੰਨ੍ਹੇ ਪੁੱਲ
ਪ੍ਰਿਅੰਕਾ ਨੇ ਕਿਹਾ ਕਿ ਜੋ ਨੁਕਸਾਨ ਕਾਂਗਰਸ ਨੂੰ ਪਿਛਲੇ ਸਾਢੇ 4 ਸਾਲਾਂ ਵਿੱਚ ਹੋਇਆ, ਉਸ ਨੂੰ ਠੀਕ ਕਰਨ ਦੀ ਕੋਸ਼ਿਸ਼ ਸੀ ਕਿ ਸਾਨੂੰ ਚੰਨੀ ਮਿਲ ਗਏ। ਉਹਨਾਂ ਕਿਹਾ, “ਚੰਨੀ ਗਰੀਬ ਘਰ ਦੇ ਮੁੱਖ ਮੰਤਰੀ ਹਨ, ਜੋ ਤੁਹਾਡੇ ਵਿੱਚੋ ਨਿਕਲੇ ਸਨ, ਤੁਹਾਡਾ ਦੁੱਖ-ਦਰਦ ਸਮਝਦੇ ਹਨ। ਉਹਨਾਂ ਨੇ 100-150 ਦਿਨਾਂ ਅੰਦਰ ਅਜਿਹੇ ਕੰਮ ਕਰ ਵਿਖਾਏ, ਜੋ ਕੋਈ 5 ਸਾਲਾਂ ਵਿੱਚ ਨਹੀਂ ਵੀ ਕਰ ਸਕਦਾ।”
‘ਕੇਜਰੀਵਾਲ ਦਾ ਦਿੱਲੀ ਮਾਡਲ ਸਿਰਫ਼ ਇਸ਼ਤਿਹਾਰਾਂ ‘ਚ’
ਆਮ ਆਦਮੀ ਪਾਰਟੀ ਅਤੇ ‘ਆਪ’ ਕਨਵੀਨਰ ਅਰਵਿੰਦ ਕੇਜਰੀਵਾਲ ਵੀ ਪ੍ਰਿਅੰਕਾ ਗਾਂਧੀ ਦੇ ਨਿਸ਼ਾਨੇ ‘ਤੇ ਰਹੇ। ਪ੍ਰਿਅੰਕਾ ਨੇ ਕੇਜਰੀਵਾਲ ਦੇ ਦਿੱਲੀ ਮਾਡਲ ਨੂੰ ਝੂਠਾ ਕਰਾਰ ਦਿੱਤਾ। ਉਹਨਾਂ ਕਿਹਾ, “ਇਥੇ ਆ ਕੇ ਸਾਰੇ ਕਹਿੰਦੇ ਹਨ ਕਿ ਦਿੱਲੀ ਮਾਡਲ ਵੇਖ ਕੇ ਵੋਟ ਪਾਓ। ਪਰ ਤੁਸੀਂ ਨਾ ਭੁੱਲੋ ਕਿ 2014 ਵਿੱਚ ਜਦੋਂ ਮੋਦੀ ਸਰਕਾਰ ਸੱਤਾ ਵਿੱਚ ਆਈ ਸੀ, ਤਾਂ ਉਸ ਵਕਤ ਵੀ ਗੁਜਰਾਤ ਮਾਡਲ ਦੇ ਅਧਾਰ ‘ਤੇ ਹੀ ਵੋਟਾਂ ਮੰਗੀਆਂ ਗਈਆਂ ਸਨ। ਬਾਅਦ ਵਿੱਚ ਪਤਾ ਲੱਗਿਆ ਕਿ ਗੁਜਰਾਤ ਮਾਡਲ ਸਿਰਫ਼ ਇਸ਼ਤਿਹਾਰਾਂ ਵਿੱਚ ਹੀ ਸੀ। ਠੀਕ ਇਸੇ ਤਰ੍ਹਾਂ ਦਿੱਲੀ ਮਾਡਲ ਵੀ ਇਸ਼ਤਿਹਾਰਾਂ ਵਿੱਚ ਹੀ ਹੈ। ਦੋਵਾਂ ਵਿੱਚ ਕੋਈ ਫਰਕ ਨਹੀਂ ਹੈ।” ਪ੍ਰਿਅੰਕਾ ਗਾਂਧੀ ਨੇ ਦਾਅਵਾ ਕੀਤਾ ਕਿ ਆਮ ਆਦਮੀ ਪਾਰਟੀ ਵੀ RSS ਤੋਂ ਹੀ ਨਿਕਲੀ ਹੈ।
‘ਰਾਹੁਲ ਤੇ ਮੈਨੂੰ ਸਿਰਫ਼ ਮੌਤ ਜੁਦਾ ਕਰ ਸਕਦੀ ਹੈ’
ਪ੍ਰਿਅੰਕਾ ਗਾਂਧੀ ਨੂੰ ਇਸ ਦੌਰਾਨ ਉਹਨਾਂ ਦੇ ਭਰਾ ਰਾਹੁਲ ਗਾਂਧੀ ਅਤੇ ਉਹਨਾਂ ਨਾਲ ਰਿਸ਼ਤੇ ਬਾਰੇ ਵੀ ਸਵਾਲ ਕੀਤਾ ਗਿਆ, ਜਿਸਦਾ ਪ੍ਰਿਅੰਕਾ ਨੇ ਬੇਹੱਦ ਹੀ ਖੂਬਸੂਰਤ ਜਵਾਬ ਦਿੱਤਾ। ਉਹਨਾਂ ਕਿਹਾ, “ਮੈਂ ਆਪਣੇ ਭਰਾ ਰਾਹੁਲ ਗਾਂਧੀ ਲਈ ਜਾਨ ਦੇ ਸਕਦੀ ਹਾਂ ਅਤੇ ਉਹ ਵੀ ਮੇਰੇ ਲਈ ਅਜਿਹਾ ਕਰ ਸਕਦੇ ਹਨ। ਅਸੀਂ ਦੋਵੇਂ ਭੈਣ-ਭਰਾ ਇੱਕ-ਦੂਜੇ ਨੂੰ ਪੂਰਾ ਕਰਦੇ ਹਾਂ। ਸਾਨੂੰ ਸਿਰਫ਼ ਮੌਤ ਹੀ ਜੁਦਾ ਕਰ ਸਕਦੀ ਹੈ। ਅਜਿਹਾ ਰਿਸ਼ਤਾ ਹੈ ਸਾਡਾ।”
